تجمع للعرايس اللي ما كملوا سنتين من زواجهم

1. السلام عليكم ورحمة الله وبركاته


2. كيفكم يالغاليات ..

السلام عليكم ورحمة الله وبركاته

كيفكم يالغاليات ..

حبيت أسوي تجمع للعرايس الجدد اللي ماكملوا سنتين من زواجهم .. بما أنها أول سنتين مهمة في الزواج واللي عليها راح تستمري لنهاية العمر بإذن الله .. نتناقش فيه عن كل شيء جديد يواجهك بالحياة الزوجية .. وكيف اتصرفتي مع المواقف اللي واجهتك .. وايش أحلى مافي الزواج .. وايش الطباع اللي تخلصتي منها وضحيتي من أجل استمرار سفينة الزواج .. والطباع اللي وجدتيها بزوجك وحاولتي تغيريها أو تخففيها لأنها ما عجبتك .. وكيف كانت بدايتك مع الطبخ وتنظيف البيت والمسؤولية الجديدة .. ووين سافرتي بشهر العسل .. وحملتي والا لسه .. يعني بالصراحة كل شيء نتكلم فيه ونتحاور عشان نفيد كل مقبلة على الزواج إن شالله .. وبالأخير نستفيد كلنا ونفيد غيرنا ..
راح أبدأ : طبعاً عروسة راح أكمل 8 شهور بعد يومين إن شالله .. تزوجت وسافرت لماليزيا بشهر العسل وكانت أحلى أيام حياتي .. جربت فيها كل مغامرة جديدة عشان أتذكر هالمغامرات على مر السنين .. كنت أتنقل مابين جدة والمنطقة الشرقية ما استقريت غير بعد 4 شهور من الزواج وهذا أثر على نفسيتي كثير بس الحمدلله جاتني سفرة هدية من زوجي بعد 3 شهور من الزواج وكانت رحلة للنمسا (انبسطت فيها كثير وشفت طبيعة ما عمري شفتها إلا بفيلم كرتون (هايدي) .. نجي من ناحية الطبخ والتنظيف بدأت رحلة الطبخ بعد شهر من زواجي كنت أطبخ أشياء جداً خفيفة وسهلة والحمد لله ما عمري حرقت أكلة ولا خبصتها (نعمة من ربي) ====>> أول مرة تطبخ في حياتها .. أما التنظيف طبعاً بدأ لما استقريت يعني 4 شهور دلع وسويت جدول كل أسبوعين أمسك غرفة وأنظفها تمام والغسيل كان على زوجي لأني برضو ما غسلت قبل كذا وعلمني ومشي حالي .. ام ايش كمان ؟؟ ايوا الطباع اللي تخلصت منها وباقي منها شيء بسيط (العناد) كنت أعاند على كل شيء بس لقيت إن العناد ما يجيب إلا المشاكل هذا من جهة و(الغيرة الزايدة) لحد الآن الله يعينني حتى أهله أغار منهم والحمدلله بدأت أخفف منها .. وزوجي الحمدلله من النوع المتفاهم جداً يعني كل شيء كان يتناقش فيه معايا بهدوء لين اقتنع .. ولاحظت إن زوجي من النوع المزوح جداً يعني دمه خفيف ويزودها أحياناً كنت ما أتقبل هالشيء وحاولت أخليه يخفف من هالطبع بس أبو طبيع ما يجوز عن طبعه .. كنا متفقين على إننا نجلس 4 شهور لين نستقر وبعدين نفكر بالحمل بس لحد الآن ما حصل حمل (الله يرزقني ويرزق الجميع إن شالله) .. وأحلى شيء بالزواج من وجهة نظري إني لقيت الإنسان اللي يشاركني بكل شيء والحمدلله .. والمواقف اللي واجهتني كثيرة وتصرفي كان في كل مرة غير (راح أقولها في المرة الجاية) ..
أترك المجال للعروسات الحلوات كل وحدة تكتب اللي تحبه خلونا نتشارك ونستفيد ..
ايش رأيكم ؟؟ يالله عاد شدوا الهمة ..