تخيلي تكون هدية طلوعك من النفاس زوجة ثانية وش بتسوين

السلام عليكم
مشاكل كثيرة صارت لي والى الان مستمرة
بس الحين زاد الطين بلة
للاسف بعد رجوع زوجي من سفرته صارحني بانه راح يتزوج علي
تخيلوا استقبلته احسن استقبال كان يوم عودته من السفر اهو نفس يوم طلوعي من النفاس
انا تعبت حيل
تخيلوا انه تعرف عليها هناك
كنت خايفة من بنات خالتي لكن للاسف سلمت منهم وماسلمت من غيرهم
يقولي احبج واموت فيج ومافيج شي ناقص بالعكس كاملة بس معجب في وحدة وافكر اتزوجها شرايج
تخيلوا ياخذ مشورتي في زواجه
طبعا انا كنت مفكرته بمزح في البداية وقلت له خلاص بروح اخطبها لك بس دلني بيتهم
قالي صج؟
حسيته يتكلم جد
سالته من صجك؟
قالي اي
تخيلوا
في ذيك اللحظة انكتمت انفاسي وضعت في تفكيرات مالها اول من اخر
بديت ابكي بصوت عالي
اخذني في حضنه وجلس يبكي معاي ويقولي مو بيدي اللي صار غصبا عني
لكن اذا انتي مو راضية خلاص انسي الموضوع ماكأن شي صار
عزمني في الليل عالعشا
طلبت منه يفتح جواله مارضى قلت له في رسايل منها قالي اي
ماتحملت وجلست ابكي ابكي
ماني قادرة اتحمل الخيانة
رجعت بيت اهلي وخبرت ابوه باللي سواه ولده
طبعا عمي ماقصر دق علي وطمني ان ماراح يصير الا الخير ولايحلم انه يتزوج وحدة ثانية
هاوش ولده وطرده من البيت وقاله ماترجع الا ومعاك زوجتك واذا فكرت تاخذ ثانية مابيك في بيتي وانسى ان لك اهل
جالي يعاتبني بكل هدوء ليش اخبر ابوه
قلت له ماتحملت الخيانة
قالي انا ماخنتج انا انفذ شرع الله والله حلل هالشي
قلت له انا اعتبرها خيانة انت ذبحتني وجرحتني
قالي بس انا ماقررت اتزوج عليج انا جاي استشيرج
قلت له وتتوقع بقولك عادي روح تزوج؟
انا ابيك لي بروحي مابي احد يشاركني فيك
انا انانية في حبك
قالي خلاص انسي الموضوع انا مابي اجرحج
والحين قراره انه ماراح يتزوج لكن للحين يكلمها
انا للحين بيت اهلي مارجعت شقتي وماراح ارجع الا لمن اتأكد انه تركها
قولوا لي شسوي
شلون اخليه يتركها
اليوم تخانقت معاه مره ثانية وقلت له مابيك استغنيت عنك وعن حبك
واذا تبيها تزوجها بس ابيك تطلقني
قالي تفكرين اني انا بتركج انا احبج ومابي اخسرج عشان وحدة توني اعرفها
كلامه يتناقض مع افعاله
يحبني وفي نفس الوقت يكلمها
اخر شي قالي خلاص ماراح اكلمها
بس انا ماعدت اثق فيه
شلون اعرف وشلون اخليه يتركها؟
انا نفسيتي تعبانة حيل
لانوم ولا اكل ولا حياة مثل الناس
حتى بنتي الصغيرونة تاركتها عند امي مالي خلقها ولالي خلق شي
تونا لنا سنة من تزوجنا
توني طالعة من النفاس ويكافأني بهالمكافأة الحلوة
لو انتوا مكاني شبتسوون؟