بسبوسه بالشوكولاته

هلا فراشات
جايبتلكم اليوم مقادير وطريقة عمل بسبوسه بالشوكولاته غريبه صح
مره لذيذة بتاكلو اصبيعكم وراها
بيني وينكم اخذت المقادير من احد المنتديات بس ما اذكر الاسم لا تعلمو احد
حفظته عندي فتره
بس يوم من الايام لما شهرزاد قالت لشهريار
اقصد انا قولت لحالي << يا حرمه ليش ما تتسنعي وتطبخي لزوجك شي جديد >> وما جت فبالي إلا هذي البسبوسه
وبصراحه جربتها ووايد عجبت زوجي
عاد المدح الي إجاني منه كان غير
و انا من غير شي شايفه حالي
وقولت ابي مدح زياده وسويت غيرها يوم الثاني ووديتها بيت اهلي
قولتلهم لا تاكلوها إلا لما ارجع بيتي عااد هم نفذو طلبي من غير نقاش >> مسيطره عليهم <<
المهم
طلعت من بيت اهلي و روحت لبيتي
اول ما اوصل بيتي يجيني اتصال من اختي
>> ألو
اختي بكل برود: كيفك؟
>> الحمدالله
اختى من غير مقدمات: ابي مقادير البسبوسه الي سويتيها اليوم
عاد انا سويت عمري حاسده ورديت عليها ببرود هذي اسرار المهنه
اختى: كيفك وسكرت >> بيب بيب بيب
وطرشتلها المقادير بالمسج >> عشان لا تسويلي سالفه << حنونه انا
النهايه انه كل الي جربو هذي البسبوسه طلبو مقاديرها
وقولت خلي بعد الفراشات يجربوها
المهم ما بطول الهذره الي مالها فايده مع اني حكيتلكم قصه حياتي
هذي هي المقادير والطريقه
وان شاء الله تستفيدو منها وتطبقوها
ولا تبخلو على بالردودكم الحلوه
جهزو عدة الطبخ و يلا نبدأ
بسبوسة الشوكلاتة مع الجلاكسي
المقادير :
3 حبات بيض + رشة فانيلا
فنجال شاى زيت
علبة قشطة نستلة <<<<<< وبنفس العلبة نعبي ====
(2/1 1 علبة سميد + 2/1 علبة جوز هند + 1 علبة سكر )
1 ملعقة طعام نسكافية
1 ملعقة طعام كاكاو
1 ملعقة طعام باكينج بودر
التغطية :
علبة حليب نستلة المركز المحلى
2 جلاكسي سادة
اول شي نسخن الفرن على درجة حرارة 180 وندهن صينية متوسطة بقليل من الطحينية
والان نبدا بخلط المقادير السائئلة مع بعض ثم نضع عليها الكاكاو والنسكافي ونخلط حتى يذوب النسكافية قليلا
ثم نضع عليها المقادير الجافة ونخلط جيدا حتى تتجانس ثم تصب في الصينية وتدخل الفرن حتى النضج
والان بعد ان استوت وطلعناها من الفرن نضع عليها النستلة ممكن العلبة كلها وممكن نصف العلبة طبعا يرجع لذوقك عن نفسي حطيت نصف العلبة ثم برشت واحد جلاكسي على وجهها وتركتها حتى تبرد ثم برشت الثاني وقطعتها وقدمتها
وماشاء الله اكلوها العيال من وقتها <<< عليهم بالعافية ياقلبي
لا تنسوني بردودكم الحلوه
تشاو