ابوس رجولكم ساعدوني

1. قصتي طويله بس بختصرها واسألكم بالله تردون عليا وتحطون نفسكم بمكاني

السلام عليكم ورحمة الله وبركاته
كنت ادخل قسم العرايس هنا .. وانتقلت لقسم الحوامل .. ودحين حدخل قسم المطلقات

قصتي طويله بس بختصرها واسألكم بالله تردون عليا وتحطون نفسكم بمكاني

انا متزوجه ليا سنه عانيت مع اهل زوجي معاناه فظيعه . ام زوجي وحده متسلطه لسانها على طول سب وسخ تبغاني انا وولدها عند رجولها .. ابو زوجي مالو صوت ولا كلمه وتتحكم فيه
سكنت عندهم في نفس العماره .. ماليا حق فبيتي .. اول شي مفاتيح بيتي كلها عند امو لمن اخرج مثلا عند اهلي كل ربوع .. اكتشفت انها تنزل فبيتي تدخل مطبخي وتاخد اي غرض وتدور فشقتي .. وسكت مااتكلمت .. اخت زوجي وحده مريضه نفسيا يابنات للأسف متزوجه وعندها بنت .. من اول يوم اتزوجت فيه وهيا حاقده عليا .. فيوم جووني اخواتها اللي اصغر منها وقالولي انها دخلت بيتي في غيابي وسرقت من فساتيني واغراضي الشخصيه .. اكسسوار وعطور ومكياج واشياء تانيه .. وبكل وقاحه تقولهم دبشها معفن البدويه مالقيت عندها شي .. كنت وقتها حامل فالتامن مافضحتها ولا اشتكيتها لامها بس قولت لزوجي وطلبت منو الحل قلي قولي لابويا .. واتصلت على ابو زوجي وحكيتو وقلي ولايهمك اخدلك حقك منها ولاتخافي والموضوع بيني وبينك وماحيوصل لااحد .. ماعدى اسبوع الا قال لام زوجي .. قامت اتصلت على زوجي وانا كنت جمبو وسمعتها تسبو وتقولو اصلا انته مو رجال اللي ماعرفت تربي مرتك وخليتها تتكلم عن اختك وكلام وسخ طويل .. قام زوجي سكت .. هيا من قهرها ام زوجي خرجت من العماره وراحت فبيت بنتها .. بعدها بكم يوم ماندري الا الباب يدق وفتحنا الا ام زوجي قالتلي اجلسي قدامي بكلمك .. حكتبلكم بعض من تهزيئها ليا .. قالتلي اول شي انتي مريضه ؟ ادا مريضه اعالجك بفلوسي .. ياوسخه يايهوديه انا بنتي تسرق من بيتك ليش .. وحتى لو جات بنتي وكنست الشقه باللي فيها تسكتي وماتفتحي فمك لانك انتي اللي داخله علينا وداخله على عائلتنا .. المفروض تحمدي ربك اننا اخدناكي على جمالك وعلى تربيتك ياتربية النت .. بنتي اشرف منك ومن ابوكي ياواطيه يابنت الحرام ياشحاته يابنت الشحاته ترى ولدي دا سيد وازوجوه عشره ياتتعدلي معانا يا يابرا انتي وولدك.. وزوجي كان جالس وساكت موطي راسو ومافتح فمو بكلمه ولا دافع عني .. الا طردتنا من الشقه وطلعت انا فوق فبيت عمي اللي اهو ابو زوجي وهيا جلست فالشقه حقتنا قافله على نفسها المهم بالقوه خرجت وسبت ولعنت .. والموقف دا ماقلتو لاهلي ( والله والله يابنات انو ابويا مطوع وملتزم وحافظ القران ومعاه شهاده جامعيه من مكه في الدراسات الاسلاميه وامي متعلمه ومثقفه وانا جامعيه متخرجه بمرتبة شرف .. وولدهم معاه ثانوي وابوه مايشتغل الا بوظيفه راتبها الفين