تكفون ربي يسعدكم ابي حل مع زوجي

1. اصريت على اهلي اني اتزوجه ووقفت في وجيهم كلهم لجله

السلام عليكم
انا زوجه ثانيه عمري في العشرينات سبق تزوجت وتطلقت
تعرفت ع شخص وتزوجته بدون مايقول لاهله يعني مافيه احد يدري بزواجنا الا اهلي وجماعتي وافقت عليه لانه الوحيد اللي يوم قلت له اني مسويه عمليه واخذ ادويه تقبل الامر وقال عادي
كثير تقدمو لي واذا ذكرتلهم مشكلتي راحو ومعاد رجعو حتى اقاربي ينظرونلي اني مريضه مع اني الحمدلله جميله جدا بهادة الجميع وتعافيت ومافيني اي شي مثلي مثل اي انسانه طبيعيه
وهو عنده اولاد وابوه كبير فالسن ومايبي يقولهم لانهم مستحيل يرضون بزواجنا بحكم تعصبهم القبلي لاني من قبيله ثانيه وغير كذا هم بدو مره ويعتبرون الحضري مو من مستواهم

اصريت على اهلي اني اتزوجه ووقفت في وجيهم كلهم لجله

تخيلو مهري اقل من اللي استاهله بكثير تزوجنا فبيتنا زواج مختصر جدا وماسافرنا شهر عسل جلس معي اربع ايام فشقه مفروشه ورجعني لاهلي ورجع لعياله
هو يجيني مره بالاسبوع وكان واعدني انه اذا تزوجنا يحطلي شقه بس للحين ماحطلي شي بعدين مع الايام تدم انه تزوجني لانه حس بتانيب ضمير كل ماشاف اهله ويصير يسبني ويجرحني بالكلام يبي يطلقني وانقطع عني فتره وجلست ابكي واترجاه وانذليت كثير بس لجل مايطلقني لاني احبه ولاني خايفه من كلام الناس وشماتتهم ولان امي مسكينه مراح تتحمل تشوفني مطلقه للمره الثانيه وانا توي ماصرت حتى 30 سنه واخواني وين يودون وجيههم قدام الناس
المهم رجع كل شي مثل ماكان بس كل ما اقوله يله ندور شقه يتهرب وكل مااتصل او ارسل يهاوشني ويجرحني
بالاخير قال لعاد تتصلين علي ابدا ولاترسلين لي شي ابدا وهو الى الان ما ادري عنه شي وربي لا اتصال ولارساله اكثر من شهر مانمت معه ولاشفتهولاسمعته
وماقلت شي لاهلي قسم بالله تعبت نفسيا مره
تخيلو حرمت نفسي من الامومه ومن وجود زوجي معي كل يوم ومن اشياء كثيره لجله وربي ضحيت لجله كثير بس مافاد شي
هو ماقدر ابدا كل اللي ضحيت به لجله
تكفون عطوني حل معه شسوي احس بموت من كثر ماخانقتني العبره من التعب النفسي