تجربتي مع شعري وأحلى تجربه الحمدلله

السلام عليكم ورحمة الله وبركاته ..
شوفوا حبيباتي هي الخلطة مو جديدة ولا من اختراعي بس زودت عليها كم حاجة
حتى يكون المفعول مكثف وقوي .. .. وكل البنات يعرفونها .
بس اللي ما يعرفونه البنات ان نتاائج هذي الخلطة تاخذ وقت طويل حتى تظهر
وتحتاج صبر ومثابرة .. والنتائج تستحق وربي ..
أنا شعري . مثل ما قلت شبه دهني ومجعد وخفيف يعني الشعره ضعيفة ما فيها ثقل
وهيئته تشبه هيئة الشعر المغربي ...
بدأت بالخلطة بداية هذي السنة تقريبا من شهر 1 او 2 وسمعتها من زميلاتي
ومن سكات رحت للعطار وقلت له أعطيني المكونات وبدأت فيها .. ع طول
في بداية كم اسبوع ما حسيت بفرق كبير .. وبعدين مع الوقت بدأ الناس من حولي يلاحظون تغير شعري
بدأوا يلاحظوا النعومة واللمعه .. وسألوني ايش مسوية فقلت لهم بس الخلطة اللي تكلموتوا عنها واستغربوا مره .. بس قلت لهم اذكروا الله
نجي للزيدة ..
الخلطة هي خلطة عباره عن
1 - خلطة الزيت
وكلها تشتريها من عند العطارين بزيارة واحده
زيت النارجين الاخضر
هذا مرره قديم والكل يعرفه وغني عن التعريف
زيت الجرجير ماركة الثلاثة بنات
وهذا تلاقيه قليل بس انا دائما اشتريه من عند بافرط او المرواني
وهوه افضل زيت جرجير جربته .. افضل حتى من اللي في المعاصر ..
ساق الحمام = الخوا جوا
سابلة
ماسكه ( سنانير ) ]
محلب
هذا ريحته شويه قوية .. اذا ما تتحملي الروائح القوية بلاش منه ..
وهذا الأعشاب تخلي العطار يطحنها لك مع بعض بكميات متساوية .. وما تكلفك كثير
انا اخذت كيلو ب 40 ريال .. وكان كثير وزعت منه على بنات خالتي وصاحبتي واخواتي ..
بعد ما تجهزي المكونات .. تاخذي جيك ماء أو برطمان كبير وتحطي فيه 2 فنجان شاي من الاعشاب
مع علبه النارجين وزيت الجرجير .. وتحطيهم في الشمس لمدة نهار كامل .. حتى يمتص الزيت مكونات الاعشاب ..
2 - وقت وضع الخلطة ع الراس
بد ما جهزنا الزيت ..
تاخذي مقدار فنجان قهوه من الزيت + بيضة + نصف علبة زبادي أو لبن كامل الدسم
+ فنجان شاي سدر + فنجان قهوه حناء .. ويمكن تستغني عن الحناء لو شعرك مصبوغ أو ناوية تصبغيه لان الحناء تعمل مثل الواقي على الشعر وما تخليه يصبغ
أفضل سدر تشتريه من عند محل بافرط . أصلي صافي ونظيف ومطحون ناعم ما يضايقك في الغسل
اللي عند المرواني مخلوط معاه حنا انتبهي .. :/
وتعجنيها مع بعض .. حتى تتكون عندك عجينة سائلة ثقيله ..
تقسمي شعرك وتوزعيها بمشط عريض وتلفي شعرك وتربطية بكيس
وتتركيه ع الاقل 4 ساعات . .وتغسلية بالشامبو عادي
وبعدها تستعملي اي حمام زيت
( انا افضل حمام الزيت ع البلسم لانه افضل بكثير وخاصة بديل الزيت من بانتين )
:::::::::::::::::::::::::
كلام مهم جدا جدا ...
كثير بنات في النت جربوا هذي الخلطة .. بس لقلة صبرهم ما أعطتهم النتائج اللي يبغوها
لا تتوقعي ان هذي الخلطة تخلي شعرك كأنه مفرود بالكيراتين لا .. بس
شعرك بيكون بأحسن حالاته الطبيعية .. وعلى حسب نوع شعرك بيكون ..
وعني .. شعري أبد ما افكر افرده ولا أعمل له كيراتين ولا اي علاج .. لاني اشوفه طبيعي جدا
ملاحظاتي على شعري .
أنه صار أنعم بكثير التجاعيد صار حجمها أكبر بعد ماكانت صغيرة ومتقاربه
وصار شعري .. أطول .. وأثقل ..
ماصار يتعبني بالأستشوار مثل أول .. ولون الشعر صار أغمق على حمره
.. التقصف معدوم .. ما عدا كم شعره محروقة من الأستشوار
مدة استخدامي للخلطة ما يقارب 10 شهور ومازلت مستمرة ..
استعملها كل جمعه .. بعد صلاة الظهر وأغسل شعري في الليل
وأيام الاسبوع أستعمل بس الزيت قبل ما اغسل شعري بثلاث ساعات ع الأقل
وفي النهاية .. دعواتكم لي بالتوفيق ..
الموضوع من أعدادي الشخصي .. ما عداا بعض الصور اخذتها من القوقل
: )