اريد حل وسريع يافراشات مقهوره

السلام عليكم
الحقيقه الله يعينك اختي ويهدي زوجك
لكن لاتزعلين مني : انت غلطانه , كيف تتركين غرفة نومك وتنامين بمكان ثاني ؟ حتى لو كان داخل البيت .
غلط صدقيني وعمر الرجال مانزل راسه واعتذر وبالاخير انت اللي بترجعين
انا لو منك اعيش بشكل طبيعي ما احسسه اني مقهوره من تصرفاته حتى لو كنت بداخلي ميته قهر واحاول اشغل نفسي بالاولاد والقراءه النت اي شيء ثاني واادي واجبه على اكمل وجه
وبالمناسبه : مره صار بيني وبين زوجي زعل واديت واجباته مثل اول واكثر بس اني ما كنت اكلمه ابد والبس اجمل ماعندي من ملابس الاثاره وانام جنبه واتقصد انام بطريقه ملفته الى ان طال صبره وقال ليش الحين انت متزينه ومتطيبه ؟ قلت من واجبك علي انك تشوفني في ابهى صوره بس مو لشيء ثاني , عصب وقال : وانا من واجبي عليك اني انام معاك وماقدر يتمالك نفسه وسويت نفسي مغصوبه طبعا وبعدها جلسنا نضحك وانتهى الخلاف على كذا بس اعتقد انه كان للباسي وادائي لواجباته دور كبير في انه يمتص غضبه
انت حاولي انك تسوين معاه جلسة مصارحه بكل هدوء يمكن في بنفسه شيء انت مو عارفته وادعي الله له الهدايه
واسال الله ان يصلح لك زوجك ويصلح لك شأنك كله
اختك
نجمة الفجر

السلام عليكم ورحمة الله وبركاته
يااخية الإسلام أناديك بصوت الحق.......... تذكري ..... كوني له أمه يكن لك عبدا ولاتنسي قول المصطفى صلى الله عليه وسلم ( هو جنتك ونارك) راجعي نفسك وقفي معها وقفة مصارحةلعلكي تجدين أنك أنت السبب فالمرأة بحسن خلقها وتعاملها الطيب مع زوجها تكسب قلبه ولايخفى عليك أن الرجل كالطفل يتأثر بالكلمة الطيبة وأقول لك كيف تكسبين قلبه أولاإختاري إسلوب المدح معه كثيرا كثيرا ودائما تنازلي وإذا رفض يقضي لك حاجه إبتسمي في وجهه وقولي إذا مايناسبك مرة ثانيه جربي صدقيني غير تدعين لي إذا إستخدمتي هالإسلوب أكثري المدح أكثري التبسم ..... التجمل ....المرح ....الدلال ...وخاصة الرائحة الطيبة إحرصي عليه واجعليها همك عند زوجك .....الله يوفقك ويسعد أيامك مع إسرتك ....

الله يهديكم ويجمعكم على خير , أختي أنتي أدرى وحده بزوجك , نصيحتي لك أقعدي مع نفسك وفكري بحياتك الماضيه وشوفي وش اللي بيسعد زوجك , يعني معقوله هذي أول مره تهاوشون ؟!!!

اهلين يا قمر
انا بصراحة مع كلام اختي نجمة الفجر ..... يعني لا تحاولين انك تبينين لة انك تبغين تصالحينة, خليك طبيعية قومي بواجباتك على اكمل وجة.... البسي احلى الملابس الي عندك.... وبنفس الوقت لا تبينين انك تبغين تحكين معاه
وانا راي كمان انك تحاولين تشغلين نفسك عشان ما تفكرين بالموضوع كثير يعني اعزمي صاحباتك ... او اعملي اطباق جديدة
يعني حاجات زي كذة
والله يهدي زوجك يارب .... وياليت تعلمينا ايش يحصل معاك
اختك ليال

انا بعد مع كلام (( نجمه الفجر )) دام انج متاكده انج مو الغلطانه ليش عيل تروحين تراضينه؟؟؟
تصرفي على طبيعتج ولا تروحين تراضينه .. وسوي كل واجباتج لبيتج وريلج ولعيالج وهو صدقيني راح يحس
وحاولي قد ما تقدرين تلبسين له لبس مغري عشان يحس شوي
والله يوفقج

انا ايضا اقول لك بشكل اكثر صراحة ان ما يحدث لك انتى السبب فيه ؟؟!!
نعم الزوجة يجب ان تسمع كلام زوجها وتنفذ كل طلباته ..الخ من الواجبات لكن لديها ايضا حقوق يجب ان يحترمها زوجها ولا يمكن للحياة ان تكون هات فقط بلا خذ او خذ فقط بلا هات بل الحياة الزوجية شراكه بين شخصين وبالتالى فلكل منهما حقوق ولكل منهما واجبات ...
وواضح ان زوجك اعتاد ان تبادرى انتى بمصالحته فى كل الاحوال سواء هو المخطىء او لا ؟؟و بالتالى فاصبح فى كل الاحوال يتصرف معك هكذا اى لا يبالى بك ولا بزعلك فى حين تجرى انتى وتسعى لمصالحته وقد يقبل او يرفض ؟؟!! لذلك المفروض ان تكون الزوجة عاقلة لكن فى نفس الوقت لها كرامتها داخل بيتها مثلما يحافظ الزوج على كرامته وكبريائه وطالما هو من زعلك فيجب ان يصالحك والمصالحة لا تقلل من قدره ابدا بالعكس بل تعنى انه فكر فيما ضايقك ويحاول ان يعيد الحوار والتفاهم بينكما ...
انصحك انا الاخرى اذا ضايقك باى تصرف لا تظهرى له قهرك او زعلك وفى نفس الوقت تجنبى الكلام معه او الجلوس معه فى مكان واحد لتجعليه يشعر انه مخطىء وبالتالى يبادر لمصالحتك مع عدم الاخلال باى من التزاماتك اى اقضى طلباته اكله شربه ..الخ واذا تكلم معك وقال ماذا بك؟؟ ساعتها يفضل ان تتكلمى معه بهدوء عن تصرفاته التى تضايقك وتتمنى ان ياخذ باله منها واذا قال لك خلاص وصالحك لا تتمادى فيها وتكلمى طبيعى فقط وقت العتاب حاولى ان تضعى النقط فوق الحروف ومرة مع مرة تضعى كل النقط فوق الحروف وتنتهى المشكلة ...
اما نومك فى مكان اخر غير سريرك فهذا تصرف خاطىء ويكبر من حجم المشكلة واذا كانت الخلافات تتواجد طوال اليوم فبمجرد نوم الزوجين بجانب بعضهما تزول معظم الخلافات... لذلك نومك بجانبه وسيلة فعاله لحل اغلب المشكلات التى ممكن ان تواجهك ...
ربنا معك ويصلح لك الحال ...

