تعالي قولي كل اللي اشتريتيه للتنحيف والكسل والتأجيل ماخلاك تستخدمينها عرض بضائع

هلا والله بأحلى دبدوبات في العالم
الموضوع ومافيه اسمعوو هرجي للنهايه
اكيد حنا يالدبدوبات مانسمع شي عن التنحيف الا ونشتريه
مانشوف اعلان في التلفزيون الا وتحلفين حلف الا تشترينه
خصوصآ اذا لحسو عقلك بكم كلمه وجابو تجارب عن منتج التنحيف
وناس قبل وبعد
اكيدات انك ماتصدقي خبر وتشترينه
انا بصراحه لي فتره طويله وسنين مع التنحيف والرجيمات ومنتجات التنحيف
والحمدلله نحفت كثير وبعد جوهدون جهيد << حلوه جوهدون
واشكر كل الشكر من قام بمساعدتي للي وصلت له
المويهيم<<<
وصلت لوزن حلو لكن شكلي كل اللي حولي يقولون حلو بسك
لكن تعرفون ابن ادم طماع وابي انحف اكثر واشد جسمي اكثر
وانتو تعرفون الاجازه ومايتخللها من اغراءات واكلات
وحفلات ومناسبات
وان شاء الله اني بحاول اواصل الى بعد الاجازه اذا منكم وحده تبرعت وقطت معي في فكرتي
اللي انا مخترعتها وان شاء الله تحوز على رضاكم
نجي للفكره
في البدايه انا قلت اكيد عندكم اشياء للتنحيف في بيتك
اشتريتيها على بالك بتستخدميها لكن للأسف
صار الغبار يستخدمها اكثر منك
ولو تعدون اللي خسرتو من كثر ماتشترون منتجات تنحيف
كان بهالفلوس تبني لك قصر وتسوي لك مشاريع
لا تنكرون صح لا وبعد فيها حب خشوم للاهل اذا انتي بنت
واذا متزوجه حب خشوم للزوج
المويهيم<<
مثلآ انا بعرض عليكم كل اللي عندي ونبي نسوي كروب<< اقصد جروب
ان حنا نستخدم هالمنتجات لو خمس اوعشر دقايق حسب وقتك
بس نحط جدول لنا ونستخدمها
بدل ماهي مسدوحه في كل زاويه في البيت
صح يابنات ولا لا ؟؟؟
ماني قايله ان لازم نسوي دايت معين لأن ادري وجيهنا مو وجيه دايت
بس انتي حاولي تخففين من الاكل او تمشين على دايت مع احدى هالجروبات المونتشيره في هذا القسم
ومن القروبات اللي عجبتني بصراحه قروب حورية الكون واماني
وموديل 2009
المويهيم<<<
وتسوين معي هالاشياء طبعا راح ننسق بضاعتنا ونكتبها بجدول
واللي نسويه يوميا نشخط عليه بصح << حلوه نشخط
طبعآ انا لو اقولكم وش عندي من اشياء للتنحيف طارت عقولكم
النادي و المستشفي يتحدوني
بس مااقولكم اني بطرانه ومطخطخه بالفلوس شريت كل هذي الاشياء
لا بس تعرفون الحريم اذا حطو بروسهم شي
وتعرفون بعد اللي يبي ينحف وش يسوي من مغامرات
بس ياخساره مااستعمل منها شي الا في الخمس شهور مره وابي اتشجع
وتشجعوني واشجعكم بالي عندكم واللي عندي
اتفقنا
تيب بقولكم وش عندي بالبيت اوكي << شكلها بتبسط فيهم بالسوق
اول شي ياتويلات العمر اكيد كل دبه عندها هذا الشي اللي لاغنى عنكم منه
لكن على قد ماتبون تشترونه على قد ماتكرهونه
1>>> السير الكهربائي
2>>> عندي الاوربت تراك
طبعا هذا لي اكثر من ثمانيه شهور مالي فيه علم!!
