بفسخ الخطوبه ابي ارائكم والو حركات لاتحرميني من رائيك

وينكم صبايا الموضوع مازمني ابي احد يفكر معاي

الله يكون بعونك ي الغلا

اول شي سمورة احب ابارك لك الملكة و دعواتي لك بالسعادة والهناء ياعروس .. وأهلا فيكي بيننا اخت وصديقة وفراشة تفيدينا و تستفيدي من وجودنا جميعا حول بعض
بخصوص اللي صاير معاكي خليني اقولك اول شي انك تشيليلي فكرة فسخ الملكة من راسك اول شي ولا عاد تفكري بهالموضوع ابدا الا في الحالات التالية : ( الضرب - قذارة اللسان - المخدرات او المسكرلاسمح الله وطبعا اسوء و اصعب شي الدين الفاسد) وربي يكفينا ويكفيكي شر الناس اللي من هالنوع .. ، لأن أي شي ثاني له حل و طريقة في التعامل مناسبة اما الأسباب السابقة تحتاج حلول جذرية غالبا ما تقدري لوحدك تتعاملي معاها .
نيجي لمشكلتك ياجميلة .. اللي فهمته انك مملكة لكي الحين شهر ونص والعريس ما اتصل ولا أرسل لك حتى و كمان حسيتي فيه برود من ناحيته و من ناحية أهله كمان .. وعلى هالأساس راح اقولك شغلة ، سمورة ياقلبي كلنا أول ما انخطبنا كان ببالنا ان فترة الملكة دي بتكون وردية و العريس بيكون مرة متلهف علينا ومن ثاني يوم يتصل و كلام كثير و لما ملكنا كل وحدة ببساطة
عاشت قصتها الخاصة .. فيه اللي اتصل بنفس اليوم وفيه اللي من قبل وفيه اللي بعد اسبوع وفيه اللي ما اتصل اساسا وقضاها بس واتس اب ومسجات او حتي بي بي المهم انه كل زوجين ووضعهم الخاص وكل ما استوعبتي الفكرة دي اسرع صدقيني بترتاحي انا فاهمة ان في اساسيات تتوقعيها بس صدقيني حتى الأساسيات مو ضروري تصير بالشكل نفسه .. شوفي ياعيوني لازم كمان تحطي شغلة مهمة ببالك مادام انك الحين اتزوجتي : اول شي أبدا لا تقارني بين زوجك ووضعك و أي أحد تاني وثانيا لا تحطي حالك في وضع يخليكي مضطرة توضحي لأحد شي .. يعني لو احد من أهلك سألك ليش فلان ما يجي يزورك قولي لهم ومستعجلين على ايش ؟!!
كل شي بوقته حلو .. أو اي شي يخليهم يحسوا انهم هم اتدخلوا في شي ما يخصهم .. طبعا انا فاهمة انه طول على الزياة بس ترى قلقك زي الوقود اللي يزيد رغبتهم في السؤال وكل ما حسستيهم ان الدنيا كول ما راح يركزوا معاكي .. اذكر فترة من ايام الملكة زوجي ما كان
يجيني الا بالشهر مرة ويمكن سوا هالحركة شهرين واهلي بدأو يسألوا .. قلت لهم : متفقين و عادي كل واحد مننا عنده شغل وملحقين نقعد سوا العمر كله ان شاء الله .. ومع الوقت ما احد صار منتبه (طبعا انا كنت من جوا اغلي بس لوحدي) فأبغاكي ما تفكري في شكلك
