السر الكبير للرزق

السلام عليكم
بنات انا اكتب هالموضوع لأن فيه آيه أو حديث ماني متذكره المهم ان تفسيره
ان من جعل الطاعه خالصه لوجه الله وابتغاء لمرضاته ربي يبسط عليه بالرزق ويرضيه
احنا دايم نستغفر ونسوي جدول كله عشان الزواج أو الذريه ونقول اننا بنستمر حتى لو
حققلنا ربي الي نبيه وسبحان الله الواحد يلهى لما ياخذ اللي يبيه
لكن لما تكون الطاعه والذكر ابتغاء لمرضاة الله سبحانه بتقعدين العمر كله تذكرينه
جاني ايميل وشوفو وش تقول الي كاتبته
هالحكي مناسبته ان احنا دايم نردد طفشانه ,, متضايق ه
مايمر يوم الا ونقول ياربي طفش , زهق
خلونا نعرف ليه ..
أنا عرفت هالمعلومه وحبيت أنقلها لكم عشان كلنا نطبقها وناخذ أجر كل من طبقها
سبحان الله لما يخف ذكر الله بالقلب أيا كان سواء قرآن أو تسبيح أو تهليل أو حتى استغفار ....إلخ
وتزيد ذنوبنا سواء من سماع اغاني او كلام او نكت أو تعددت الأسباب والذنب واحد
ماعلينا ,, المهم
يبدا يغطي قلوبنا سبحان الله شي اسمه الران
قال تعالى ( كلا بل ران على قلوبهم ماكانوا يكسبون )
وهذا هو سبب الضيقات والطفش والحزن ,, عشان كذا أقل شي لما نستغفر كثير ونسوي طاعات يبدأ سبحان الله
هالغطاء يروح وسبحان الله نبدا نحس بفرح جوا قلوبنا ,,
صدقوني الذنوب زي الصدأ بالضبط تقدرون تراكمونه وتقدرون تزيلونه الصنفره مثل مايسوون المعامل .
بقولكم شي بس خليكم معي ثواني ,,
صح أحيانا نحس بضيقه لدرجة أحيانا ودك تصرخ عشان يروح شي بصدرك ,, هذي هي الذنوب عشان كذا أبسط شي
أستغفر ,, وبعد لو معاها ركعتين كذا حلوين ياسلام بيكون أحلى وأحلى
قال تعالى ( ومن أعرض عن ذكري فإن له معيشة ضنكا )
أحيانا ماتجيك أوقات تحس نفسك الهواء ضاق وماتقدر تتنفس من ضيقة الصدر , بالضبط نفس ضيقة النفس
اللي تجيك لما ترتفع فيك الطياره وبعد أعظم
شوفوا ربي اللي خلقنا شرح هالحاله
قال تعالى ( ومن يرد الله أن يهديه يشرح صدره للأسلام ومن يرد أن يضله يجعل صدره ضيقا حرجا كأنما يصعد
في السماء )
أكثروا من الأستغفار وذكر الله دائما وأبدا بتلاحظون كيف التغيير الواضح

• همسه : إذا كنت تشعر أنك لاتعيش جيدا فاعلم أنك لاتصلي جيدا

بنات أنا أعرف وحده ماتتغطى بس محجبه وحتى لما تسافر يعني لبسها مو لبس حجاب واسع
وطويل لا ,, وماشالله ربي موفقها ومسعدها ومسخر لها زوجها ماشالله تبارك الله
والسبب ان البنت قلبها نظيف ماتتطنز على أحد ولا تتكلم بظهر أحد ودايما بشوشه
والأهم من كذا ان صلاتها ماتتخيلون ماشالله خشوعها بالصلاة ..
فسبحان الله صحيح انها من ناحية الغطا يعني لكن مع ربها مره زينه
السر يابنات بنيتنا للعمل مو عشان زواج او حمل المفروض تكون خالصه لوجه الله
الصلاة لازم نحافظ عليها مو نصلي زي ماقال الرسول مثل نقر الديكه والأهم قلوبنا من دااخل
أعرف وحده عباتها على راسها وماتلبس بنطلونات ولاقصير لكن فيها شوفة نفس وسبحان
الله محد يحبها رغم تحشمها .. عشان كذا من اسباب الرزق والتوفيق بعد
قلبك وتعاملك مع الناس كل ماكنتي طيبه وقلبك صافي ومتواضعه وكنتي مرضيه والدينك
كل ماربي رزقك وحبب خلقه فيكي وتدعيلك الناس من كل جهه ..
أعتذر عن كلامي اذا مافيه أي ترابط أو ترتيب في الأفكار