ابوي ابوي لو صد عني ما ترجيته قصة روعه

من العنوان مبين عليها روعه
كمليها قلبي

افا توقعت بلاقي حماس وتشجيع بصراحه بصراحه
ما توقعتكم كذا خذلتوني جبتولي الإحباط حرام عليكم
انا راح انزلها عشان خاطر الفاتنه الصغيره...........
أنا متأكده إن اللي بتابعها معنا راح تعجبها..............................

(( الحلقة الاولى ..))
".،؛,‘ معزتك عندي ترا مالها نوع ..و مكانتك في القلب ماحد لقاها ..و غلاك في روحي صار مزروع..حتى المشاعر ترجمت لك غلاها و الروح لو راحت لاجلك فداها‘,؛."
فرت نورة الرواية اللي كانت تقراها ..بعيد عنها و جنها مب راضيه بالنهاية او كانت تتوقع نهايه غير الي قرتها ...اف اكره الروايات اللي تكون نهايتها ماساة أأأأأأأأأأأأأأأأه تذكرت قصة "راحت روحي من محجر عيوني " الله يسامحج يا معاني ..هذي كاتبة القصه ..جتلت بطلة القصه عهود .. قالوا عنها كاتبه و مبدعه انا اعترف انها جي بس انتي يا معاني شريره ...
حطمتي حياة عهود و غير جي ذبحتيها لالالالالالالا و المصيبه ع يد منوه حبيبها و حلم عمرها مايد ... آآآآآآآآآآآآآه يا كيف عشت مع عهود قصة حياتها خطوه خطوه و كلمه و كلمه .. فرحه و فرحه حزن و حزن أي فرحه معاني ما خلت في حياتها فرحه ..
.بروح اسوي لي نص كافيه ..انا محد يعدل مزاجي و اييب راسي غير النص كافيه ..مدري ليش عهود وايد في بالي ... سبحان الله رغم انها شخصيه خياليه .. الا اني احس انها شرات حياتي مثل حياتها بس شخصيتنا مختلفه كيف كيف يا نوره ..
اووه الماي من زمان غلي شليت الغوري و جبيت الماي في الاسكانه و حطيت نص كافيه و معلقه شكر.. اخ صدقه عمور اكيد في يوم من الايام بيصيبني سكري .. هذا عمور اخوي اكبر عني بثلاث سنوات ام يعني 24 يعني انا عمري 21 اخ كبرت بسرعه الايام اتمر سرعه ..شربت شويه من النص كافيه اتذوقه اووف لسعت لساني ههه جني ياهل امطلعه لساني ..
يلست ع الكرسي الجريب مني في المطبخ .. طالعت المطبخ صغير بس حلو و مرتب ها بفضلي ..ولا عمر انسان لاهي بحياته ولا جني وحيده بين اربع جدران ما يهتم ولا يفكر عنده اخت يخاف عليها او يحاتيها ...هذا عكس ناصر اخو عهود الي في قصة معاني .. متسلط و يخاف ع اخته مب شرات عمور اخوي مالت عليه .. اخ اخ بس نصور وايد متسلط المفترض كان يوزع الحنان و الحب ل عهود الي كانت مفتقدتنه و ادوره عند مايد و غيره ..بداال ما يوزعه ل سعاد و غيرها ..
.
عهود عهود سرحت ب عهود ..ع الاقل لو كانت حياتها ماساويه بس حظها عندها اهل عايله اسره .. تذوقت ها الشي ..بس شي تناقض كيف تذوقت .. و هي مفتقده الحنان الي سارت ادوور عليه عن طريج مايد .. اخ عليك مايد ما قدرت قلب عهود ...حطمته بايدك شرات ما حطمت جسمها بسيارتك الي ما رحمتها ولا رحمت اخوها عبدالله .. بس فرق بيني و بين عهود انا ما عندي اهل .. انا من دون ام و اب .. لا ما بقص عليكم ابوي عايش بس وينه .. رفعت راسي ادوره بين جدران المطبخ
..جي هو نمله بس بس ما اقدر اطري ابوي اسمحولي الاب كلمه كبيره لو هي من اربع حروف بس معانتها عميقه و كبيره و تحمل مشاعر ابصراحه صعب الواحد يعبر عنها او يوزنها ... بس بالنسبه ل لي اجوفها سطحييه .يمكن لاني ما عرفت ولا تذوقت معناتها
.اخ حتى انت يا النص كافيه ما عدلت مزاجي .. حطيت الاستكانه ع الطاوله من غير ما اكمله و هاي اول مره يمكن ما اشرب النص كافيه كامل معقوله انا نوره الانسانه الصريحه الحيوية مسولفجيه ..راعية المقالب و الصولات و الجولات ههه الله يخلي اخوي عمور ما اجوفه الا باخر الليل تدرون متى اخر الليل عندي الساعه ثمان و اقصى حد عشر ..
ام احب الرقاد وايد ...عكس عمور سبحان الله ...مب جنا اخوان ورابين ويا بعض .. ايه الساعه ست المغرب بسوي لي عشى ..
وقفت فتحت الثلاجه ادور شي اكله ام تذكرت عهود خلاص مالي نفس اكل صكرت باب الثلاجه بقوه .. و جني منقهره بعدني من الحياة الي اتصيب بعض الناس يعيشون حياتهم هم و غم و اتكون نهايتهم ماساويه غمضت عيوني ورفعت راسي فوق اخذ نفس طويل .
نوره حبيبتي هدي عمرج ها هي الا قصه و قصه خياليه .. كنتي بتكسرين باب الثلاجه عااد منو بيصلحها لج عمور ويه الفقر .. تعال تعال ببوسك اموااحه احلى بوسه ل احلى باب ثلاجه الي ما نكسر و تحمل دفاشتي ..حسيت برجفه الجو تغير صار بارد و نحن بشهر ديسمبر احب البرد .. حتى لو كان يأذي لانه يخلينا اندور للدفأ و منو في العالم ما يدور الحنيه و الدفأ ..بها الايام البارده ..
عاد الي يسمعني يقول قاعده في الاسكيمو .. فديت راس الخيمه و بردها و حرها و مايها و بحرها و يبالها و شمسها و قمرها الي هي انا خ احسن من الاسكيمو و من ام ما بكمل .. بروح حجرتي بنخمد برقد ..بنام باجر وراي دوام تدرون شو دوامي الي فرحانه فيه ..؟؟ اقص كروت شسوي ها الي الله قدرني عليه ..اقص كروت و مواعيد للمرضى يالله بناخذ من هاي الشغله الاجر من رب العالمين .. رب العالمين !!! و كيف ارقد الحينه يعني ما بصلي العشا لا حرام ...خلاص اوني بجلب بالفراش لي ما يأذن العشى ..اوه صدق الساالفه برد برد ولا بس بالشقق جي يكون برد.. ع فكره لو انا من راس الخيمه بس ساكنه في شقه مطله ع كورنيش راس الخيمه ..مكان رهيب ..لا تستغربون ..مواطنه و من راس الخيمه و عايشه بشقه .. شسوي ها الي الله كاتبنه .. بس موقع شقتنا حلو ..
الا رهيب يا سلام .. بحر و حشرة يهال اليران و السيايير ابصراحه محد يحسدني ع هالمكان.. بس وايد احب شقتي لانها مكاني الوحيد موطني الصغنون .. لحظه بلبس زلاغي ابصراحه ما اتحمل البرد ..ام ابا كوت .. ما عندي ... اكيد شي بحجرة عمور ..طلعت من حجرتي ركض ل حجرة عمور الي كانت مجابله حجرتي .. دشيت و ياليتني ما دخلت تدرون ما في داعي اقولكم كيف اتكون حجرة الشباب الي شرات عمور .. ما اتعرفين وين اتحطين اريولج ..؟؟دخيلكم الثياب ابكل مكان .. لا لا اتلوم اوصفلكم حجرته .فضيحة .. اكرمكم الله زباله مب حجره ..المهم كوت كوت وين يا عمور ابا كوت ..
