اذا زوجك عصبي اتفضلي بتستفيدين ان شالله

1. بسم الله الرحمن الرحيم


2. أولا: مهم جدا انك تعرفين شنو يعني الرجل العصبي


3. الحين نجي للخطوة الأهم وهي اشلون تتعاملين مع زوجك بوقت الغضب:

سبحان الله وبحمده سبحان الله العظيم

بسم الله الرحمن الرحيم

بنات انا شفت حريم يتعاملون او يتصرفون تصرفات خطأ مع أزواجهم بوقت الغضب و حبيت أنقل لكم تجربتي الشخصية بعد معاناتي من زوجي العصبي في بداية زواجي
لدرجة ان هذي المعاناة وصلتني لقرار الإنفصال عنه .. بس لأني حسبتها زين و شفت فيه ايجابيات صعب اني الاقيها برجال ثاني علشان كذا تراجعت عن قراري والسبب الثاني لأني أحبه و هو يحبني علشان كذا قلت لازم الاقي حل لعصبيته
وهنا بدات ابحث و اقرا واشوف استشارات اخصائيين لزوجات يعانون من عصبية ازواجهم و واستفدت كثير من تجاربهم و حبيت ألخص لكم هذي الاشياء في هذا الموضوع

أولا: مهم جدا انك تعرفين شنو يعني الرجل العصبي

الرجل العصبي هو طفل كبير ما يقدر يسيطر على إنفعالاته علشان كذا ممكن نقدر نقول عنه شخص ضعيف مسلوب الإرادة و القوة.

• لازم تعرفين أن الرجال العصبي ما يتعمد إيذاء مشاعرك لأنه بهاللحظه يكون بدون تفكير وبعد ما يهدأ راح ينسى كل اللي صار لأنه طبيعي مو حاس بشنو جرح مشاعرك.
• الرجال العصبي شخص فاقد الثقه بنفسه و فاقد للحب و الحنان و يحس إن الناس يتعمدون إهانته وعلشان كذا عطيه الحب والحنان و الإهتمام و الأهم من هذا الإحترام و التقدير ولا تنسين تمدحينه و تثنين عليه لأن بهالطريقه راح تقللين من نوبات غضبة بالمستقبل

الحين نجي للخطوة الأهم وهي اشلون تتعاملين مع زوجك بوقت الغضب:

• حاولي قد ما تقدرين انك تتجنبين انك تكلمينه وقت ما تكون واضحه بملامحه العصبيه والغضب.
• لاحظي تعابير وجهه وافهميها لمن يكون على وشك الإنفجار بلحظة غضب مثلا تشوفينه يتنفس بسرعه او يطالع بنظرات حاده

هنا تجنبي انك تثيرينه أكثر وأقضبي أرضك

• لمن تحاورينه خليك لبقه واحترميه ولا تستفزينه بأي كلمه أو حركه ولا تحاولين تصرين على راي اذا كان هو يخالفه أو انك تعارضينه بحده أو تستهزئين بكلامه او فيه

بس قولي رايك بلباقه و هدوء واسأليه عن رايه باحترام لأنه محتاج للإحترام و التقدير بهذي اللحظه.
الحين بقول لكم نقاط مهمه وهي اشلون تتعاملين مع زوجك لما يثور و يستشيط غضبا بوجهك (( استر يا ستار))

• بالوقت اللي يكون فيه معصب و ثاير و يصارخ من قمة راسه خليك هاديه و متماسكه ولا تنرفزينه و تستفزينه بكثرة الكلام او تراددينه أو حتى تبكين و تضعفين لأن هالشي بيزيده عصبيه مثل ما انا موضحه بالصور
• خلي قعدتك منتصبه القامه بس باحترام ولا تطالعينه نظرات لا مبالاة واسمعيه و خليك مهتمه للكلام اللي يقوله لأنك ان طنشتيه راح تزيد حدته و غضبه عليك.
• لا تقولين له مثل هذي العبارات (( ليش انت معصب؟؟)) , (( ترى الموضوع ما يستاهل كل هالعصبيه!)), ((هدي أعصابك ماله داعي كل هالصراخ!!)) كل هذي العبارات راح تحسسه انك مستهينه فيه و مو مقدره موقفه.

ممكن انك تقولين له(( أدري حبيبي هذا الموضوع يخلي الواحد يطلع من طوره و معاك حق..بس ان شا الله ما يتكرر))

• لا تناقشينه ولا تتنازلين عن رايك بسرعه بس حاولي بهدوء انك تأجلين النقاش لوقت ثاني.. مثلا قولي (( ان شا الله نتفاهم بعدين)), ((يصير خير بإذن الله)) لأنك اذا تنازلتي راح تخسرين و تتضايقين مع مرور الوقت.

بعد ما تنتهي ساعة الغضب:

• خليه يحس انك متألمه و متأثره و حزينه بصمت بدون ما تحسسينه بانك كارهته و بدون ما تعاقبينه او انك تطنشينه و ما تكلمينه لأن هالشي راح يزيده عناد و يسوي مشاكل معاك

بس اذا عاملتيه بصورة زينه بس خليه يحس انك حزينه و منكسره هالشي راح يحسسه بالندم و ينكسر قلبه عليك.

• اذا قدرتي انك تكلمينه بهدوء بالموضوع يكون أفضل وقولي له عن أثر هذا الموضوع بحياتكم و بيني له شعورك و انك انجرحتي و مع هذا بيني له انك تحبينه و تعزينه وحاولي تدلينه لطرق يتحكم فيها بأعصابه واللي دلنا عليها رسولنا صلى الله عليه و سلم مثل الوضوء و الصلاة ركعتين و الجلوس والإستلقاء و ذكر الله

وفي النهاية
إذا تبين تكسبين زوجك العصبي.. احتويه بالحنان والعطف والتقدير.. وعامليه بلطف وتقدير واهتمام، وبيني له مشاعرك وتقديرك و راح تشوفين اشلون راح تقدرين على علاجه بإذن الله، ولا تنسين أهمية الدعاء له.
بنات لا تنسون دعواتكم لي.وابي اشوف الردود الحلوه.