انتي ياعروسة فرحك قرب ادخلي الموضوع ده يهمك

1. السلام عليكم ورحمة الله وبركاته


2. خليكوا معاي من البداية للنهاية باذن الله تعالي


3. شوفي ياقمر انتي وهي


4. المهم نرجع لموضوعنا وباختصار

السلام عليكم ورحمة الله وبركاته

حبيباتي الفراشات العروسات اللي علي وش جواز(وش جواز بنقولها في مصر للي مثلا باقي علي فرحها بالكتير 6 شهور عشان ما تيجي واحدة تقولي ايه الفرق بين وش الجواز وضهره )يعني اللي لسه مخطوبة تتفضل برضه تقرا مش مهم بكره يجي يومها
ربنا يارب يتمم لكل واحدة فيكم علي خير ويسخر لها جوزها يارب ويرزقها بالذرية الصالحة ويبارك لها في جوزها واطفالها وبيتها ويبعد عنهم شياطين الانس والجن
المهم يابنات انا طرحت موضوعي ده لاني بصراحة شفت في مواضيع كتير قوي في قسم عروس الفراشة البنات خايفين ومرعوبين من الجواز وتحديدا من ليلةالدخلة مش عارفة ليه كان العريس ده عفريت والا حاجة لا سمح الله بيثير الرعب والخوف كل ما البنت تفتكر انها هتتجمع معاه في بيت واحد وكان ليلة الدخلة ديه مثلا ليلة القبض علي العروسة والا حتي ليلة القبض علي بكيزة وزغلول(ده مسلسل مصري قديم شوي بس كوميدي جدا مش موضعنا دلوقت )المهم
يابنات وياعرايس بجد اسمعوا نصيحة واحدة متجوزة من تلات سنين والحمد لله رب العالمين وماشاء الله تبارك الله ومن غير حسد سعيدة مع جوزها ويارب يديم علينا وعلي امته السعادة والاستقرار وهدوء البال وكله بفضل الله وحده مش هنقول لكم بقي شطارة ستات والا شغل حريم زي ما الناس الجاهلة تقول لا كله بفضل الله وحده وطالما كل طرف يراعي ربه في الطرف الاخر يبقي ربنا يديم عليهم ساعدته ورضاه

خليكوا معاي من البداية للنهاية باذن الله تعالي

اولا جوزك ده اللي هتتجمعي معاه في ليلة دخلتك هو خطيبك يعني اللي اخترتيه برضاكي محدش غصبك عليه(الا طبعا انك كنت خايفة تعنسي والا حاجة فلما شفتيه قلتي له تعال نار جوازتك والا جنة العنوسة) جه اتقدم لك وشافك وشفتيه وربنا جمع بينكم بالحلال والف بين قلوبكم بكلمته وبرضاه وهو ده نصيبك اللي ربنا سبحانه وتعالي كاتبه لك من قبل ما تتخلقي والا انتي والا هو اساسا . وهو ده برضه اللي قعد رايح جاي عليكي مرة في الاسبوع مرة في الشهر حتي مرة كل ست اشهر(علي حسب الحكومة في البيت عندكم ما بتقرر زيارات السجناء) مش مهم وهو برضه اللي صرف عليكي فواتير موبايل براتبه كل وبالديون كله عشان يفضل يقولك كلام زي بحبك وحشتني هشوفك امته كلميني ضروري والكلام الفاضي اللي كلنا عارفينه ده المهم ان هو ده اللي قعدتي معاه وعرفتيه وعرفتي طبعه ومزاجه وكل تفاصيل حياته وهو اللي بقي يسال عليكي لو عندك امتحان والا تعبانة لا قدر الله هو اللي بقي يخفف عنك لو متضايقة من شيء هو نصك التاني زي ما بنقول(مش هقول طبعا هو ده اللي دفع دم قلبه وباس ايد وراس ابوك وكل رجالة عيلتك وشال وشيل هدايا منها ماخف وزنه وزاد سعره ومنها ما زاد وزنه وسعره عشان يتجوزك ولف علي عيلتك بيت بيت عشان يراضيهم عشان يتجوزك وفضل يبعت ناس ويجيب ناس ويودي ناس من اهله مش موضعنا دلوقت كلنا عارفين هو بيتبهدل قد ايه العريس ده لحد ما يفوز بالقمر ) يعني نقدر نقول حب حقيقي في حياتك فضلتي تحلمي بيه من يوم ما كبرتي لا وحب حلال بشرع الله حلل لكم كل حاجة وقربكم من بعض وجمع بينكم في نصيبه وقسمته يبقي هو ده فعلا حلم عمرك صح والا لا؟
ثانيا : انتي من يوم ما الاخ ده دخل بيتكم وانتي عارفة اكيد يعني ايه جواز يعني متخيلة الموقف وعارفة كل حاجة(متجيش واحدة تقولي ما اعرفش النت ياحلوة ما خلي شيء خلوا الكلام لجدتي وجدتك:0100:انما جيلنا ده كله عارف كل حاجة وقاري وفاهم كل حاجة جيل مثقف من الاخر)يعني عارفة يعني ايه جواز ويعني ايه حياة زوجية واسرية وواجب كل فرد فيكم ناحية التاني ومتخيلة او راسمة تخيل ازاي هتمشي حياتك معاه طبعا بعد مشيئة الله وحده
ثالثا : نيجي للمهم دلوقت اجتمعنا وحددنا ميعاد الفرح واخينا دفع المهر زي ما طلبتوا ونزلتوا هاتك ياشرا اشيء عفش اشي هدوم اشي دهب اشي سجاد اشي ستاير اشي مطبخ اشي مفارش اشي اشي اشي اشي
وفستان الفرح اخترناه والزفة اخترناها والمعازيم نقينا كروت دعوتهم والفرح حجزنا قاعته ولحد الكيكة اخترناها والاوتيل حجزناه ولحد مفرش السرير اخترنا لونه طيب وبعدين؟؟؟؟فين المفيد بقي هو صاحبنا ده عمال يكع(يكع بالمصري زي ما بنقول بالفصحي كده يذرف دما بس يكع معناها يذرف فلوس)عشان الفرح ومستني اليوم ده بفروغ الصدر وقاعد يقول ياسلالالالالالالالالالالالالالالالالالالالالام
وبعدين ده بقي يابنات اللي عاوزكم فيه(معاكم بثينة كامل ده في مصر وفوزية الدريع في الخليج )