اووه ها لونه بني فاتح .. ابصراحه ما يشجع بس عشان ادفى ..لبسته حسيت بعمري غرقانه يا طولك و عرضك عمور جثه.. تف تف تف بسم الله عليك ما فيني اصمك ابعين .. راس مالي و طوايفي انت فديت بعد عمري عمور .. اموحه لبست كوته عشان ارضي ضمري
.اتاملت الكوت تبون الصراحه مب ويه عمور يشتري هالكوت .. شكله من الغالي .. يمكن ليش لاء كل شي جايز ..!!. طلعت من حجرته .. بسم الله زين ما طحت ..صج اتكربعت ..اخ زين يودت عمري شو هاا وزار عمور شو يسوي عند الباب شلته من ع الارض و فريته فوق الشبريه لو طحت الحينه و انطر راسي و طلع دم منو بسعفني بسم الله علي ...دخلت حجرتي اه مب حجره جنه جنه مب شرات حجرة عمور .. فرق السما و االارض اخر ترتيب .. و نظافه .تبون تعرفون شكلها .
. ام لونها ازرق ادري لون صبياني بس انا احبه لانه هادي ولان حجرتي مطله ع البحر فاحس اني غرفتي عاكسه لون البحر .. انزين ستاير زرقه غامقه و موزع عليها ورود زرقه فاتحه . و اللحاف نفس شكل الستاره ام حجرتي صغنونه ع قدي ..
شبريه صغنونه ع قدي بوسط حجرتي و الكبت ع الطرف ..و التسريحه مجابله الشبريه طبعا شي مسافات من بينهن بس بعد صغنونه ..و من الصوب الثاني كانت الدريشه مجابله الشبريه اووه دار راسي المهم ..عاد ع قد حالي لو كان الاثاث من الرخيص بس حلو و مريحني ..و الاهم .. . ع طول دخلت تحت البرنوص ادفى .. اتصدقون الجو مب ل هناك بارد بس انا دمي بارد ابسرعه ابرد ماشي طاقه ..حسيت بالدفى شعور حلو و احساس جميل ..
يا سلام زلاغ و كوت وين تبين نوره خ ام وين كنت صح عهود .. و عايلتها ..الظاهر ما برحم عهود هاي .. الله يعينج علي ههه خلاص ما بطريج لاني احس بثجل بعيوني شكلي رقدت خلاص .. واع واع واع يا ربي يا ربي هاصوت الياهل يا ربي انا شو سويت بحياتي عشان اطرش لي هالياهل السوري بو عيون خضر ..
الي سكن حذال شقتي و كل يوم يصيح و يزعجني ابا انام حشره الله يعين اهله ..اوف حسبي الله ع ابليسك كنت برقد .. طيرت الرقاد من عيوني طارت حمامة فواد ابوك.. استغفر الله استغفر الله حطيت ايدي ع حلجي اسكت ها الحلج الي يطلع رمسات و دعاوي ع الفاضي ..
. ليش اطري الناس سامحني يا رب .. خلاص بكفر عن الي قلته و بسوي خير .. تدرون شو .. برتب حجرة عمور ...حرام .. اذا انا ما اشفقت عليه بتم جي .. مزبله اوه ضااع الاجر استغفر الله .. قمت من مكاني .. شو هالياهل النحيس يوم طار الرقاد من عيوني صخ .
.الله يسامحك و يسامح ابوك يوم سكنكم هني حذالنا يعني ماشي شقه براس الخيمة الا هاي الشقه وين الي مجابله شقتنا اوف .. يالله حرام زلمات ..
و غربه لازم انحن عليهن يحتاجون المساعده لانهم ف بلاد غربه.. بس مني انا لا تتريون مني شي انا بروحي يالله معتمده ع ها 4000 الي اخذها من قص الكروت ... يالله خذت نفس طويل .. الظاهر بغير رايي و ما برتب حجرة عمور بس حرام ما يستاهل ...
محد بيعطف عليه رفعت ايدي للسما و ادعي ربي من كل خاطري ... يالله اتعرس .. و اتييب لي وحده اتونسني.. اتونسني !!! منوه يونسني غيرها فديتها ..خولة بنت خالووه .. جفتوا طلع عندي اهل غير عمور .. ما عليه يايتنكم في الدرب حبه حبه بنبدا ب خوله ... خلوني انظف حجرة عمور .. و ارمسكم بنفس الوقت عن خوله .. خولوه بعمري .. حرام ما طلعت التوأم مالي ..بس للاسف امي و امها توأم .. نحن الظاهر توأم بس من بعيد خ كيف جي ما ادري ولا تسالوني .
. بس خوله هذي ..حبيبتي و عمري و صديقة الطفوله يا ليتكم اتجوفون طيبة قلبها ..هذي بنت خالوه مريم و شرات ما قلتلكم خالوه توأم امايه الله يرحمها ... و عندي خالوه عايشه و هي اكبر خالاتي ... عندها البكر حميد 26 سنة و بعدين محمد ابعمري 21 متزوج خلود بنت خالوه مريم و عندهم جسوم عمره ست شهور و نهله اصغر عني بسنه يعني ام هي 20 .. .و ريل خالوه عايشه الله يرحمه ... خ اخبركم ابسر حميد يحبني اكبر لوتي جفته و عرفته ف حياتي حميدووه ولد خالوه عايشه ..قال شو يحبني ههه ضحكني ايام روعه مرت ليتها اتعود .. ..
المهم و الاهم خالوه مريم عيالها خوله و خليفه خلود هذيلا كلهم حرف الخا خوله و خليفه توم و خلود عنقود البيت ع فكره فارس البجر بس امه هاجر توفت و ربته خالوه مريم ...عشان جي ما يشبهنا .. انزين و ريل خالووه مريم اسمه احمد ..اكيد استغربتوا ليش ما طريت اهل ابوي ...تبون الصراحه ما اعرفهم قصه طويله و عريضه مع الايام اكيد بتعرفون .. المهم .. كح كح كح ..تدرون ارمس و انظف حجرة عمور كله غبار .. كح كح كح ..
ع طاري الكحه يا رب ترزق عمور بحرمه تنفعك وو تنفعني خ هي خوله .. خوله توام روحي ..هذي حبيبتي ..ندري انكم دريتوا ... رغم ان المسافات الي بينا بعيده بس الله يخلي الاختراعات التلفونات و المسجات و هالسوالف ... انا وايد احب خوله ..طفولتي عشتها معاها ..انا و عمور اخوي بعد وفاة امايه الله يرحمها تربينا بيت خالوه مريم ..و لي ما كبرنا و اعتمدنا ع نفسنا.
. فكر عمور نظهر من بيت خالوه مريم .. بعد ما لاحظ ان حميد و فارس صاروا كبار و انا غديت حرمه اوني عاد.. ما انكر عمور خبله و متهور بس مرات يكون حكيم.. ترا قالوا خذو الحكمة من افواه المجانين .. المهم خالوه مريم رفضت ف البدايه بس بعدين اقتنعت و رضت بالامر الواقع .. بس خالوه عايشه ما تهتم ولا اظني قد فكرت فيني و ف عمور ... اهم شي عندها عيالها ...