قدام اهلك او اي أحد لأنه كل واحد وله وضعه وظروفه ، أما بخصوص عدم اهتمامه فصدقيني مافي شي يدل على كدا ابدا حتى اختفاؤه لأنه في اوقات كثير يكون الشاب من جد محرج ومو عارف كيف يتعامل معك ، و هالشي يعطله كثير في انه ياخذ خطوة الاتصال .. وكمان يمكن
هو شايف الأهل ما يتواصلوا سوا وحاس انه عيب هو يكلمك او خايف يضايق احد .. بالنهاية سمورة أصابع يدك مو زي بعض ومو كل الشبابعلى نفس الدرجة من الجرأة .. فيه اللي جريئ بالكلام وفيه اللي بالفعل .. وفيه اللي مع الوقت يتجرأ ويحتاج دفشة صغنونة (مخفية طبعا)
وبعدين انا اعرف عوائل متعودين يعيشوا مع نفسهم بس .. يعني لا لهم معارف ولا اصحاب يزاوروهم ولا شي بس افراد الأسرة وطبعا نتيجة لهذا الطبع تلاقيهم كمان يلاقوا صعوبة في موضوع التواصل ( وهاذا طبعا ما يعني انهم بطالين لا سمح الله) ويمكن اهل زوجك من هالنوع !!!
فانتي عليكي بانك تتعوذي من الشيطان وتدعي بصلاتك ان الله يريح قلبك و يهدي سركم ويكتبلك الأصلح لكم .. وان شاء ما بيصير الا اللي يريحك .
برافوا عليكي انك ما اخذتي رأي اختك وكلمتي اخته .. فعلا الأفضل ما تكلميها لأن هي شي و أخوها شي تاني و اليوم اذا دخلتيها بينكم ما بتعرفي بكرا تطلعيها من اموركم الخاصة ، انتي بس خليكي لطيفة معاها كالعادة وخلي سؤالك عنها هي وامها بس ولو هي جابت سيرة اسمعي
بدون تعليق ولو لا خلاص لا تسألي ..، صدقيني هو راح يكلمك بالنهاية ان طالت او قصرت وهالشي هو المفروض منه و اكيد ما بتبدئي انتي .
بس اعطيه الوقت لأن فيه كثير شباب يحتاجوا هالشي .. وكثير عرايس وانا منهم عانو من خجل ازواجهم بالبداية ولكن مع الوقت اتغير الوضع ، وعلى فكرة طبيعي خجلهم لأن كل شي يسووه يبغالوا جرأة و مغامرة لأنهم المفروض ما يعرفوا كيف راح تكون ردة فعلك .. فتلاقيه متخوف
لايصدمك بكلمة والا حركة تفضحه عند اهلك لكن مع الوقت خلاص يعرف طبعك و يتصرف وفقا له ..
وعلى كل في حالتك سمورة وطالما فرحكم ما اتحدد راح انصحك بشغلة طولي بالك قد ما تقدري واتشاغلي عن هالموضوع
بأي شي لأن الزواج ترى يبغاله طولة بال والرجال بالذات لو ما طولتي بالك معاهم تطقي تاني يوم (اسم الله عليكي يالغالية)
راح يكلمك ان طال الوقت والا قصر لأن اي شاب اكيد يحب يتعرف على زوجته قبل الفرح ، وترى الجماعة مو مسترخصين ولاشي بس البيوت اسرار و اليوم ما تعرفي السبب بكرا يبين معاكي .. ترى ياما كنت اعصب على امور ولما اعرف سببها اروق و اقول والله كنت مكبرة الهرجة .. حبيبتي اتذكري المثل اللي يقول مافي حلاوة من غير نار و كل ما حسيتي بصعوبة هادا معناه ان وراها ايام حلوة بقدر هالصعوبات ان شاء الله ، اتفائلي وادعي ربك و ان شاء الله ربي بيريح قلبك .