3>>> نطيطه حقت الاطفال والله لو تشوفوني وانا انطط فيها ان تضحكون علي
طبعآ ننط فيها بعقل مو نروح السما ونرجع على بالنا رشيقات لا انتبهو
4>>>عندي سلمكم الله جهاز للبطن من يو مارك مره رهيب استخدمته ايام
ماكنت على الدايت وشد بطني شد فضيع
5>>> عندي حدايد لليدين اثقال كيلو وكيلوين اكيد اكثر من كذا مشكله
بس لا تخافون انا جبت العلم من وحده خبيره تقولي الحدايد البناتيه ماتجيب عضلات
بس داومو عليها << انا اطلقت اسم الدلع عليها البناتيه يعني الكيلو كيلوين بس
وغير هذا تجربتي السابقه مع التنحيف هي الحكم
ام وش بعد ام ايه
6>>> عندي من يومارك حزام هزاز يهز هز برموت كنترول خارجي على الكهرب
حلو بصراحه انا بنفسي جربته ويجيب فايده
اذا استخدمتيه مع دايت ورياضه خصوصا بعد المشي تحسين باسترخاء لانه يدلك
مناطق الجسم والدهون ويحفزها على النزول بس مايستخدم للبطن وقت الدوره
انا بصراحه احطه بظهري دايم واحس انه كانه احد يدلكني
طبعا هذا غير حزام الهزازز اللي مع السير << اللي تبيه تاخذه ماابيه عندي
7>>> وعندي جهاز اشتريته من شركه من زمان يسلم عليكم من فتره ماشفته بس مره حلو
بمعنى الكلمه كأنك تطلعين درج ماعرف اسمه بس بيشد منطقة الافخاذ والارداف
بس شرهتكم على اللي واصلت على استخدامه استخدمته 3شهور وشفت نتائج فتاكه
8>>> تيب نجي عاد للمنجات الثانيه مو اجهزه
انا استخدمت من امانا كير منتج عندهم بصراحه حلو وماهو كيميائي اللي هي حبوب الجريب فروت
تحتوي على الياف وخل تفاح خلصت علبتين ايام الرجيم والحين رجعت وشريت منهم علبه جديده بتساعد على التنحيف
انا بنفسي جربته
9>>> واخذت معاها هالمره كريم التنحيف وكريم الشد لسا ماجربتها بس البناني يحلف حلف
انها تجيب نتيجه قلنا يالله << هذي مشكلتي دايم اصدق واشتري وهلما جره
10>>> برضو عندك بران من الصيدليه محتوياتها بفس محتويات حبوب الجريب فروت كلها الياف لأني بخاف من الحبوب
11>> اي صح عندي بعد خيمة ساونا حلوه بعد بس عشان استرخاء جسمك بعد التمارين وعشان
تصفي بشرتك وتفتحها وتقلل التشققات خصوصا اذا تمرختي بكريمات وخلطات وحركات
بتشوفين نتائج خياليه اختي كان زواجها قبل سنه تقريبا واخذت الخلطات من كتاب اسرار الحريم
والله ماخلصت شهرين الا صارت بشرتها نعومة اطفال وبياض مع حمره
12>> ام اذا في شي ثاني برجع اكتبه
وانا من يوم السبت راح ابدا فيهم يالله من تقط معي وتجي نعرض بسطتنا هنا
بس يابنات الله الله بالردود اللي توسع الصدر اقلها لا تعرضين بضاعتك بس قولي لي كلمه او دعوه تشجعني
اللي بتدخل وتبدى معي هي اجمل الجميلات وارشق الرشيقات
واللي ترد لي بدعوه هي حلوه
واللي تدخل وتطلع وتمر مرور الكرام ولا احم ولا دستور << يعه يعه يعه
ويارب قدرناعلى طاعتك وحسن عبادتك
وساعدنا على بلوغ اهدافنا
من محبتكم الدائمه<<<< مها