اخ اتذكر اليوم الي طلعنا به انا و عمور من بيت خالوه مريم ..كان يوم حزن و خاصه انا و خوله فارقت اختي .. عشت و تربيت معاها اجمل و احلى ايام عمري ... 17 سنة عشتها مع خوله. و بعد ما اتخرجت من الثانويه قدمت ع وظيفه وخالي ما قصر ريل خالتي مريم الي هو احمد سوا لي واسطه في الصحه و اتوظفت في مستشفى صقر اقص كروت ..
و عمور كان موظف بالحرس الاميري من ثلاث سنوات ..يعني الحمدلله نقدر نعتمد ع نفسنا .. و الله يخلي لنا الشيخ سعود بن صقر الي عطانا هاي الشقه ..مجانا تكريم ل عمور في وظيفته طلع منه فايده اتصدقون .. و عطانا بيت شعبي .. بس اتفجنا انا و عمور انخليه لي ما تتعدل امورنا اكثر .
. و نروح نسكنه لانه عود و يباله اثاث .. ..لو تدرون اشكثر كنت شيطانه انا و خوله كنا انسوي عصابه ضد الاعداء تدرون منوه فارس و خليفه عيال خالوه مريم ومحمد و حميد عيال خالوه عايشه معاهم عمور .. ياما سوينا فيهم مقالب بس كنا نجنب عيال خالوه عايشه لان ما شاء الله عليها عليها لسان ...".قل اعوذ برب الفلق " تف تف ما ابا احسدها ع شو يا حسره ..المهم ما كانت ترضى ع عيالها عشان جي كنا نجنبهم ..و خاصه نهله ام المشاكل .. عدوتنا اللدوده .. خ اذكر مره ..اووه لحظه خلصت حجرة عمور.
. يا حلاتها و هي نظيفه و امرتبه .. اثاثها اخضر .. حتى لون الحجره اخضر.. اصبروا بروح اصلي العشاا و بخبركم .. ايام طفولتي ..انا و خوله خ توام روحي ..اووه لازم افسخ زلاغي و كوت عمور ..دشيت حمام حجرة عمور .. لا لا يروح فكركم ابعيد ترا الحمام نظيف مب شرات الحجره .. اتوضيت و خلصت.. صليت العشىى و سنة ركعتين و الشفع و الوتر .
.
بيني و بينكم .. ما كنت اصلي الشفع و الوتر بس الحينه قمت اعود عمري .. الحمدلله و الشكر .. ابسرعه لبست زلاغي و الكوت برد برد و الله برد ؟؟اووه شبريه عمور اجرب لي من شبريتي .. دشيت حجرة عمور .. و دفيت بلحافه نفخت ع ايديني ادفي روحي .. جفت علامة حرق ع ايدي اليسار .كانت بني غامج و مع الايام صار لونها فاتح ....
غمضت عيوني و انا اتذكر احلام طفولتي ..و كانه البارحه ..اتعودنا انا و خوله بعد ما ياذن العصر و اتخلص صلاة العصر نربع الدكان و نشتري منه البفك و الكاكاو و طبعا البارد الي كان ممنوع ان نشتريه بس كنا نشتريه بالسر ..
نورة: خوله خوله شو رايج انسوي رحله ..
خوله: رحله !! الحين ..؟؟
نوره: هي روعه صدقيني .. تعالي نشتري شبسات و كاكاو و عصاير .. و ماي و انروح ناكل ابعيد..
خوله: الله فكره روعه اتخبل انزين و ين تبينا انروح ...؟؟
نوره: وين بعد نتمشى بالبراحه الي ورا الفريج..
خوله"نعقد حياتها" مب جنه بعيد اخاف امايه تهزبنها..
نوره: منوه بخبرها !! تعلم الغيب شوه..
خوله: استغفر الله ..
نوره: عيل يالله شو رايج انروح..
خوله: موافقه "وتبتسم"
ما تصورون اشكثر خوله تطلع قمر يوم تبتسم ما شاء الله عليها حليوه.. اذكر كان الكل يقول حلو عودها .. و شعرها سايح.. عكس شعري كانوا يزقروني بلاليط..شو ذنبي ربي خلقني جي ..المهم عن الفضايح.. بس تبون الصج خوله احلى عني ..غيروا الموضوع ..
سرنا الدكان..
خوله: فريد ابا لبن ثلج..
نوره: و انا ابا عصير .. و شيبس الخليج..
خوله: و انا ابا تويكس .. و ام
فريد: انته يشتري واجد بعدين ماما مشكل انا ..
نوره: لا لا مافي مشكل ..
خوله: ماما يقول روح حق فريد يشتري حساب ع كيفكم ..صح نوره..
نوره :اتهز راسها" صحين ..
فريد: كل كلام مافي مزبوط
حليله فريد مدري حي ولا مات كان طيوب و ينقص عليه كنا نشتري اشكثر باليوم و يحصل هزبات من خالوه مريم ..
طلعنا من الدكان.. الي كان مجابل بيت خالوه مريم و خالوه عاشوه..
خوله: نوره جوفي نهله اطالعنا..
نوره: البسيها لا تعطينها ويه هاي ام المشاكل ..جوفي شعرها كيف واقف مب امشط..
خوله: ههه امنقع فيه شلق
نوره: ههه
نهله: وين رايحات..
نوره"ايديها ع خصرها" و انتي شو يخصج ...؟؟
خوله: رايحين مكان خطير..
نوره: خوله اسكتي اسكتي لا اتخبرينها عن تفتن شرات البارحه .. اتعرفينها فتانه ..
نهله"محرجه": انا مب فتانه..
خوله: عيل منوه البارحه امخبر خالوه عايشه اني انا و نوره عقينا الزباله حذال باب بيت علي بن محمد..ابوي ولا يدي طلع من قبره..
نوره: لا يمكن امايه ..
نهله: امايه ابروحها جافتكم و خبرت خالوه مريم
نوره: و خالوه مريم خبرة خالي احمد و خالي احمد ضربنا بالخيزرانه و كل ها ابسببج..
خوله: يا راعية المشاكل..
نهله: و اخر مره سامحوني .. " و اطالع الجيس الي شالتنه خوله" خذوني وياكم ..
خوله: تبين تاكلين اكلنا..
نهله:بدفع لكم..
خوله: يالله بكم تشترين..؟
نوره: صبري خولوه ..جوفي نهلوه تبين اتيين معانا ..ادفعي حق الاكل .. و حق السيره بعد ..
نهله"زعلانه" حرام عليكم وايد من وين اييب لكم فلوس ..؟؟
خوله: حرام نوره تعالي انسوي لها ديسكااونت
نهله: هي الله يخليج نوره..
نوره: لا لا لا ماشي تنزيلات ولا ديسكااونت ..جوفي تبين اتيين ادفعي 50 درهم و 50 غيرها عشان الأكل ..شو قلتي ...؟؟ و بعدي حمدي ربج بنقبل ناخذج ولا انتي جايفه شعرج مب مشطنه..شو ها ما عندكم مشط..؟؟
خوله: جوفي ملابسنا انا و نوره حلوه ونظيفة و شعرنا مرتب ..انتي ليش ما تستوين شراتنا ..
نوره: جوفي خوله هذي نهله اتضيع وقتنا تعالي انروح عنها .. و انتي روحي العبي مع خلود ..في بيتنا .. يالله انروح خوله..
خوله: يالله نوره .. " و مسكت اييد نوره"
نهله: لا لا حرام عليكم صبروني دقايق بروح اييب الفلوس و بيي معاكم..
خوله "مستانسه" يالله ابسرعه.
نوره: بعد للميه اذا ما ييتي بروح عنج ..واحد اثنين..
ركضت نهله داخلت بيتهم عشان اتيب الفلوس..
