أكلة مجنونة مجنونة بالصور إخراج خيال

حبايبي اليوم جالسة أفكر إيش أطبخ
ودخلت بحثت في طبخاتكم الخطيرة بس لقيت وصفه وقلت تم
لقيت شي ناقص عندي
بس برضه يابنت قلت أخترعي وغامري وطلع الطعم جنان
المهم حضرت طبقين مع الحلى
المقادير:
لحم مفروم
بصل + ثوم + بهارات ( ملح + فلفل أسود + إبزار الكبسة + كركم + كمون + فلفل أحمر)
يعني بهارات من كل شي حطيت بخاري على كبسة ههه الحمدلله ماحطيت تايد مطحون المهم يعني لعبت بحسبة البهارات
5 حبات بطاطس وسط مقطعة مكعبات مقلية
قشطة تخلط مع 3 ملاعق أكل جبنة كاسات
شابورة مطحونة + سماق
خلصنا من مقادير الصنف الأول
مقادير الصنف الثاني:
كوب ونصف رز بسمتي كلاسيك منقوع بماء ساخن
( أهلي يستخدموا أكثر رز أبوسيوف الدبه أو أبوبنت ) بس أنا أفضل الخفيف ناقصين كروش
المهم لايكثر الحكي
بطاطس مقطعه مكعبات ومقليه يعني خذي بدون لا أحد يدري من اللي قليتيها في الأول
فلفل رومي مكعبات + بصل + ذرة وبازاليا اللي تجي مجمدة بأكياس لقيتها وحطيتها بالطبخة
بهارات نفس الحفلة الأولى بس تضيفي ماجي حبه
لحمة مفرومة برضه من جارتها الأكله الأولى لأنها كثرة علي اللحمه وقلت أستفيد من الباقي
الطريقة: الجزء الأول
تسوين اللحمة المفرومة على النار تعرفون هذه الطريقة
اللحمة وشوي مويه تفكفك بسرعه على النار بدل ماتخبطين وتقلبين الدنيا ويدك تتعب
وتحطين الثوم معاها لما تنشف من المويه حطي البهارات والبصل آخر شي
هذه الطريقة تشيل نكهة الزفر من اللحمه والبصل بالاخير بل ماتطفين عليها عشان مايذبل ويصير ماله معالم ولاطعم ونكهة
تحطون البطاطس بصينية وتخلطي عليها اللحم المفروم مو كله خلي شوي وتقلبيها وتكبي من فوق القشطة مع الجبنة
وترشي الشابورة المطحونة عليها وشوي من السماق وتحطيها بالفرن
طريقة الصنف الثاني:
تكشني البصل مع الزيت حتى يخدر وتحطي الفلفل الرومي والخضار الموجودة
وتقلقليها والماجي لاتخلونه كليش
وتصبي المويه عليها قليل وتحطي الرز المنقوع وتخليه على النارالين يستوي
وبعدين تاخذين صحن التقديم تحطي اللحمة المفرومة اول بعدها الرز من فوق
وتقدميها مع السلطة
والحلى مهلبية بدون فراولة الزينة أعذروني لعدم توفر الفراولة بثلاجتي
سبق ذكر وصفتها في مواضيعي
وبالعافية حبايبي إنشاءالله تسوونها وتقولون رأيكم
وهذه الصور فيها صحن مفقود السلطة
مومهم عشان أختي مسكينة اللي تتغدا معاي لو زوجي معاي كان المحمر والمشمر