شوفي ياقمر انتي وهي

خوفك من ليلة الدخلة ده اصلا مالوش لزوم اوعي تخليه يكسر فرحتك والا يشغل بالك ابدا ابدا ويخليكي تنسي جوزك وحبه ليكي وتضحياته عشانك ويخليكي تتخيلي انه وحش كاسر عاوز يلتهم فريسته لالالالالالالالالالالالالا كل الستات اللي قبلك واللي بعدك عدا عليهم اليوم ده بس فيهم اللي عدي يومه ده وكان فعلا ليلة العمر واحلي ليلة في العمر وبيفتكرها بكل خير وفيهم اللي عدي عليه زي مايكون اسود ليلة في العمر انتي اختاري هتمشيها ازاي الليلة ديه؟؟؟ وبجد بجد كل ما تبقي ليلتك حلوة وتستمعي بيها كل ماحياتك وايامك اللي جاية بعدها يوم بعد يوم هتعيشها باذن الله اسعد واسعد وكل ما تزودي همومك في اليوم ده كل ما هتبقي ايامك بعده اصعب واصعب
تعرفوا بعد الجواز عرفت ان العريس هو الفريسة في اليوم ده مش العروسة (ياعيني بيكون خايف والله زينا ويمكن اكتر لانه لو احنا البنات عيطنا وقلنا له معلش خلينا ليوم تاني تعبانة وعاوز انام بينام في القوضة التانية والا حتي علي الكنبة وهو مكسور الخاطر وخايف من بكره وبيقول ماتخلينا النهاردة انا مرتب حالي للنهاردة وامي شارياة لي رطلين جمبري واستكوزا عشان النهاردة وقعدت تعلف في زي دكر البط وتقولي كل يابني وارفع راسنا لسه هستني بكره تاني واظن المتجوزات فاهمني كويس وفاهمين قصدي)