خوله: خمسين لج و خمسين لي ..
نوره: ههه اتفجنا ..النص بالنص
خوله : زين خليفة اخوي وينه حرام سوينا له خيانه..
نوره: زين قلنا توم بس مب جي يلصق فيج.. و بعدين هالوقت يلعب كره مع الشباب ..
خوله: هي ههه بزعل اذا اكتشف مغامرتنا ..
نوره : و منوه بخبره..اصلا ..سكتي سكتي يت ام شعر منكوش..
خوله"تحط ايدها ع حلجها و ههه"
نهله: هاه خذوا مية درهم..
نوره"اطالع خوله" ترا هاي اول مره 100 بعدين اغلى ..
نهله: انزين انزين يالله انروح..
مشينا و نحن مستانسات و اول مره انا و خوله نندمج مع نهله ام شعر منكوش ..حتى نهله كانت مستانسه شكلها ما بتسوي لنا مشاكل راعية المشاكل.. طفنا بيت خالوه عايشه و بالمره بيت خالوه مريم.. و عدينا السكه.. اخرتها وصلنا البراحه الي تكون وراا الفريج.. كانت عوده .. و مساحه كبيره ..جفت عمور و حميد و محمد و فارس و خليفه يلعبون كره مع عيال الفريج.. في وسط البراحه ... و سمعت صرخت عمور و كانه محرج من واحد من الشباب لانه ضيع عليهم الجول ...
خوله: جوفي جوفي نوره عمور محرج..
نوره: اسمع حسه جنه بالع مكبر صوت حشى مب صوت ادمي ..
نهله و خوله ههه
نوره: المهم لا تخلونهم يجوفنكم .. نمشي ورا الشير ..
اخرتها وصلنا اخر البراحه مكان فاضي و محد اييه ..
خوله: الله الجو روعه غيم و هوا ..
نوره: احلى شي الهدوء .. خوله جوفي نهله صاخه شفيج نهله..
نهله: ماشي بس مب جنه ابتعدنا وايد....
خوله: ليش انتي خايفه ويوييوويو خوافه ههه
نوره: ههه عادي نهله لا تخافين ..جوفي هناك.." و أشرت وراي الشيره الي نحن مندسين وراها " جوفي اخوانا هناك يلعبون ..
نهله: بس بعيد ..احجامهم صغيرونه ..
خوله"طفرانه " اووه لا تخلينا نندم انا يبناج..
نوره: يالله يالله تعالوا ناكل ...
يلسنا ع الارض.. و فرشنا الاجياس بعد ما طلعنا ...الشيبسات و العصاير و الكاكاو ...
نهله: ابيه انتوا مشترين كولا ....خالوه مريم بتحرج..
خوله: و شدراهاا امايه ...محد يدري عن شي نهلهو
نوره: ندري انج فتانه و يا ويلج اذا خبرتي علينا ..
خوله: خليها اتخبر هي بعد بتتحاسب معانا لانها يايه ويانا ..
نهله: لا لا ما بخبر وعد ..
قعدنا ناكل و نسولف و نضحك .. و اول مره نهله جي تندمج معاي انا مع خوله .. كنا مستانساات..قمنا نغني و نرقص و نلعب ...
نوره: تخيلوا هني بحر..
خوله: انظروا الموج القادم من الجنوب..
نهله: يا للهوله ما نفعل و كيف النجاة..
نوره: البسوا طوق النجاه هياا يا رفاق ..
خوله: الويل لنا هلكنا ...
نوره النجده النجده ..
نهله النجده و تمينا نصارخ و نتراكض ورا بعض اونه الموج بشلنا و نحن انصراخ النجده النجده..
وقفت ابمكان امبطله عيوني يوم جفت قوم عمور اخوي يايين ركض صوبنا ..!! لها الدرجه صوتنا عالي ..
نوره: خوله لحقي قوم عمور يايين صوبنا ..
خوله: الشرده..
نهله : و الاكل..
نوره: أي اكل بعد خلصنا هاي قراطيس فاضيه يالله نشرد.. قبل لا يوصلون لنا و يفضحونا ..
ركضنا ف البدايه كنا خايفات نركض و انطالع ورانا .. بس بعدين حسينا جنا نلعب ركضنا و نحن نضحك صوت عالي .. مسكتنا نهله و كانها اتقولنا ابا اتم معاكم جي ع طول .. مسكت ايدها و رصيت عليها و جني فهمت قصدها .. و خوله مسكتها من ايدها الثانية.. وصلنا الفريج ع اذاان المغرب .. اتفقنا يكون عهد ووعد بينا و يتم سر .. راحت نهله بيتهم ..و دشينا انا و خوله بيت خالوه مريم .. و سيده ع غرفتنا قبل لا اتجوفنا خالوه.. اتغسلنا و اتنظفنا ..طلعنا انجوف تلفزيون كان يعرض بهذاك الوقت مسلسل خليجي الى ابي و امي مع التحية " كلنا كنا اتابعه يعني نتيمع بها الوقت حتى خالي احمد ريل خالوه مريم ..
خوله: نوره اخاف قوم فارس اخوي جافونا ..
نوره: ما عليج سوي روحج ما اتعرفين شي شو دليلهم ..
خوله "تبتسم" صدقج شو الدلليل ..
خليفه: اش عندكم تساسرون ..
خوله: انت شو يخصك اسرار البنات
خليفه : افا خوله ..صارت من بينا اسرار ..
فارس: شو خلوف انت بنيه شو تبا بهم..
نوره: انت منوه طلب رايك..
فارس: و انتي منو رمسج..
عمر: ترا ندري شو كنتوا امسوين العصر ..كشفناكم..
احمد: بس عاد خلونا نتابع المسلسل رمسوا وقت الفاصل .
خلود: انا ابصراحه ما اتشجع لها المسلسل مدري شو يعيبكم فيه بروح اساعد امايه ف المطبخ..
احمد: ما شاء الله ع بنتي هبة ريح ..
فارس: عيل تتحرا شرات هذيلا و ياشر علي و على خوله"
نوره: لو سمحت فارس ما يخصك فيني ارمس عن اختك بس
عمر: لا و الله عادي فارس خذ راحتك انا سامح لك..
نوره: لا و الله
وقفت ابا اطلع من الصاله بس ما كنت عارفه ليش .. عشان نظرات فارس لي ؟؟ ولا اني خايفه انهم صج كشفونا انا و خوله و نهله ..!! صبروا نهله اكيد هي امفتنه ..لا لا ما اعتقد كانت شكلها مستانسه و اكيد تبا اتكرر الرحله عشان جي مستحيل اتفتن
خوله: وين رايحه نوره..
نوره: بسير عند خالوه المطبخ .. انا ما اقعد عند هالاشكال باستثناء خالي احمد و طالعت فارس بنظرات و فهمته اني كنت اقصده ..
خوله: بيي معاج..
خليفه: انتي ذيلها ابكل مكان لاحقتنها ..
خوله: كيفي هذي توأمي ..
خليفه: عيل انا منوه..
نوره: ولد البطه السوده ..
وطلعنا من الصالة و سرنا المطبخ عند خالوه مريم.. كانت اتسوي خبز ..يا سلام اتخيلوا بها الجو البارد و الدنيا امغيمه و هوا بارد يضرب ويوهنا ..و ع ريحة الخبز ابصراحه شي روعه ..
ساعدنا خالوه مريم انا و خوله و خلود ... شويه ودش علينا فارس المطبخ...اتاف و ج

(( الحلقة الثالثة ..))
