اعترافات بنت لسه متجوزتش

1. فما هي حكمه ربى من عدم زواجي للان ؟؟

اخواتى الغاليات دي فضفضة منى معكن وأتمنى تشاركوني باراءكوا الجميلة ودعواتكن
واتمنى ان كل اخت لم تتزوج بعد تشوف تاخر زواجها من المنظور ده صدقونى هترتاح كتير
اخواتى اعترف أنى كنت كاى فتاه تخطت الثلاثون بعده سنوات تمنيت كثيرا ان يرزقني الله بالزوج الذي أتمناه ويكون لي أسره صغيره جميله وأطفال أربيهم تربيه الإسلام ويبقوا من أحسن الشباب لكن لحكمه لا يعلمها إلا الله تأخر زواجي للان
وكثيرا ما كان الهم والحزن يصاحبنى لتأخر زواجي فانا والحمد لله لست قبيحة الشكل والحمد لله يشهد لي الجميع بالخلق والأدب وعلى درجه مقبولة من الثقافة ولست مثلا سليطة اللسان

فما هي حكمه ربى من عدم زواجي للان ؟؟

ومابين حزني وحيرتي تصادف إن كان في ضيافتنا احد الأقارب الذي وبدون اى كلام سابق في هذا الموضوع وجدت هذا القريب يقول لى " تعرفي ان ربنا بيحبك "
طبعا اقشعر بدني وفاضت دموعي بنفس اللحظة وقلتله من كل قلبي يارب ربنا يكون بيحبنى وأنا أطول وسألته بس ليه قلتلى كده قالي ده مش كلامي ده كلام سيد الخلق سيدنا محمد صلى الله عليه وسلم عندما قال " قال عليه الصلاة والسلام: (رغِم أنفه، رغم أنفه، رغم أنفه، قيل من يا رسول الله؟ قال : من أدرك والديه عند الكبر أحدهما أو كلاهما ثم لم يدخل الجنة )
و انتى بتخدمى اهلك كل السنين دي يعنى ربنا راضى عنك ان شاء الله .
عندها توقف بي الزمن وشرد فكرى فى كلامه ياه ده صحيح عنده حق
كفاية لما بابا بحكم سنه تكثر طلباته منى فاحضر له ما يريد كفاية اسمع منه ربنا يديكى الصحة ، ربنا يسترك
ياه حلو قوى الدعاء بالستر ده مش بس ستر الجواز لا الستر فى حد ذاته حلو قوى
ويلاحقني كلما مريت إمامه بالدعاء لي بالصحة والستر وراحة البال وصلاح الحال
الأحسن من كده انه بقى دايما يقولى انه راضى عنى والحمد لله
" حاجه تريح القلب "
وحبيبتى ماما التي أقوم عنها بقدر استطاعتي بكل ما تريد وأقوم بكل واجبات المنزلية لترتاح هي بعد سنين من العطاء والجهد من اجلنا بالاضافه إلى أننا أصبحنا اكتر ارتباط عن ذي قبل
ياه ده صحيح ربنا بيحبنى قوى
عارفين بعدها بقيت والحمد لله أكثر تقبلا لتاخر زواجي يمكن كمان مبسوطة لاحساسى إن ربنا بيحبنى لانه اختارني عشان أساعد بابا وماما ونضحك سوا ، نهزر ، نتناقش ، نتكلم
عارفين حاسة إن ربنا بعتلى قريبنا ده عشان يوصلى رسالة على لسان ذلك القريب
صحيح بتمني جدا ان ربنا يرزقني الزوج الصالح اللى أتمناه ويكتبلى معاه الخير بس مبقيتش زعلانه زى الأول بالعكس اصبحت اكتر صبرا والأكثر والأغرب أنى بقيت اكتر طاعة لوالدي هو أنا مكنتش بعصيهم بس مبقيتش بتضايق لو زادت طلباته بالعكس بس ربنا يرضى عنى
الأجمل هو الإحساس اللي بقى يملاني دلوقت إن ربنا هيرزقنى بإذن الله بالزوج اللي أتمناه وأحسن كمان بفضل دعوات بابا وماما ورضاهم عنى ويارب يستجيب لى عن قريب باذن الله
دعواتكم اخواتى لى ولكل اخت تتمنى الزواج ربنا يسعد كل بنات المسلمين يارب ويسعدهم ويسعد كل متزوجه ويبارك للجميع فى اسرهم