ومتشتتين وماعندهم لادين ولا اخلاق ولاتربيه وامو صوفيه ) سكت وقلت بيتي وزوجي اهم بحافظ عليهم .. ويمر كم يوم الا تجي رساله على جوال زوجي من اختو حسبي الله ونعم الوكيل فيها كاتبتلو ( انا مني بحاجة اغراض مرتك المعفنه اللي اتزوجتها انته وكانت .... وحامل والله عالم اش كمان يجي منها قدام .. وادا انا مني متربيه فمافي العن من .... اللي زي مرتك .. ويكفي انك تقفل عليها الباب وانته خارج ) متخيلين يابنات فوق ماامها قدفتني فعرضي تجي بنتها تقدفني بشرفي واني حامل وولدي جايبتو بالحرام؟؟؟؟؟؟؟؟ انا مااتحملت واغمى عليا ووداني المستشفى وقلي والله انك اشرف من الشرف وانا زوجك لو ماكنتي شريفه مااتزوجتك .. وسكت وماقولت لااهلي يعلم الله حفاظا على بيتي للمره التانيه .. وبعدها بفتره انا كنت ارتب شنطتي بروح لااهلي ابات عندهم كم يوم الا شوفت زوجي اخد جوالو ومعصب طالع لاهلو قلتلو اشبك قلي اختي انكرت انها ارسلت المسجات اللي اتهمتك فيها بشرفك ووالله لاوريها .. قومت مسكتو وترجيتو مايتخاصم معاهم وماهمنا منهم .. طنشني وطلع وبعدها نزل وانا عادي عمال اكمل ترتيب شنطتي الا الجرس يدق بقوه راح فتح الا اسمع صراخ امو دقيقتين الا فتحت عليا باب غرفة النوم تخيلو .. تقولي انتي ايش تبغي مننا ياللي فيكي وفيكي قام زوجها نزل وخرجها من غرفتي وانا خرجت من بيتي وروحت لبيت اهلي وحكيتهم الموقف دا بس .. طبعا اهلي راقيين ومحترمين ماسوو شي .. مشيت الايام لين الجمعه الي فاتت .. يوم الخميس كنا انا وزوجي بنحتفل بعيد زواجنا قولت بسويلو مفاجئه اعطيت اختو الصغيره فلوس توصي اخو زوجي يجبلنا عشا .. الا راحت لاختها اللي اكبر منها وقالتلها قامو اتفقو عليا دسو الفلوس وخربو الليله وقالو لزوجي اني وصيتهم بعشا ومفاجئه .. انا من قهري قولتلو تراهم اتفقو مع بعض يخربو علينا وزعلت .. قام زوجي خرج قلي بجيب عشا وانا عديت الليله احتفلنا على قدنا .. يوم الجمعه ماادري الا الجرس دق فتح الباب الا امو داخله علينا انا كنت بغرفة نومي وولدي عمره شهرين ونص فحضني عمال ارضعو الا مسكت علبة المناديل الخشب ورفعتها بتضربني انا بدون شعور حضنت ولدي بحميه قام زوجي بسرعه اخد منها العلبه وخرجها من الغرفه .. الا قامت تسب .. يا.... يا.... ياوسخه ياللي جايه من الخيام ونظفناكي يايهوديه يابنت اليهودي اصلا امك جايبتك بالحرام وابوكي وهابي ياحفدة شارون ياواطيه ياخسيسه ياكلبه يابنت الكلب وسب كتير انا قومت على طول قفلت الباب بالمفتاح واتصلت على ابويا قولتلو الحقني قام جاني هوا وامي وهما لسه بالطريق وهادي تضرب باب الغرفه برجولها بكل مااعاطاها ربي تقولي اخرجي من الشقه دحين ياللي فيكي وفيكي .. انا من خوفي وولدي يبكي اتصلت على ابو زوجي ابغاه يحميني لين مايجو اهلي اتصلت عليه خمسه مرات ومايرد .. فنفس اللحظه ابويا اتصل عليه قلو انزل اوقف مع بنتي شويا لين مااجي قلو تعال شيل بنتك سبب المشاكل .. طلع حسبي الله عليه شايفنتي ادق عليه ومايرد يبغى مرتو تضربني .. جا ابويا وامي وهياا لبست عبايتها تخيلو يابنات ... تسب امي تقولها ياحقيره ياحقوده يافاسده .... يلا طلقي بنتك وزوجيها واحد ........ تخيلو ابويا مطوع بدقنو واقف قدامها تقولو يااكلب ياابن الكلاب يانجس اخرج من عمارتي .. زوجي واقف ولا كلمه قالها .. وابو زوجي واقف تحت عند باب العماره وسايب مرتو تسب ابويا وامي .. اخدت شويه بس من اغراضي وخرجنا .. عند الباب تفلت علينا وقالت توو ماطهر بيتي وقالت لولدها مااكون امك ان ماطلقتك منها .. وانتي (تكلمني) انا وراكي والزمن طويل مااكون فلانه ان ماخليتك تتهني بعيشتك .. كل دا الي سار واهلي ساكتين ماوجهولها كلمه لاننا ناس متربين على الدين والاخلاق .. وابويا على الرغم من الاهانه الي جاتو هوا وامي قلي يابنتي انا معاكي واقف وزوجك لو بياخد شقه برا عن اهلو خليه ياخد وكلم زوجي وقال خلاص .. معنو مافي اب في الدنيا يسويها .. بعدها بيومين جا زوجي قال لابويا بشوف ولدي قلو ابشر قلو باخدو خمسه دقايق بس عند السياره وارجع وشرد فيه .. امي اتصلت عليه الا ردت امو على جوالو .. قالتلها السيد يتربى عند الاسياد مو عند الجزم ياجزم تفو عليكي وقفلت السماعه .. انا انجنيت على طول روحت الشرطه مع ابويا وماطل فينا يومين دخلت المستشفى اغمى عليا وبالقوه رجعلي الولد .. ابويا وامي مصدومين منو لي سوا كدا وهما واقفين معاه وفتحوله بيتنا .. للأسف انا كنت صابره سنه كامله على بلاوي يابنات اكتر من كدا عشانو وعشاني احبو .. يجي هوا يسوي كدا .. قلي بعت اهلي عشانك وانا نايم فالشارع واكتشفت انو كداب وانو كان عند اهلو .. مافي احد يتبرى من اهلو وهوا صح يحبني بس رضالي الاهانه والظلم من اهلو وحتى هوا ظلمني كتير .. يتكلم فااهلي قدامي .. يسبني .. يهينني .. وبالمقابل له ايام كتيره حلوه يعاملني فيها احسن معامله .. انسان متقلب ولد امو .. دحينا انا عند اهلي وولدي معايا وابويا بكرا بيكلمو ويقولو يطلقني بناء على قراري انا .. اسألكم بالله يابنات لو كنتو بموقفي تستمرو بحياتكم معاه ولا تطلبو الطلاق زيي .. بيئتهم فاسده كلامهم وسخ سبهم وسخ .. ابو زوجي يدخن ويسمع اغاني معنو مربي دقن .. ام زوجي لسانها اوسخ شي شفتو بحياتي مريضه نفسيا متسلطه .. اخت زوجي حقوده ماخلت احد مااتكلمت عندو عني .. زوجي مهما راح ومها رجع دولا اهلو نفس تربيتو .. ماابغى اظلم ولدي بالطلاق وبنفس الوقت ماابغى اظلمو انو يعيش في بيئه فاسده تتهم امو بالحرام . ابغى رايكم امانه عليكم
مع العلم انو عمري 26 سنه وقبليه وبنت ناس محترمين واهلي حالتهم الماديه كويسه بعكس اهل زوجي اللي اقل مننا فكل شي .