"من يوم وادعت زولك و القلب ملتاع ..للحب سلطان أمره مقضي ومسموع
لا يشغلك قول واشي .. القول خدّاع ما في دروب المحبة حاجز وممنوع"
اتجدمت من خلود و حميد..ارتبكت يوم جفت حميد ما خوز نظراته عني اول مره شخص يطالعني جي صج فيه جرأه ولا اسميها وقاحه ..؟؟..
نوره: السلام عليكم..
حميد: عليكم السلام اشحالج نوره..
نوره: الحمدلله انت شخبارك..
حميد: بخير ربي يعافيج.. و الله و كبرتي و صرتي عروس .؟؟
و ابوي هذا شو ارد عليه الحينه طالعت خلود الي ابتسمت لي و دشت الصاله..وين رايحه يا الهبله امخلتني ابروحي مع حميد.. حميد !!! تدرون منوه حميد اذكر مره خبرتكم انه لوتي ..
ابتسمت له: ما في شي بالدنيا يتم ع حاله..
اتجدم ويل ها وي ياي..جفته يلعب بسويج سيارته الظاهر كان بيظهر ..
حميد: معقوله انتي الشيطانه ..صرتي جي..
اتمصخر عليه: شو كبرت و صرت ابليس
حميد: هههههه
نوره: خالوه عايشه وين...؟؟
حميد: فيج الخير و صرتي تنشيد عنها
نوره: دوم انشد عنها و اسال عنها و ازورها بس ما يصادف اتكون موجود..
حميد: و عمر اخوج..
نوره: شفيه..
حميد: ما قام ينجااف
طالعته مستغربه: بس يوم انشد عنكم يقول انكم تجاوفون في القهوه
حميد: هاه يعني تسالين عنا
اوهو هذا شو يبا الحينه ..شو مشكلته وين يبا يوصل ..لي متى بتم واقفه برع يعني ...
حميد: لا انا اقصد صار لي اياام ما جفته..
نوره: دق له و اساله..بتم واقفه برع واايد..
حميد: حياج حياج ..
اتجدم و انا ورااه ..دش الصاله..جفت نهله يالسه اطالع تلفزيون يا كرهج..من جافتني وقفت اتسلم علي يحليلها طيبه ترا اتمصخر عليها.. سلمت عليهاا..
نهله: و انا اقول غريبه هالخميس ما مريتي علينا
حميد: ليش كل خميس اتيين و الله ما عندي خبر..
نهله: ترا اهي اتمر علينا حزة العصر و انت مستحيل اتكون موجود هالوقت ..
نوره: وين خالوه عايشه ابا اسلم عليها و اروح ما فيني اتاخر ..
نهله: جي اتخافين من عمور..
رديت عليها بنفس النبره: لا بس انا مب متعوده اكون برع البيت بها الوقت..
نهله: قصدج الشقه..
نوره: ايوه الشقه..
حميد: عادي بس اليوم تاخري انا بوصلج جان اتخافين..
نوره: مشكور ما يحتاي ..خالوه بحجرتها..
نهله:قعدت ع الكنبه: هي روحي لهاا
حميد: نهله شو ها المذهب..
نوره: عادي تراني مب غريبه..
نهله: وفرتي علي محاضره من حميد..
حميد: ما عليج منها نوره تعالي باخذج حجرة امايه..
كنت بقوله اندل الدرب .. المهم سار جدامي و انا و راه حسيت اليوم صرت ذيل حميد...دق الباب .. سمعت صوت خالوه و هي اتقول الباب امبطل.
حميد: امايه نوره بنت خالوه تبا اتسلم عليج..
خالوه عايشه: هلا يمه تعالي قربي ..
اتجدمت منها حسيت يوم جفت خالوه عايشه منسدحه ع الشبريه ..كبرت عشرين سنة..مدت ايدها اتسلم علي.
اتجدمت منها ..سلمت عليها بست ايدها و راسهاا و يلست حذالها ع الشبريه..جفت حميد يرااقبني تضايجت من حركااته ..بالاول يوم كنت صغيره كنت احب اسولف معاه و اضحك .. و كنت استانس يوم كان يشيلني و يفرني بالهواا جني عصفوره اطير ..بس الحينه احس صار حاجز من بينا يمكن لان كبرنا ..
خالوه عايشه: وينج ما ييتي اليوم..
كانت ماسكه ايدي معقوله الواحد يوم يكبر و يصير شعره ابيض ..يعقل يعني ما يصير لسانه طويل..
رديت عليها: رحت مع قوم خالوه مريم.. عشان انجوف العروس ..ما ييتي..؟؟
خالوه عايشه: قالت لي خالتج مريم خاوينا بس كنت تعبانه و مب رايمه قلت نهله بس ما رضت ..
حميد:-شو شفتوا البنيه..؟؟
انت شو يخصك تسال هالسؤال صج ما يستحي ..
نوره: زوينه ..
عايشه: الله يهنيهم عقبالج يمه و عقبال عمر شحاله عمر اخوج
نوره: الحمدلله ابخير باجر بيمر عليج..
عايشه: هي هو كل جمعه يحليله يمر علي ..
وقفت: انزين خالوه بخليج الحينه..
خالوه عايشه: ما شربتي شي ..
نوره: ما عليه مره ثانيه ان شاء الله بس تاخرت وايد..
حميد واقف.. و انت ليش وقفت بعد تباا اتوصلني عند الباب بعد..سلمت ع خالتي و طلعت من حجرتها و كان وراي حميد..بس نهله ما كانت موجوده بالصاله.. احسن مالي خلق اجوف شيفتها..بعد انا مب ناقصتنه ..وصلت عند سيارتي ..
حميد: نوره ما تبيني اوصلج ولا اتأمنين..
نوره: ما يحتاي حميد ما اتقصر..
ركبت سيارتي .. و ضربت له هرن اودعه...يا ربي مب راايمه اسوق فيني رقاد اوني الحينه سهراانه انا الساعه عشر .. زين بعد بوصل الشقه ما بجوف عمر بروح البس زلاغي و انخمد ..ا
مدري كيف وصلت الشقه و الله مدري ..من وصلت ..فريت كل شي عبايتي شيلي شنطتي.. و انخمدت ع الشبريه ..اوني سهرانه الحينه ...حتى ما قفلت باب حجرتي ههه ولا لبست زلاغي مصطله فيني رقااد...
فجيت عيوني ع رنة تلفون البيت.. منو يتصل بها الوقت ليش كم الساعه..اتفأجات الساعه ثلاث ف ليل منوه يتصل بهاا الوقت ؟؟يمكن عمور ..بس ما دق ع موبايلي... دورت موبايلي تذكرت اني فريت شنطتي ف الصاله..اوه نوره متفيجة روحي ردي ع التلفون يمكن شي ضروري ..ابصراحه اتروع يوم اترن التلفونات بتخر الليل..ركضت الصاله..و شليت التلفون..
قلت:السلام عليكم...؟؟
.......:عليكم السلام...عمر موجود..
عااد اتخيلوا شو شعوري الحينه واحد متفيج يتصل باخر الليل عشان ينشد عن عمور الناس اخترعوا موبايلات..كان ودي اهزبه..بس مسكت اعصابي ورصيت ع سماعة التلفون..
........: الو
رديت: عمر مب موجود دق ع موبايله ..
.........: موبايله يعطيني مغلق ..
نوره: زين هوه مب موجود..
.......:انتي نوره ...؟؟
فجيت عيوني و جنه يتني صفعه من الخاطر منو هاه يعرف اسمي..يعني تلفون باخر الليل و سكتنا..بعد يطري اسمي !!عمور مفضحني الله يغربل ابليسك..
نوره: منوه انت...؟؟ و كيف اتعرف اسمي ..؟؟
.......: انا فارس..
