ابي مساعدتكم

أتشرف اني أكون أول وحده ترد على طلبج
وانا خبرتي قليلة ماصار لي الا سنة ونص بس اشلون كسبت ام زوجي
من أول مادخلت البيت حاولت ماأطيح الميانه بيني وبين كل من في البيت
يعني ماأثقل وأقعد عندهم طول يومي عشان مايملون مني ويصير وجودي وعدمه واحد
ودخلتي عليهم يكون لها ألف حساب وبعد أحاول في المناسبات مثل العيد أو المناسبات الثانيه أجيب لها هدايا بس تكون أشياء تعجبها والحمدلله دايما يعجبها ذوقي
و في رمضان لازم كل يوم أفطر معاها يعني ماأفطر مع زوجي بروحنا وهي وايد مستانسه من هالشي
وآخر شي جبت بنوته وسميتها عليها وهذا اللي قربنا من بعض وايد وصارت تبديني على بناتها
بالرغم من اسمها قديم وتقريبا محد كان متوقع ان حد من عيالها بيسمي عليها والكل استغرب اني سميت عليها وهذا الشي كبرني في عينها ..
هذي تجربتي وأتمنى أكون أفدتج

عزيزتي ذهب صافي مرحبتين فيكي
اولا لتكسبي محبتها عامليها زي الوالدة بس في حدود يعني ماتقول لها كل شي وضعي حدود معقوله وخليك مبتهجه دائما امامها وامدحي ولدها وقولي لها الله يحفظك ويسلمك ليه لأنك اخترتيني لولدك ربيتيه واحسنتي تربيته واهم شي لاتسكنون مع اهله (ابعد بعيد حبك يزيد) وساعديها على قد ماتقدرين
وهاه اعزمينا على العرس وقولي لي ويش صار معاكي مع حماتك
وربنا يوفقك ويحبب زوجك فيكي ويرزقك بالذريه الصالحه اللهم امين

ثانكس على ردودكم وانتظر المزيد من الردود اللي تفيدني
الزين بس حبيت اسألج شنو عادة تكون سوالفج معاهم شتسولفين عنه؟؟
يعني ابي اعرف نوع السالف علشان مايملوني

خلج طبيعيه هذا أهم شي
وسولفي بأي سالفه صايره لج وكأنج تسولفين مع أمج أو وحده من خواتج
مثلا انا في الجامعه ولو صادني موقف ساعات مع دكتور او اي أحد في الجامعه أقولها عنه عادي
وصحيح تذكرت شي اذا زوجك عنده أخت صغيره يعني في السن اللي مانخليهم يطلعون بروحهم وكانت تبي شي من السوق أو كانت امخلصه امتحانات وتبي تطلع
تبرعي انتي وخذيها معاج وديها المكان اللي تبي وقولي حق أم ريلج انج تين اتريحينها وبتودينها بدالها وبجذي
بتكسبين أم زوجج وبتكسبين أجر في أخته

هلا الغاليه
والله موضوعج مهم وايد لانه اذا كسبتي ام زوجج ان شاء الله بتقدري تكسبين زوجج بسهوله
حاولي اتعاملين ام زوجج وكانها امج وبين فتره وفتره اتيبين لها هديه
وحاولي دايما انج تمدحينها جدام زوجج واتقولين له انا احب امك وايد واحسها نفس امي
هو طبعا بيستانس منج وايد وتكبرين في عينه
ومبروك مقدما والله يوفقج الغاليه

أختي ذهب صافي .. مبروك الزواج مقدما
وكلام اختي elzaina606 صحيح .. لكن المشكله انه مو كل امهات الازواج زي ام زوجها بعضهم الله يهديهم مهما سويتي
مايفيد وبعضهم حبيب مره يعني حتى لو ماتسوين لها شي تحبك من محبة ابنها
فهذا يعتمد على اخلاق ام زوجك .. اتبعي الخطوات اللي قالت لك عنها الزينه .. بس اهم شي تجي منك هالاشياء عن طيب نفس
مو غصب .. وبعد خليك على طبيعتك ولاتتصنعين انك تحبينها او انك تحترمينها حبيها من جد مهما كان لأنك اذا تصنعتي بيجي
يوم تتعبين فيه من هالشي وترجعين لحقيقتك .. بس ان شاء الله الأمل فيكي كبير انك تعامليها معاملة تقريبا مثل امك يكفي انها مره كبيره .. واعطتك ولدها اللي تعبت فيه هالسنين وانتي اخذتيه ..
بعد فيه امر مهم وهو انك ماتسمعين كلام احد امك او اختك او صديقتك او قريبتك صحيح انهم يبون لك الخير لكن هم
مايعيشون معك ويعايشون موقفك اللي تحكين لهم عنه فتأخذهم العاطفه والحماس ويحثونك على اشياء ممكن تضرك
آخر نقطه واهم نقطه هي الصبر .. اصبري على كل شي تشوفينه وتسمعينه سواء من امه أو اخته اذا كنتي تحبين زوجك
ولا تخبين عنه شي يقولونه لك مو كل شي علشان مايمل منك ويحس انك تفتنين بينهم لازم يصير في الصوره معك
اتمنى لك التوفيق وحياة سعيده
وسلامتك

الله يوفقج حياتي و انشالله تكون حياتج معاهم روعه
تدرين شتسوين حاولي من الحين تكسبينها و عامليها مثل امج او عمتج
يعنى بطريقه احترام و حاولي تكونين على طبيعتج يعنى لا تسكتين وايد اذا قعدتي معاهم
لا تكلمي و تصرفي بمثل اسلوبك بالبيت بس انتبهي لكل كلمه تقولينها يعنى لا اطيح الميانه زياده
عن اللزوم عشان لا ينتقدون
الله يوفقج

elzaina606
انا معاها في كلامها
انت تكوني غير متداخله جدا في امورهم العائليه
واذا رحتيلهم الاتطولين
والله يدوم بينكم الموده والسعاده
ودمت بخير