الكيكة الشتوية هذا وقتها

السلام عليكم
انا دايما اسوي كيك وانا معروفة بانني فنانة كيك واهلي دايما يطلبون مني وصفات
ومن ضمن أكلاتي هي " الكيكة الشتوية" واسويها بالشتا بس .. ومن يومين اختي ذكرتني فيها وسويتها لهم فقلت انقلها للفراشات وانشالله تعجبكم
المقادير:
3 أكواب طحين
ربع كوب سكر (ويفضل الأسمر)
نص كوب فواكه مجففه او زبيب
نص كوب مكسرات نوع واحد
4 بيضات
1 كوب عسل
ربع كوب زيت
1 كوب ماء + 3 ملاعق قهوه نسكافيه
2 م ص باكينج باودر
نص ملعقه صغيره زنجبيل بودره
نص ملعقه صغيره دارسين بودره
نص ملعقه صغيرة هيل بودرة
ربع ملعقه صغيرة مسمار بودره
ذرة ملح
الطريقه:
ننخل الطحين والباكينج بادور ونضيف عليه البهارات والملح
نخلط البيض والسكر بالخلاط ونتركه يخلط حتى يرتفع
نخلط المكسرات والفواكه المجففة ونضيف عليهم ملعقه طحين ونخلطهم حتى يتغلفون مضبوط
بعدها وبالتدريج نضيف على خليط البيض ، العسل وسائل القهوه والزيت والطحين ( كل مره شوسه من كل مقدار) حتى تخلص المقادير والخلاط طبعا شغال
بعدها نضيف خليط المكسرات والفواكه ونخلطه باليد
نصبه في قالب الخبز (المدهون مسبقا) وندخله الفرن مدة 45 دقيقة (حرارة متوسطة)
وبعد ما تبرد ممكن تقدمينها ساده او ترشين عليها سكر بودره او تغطينها بتغليفة الجبن والعسل
اتمنى تعجبكم لانها لذيذه ودافيه للشتاء
.