مدري شو اقولكم..يوم سمعت اسم فارس..اتصوروا شو سويت..صكرت التلفون ابويهه مدري ليش سويت جي..يستاهل السبال يا قوة عينك..و فرحان ابعمرك انا فارس و حطبه اتكسر راسك..ركضت حجرتي و قفلت علي الباب.. حسيت ابرجفه معقوله انا خايفه..تذكرت نظرااته حسبي الله عليك امسوي لي رعب من يوم كنت صغيره..لصقت ف باب حجرتي ريولي ما ساعدتني اني اروح و انخمد ع شبريتي..يلست ابمكاني عند باب الحجرة حضنت نفسي ..هذا حس فارس نزلت دموع من عيوني لا ارادي.. فارس ..فاارس.
XXXXXXXX
فتحت عيوني ع اذان الفير ..حسيت ابعمري مصدعه صداع قوي..جفت نفسي راقده حذال باب حجرتي..قمت و كاني ما ابا اتذكر شو صار ف ليل.. دشيت الحمام و اتيددت قريت سورة البقره..لي ما سمعت الامام يقيم الصلاة..صليت الفير .. و كملت سورة البقره..بعد ما خلصتها..
طلعت زلاغي من الدرج و لبسته..و لبست كوت عمور الاخضر مال الدواام كنت احس يدفيني..انسدحت ع الشبريه.. و تلحفت..تجلبت واييد..تعبت ابا ارقد بس مب رايمه..صارت الساعه ست الصبح و انا احاول ارقد بس مب رايمه ما ابا افكر بشي..بس تعبت ..من التفكير .
.
اياام مرت فكرت فيها .. و خلاص يااه اليوم الي انا ارتااح فيه و اعيش حياتي بس كيف .. و ها الي اسمه فارس ظهر ب حياتنا مره ثانيه.. غااب عنا 7 او 8 سنوات... من عقب هااك اليوم ما جفته.. كل الي اذكره كانت نظراته الشيطانيه علي.. يوم خالي احمد كان يهزبه..
و يروغه من البيت.. كان يطالعني ..و كانه يحسسني انا مشتركه معاه او اني انا السبب بالي صار له.. انا مالي علاقه .. فيه ولا ابا يكون بينا أي صلة. و انا ما غلطت الي جفته قلته ..يعني نظرات الاتهاام الي كان يطالعني فيها..مالها حاية .....
عمر كاان الشخص الوحيد الي يداافع عنه مع انه يدري انه فاارس غلط و سود ويه عمي. بهاك اليوم ..كان عمري 15 سنة... يعني فارس كان عمره 19 شااب مب صغير.. و الي سوااه ما يسويه واحد محترم و مؤدب...المهم..ما ادري عمر اخوي كيف صار جريء ووقف مع فارس ضدنا كلنا...كان يداافع عنه..ع أي اساس ادافع عنه عمور..
فارس كان مذنب حتى لو كان رفيجك هذا مب معناته توقف معاه ع الباطل..لليوم و الله لليوم و كان كلمات خالي احمد تترد في اذوني..عمر تبا تتواصل مع فارس اظهر من بيتي و بيت خالتك ..و هالجملة الي خلت عمور و مب بس عمور كلناا ننصدم من كلام خالي احمد...و حرم علينا نطري اسم فارس جدامه.. او نتواصل معااه.. و أي واحد يفكر يرمسه او يتصل فيه .
.بيكون مصيره شرات فارس الطرد.. كنت احس انا الوحيده الي مستانسه بعقاب فارس و احس شويه عليه ..بعد الرمسه الي قالها خالي احمد نقزت خالوه مريم ل عمور اخوي و قبضته من ذرااعه تترجااه
: بس عمر اسكت لا ادخل عمرك بشي ما يخصك.. خلي خالك و ولده ابكيفهم لا اتخلي خالك احمد يحرج عليك..
جفت عمر يبطل شفايفه و كانه بيرد عليها بس يوم جاف دموع خالوه مريم صخ.. و نزل راسه..بعدها رفعت راسي جفت فارس يطالعني بنظرات لها وايد معاني بس انا ما فهمت منه ولا شي ...بعدين ظهر من البيت وصرنا ما انعرف عنه أي شي.. حتى ثيابه ما شلها معاه..
جذي يكون يوم الواحد يتبري من اهله...حسيت برجفه و قشعريره...طالعتهم كلهم بعد ما ظهر فارس من البيت كلهم كانوا يتألمون حتى خالي احمد..و و عمور اخوي هذي اول مره اجوف دموعه..ما قدر يسوي شي..لو تكلم.. بيروغه خالي احمد بعدين وين بنروح...
.
بعد سنة اشتغل عمور اخوي..و السنة الثانية عطااه الشيخ سعود طول بعمره شقة.. و انتقلنا هناك انا و عمور و كنت وقتها بثانوية عامه...ف البداية كنت رافضه اروح معاه و كنت اصيح. بالنسبة لي اليوم الي ظهرت فيه من بيت خالوه مريم اسوء يوم ف حياتي ....و كلنا عرفنا ان عمور بغى يظهر من بيت خالي احمد..عشان يرجع علاقته ب فارس .و كان بالنسبه له اسعد يوم ف حياته ...
.بس خالي قاله..البيت مفتوح لك و ل نوره باي وقت..تبون اتزورون خالتكم عيال خالتكم حياكم الله ... حسيت ابقهر .. لاني تركت مكان الي تربيت فيه و عشت احلى ايام عمري و طفولتي ..
.بس الحمدلله ع كل الي صار علاقتنا انا و عمور بقوم خالتي شرات قبل يعني سالفة فاارس ما أثرت فيها ...ها اهم شي ..كل الي عرفته من عمور ان فاارس راح بوظبي .. بعد ما ظهر من بيت خالي احمد.. و استقر هناك..مع خاله و خالته..خاله اخو امه من الاب ..تزوج خالته اخت امه من الام..مدري كيف استقبلوه اكيد اكيد قص عليهم ولا هالاشكال و الحثاله محد يأمن يعيش معاهم.. وليش ما يأمنون ..لازم يأمنون ترا فارس اخو عيالهم بالرضااعه.. ابصراحه انا ما اعرفهم ولا اعرف اساميهم و كيف علاقة فارس فيهم كل الي اعرف انه عايش ف بوظبي مع خاله و خالته.. و اخوانه في الرضاعه ع رمسة عمر.. و انا ما طريت هالشي لا ل خوله ولا قوم خالي احمد ما فيني ع المشاكل خليه يولي...
سمعت صوت باب حجرة عمور.. نقزت.. و رحت فتحت باب حجرتي..
جفته يفتح باب حجرته:تو الناس بدري ...؟؟
عمور متروع: انتي شو اتسوين اليوم الجمعه ماشي دواام..
نوره:ما ياني رقااد...ليش راد بها الوقت ..انت ما تحاتي اختك..
عمور: كيف ما احااتيج..تراني اسهر ويا الشباب ف القهوه جريبه من بنايتنا..شوفيج انتي هاليومين ما تنجافين ولا تنشدين حق شو زعلانه..
طالعته بنظرات ..اونك ما اتعرف شو مزعلني بس خلها ع الله..جافني ما رديت عليه..دش حجرته ..و لحقته..
نوره: موبايلك ليش مغلق...؟؟
عمور داش الحمام يغسل ويهه: كان امفضي اخر الليل بس بعد الفير حطيته بالجراجه في السياره ليش متصله شي استوا..
نوره: لا مب انا المتصله..وااحد اسمه فارس
طالعني عمور يوم نطقت باسم فارس...ظهر من الحمام و انا تميت واقفه عند باب الحمام..طبعا معلوم ما بيصكر باب الحمام.. صكرته...يلس ع الشبريه..
