حفلة المقتولة لغز جريمة الجزء الأول

1. المشهد الثاني..

مرحبا بنوتات ..
هاي لغز من تأليفي حابة نتشارك كلنا ونحله ...وصدقوني بتستانسون..
نبدا مع الجزء الأول..
المشهد الأول..
سارة: سراب في سراب في ضوء في مشاعر الطريق المظلم..
تقاطعها مها بصوتها العالي: أبرك سنة!! جنيتي ياسويرة شتقولين انتي؟ شاللي سراب ومطر ورعد شفيك يابنت الحلال قمتي تهلوسين؟
سارة : يوه لاتخربين علي قاعدة احاول أحل لغز..
مها: شلغزه ياحظي؟؟ آآآآآه بس ربي باليني بخويات مادري من أي كوكب جايين ..
ترن ترن ويرن جوال سارة..
سارة : آلو هلا مريومة....وشو؟؟ لا لا من صدقك انتي؟ شتخربطين ؟ متى زين؟؟ آها اوكي خلاص تم.. بس علميني شجيب معي؟ خلاص .. اوكي يالله مع السلامة ..
مها: شصاير؟؟ شفيها مريوم؟
سارة: الليلة بتعرفين ترى العشى عند مريوم اليوم ولاتسألين عن شي ..
مها: أقول بتقولين ولا أقوم أكفخك؟!!
سارة : مهوي عن الإستهبال مانيبقايلة اللحين.. الليلة بتعرفين..يالله قومي تجهزي في بيتكم علشان أنا وراي شغل لين قمة راسي..
مها: عدل أحلى تصريفة .. زين ياسويرة إن الليل لناظره مو بعيد باقي ساعتين وشوي..
يوم كانت سارة بالمتوسطة تعرفت على مريم وبنت عمها هند وبنت جيرانهم الداهية وضحى اللي كانت عبقرينو الصف.. مو بس شطارة .. لابعد شيطانة درجة أولى مجننة كل المدرسات وياويل المدرسة اللي ماتكون جايبة كل المعلومات عن الدرس لأنه وضحى بتحرجها وبتستجوبها مو بس تسألها عن كل شي بالدرس..وكانت وضحى مسوية مقالب في الكل..وعن طريق المقالب تعرفت الشلة على مها اللي جات المدرسة بعد ما انتقلت لمنطقة جديدة ..

المشهد الثاني..

في غرفة مها قعدت اطالع نفسها بالمراية .. وتتجهز علشان عزيمة بيت مريوم..وبنفس الوقت تكلم نفسها!!
مها: ماشا الله .. ماشا الله .. شهالزين يامهوي..والله قمر .. لا وذكية بعد .. أيه امه مو بس داعيتله اللي بيتزوجني.. لا كل أهله داعين له خ خ خ خ أقول مهوي بسك تكلمين عمرك كنك مب صاحية بس أقول والله إني قمر شهالحلاة .. قولي ماشا الله لاتصكين روحك بعين ماتقومين منها ..ام اللمسات الأخيرة واللحين أكتملت الصورة ..أجن والله فديتني..
لما انتقلت مها لبيتهم الجديد قبل أربع سنوات في منطقة بعيدة عن المنطقة اللي عاشت فيها طول عمرها راحت لأقرب مدرسة لهم .. مها حلوة وذكية ..وفي ثالث يوم دوام لها بالمدرسة حست انه البنات اللي هناك قاعدين بنفس الفصل ناوين لها على نية ..
مها تكلم نفسها : يامهوي خلك مسوية نفسك ماتدرين شي أحسن علشان لايسوونلك مشاكل مانتي بقدها..
وكانوا البنات يتساررون ويطالعونها يعني اشكرى خبر قاعدين يحشون فيها ويرسمون خطط..
وطبعا رئيسة الشلة هي وضحى قعدت ترسم خطة كيف اطفش هالبنت خصوصا انها بدت شوي شوي ترمي شباكها على مركزها بالصف وهي اللي قبل لاتفكر بالإجابة تلاقي هالبنت رافعة يدها وتجاوب ولا بعد مؤدبة ولاتسأل شي يفشل المدرسات ..
وضحى لسارة:
هالبنت ماهي عارفة حدودها على كيف أبوها جاية تاخذ مكاني هنا بالصف؟ ولا شوفي أبلة الشرعية مستانسة عليها والمصيبة أبلة العلوم ماكنه ربي خلق غيرها في الفصل..
الخطة كانت انه اطيح وجه مها قدام المدرسات علشان لايثقون فيها وحطت في بالها يوم السبت علشان تنفذ الخطة لأنه لازم اتم مها تتعاقب طول الاسبوع ..على الشي اللي قررت تسويه فيها وضحى ..
شاللي بتسويه وضحى في مها .. وشلون صارت علاقتهم قوية بعد أربع سنوات من المقلب؟؟ هالشي اللي بتعرفونه في الحلقة القادمة ..من قصة حفلة المقتولة ..
أبي أشوف ردود حلوة ومميزة