البيكاتا من مطبخي بالصور

السلام عليكم
النهاردة جبت لكم طريقة عمل البيكاتا زي المطاعم و اللي عملها شيف مشهور اوي في التليفزيون وهو الشيف يسري
المهم انا جربتها و طلعت واو و كل اللي يدوقها عندي يطلبها تاني
ندخل في الموضوع
المكونات:
شرائح لحمة
جزر و كرفس و بصل مبشور
ملح
فلفل
زبدة
2 ملعقة دقيق
1/2 كوب كريمة طهي
لو عايزة تحطي مشروم و تبقي بيكاتا بالشامبينيون يبقي 1/2 كوب مشروم
للأسف انا زوجي مش بيحب المشروم
الطريقة:
حطي الزبدة و شوية زيت في مقلاية علي البوتاجاز و نحمر فيها اللحمة و عليها ملح و فلفل
نحط اللحمة في صينية و ندخلها الفرن تكمل سواها
مكان اللحمة نحط الجزر و البصل و الكرفس المفروم و نقلب لغاية ما يدبل
بعد ما يدبل نضيف الدقيق
و نقلب لغاية لما يمتزج مع بعضه
نضيف بعد كده 2 كوب ماء او شوربة علي الخليط ده
و نقلب لغاية ما يبقي سميك
نصفي الخليط السابق ده بمصفاة لنتخلص من الخضار المبشور
نرجع الصوص المتبقي في المقلاية تاني
نضيف عليه الكريمة و نقلب
ولو كنتي هتحطي مشروم فحمريه في زبدة في مقلاية تانية و ضيفيه مع الكريمة
نسيبها تغلي شوية بس مش كتير مع الكريمة
نحط اللحمة في المقلاية مع الصوص يغلي معاها مرة او اتنين عشان يتشرب الطعم
نغرف في طبق و بالهنا و الشفا
اتمني انها تعجبكم
معلش الاضاءة مش حلوة في الصور