تطورات زعلتي اني صاحبة موضوع زوجي قاهرني ومزعلني واريد اقهره واغيضة

1. سلام عليكم بنات .. شلونكم حبيباتي انشالله بخير تكونون يارب

سلام عليكم بنات .. شلونكم حبيباتي انشالله بخير تكونون يارب

احب ابشركم اني تصالحت مع زوجي من البارحه وسويت كل الحركات الي كلتلكم عليهه بس الضاهر الرجال جان مقاوم اني احس بيه يريد يهجم عليه من الشوق بس رجال تعرفون بطبعهم مايحبون يتنازلون .. المهم اختي كالتلي لا تطولين الزعل لازم تتصالحون موزين هيج لا تعودي على زعلج واني كلت لا خلص بعد لازم اتحرك واسوي شي ماريده يتعود على زعلي مثل ماكالت اختي وخاصه اني اول مره ازعل هالكد معاه المهم اختكم الشطورة شسويت ؟؟ كلت خلي اتحارش فيه بطريقة غير مباشرة اكيد حتكولون شلون ؟؟ اني اكلكم .. قبل فتره والدتي وصتني على وصفه علاج تريد نشتريلهيا من يمنه لان اهلي ساكنين بغير مدينه وماكو هالعلاج هنا بس يمنه المهم اني من يومهه كلت لزوجي على اسم الدوه حتى يسأل اذا كان موجود وماسألت عليه بعد نسيت .. ماما حبيبتي بارحه خابرتني وذكرتني بيه وكالت سألتو عليه ؟؟ وهنا اجتني الفكرة الفشفوشية وكلتلهه ماما مو تدللين راح اسأل زوجي اكيد بيكون سائل عليه .. وهنا اجتي حجة على طبق من ذهب حت اتحارش بابو الشباب بطريقة غير مباشرة .. طبعا اني كتلكم اني 3 ايام مطنشته ولا سائلة فيه كلشي اسوي واجباته غسل وكوي وملابس وتنظيف بس عالسايلنت المهم اخذت الجوال ودزيتله المسج التالي (( مسألت على الدواء الي ماما وصتنه عليه )) وبس كلمتين ورد غطاها ورا 10 دقائق اجاني الرد بمسج (( تسألين على الدوه بس تسألين عليه؟؟ )) هاها هاي ولكم يا بنات اني طرت من الفرح اولا لان هو طلع منغاظ انو اني مطنشته وثانيا لان حسيت مشتاق لسؤالي عنه واهتمامي بيه واني كلت لنفسي كافي يا بنت عاتبي باسلوب رومانسي ياعيني عالرومانسيه وكمت ودزيتله (( اني اسأل عنك ومشتاقتلك واحبك بس انت الي تسوي حركات ويايه تقهرني منك وتخليني هيج اتصرف غصب عني )) حلو مو ؟؟ اكيد حلو لان جاني الرد التالي (( من ارجع من الدوام اخذج ونروح نسأل على الدوه سوية .. احبج )) الله الله يا بنات طرت من الفرح فوك فوك فوك لان جنت جدا مهمومة وخايفة الزعل يطول وما كذب خبر اول مارجع من دوامه دخل عليه وباسني وحضني واني بعد بسته وكتله الله يساعدك حبيبي ولا فتحنه الموضوع بعد (( كلت ماكو داعي نعيد بموضوع قاهرنه المهم تصالحنه والحمدلله وفهمته انو الي يسوي يقهرني من خلال المسج واعتقد هذا كافي وراح يضل اباله )) وطلعنه بعديهه حتى نسأل على الدوه ...وعاشو عيشه سعيده
شكرا لكل الي نصحوني وناقشوني وماخلوني بحالي احبكم كلكم تحياتي للجميع اختكم نونه