العيب فينا ولا في المجتمع ناقشوني بردودكم اذا كنتم تحبوني

1. لكن للأسف .. الناس بتناقض نفسها او بتنافق نفسها قبل ما تنافقني


2. وكله بناء على طلب الزبونه مع اضافه لمساتي اذا هي سمحتلي طبعا بكده

السلام عليكم ورحمة الله وبركاته
حبايبي كل فراشات المنتدى
انا النهارده حابه اني اتناقش معاكم في امر مهم جدا بالنسبالي وبالنسبالكم
بس قبل كل شئ اتمنى تجاوبني وتناقشوني بكل صراحه بدون ماحد يتجمل او ينافق نفسه ( عذراً على الكلمة لكن ملقتش كلمة تعبر غيرها )
انا هكون صريحه معاكم ولذلك اتمنى تكونوا صريحين معايا
من خلال عملي في مجال الميك اب للآن لقيت ان الحمد لله اني نجحت بنسبة كبيرة جدا وسطكم
وانا عرضت شغلي كله بالصور ولم ازيف ولم استخدم فوتوشوب ابدا او غيره
وجدت اعجاب كبير وحماس اكبر .. شفت ردود مشجعه جدا وناس معجبه بالشغل بشكل كبير
لفت انتباهي ان 99 % من ردودكم بتميل للمكياج الناعم .. وحتى لما عملت ميك اب تقيل ( مع ان مكياجي الثقيل من وجهة نظر الميك اب الخليجي يعتبر خفيف ) لقيت برده ان في بنات علقت وقالت انه تقيل
اوك يعني اتفقنا جميعا ان الميك اب الخفيف حلو ومناسب ولقيت الكل مهبول عليه
انا بطبعي عندي مبدأ ان المكياج عملية لابراز الجمال وليس لإخفاؤه .. ومن المبدأ ده بقدم لكم الصور اللي انتم بتشوفوها ومكياجي اللي حاز اعجاب الاغلبيه

لكن للأسف .. الناس بتناقض نفسها او بتنافق نفسها قبل ما تنافقني

كل زبونه تجيلي او تكلمني تقوللي عايزه ميك اب خفيف وناعم .. واروح بروفات قبل المناسبات واطول بالي مع الزبونه واعمل كل اللي يرضيها ( خليكم فاكرين انها اصلا من البدايه عماله تأكد عليا تطلب ميك اب خفيف وناعم وهادي زي اللبنانيات والصور اللي على النت الخ الخ الخ ) ونطلع من البروفا متفقين على ميك اب معين وعاجبها ومقتنعه بيه

وكله بناء على طلب الزبونه مع اضافه لمساتي اذا هي سمحتلي طبعا بكده

لكن بلاقي العكس تماما بعد كده يوم التطبيق الفعلي الاقي الناس بتبدأ تتخلى عن المبدأ اللي طلبوني على اساسه من البدايه ويتهموني ان مكياجي باهت خفيف وبشوف في عيونهم نظره غيره من اي وحده عملت مكياج خليجي اوفر كله اصفر واحمر واخضر وازروق والوان ملهاش عد ولا حصر ورسومات غريبه عجيبه
الاغرب من كده ممكن تكون جايبالي صورة ميك اب ناعم واطبقها ليها بالظبط .. ومع ذلك بقول ملاحظاتي اذا كانت هتناسبها او لا وفي الاخر بعمل على رضاها وبيطلع المكياج حلو وراقي جدا لكن مبتكنش من جواها مقتنعه واللوم والعتب بيرجع عليا انا في الاخر
طيب انا مش ضد المكياج الاوفر .. الناس اذواق ومفيش اي مانع ولولا اختلاف الاذواق لبارت السلع ..
لكن عتبي هنا على حاجه مهمه .. طالما البنت من البدايه مش مقتنعه بالميك اب الهادي واللبناني والناعم ليه بتطلبه من الاول وليه بتبدي اعجابها بيه علنا قدام الناس وتيجي وقت الجد تقول لا مينفعش تكون فلانه وفلانه وفلانه حاطين في الزواج ميك اب اوفر وانا لا ؟؟؟؟
مع ان الموضوع المفروض لا يحسب بالطريقه دي .. كل وحده تعمل اللي على كيف كيفها المهم في النهايه الشكل النهائي والثقه في النفس والثقه في ذوقك اللي انتي اختارتيه
سؤالي هو ...
ليه التناقض ؟؟ ليه كل وحده بتناقض نفسها وثقتها في نفسها بتتهز بالسهوله دي ؟
اللي ابدت اعجابها بالميك اب الكلاسيك الناعم او غيره المفروض تكون قد رأيها وواثقه من رأيها وواثقه من نفسها ..
ليه بتبدوا اعجابكم بعمل معين وبطريقتي في الشغل لكن وقت الجد بتلوموا وتعتبوا عليا ؟؟؟
انا الى الان ولا مره زبونه طلتني عشان اعملها ميك اب ثقيل او خليجي لأن الناس عرفت شغلي وعرفت اسلوبي ان مكياجي ناعم وربي شاهد على كلامي ان مفيش اتصال ولا سؤال بيجيني الا وتكون الزبونه طالبه مكياج ناعم وتأكد وتعيد وتزيد في التأكيد ........ لكن للاسف بتخذلوني في النهايه
اتمنى كلامي ميزعلش حد ... بس زي ما انا كنت صريحه احب اللي حواليا يكونوا صريحين .. احنا اخوات وانا اللي بيحز في نفسي اني بعمل كل جهدي على ارضاء اي وحده تجيني لكن لانها اصلا من جواها مش مقتنعه بالميك اب الكلاسيك الناعم على نفسها وبتناقض نفسها وتناقضني ده بيخليها في الاخر غير راضيه عن اي شئ
عندي لكم رجاء .... قبل ما تطلبي اي كوافيره كوني من جواكي صريحه مع نفسك واعرفي انتي عايزه ايه قبل ما تخسري وقتك وتخسري غيرك وقته
بس ناقشوني بصراحه .. ومتبخلوش عليا بردودكم وصراحتكم
انا في الانتظار