اشكر لكم اخواتي الرد السريع
ولكن كيف اتعامل مع واحد اناني مايحب الانفسه حتى الخروج ومقابلة الاصدقاء لما ارجع يقهرني قهر ويرد علي ليش اتاخرتي اهو يطلع ويسهر ولما اعامله زي ما يعاملني يقول ما بقى الا هو طيب ليش انت تطلع وتتاخر وانا ماتاخر وتعل روحي ويتحكم فيني ما يقولي لاتروحين ولكن لما ارجع يقولي ليش تتاخرين وشفتو مشاوير الرياض شلون كريهه الواحد لمن يطلع من بيته يبيله 3ساعات عشان يرجع وياليته عن ديانه كان اقول ماعليه بس الشكوى على الله

الله يهديه انشاله لج ويهنيج المهم انتي لتضيقين خلقج ترا مافي ريال مثالي يعني كل شي يسوي ايجابي وصح يعني انتي تحدي نفسج شوفي انا كنت مثلج قبل ويمكن للحين بس اخف شوي يعني زوجي كان زعول لاقصى درجه مع انه انا بالي وسيع ومازعل واطوفله وايد شغلات يعني لي شفتي فيه شي او سالفه راح تتحول حق مشكله او زعل على طول غيري الموضوع وابدي بالكلمه الحلوه اذكرج مره ثانيه ترا واله الكلمه الحلوه لها تاثير عالريال يعني حتى لو من ورا قلبج ميخالف تحدي نفسج انج ماراح تخلينه يزعل منج عرفتي لي شفتي عصب وزعل ابتعدي عنه شوي لما يهدى وبس بعدين كل شي راح يرد مثل ما اهو ولا تذكرينه بعيوبه يعني لا تقوليله انت وايد عصبي ولا بسرعه تزعل وانت ولا مره سمعتني ولا ولامره طلعتني
عرفتني يعني عادي بالعكس ححسي انه شي حلو لو سوى الشي اللي انتي تقوليله اياه يعني مثلا لما يعصب ويزعل قوليله ((احبك حتى وانت زعلان وانت معصب مني وانت ما تطلعني ..زبكل الحالات احبك ))) خ ترا هاذي الجمله كله اقولها حق ريلي ولها نتيجه مضمونه
صدقيني بهالطريقه راح تقدرين تخلينه يسوي الشغلات اللي انتي تبينها وتكونين بينج وبين نفسج مرتاحه انج مو مقصره معاه بشي وانه ماتحسين انه انتي منكده حياته وبعدين اذا عالطلعه شوفي اساليب جديده عشان تبينيله انه تبين تطلعين يعني لا تقوليليه مل بطلع غلط عرفتي يعني سايسيه مثلا اليوم بشوف ذوقك وين توديني مع اني ماني طالعه وانتي تكونين ميته عالطلعه ......يعني على هالطريقه عرفتي اتمنى فراشتنا العزيزه اكون افدتج وقدرت اعبر عن الشي اللي بقوله عدل وتفهميني وجربي وقوليلي النتيجه

معقولة 28 يوم ما تتكلمون مع بعض على سبب تلفه يعني هذا الشي يمكن يسبب زعل بس مو لهذي الدرجة
أنا أنصحك بالدلع ثم الدلع
طرشيله مسج (علموك القساوة وانت طبعك حنون وكيف تجرح دموعي وانت في وسط العيون)أو اكتبي له ورقة وحطيها عند السرير هذا المسج سلاح فتاك استخدمه عند الزعل
وبعدها حاولي تبينين له انك مو طايقة فراقه من حركاتك وكلامك واكتبي له رسالة مثلاً تقولين له فيها انك مو قادرة اتعيشين بعيدة عنه وهاذي السوالف ولا تقولين انه هو الغلطان او ليش انزل نفسي له لا هذا زوجك ومافي بينكم اي حاجز وانتي ردي المياه الى مجاريها وتالي عاتبيه على كيفك بس بشطارة وسياسة
ومرة ثانية لما يزعلك او يرفض لك طلب ادلعي عليه قولي له افا ابو ....... ما هقيت اتردني او لالا اكيد فيك شي مو عادتك ترد لي طلب ومن هالصبغ ودوسي على نفسك شوي علشان توصلين للي تبينه
مع تحياتي