تجربتي مع السمنه أتمنى الكل يدخل وبالأخص الدبيات

1. وقصتي كالتالي :


2. 6- ابتعدت عن الحلويات والدهون والشوكولاته بالرغم من حبي الشديد لها .

السلام عليكم ورحمة الله وبركاته
في موضوعي هذا حبيت اكتب للبنات عشان يستفيدون وبالأخص اللاتي يعانون من السمنة

وقصتي كالتالي :

بعد ولادتي بالمولود الأول رحت أكل بشراهه ونفسي مفتوحة على الأكل على طول وأي وقت القى نفسي فاضية أفتح فمي وأكل ووقتي كله كنت فاضية وهمي كله ابلع في هالأكل ما لذ وطاب (الله لا يشغلنا إلا في طاعته ) ووزني يزيد شوي شوي الين وصل وزني 85مع العلم ان طولي 152 وزوجي ما يقول لي شي بخصوص الوزن وأنا قلت ما دام هو راضي وش علي ....
الين وقع الفاس بالراس وسافرت من مدينتي الى المدينة اللي فيها أهلي وجماعتي عشان عندنا مناسبة وكل من شافني قال وش هالسمنة واللي يطنز علي والي يقول تعالي يابطة حتى أبوي يطنز علي وأخواتي يقولون كأنك فلانة ...وحدة من الممثلات ما نبي نغتاب أحد ..... المهم زوجي يوم سمع هذا كله راح وجاب لي ريجيم من كتاب وسوى معي الريجيم عشان يشجعني , بس انتم تعرفون الريجيم ومشاكله النفسية والحرمان اللي نعيشه خلانا نتركه ونرجع للأكل أكثر من أول واستمريت على هالحال ثلاث سنين .........وبعدها جلست مع نفسي أفكر وأقول إلى متى السمنة هذي وإذا بغيت اشتري شي ما ألاقي مقاسي الا الدراعات وإذا ابلبس بنطلون يكون مقاسي 46ولازم البس بلوزة طويلة عشان تخفي العيوب ... وقررت ان اسوي ريجيم بس هالمرة ادلع نفسي عشان اتقبله واستمر عليه ومشيت على القاعدة النبوية (( نحن قوم لا نأكل حتى نجوع وإذا أكلنا لا نشبع )) وراح أكتب طريقتي في نقاط ....
1- ابتعدت عن الوجبات الإضافية كليا (ثلاث وجبات تكفي )
2- لا أكل حتى أشعر بالجوع الشديد مو أول ما أشعر بالجوع اروح اكل لا بس إذا شد الجوع وأول ما أشعر بالدوخة أروح أكل ثلاث تمرات وكوب لبن خال من الدسم ( اعتبرها وجبة رئيسية وليست إضافية ) .
3-واتبع نظام السعرات الحرارية (يعني أكل في اليوم من 700إلى 900) فقط هذا في الأول بس بعد كذة أزيدها إلى 1200سعرة .
4- بدل مأجلس عند التلفزيون أو النت امارس الرياضة كل يوم ولمدة ساعتين مثل المشي السريع لمدة ساعة وطلوع الدرج والنزول لمدة ربع ساعة وتمارين الأيروبيك ونط الحبل وأي شي أهم شي لمدة ساعتين وعشان تحلو التمارين في عيني اخليها زي اللعبة زي المشي السريع العب أنا وبنتي اللي عمرها 5سنوات وتمارين الأيروبيك مع بنتي اللي عمرها سنة .
5- اشرب شاهي أخضر بعد الوجبات اللي يحتوي على السنا مكي ( الرسول صلى الله عليه وسلم وصى فيه ) .

6- ابتعدت عن الحلويات والدهون والشوكولاته بالرغم من حبي الشديد لها .

7- كنت ازين وجبتي الرئيسية وأخليها تفتح النفس واتفنن فيها وأطول وأنا ازينها لأنه كلما طولتي وانتي تحضرينها تحرقين سعرات حرارية أكثر وتشعرين بأنك تقدرين هذي الوجبة التي لا تتجاوز ال300سعرة حرارية وعندما اكلها اتلذذ فيها وأكلها ببطء وفي جو رومانسي وأقول ام لذيذ (العب على عقلي ) ومع مرور الوقت سوف تحبين هذا النظام حتى لو كانت وجبتك خبز بر وزبادي .(صدقوني )
8- استخدمت نظام المكآفات ... يعني أحدد لنفسي وقت معين مثلاً اسبوعين وأحدد عدد من الكيلوات مثلاً 2كيلو أو 3كيلو وأقول اذا نقصت هذي الكيلوات في هذي الفترة اسوي لي كبسة أو أي أكل أنا أحبه أو اصبع كيتكات (ملاحظة -- الأكل الي تحبيه قللي كميته قد ما تقدرين يعني لا تتجاوزين ال500سعرة حرارية )
9- أحدد لنفسي مستوى معين من الكيلوات وأكافئ نفسي مكآفأة كبيرة ... يعني كلما نزلت 10كيلو بدون تحديد لمدة معينة اروح اتعشى في المطعم اللي أنا أحبه وأختار الأكل اللي انا أحبه وأحط في بالي أني في جو رومانسي وأكل ببطء واتلذذ في الأكل ولا يتجاوز أكلي ال800سعرة حرارية .
10- إذا بأروح عند ناس أكل وجبة خفيفة في البيت وإذا قدموا لي حلويات أو فطاير على طول أقول ما أحبه عشان استحي ما أمد يدي بعدين على الأكل اللي حطوه قدامي وما يشيلونة الا بعد ساعة ... وإذا جابوا الوجبة الرئيسية ابدأ بأكل السلطات والرز أكل عدد 15 لقمة بدون ماأحد يلاحظ وإذا كانوا مقدمين أنواع كثيرة أكل ثلاث لقمات من كل صنف أنا أحبه .
11- اتعمد دائما أن أكل بالشوكة حتى الكبسة والسلطة وأي شيء لأن الكمية تكون قليلة فيها أكثر من الملعقة .
12- استبدل العصائر المعلبة بالعصائر الطبيعية لأنها أقل في السعرات الحرارية .
ولي ستة أشهر على هالحال وأنا مرة مرتاحة عليه ووزني الآن 57وأطمح للمزيد وكل من رأني يسألني عن الريجيم اللي سويته وكيف خسيت علية لدرجة انه وحدة تقربلي سألتني كيف قدرتي تحرمين نفسك من الأكل الين خسيتي ... قلتلها ما حرمت نفسي وقلتلها على الطريقة .... وصار مقاسي في البنطلونات 32بعد ما كان 46 وجسمي ما ترهل أبداً لأني امارس الرياضة وسمعت كمان دكتور يقول إذا نقص الوزن بسرعة يرجع بسرعة أما إذا نقص ببطء يعني كل اسبوع كيلو أو كيلو ونص ما يرجع الوزن بسرعة وبالأخص إذا حافظتي على مستوى أكلك ...
واتمنى الكل يستفيد واللي بتجرب نظامي تقولي وتدعيلي . وأنا بأدعياها بعد وأي استفسار أو نصيحة أنا جاهزة ....