ياحياتي يالو حركات ريحتيني حتى رجعت قريت الكلام كذا مره انا اكبر وحده في اخواني واول وحده بتتزوج عشان كذا ماني عارفه اتصرف بس كلامك من جد ريحني
وهو فعلا خجول من جلستي معاه في الملكه ان شالله ربي يوفقني معاه
ويريح بالك هاذا عشمي فيك والله الله يسعد قلبك

حبيبتي هلابك .. واي وقت تحتاجينا فيه اكيد ما احد بيقصر معاكي وياما دخلت على اخواتي ايام الملكة سواء بعد زيارته او مكالمته
وانا اصيح ما ابغاه لكن والله بالتفكير والعقل ارجع اشوف انه
من جد انسب شخص لي وترى من جد احنا طول الوقت في حرب
مع الشيطان لأنه كثير اوقات تتفسر تصرفاتهم بالنسبة لنا بشكل مرة
سيء ومانلاقي اللي ينصحنا صح او نخاف نحي لأحد وتلاقينا نجيب العيد
عشان كدا لو حصل واتنرفزتي من شي لاتقرري ابدا الا في ساعة صفا
تكوني كدا راجعة من زيارة حلوة او قعدة حلوة وقتها شوفي اذا الموضوع سيء
اما مع الضغط اللي انتي فيه مرة لا تاخذي قرارات ياعسل ..
ههه تعرفي انا من جد نفسي في ايش لنفسي اول وحدة طبعا ولباقي الصبايا ؟!!! نفسي نتعلم من امهاتنا القدامه
كيف نكون ثقال .. يعني شفتي لما كانوا يقولوا لنا المثل الشعبي : الثقل صنعة !! وربي الحين فهمت .. من جد الثقل
فعلا صنعة و فن كمان .. يا اختي احس قلبي رقيق وبسهولة اشتاق واتكلم !! يعني انا مو مطفوقة كمان ... بس في بنات
مرة صبورين و يعرفوا متي يرموا الكلمة و كيف و ليش !! تلاقي الرجال ما يعرف ياخذ منها لا حق ولا باطل !!
نفسي اكون كذا !! اذا اتعلمتي سمورة دخيلك علميني
كيف ؟!!!

قلبو
سمورة
ألف مبروك
بصراحة لمن شفت موضوعك وانك تبي تفسخي
توقعت انه في سبب قوي
صحيح انه انا توني بنت
بس حبيت ارد عليك قبل ماطلع
ماشوف هذا سبب انك تفسخي خطوبتك عشان مايكلمك او يجي عندك
لاتستعجلين باتخاذ اي قرار وبعدها تندمي عليه
انا مع اختي الو حركاات بكل كلمة قالتها
فيه شباب يكون مستحيين بالبدايه وفيه شباب يكون كذا طبعهم بالبدايه وبعدها عادي
او ممكن يكون مشغول او ممكن فترة الملكة راح تكون طويله عشان كذا ماكلمك انه راح تكون فترة الملكة طويله وانه اذا كثرة الاتصالات والجيات والروحات راح يكون فيه ملل
لاتهدمي حياتك بيدك بعدها تندمي
عليك بالاستغفار والدعاء
وان شاء الله بنفرح فيك وراح تجهزي مع العرايس
لاتنسيني من دعواتك

مشكوره دانه القلوب ع النصيحه والو حركات ان شالله بصير ثقيله اصلا بعد محصل منه هتصرف صار عندي فتور من ناحيته
الله يعيني ويعديها ع خير
فيكم الخير والله

دعواتي لك في ظهر الغيب يا الغلا ~
نصحية مني اقرأي كثير في انماط الشخصية وعن كل مايخص الحياة المستقبلية راح تتغير وجهه نظرك
وراح تعيشي بسعادة ،’ )

ماشاءالله الو حركآت والصبايا ماقصروا
الاغلبيه كذا و زوجي العزيز واحد منهم بس الحمدلله دحين الوضع تغير مرره
يبغالنا شويه صبر وماننظر لعلاقة الاخرين كيف في بعض لانو زي مالقالت الو لكل زوجين
حياة خاصة فيهم ومو لازم يكونوا زي باقي الناس في طريقة تعاملهم مع بعض ..,
موفقه يارب .. وربي يتمم لك على خير