تشكن بارمزان رهيب لايفوتكم

بسم الله الرحمن الرحيم
السلام عليكم ورحمه الله وبركاته
حبيباتي شخباركم..ان شاء الله بخير ومرتاحين
حبيباتي هالطبق روعه واذا سويتيه لأبو عيالك تأكدي راح تحطينه بجيبك
ههه (مصدقه نفسها )
المهم نخش بالموضوع ويالله اخذو المقادير والطريقه..
بسم الله.. المقادير
صحن صدور دجاج فيليه
علبه مشروم شرايح
فلفل رومي شرايح
بروكلي مقطع
بصل وثوم مفروم
كزبره فرش مفرومه
ورق سبانخ فرش مكرونه اسباغيتي مسلوقه و علبه قيمر
1 مكعب ماجي
كوب جبن بارمزان فرش مبشور
2 كوب ويبنج كريم (كريمه الخفق)
البهارات
ملح - فلفل اسود مجروش - بابريكا - اوريجانو - فلفل حب (احمر واخضر )..اختياري
الطريقه
اولا جهزت التالي..
سلقت السبانخ مجرد اني نزلتها في الماء المغلي 3 دقايق ورفعتها على طول
تبلت صدور الدجاج بعد ماضربتها بالمطرقه شوي عشان تصير فلات ..(رقيقه)
بالملح والبابريكا والفلفل الاسود
بعدين جبت 3/4 الجبن البارمزان وخلطته مع 1/4 كوب بقسماط
بعد تتبيل الدجاج اولا الطحين ثم البيض ثم الجبن بالبقسماط (الخليط)
وجهزيهم للقلي...والسر يكمن في الطبقه الاخيره اللي تغطي الدجاج وهو طعم البارمزان ولا تخافين ما يحترق مع القلي...وطعم روعه
في القدر على النار حمست البصل والثوم وبعد ما يذبل اضفت مكعب الماجي
اضفت المشروم وقلبت الى ان ذبل شوي والفلفل الرومي والبهارات و البروكلي...وبعد كل اضافه قلبي
اضفت السبانخ وقلبت واضفت كوبين الكريمه وقلبت والقيمر والربع الباقي من البارمزان
قلبتها وبعدين اضفت المكرونه وقلبت و تركتها على نار هاديه جدا لمده 10 دقايق ورفعتها
وطبعا الدجاج جهزناه بس باقي نقليه واذا قليتيه قدميه مع طبق المكرونه ...
وقدميه بكل فخر ههه
وصحه وعافية على قلوبكم
جربوه وادعو لي بالتوفيق