المهم نرجع لموضوعنا وباختصار

يابنات مالوش داعي خوفك من ليلة الدخلة ابدا بجد زي ما بيقولوا شكه دبوس والا اقل كمان يمكن اهم شيء انك ما تشديش نفسك وتخليكي ريلاكس علي الاخر وتعيشي لحظتك بمعني تلبسي افخم لانجيري وارق لانجيري عندك وتشتريه علي مزاجك(واوعي تستخسري :0100 ويكون من روب وقميص عشان تخلعي الروب ساعة ما تنامي وتخلي القطم ده متشال بعد كده عشان تلبسيه في ذكري جوازكم وكل مناسبة حلوة بينكم بعد كده(مش قلة قمصان بس هو بيفضل فاكر شكلك بيه طول عمره لانه اول مرة يتكشف عليكي بالمنظر ده فبيكون زي الجعان ياعيني اللي عمره ما هينسي منظر الكيكة اللي اتحطت قدامه) والبارفان بقي تحطي نوع من اللي يدوخ ويلين الحديد ويكون ماركة مشهورة عشان يقعد فتره عليكي ما يروح علي طول وبلاش المخلطات لانها تبقع الهدوم (عاوزين شغل جامد من اولها ان شاء الله) وتقعدي معاه وتكوني مجهزة مثلا صينية فيها عصير متقدم للعرايس او مثلا تطلبينه من الفندق يجهزه المهم يعني ايه ترتبيها بمعرفتك تسولفي شوي تفتكروا الفرح والزفة وتساليه ايه رايك في النهاردة كنت حلوة والا لا شوي تحكي له عن يومك شوي ومعاناتك مع الكوافيرة والفستان وتقله وكده يعني وتفكريه برضه بانه ازاي حفي عشان يتجوزك وانكم اخيرا اهه مع بعض الحمد لله وحده وبس عيشوا حياتكم بقي بس المهم لو استني بقي لحد ما تخلصوا كل السوالف ديه والا هتلاقيه نام وصوت شخيره جاب الجيران ياما هيقولك خلينا نشوف اللي ورانا ونسولف بعدين الخلاصة يعني مشيها عادي هو هياكلك يعني
وتحطي ميك اب خفيف لازم طبعا تشيلي الميك اب بتاع الفرح عشان تتوضي وتصلوا ركعتين وكمان طبعا ميك اب الفرح لايق مع الفستان والفرح فمش هيكون لطيف مع الانجيري وهيخليكي متكلفة قوي وتاخدي لك دش دافي يريح اعصابك وبعدين تسيبي الامور تاخد مجرياتها الطبيعية بمعني زي ما يوديك التيار روحي وماتخافيش لان اللي سايق المركب جوزك حبيبيك وهيخاف عليكي اكتر من روحه
وطبعا ما تنسيش تصلي انتي وهو اول ما تدخلوا الاوضة تصلوا ركعتين وتدعوا الدعاء الماثور لسيدنا محمد صلي الله عليه وسلم وتتبعوا سنته في الامر ده عشان تبدا حياتكم بسنة الرسول عليه افضل الصلاة والسلام وربنا يبارك لكم في بعضكم
وبجد بجد طول ما انتي مش حاطة في دماغك خوف والا قلق والا كلام فاضي من ده عمرك ما هتحسي بحاجة بالعكس هتيجي بعد الجواز تقولي ياريت كل ايامي تكون زي ليلة دخلتي وبعد الجواز تقعدي تفتكري زكرياتها وتقولي هها كان يوم جميل قوي قوي قوي ياسلام لو يرجع تاني بجد كنت هعمل كذا واسوي كذا وتقعدي تفتكري مع جوزك حبيبك الكلام ده وتسمعي منه كل المستخبي
وخدي بالك الرجالة ما بينسوش حاجة يعني لو نكدتي عليه ليلتها وفضلتي طول عمرك تصالحي فيه عمره ما هينسي لك ابدا مش هقول يعني هيضربك عشان الموضوع ده بعدين بس كل شوية هيقعد يقولك لحد ما يزهقك انتي نكدتي علينا يوم الفرح انتي سويتي كذا انتي عملتي كذا وللاسف الليالي زي كده مش بترجع ابدا تاني فمشيها يومها زي ماهو عاوز وانتي حابة عشان ما تندميش في وقت ما ينفعش ترجعي فيه تاني
واخر نصيحة هقولها لك اوعي تسمعي كلام البنات اللي يقولوا لك ديه ليلة سودا وشد وجذب وتقطيع ومعارك وعمليات جراحية ومشارط وسكاكين وزهق وعياط ومش عارف ايه دول استغفر الله العظيم ما اسميهم الا شياطين انس تستكر عليكي انك تكوني سعيدة وتعيشي ليلتك سعيدة عاوزاكي من الاول قلقانة عشان تخرب عليكي وتخرب حالك مع جوزك لانها بتكون في الغالب متجوزة مش عاوزة تشوف حد اسعد منها او متجوزة وتعيسة وعاوزة الناس كلها تبقي زيها تعيسة ما تعرفش انه كله بامر الله سبحانه وتعالي او حتي هنقول ان نيتها سليمة وقضت يومها بالمنظر ده بحقيقي فعاوزاكي تكوني متحسبة ومتحاملة للموقف ده بس مش كل الناس كده يعني تقريبا 80 في الميه من الناس اليوم ده بيعدي لذيذ عليهم من غير متاعب مش شرط ان فلانة تعبت يبقي انا اتعب زيها(صدقوني انا ياما شفت منهم والله ولما يعرفوا انك كويسة وتكلميهم بتضحكي يبقي كانك خلفتي عهد معاهم انك تنكدي علي نفسك وجوزك ليلة دخلتك منهم لله كل ما يعمل كده في اي عروسة)
والف مبروك ياعروسة ياقمر انتي وهي واعزموني علي افراحكم بقي وانا اسمعكم احلي زغرودة
وجاهزة للرد علي استفسار والردود بتاعتكم بقي جهزوها ياقمرات لان مش معقول اتعب واعمل موضوع وانتي ياست انتي وهي مستخسرين في كلمة شكرا والا ايه؟لو ما عجبكيش الموضوع قولي مش حلو وامشي وصدقيني مش هزعل منك ياقمر انت وهي