ترد علي اركان البيت مخنوقه

يابوي رحت وتركت الطفلة تنشدك وينك؟؟
تنشدك وينك وهي تبكي تناديلك!!
تصرخ يبه ..يبه .. يبه وينك؟؟
وترد عليه أركان البيت مخنوقة ...
ودعناه..
ودعناه ..
ودع أثاث البيت وأركانه..
ودع فرح هالبيت بزرانه..
ترك أطفال صغار يبكونه..
ينهش لحمهم هالجوع وما يرحم..
ياكل عرضهم هالناس وما تفهم..
ويذوقون أقسى لحظات الغياب وألوانه...
يبه وينك؟؟
تعبت أنا اسأل من حولي و اناديلك ..
تعبت الاه ..
تعبت من الزمان اللي كسر ظهري وكسر نفسي,,
خسرت من الزمان عضيد سندني وعز مقداري,,
نسيت انفسي,,
نسيت رسمي,,
ملامح إنسان واساني..
كرهت ذاك الشعور اللي ذبحني وسط حرماني,,
يبه وينك؟؟
أشوف اخوي يبكي ريحة شماغك ويضم اسمه مع اسمك ويقول آخ ياقلبي ..
أشوف الثاني منهار يقبَل دمعة فرقاك على ثوبه ..
أشوف صغار سألو عن سيرتك وماضي أيامك؟؟؟
أشوف أختي و يا أختي ..
يطرونك ,,
وأشوف أمي بعز الليل ترثي أول وتالي جدودك ..
قهر أمي طرح فداخلي غصة تناست رحمة أيامي ..
عزاي اليوم في ذكراك,,
عزاي إني لاحضرت فاكبر مجلس للناس؟؟
و جا طاريك ..يوه
لاقالو ياربي يرحمه ويسكنه الفردوس
يبه تخنقني العبرة
هي حزن مع فرحه
مدري يايبه مدري !!
لاجلست بروحي,,أقول إني بداوي جروحي
وابكي هموم دنيتي وأنام
أنام ودمعتي بخدي أخفيها عن العالم وانصى ربي فيها قبل الناس
وأقول الحمد لك ياربي
ياربي معترض بس همي سطا فيني
وأغمض عيني واغفي بضيق بضييق...
وأحس بلمسه تمسح جرح سكن فخفوقي
تمسح وجهي وشعري..
تمسح جسمي وتقرا ملامح أسى وحرمان
وتقرا على آيات من القران
وتنفث بروحك الطيبة عل ربي يجلي عني الأحزان,,
واصحي من شوقي أبي أضمك,, وأداعب لحيتك وخدك
وأدورك هنا وهناك
ولاالقى سوى الجدران
صدى,, صدى ,,صدى
يبه ترى ذكراك فالدنيا كما ريح عود يحترق طيبه ..
يبخرني بجود نفسه وأنفاسه..
وافخر به..
وادعي ربي واطلبه يارحمن
يارب إني شرفته
ياربي يفتخر فيني
يارب أكون عزه واعز شانه
يبه صدق تفخر بي ..؟؟؟
تراني ماني الطفلة..
ترى طفلتك يالغالي تراها اليوم شابت..
تراها اليوم كبرت قدام سنينها سنين..
ياربي يرحمك يابوي
وبظل اردد اسمك وانشد عنك في ذكراك..
عندما فقدتك..رثيت نفسي امام العالم..فرحيلك كان فوق قدرتي على الحياه..
رحلت ..ورحل نصف نبضي معك..دفنته في ترابك..لأجلك,,
اتشعر بي بعد كل تلك السنين....؟؟
مازلت لاافهم!!
ولااستوعب رحيلك..
رحمك الله واسكنك فسيح جناته وجمعني اياك الفردوس الاعلى..
لحظات اشعر بان الكون ضيق..
لايستوعبني..
فانهار..وابكي
احساس مؤلم وشعور يدك في قلبي الحسرات.

اتمنى لكم رمضان كريما بفضل الله ومنته ومتعكم الله بالصحه والعافيه مع من تحبون..