عمور: عيل اتصل بي و جاف الموبايل مغلق ما قالج شو يبا..
عاتبته: عمور..
رد علي ابسرعه: شو فيج نوره الريال ابشو ضرج..ليش تكرهينه..
نوره: انت مستغرب ليش اكرهه انا المفروض استغرب منك..ليش مرابعنه للحين..
عمور: لا تنسين ها رابي ويانا و ولد خالي احمد..و شرات ما تعزين خوله انا اعز فاارس و اكثر
نوره: ولد خالي احمد مب خالوه مريم يعني ما يصير لنا شي.. المهم قوله لا يدق مره ثانيه ع تلفون الشقه..انا من سمعت صوته و انا مريضه مب رايمه ارقد..
عمور: ههه ان شاء الله اوامر ثانيه..
نوره: لا ماشي تمسى ع خير ..
عمورهو يتلحف: و انتي من اهل الخير بندي الليت..
تذكرت و انا اصكر باب الحجرة: صح حميد ولد خالوه عايشه ينشد عنك..
عمور: شو يبا طول ليل مجابلنه في القهوه..
نوره:ههه مادري ..نش اليوم من وقت عشان اتروح ل خالوه عايشه البارحه جفتها امبين عليها تعبانه..
عمور: زين زين روحي خليني ارقد ..
صكرت الباب ..ابتسمت حسيت و انا ارمس عمور جني ولية امره و اتحكم فيه ههه حلو تتحكمين ف ريال ...دشيت حجرتي.. و شليت الروايه الي كانت موجوده ع التسريحه.. و انسدحت ع شبريتي و يلست اقرا ..اضيع وقتي بدال هالملل..
XXXXX
بعد اسبوع و يوم الجمعه كنا في بيت خالوه عايشه معزومين ع الغدا.. بمناسبة ختاان جسوم ولد محمد و خلود.. و المناسبة الثانيه تحدديد ملجة خليفه ع شيماا..صاار زمان ما تيمعنا..دشينا انا و عمور بيت خالوه عايشه ..سمعت اصوات و ضحكات طالعه من صوب باب الصاله...
ذكرت عمور: عمور..
عمور: شوه؟؟
نوره: لا تنسى اتغض النظر..
عمور: شو قصدج..
نوره: اونك ما فهمت قصدي...
عمور: عن الاستهبال ...
الجو كان رهيب و باارد و مغيم.. عشان جي قوم خالوه عايشه ..مب مشغلين المكيفات فاجين باب الصاله...و الدرايش ..ابصراحه حسيت بشعور ممتع لان من زمان ما تيمعنا..جذا...كان بويهنا قاعد و مجابل باب الصاله.. حميد و خليفه نزلت راسي يوم جافنا ..
خليفه: ها وصلوا...المتاخرين..
حميد: قربوا قربوا..
دشينا انا و عمور ..
_السلام عليكم...؟؟
الكل رد علينا: و عليكم السلام...
سلمنا ع الكل بس واحد ما كان موجود منوه منوه ..
نوره: خالوه وين خالي احمد..
خاتلوه مريم: خالج احمد و الشواب مشغولين ف التجديف
خالوه عايشه: عيل انتوا يا الشباب جي ما سرتوا تدربون
محمد: الله يهداج امايه الجو ما يساعد و بعدين تأجل السباق ع نهاية شهرمارس
جفت عمور يشيل جسوم و يلاعبه.. و جسوم ما يصدق يجوف الريااييل يتعلق بهم..
خالوه عايشه: يالله شد حيلك عمر عرس و ييب لك واحد
محمد: ابوي اذا جي حشره نصيحه لا اتفكر..
الكل:ههه
طالعني عمور و رد ع خالوه عايشه: ان شاء الله خالتيه جريب بس بعد الدوره..
حرجت منه كنت ادري يقصد نهله الحيوان ما فاد فيك يوم زعلت.. الشي الثاني الي كان يقهرني حميد ما شال عيونه عني..عشان جي فكرت اشرد من الصاله..
نوره: خالوه عايشه وين البنات ...؟
خالوه عايشه: خوله و نهله في المطبخ ينجبون الغداا.. و خلود ف حجرتها..وين تبين اتروح روحي..
قمت من مكاني و كان ودي اركض مب امشي ابسرعه..
قلت و انا اطالع عمور: بسير عند خلود عيل ..
ما ادري اذا فهم نظراتي او لا لاني اجوفه يبتسم لي الطفس..شليت ابعمري و رحت حجرة خلود..دقيت الباب و دخلت عليها جفتها يالسه تتمكيج..
خلود: هلا و الله نوره تعالي دشي..
نوره: شحالج..
خلود: طيبه جفتي جسوم قاعد يصيح ولا صاخ..
نوره: لا دام عند عمور اخوي لا اتحاتين مستانس الريال..
خلود: ههه
طالعت حجرة خلود..مع اني جايفتنها قبل ..بس الظاهر امغير الاثاث ..و معطي شكل الحجره اكبر مع انها وايد عوده ...
خلصت عهود من ميكابها.. و يت يلست حذالي..
قلت لها: ما يحتاي اتحطين ميكاب انتي بروحج ما شاء الله عليج بيضه و حلوه..
خلود: حتى و لو اتحسين المكياج الحين مطلوب ..
نوره: طبعا في كل مكان الا مكان العمل..
خلود: اتصدقين نوره بديت اتملل من قعدت البيت ابا اشتغل..
نوره: ههه عندج جسوم يونسج..ولا تبين تشتغلين عشان تشردين منه..
خلود: ههه كيف عرفتي اتصدقين ..ام لوع ابجبدي..
نوره: يالله تحملي تبوون ريل و عيال تحملوا..
خلود: ما انخطبتي..؟؟
نوره: فال الله ولا فالج شفيج تتحريني شراتج ميته ع العرس..
خلود: شسوي ما صدقوا قوم خالوه عايشه خلصت من الثانويه سيده خطبوني ولا انا ما اريد..
نوره: ها علينا حلفي انتي بس ..
خلود: ههه المشكله كان المعرس محمد لو واحد غيره صدقيني ما قبلت..
نوره: معلوم ابويه معلوم..تبين منوه و ما تبين منوه انتي من يوم كنتي صغيره صايعه..
خلود: ههه غربلج الله ..لسانج يباله قص..هي صج ع فكره جي ما رحتي عند خوله و نهله في المطبخ..
نوره: اخ لااه ما ابا اجابل شيفة نهلووه انتي كيف طايقتنهاا
خلود: شسوي بنت خالتي و عمة ولدي و اخت ريلي
نوره: ههه خيبه اتخيبهاا من كل صوب عافده عليج..
خلود: انتي بعدج ما ادانيينها زين هذاك اول الحين كبرتوا ...
نوره: انتي ابذمتج مرتاحه معاها..
خلود: تبين الصج ..لا ..بس مرات اتكون طيوبه...بس محمد دوم هو الي يتفاهم معاها لو عقت علي رمسه لكن خالوه عايشه ..يحليلها ما قد قالت لي شي ...
نوره: مع ان نهله طالعه عليها..
خلود: ههه هي اتصدقين ..عيل الله يعينج باجر..
نوره:ع شو..؟
خلود: اتصدقين محمد قال لي ان حميد خبره يفكر يخطبج..
نوره: شو يخطبني لا و الله ليش ان شاء الله...
خلود: شو ليش ان شاء الله ...ليش يبون يخطبون بعد..
نوره: ده بعده.."وقفت" قومي خلينا نتغداا لا اتغثيني خليني اتغدا ع راحتي..
خلود: الله يعينه..
نوره: منوه..
خلود: الي بياخذج..
نوره: ههه هوه لسه شاف حاكه..
خلود: شريره..
بطلت علينا الباب خوله..
خوله: هااه نوره ضحكتج واصله برع شو اتقولون..
خلود: يالله بالستر ..
نوره: تعالي سلمي بالاول فقتج..
خوله"اتسلم ع نوره" يالله نشن تعالن تغدواا
نوره: وين ..؟؟
خوله: ف الصاله خلاص الرياييل راحوا الميلس...
خلود: عيل يالله ..
طلعنا من حجرة خلود..جفت نهله يالسه و معاها جسوم..هاه اكيد عمور الهيس جافها و سلم عليها ولا هي ليش مستانسه مالت عليها.عااد هي ما اتصدق تراني اعرف طينتها ....المهم سلمت عليها.. و قعدنا نتغداا...بعد ما خلصنا... حسيت ان نهله كانت تجنبني و مطنشتني . و انا بعد تراني مطنشتنها مب بس هي تعرف اطنش..انزين...
شويه ودش محمد و حميد الصاله..
خالوه عايشه: وين عيال خالتكم..
محمد: يلس حذال خلود.. و شل عنها جسوم: عمور ظهر واحد من الربع دق له.. و خليفه بعد مدري وين سار..
نوره: شو عمور روح عيل منوه بوصلني البيت يستهبل هاه ..
الكل: ههه
خوله: الظاهر نسااج...
خالوه مريم: مب غريبه انتي تراج بيت خالتج.قعدي لي ما يخلص شغله و بيمر عليج..
نوره: خالوه الله يهداج عمور باجر الصبح بخلص شغله..
خالوه عايشه: هي ها العمر يخلص و الشغل ما يخلص ..
حميد: مب مشكله نوره لا تضايجين..قولي لي متى تبين اتروحين و انا بوصلج بدربي..
نهله: يالله ما انروم ..
نوره: اونج انتي ..ما اتروميين
خوله: ايه جنه شي مطر..
ركضت خلود برع اتجوف..
محمد: اندوكم انتوا حرمه معرسه و عندها ولد..
صاح جسوم يوم جاف خلود تركض برع يباها اتشيله..
ردت خلود داخل: لا ماشي بس الجو فنان ..
حميد: من زمان ما تيمعنا جي..
خالوه مريم: ناقصنا احمد..
محمد: شو رايكم عيل الاسبوع الياي اذا كان الجو جي فنان نطلع البر..
خوله: الله روعه صج محمد ..فكره حلوه.
خالوه عايشه: لا ما اروم اظهر وياكم..
نهله: حرام عليج امايه لا اتخربين علينا الطلعه..
خالوه عايشه: و جان الجو عادي ما فيه غييم..
خلود: لا ان شاء الله بيكون روعه جي و فنان ...
نوره:خلاص خالتيه دام انج تتحججين ما اترومين اتروحين خط انروح البحر..
نهله: ليش انتي بتروحين معانا ..
و ابوي هاي الحينه شو ارد عليها..شو محد بسكتها عني..اويه كلهم يطالعوني لا لا حبيبتي نهله تتحسبيني بنحرج ولا بتغلبيني بها التغيزاات..
نوره: طبعا حبيبتي بروح و بعفد السياره قبلج..
الكل: ههه
خوله: خيبه نوره شويه و بتصرطينها..
نوره: ع بالها يالسه ف بيتهم ما برد عليها..
حميد: اوب اوب ضرابه ..
خالوه عايشه: انتوا بتمون طول عمركم جي ..مب تصالحون..
نوره: خالتيه الي يعطين كلمه اعطيه عشر..
محمد: و ابوي طالعه ع امايه نوره..
خالوه عايشه: سود الله ويهك امبونك ما تستحي ع ويهك..
الكل: ههه
خالوه مريم: اذا الله راد و سرنا نوره خبري عمور اخوج يروح واذا ما طااع قوليله كلنا ما بنروح اذا ما سرت..
حميد: ها ها بديت اغار شمعنى عمور يعني ..
نوره: لحظه حميدان "طلعت عفويه بس ما توقعت الكل بتفاجأ بهاي الكلمه طنشتهم و كاني ما قلت شي غلط" خالوه اشمعنى عمور حتى انا اغار يعني اذا انا ما سرت انتوا عادي بتروحون ..
خالوه عايشه: يالله مريم توهقتي ها الاخوان قاموا يغارون ..
نوره: طبعا ممنوع التفرقه العنصريه ..
محمد: مال اول تفرقه عنصريه..
خوله: انت عطني جسوم حاطنه بحجره..
نوره"غمزت ل خوله: انتي ما اتوبين بعدج تبين اتشيلين جسوم..
خوله:صخي عن الفضايح..
خلود: ليش شو بلاه ولدي جسوم..
نوره: ما بلاه شي اعوذ بالله ..يالله منوه بتبرع و بوصلني..
حميد: انا بوصلج شرايج..
نوره: ابروحنا !!
الكل: ههه
خوله: انا بيي معاج..
نهله: انا بعد ترا الجو رهيب بالمره كشته...
خلود: لا و الله و انا و جسوم بعد بنيي
خوله: استحي ريلج يالس و تبين اتيين ويانا..
خالوه مريم: لا تاخذين جسوم اخاف يمرض الجو بارد..
خلود: خلاص عيل ما بروح الوحده يوم تعرس تنحرم من كل شي عفانا الله ..
محمد: فديتج و الله خلود نشي و يبي معاج جسوم بنظهر رواحنا بنتمشى..
خلود"طايره من الوناسه" و الله يالله يالله
خالوه عايشه: الباب عن تدعمينه خلود
الكل: ههه
طلعنا انا و خوله و نهله .. مع حميد.. يلسنا ورا انا و خوله و نهله جدام حميد..
بالفعل الجو وايد رهيب لو اوصفه لكم ما بتصدقون ..زين عمور شرد سوا فيني خير ..ههه
نهله: حميد دخيلك مر صوب البحر..جوف الجو هناك غييم اسود..
خوله: معناته شي مطر..
حميد: لا لا ماشي شو تتحرون طلعتن معاي عشان امشيكن يالله مناك..
نهله: حرام عليك حميد..شويه بس ما بننزل من السياره ..نوره قوليه يمكن يسمع كلامج..
نوره: لا و الله ...
خوله: يالله عاد نوره قوليه خذنا البحر ..
حميد: يالله اذا قالت نوره خذنا الحينه بغير الشارع..
خوله و نهله: حراام عليج نوره لا اتذلينا.
نوره: خ ما بقول كمل كمل طريجك حميداني

رقيقة المشاعر
سجلي حضوري
ولي عوده بالتعليق

هلا فيك اختي انا فلانه .........
صرنا ثلاث الحين انا وانت والفاتنه الصغيره
وبإنتظار البقيه ...........

واو قصتج روعه والله روعه
جنان
وعلى اعصابي ماادري شنو بيصير؟
نوره ليش تكره فارس؟
فارس شنو مسوي ؟
نوره بعد ليش تكره نهله ؟
حميد " شي " حميدان خ
بس يالله مدري شنو بيصير بينه وبين نوره ؟
وعمور ونهله وخوله ؟ شنو بيصير؟
نوره شنو بتسوي يوم شافت فارس؟
يالله احداث كثيرة
محتاره
بليز لا تطولين علينا وقصتج روعه بس صج كاتبة القصة صح معاني؟ والا؟
ننتظرك على احر من الجمر

مشكورة عالقصه روعه مشالله
نفسي اعرف ليش نورة تكره فارس