رواية وجوه باقنعة الحب رواية جنان بمعنى الكلمة

1. اعتكفت بغرفتي وتوضيت وصليت الظهر ..


2. اكيد بتسالون منو انا ...


3. بقولكم عن عايلتنا كلها عشان ارتاح من حنتكم ...ههه..


4. ننتقل لخالتي ام صلاح ...متزوجة واحد مو من الأهل بس معارفنا وعندها ..


5. نيي الحين عند خالتي ام ضاري ...متزوجة وزير سابق ...وعندها ...

السلام عليكم ورحمة الله وبركاته
كيفكم بنوتات
اليوم انا ناقلة لكم رواية بصراحة روعة
ومانقلتها الا انها جنان
ع كثر ماقريت من الروايات لكن هذي غير شكل
وابي تفاعلكم وردودكم عشان تشجعوني عشان اكمل
××××وجوه بأقنعة الحب ××××
×××للكاتبة ليل العشاق××× وجوه بأقنعة الحب ... الكاتبه ::: ليل العشاق
وجوه بأقنعة الحب
بقلم: ليل العشاق
عندما يخونك اقرب الناس إليك ..
عندما تكتشف انك وحيد ...
عندما تُغلق الأبواب في وجهك ...
عندما يتبيَّن لك انك بلاقيمة بعد حب...
عندما تدور من حولك الأحداث وانت لا تفهمها ...
قد ترون المقدمة غير مفهومة ..وقد تقولون "ما معنى المكتوب ؟؟ "
وقد تتساءلون "ما قصدها ؟؟"
وقد ترون ان القصة خيالية لا تمت للواقع بصلة ...ومستحيل ان تحدث بيننا وفي مجتمعنا ..
لكن ..
دعونا نتكلم بشفتي المغدور ...
وقلب الخائن ..
لنرى ايهما على حق ...
المغدور ...ام الخائن ؟؟
الحلقة الأولى
من تحت اللحاف الدافي في هالشتا القارس .. مديت ايدي وانا ادور على التلفون المزعج اللي صارله ساعة يدق ...
تحسسته اخيرا ..مسكته وحطيته على اذني وقلت من تحت اللحاف ..
يعقوب : ألو...
وقلتها بكل كسل ...
زيد : بيه انت لين الحين نايم ؟؟ قوم اذن الظهر من زمان ..
غمضت عيوني بعدين بطلتهم ...بعّدت اللحاف عني وقلت ..
يعقوب : انزين كاني قعدت ..
زيد : يلا بسرعة ...
صكيت عنه وانا ودي ارد انام ... والله فيني النوم ...
طالعت الساعة وكانت وحدة إلا ربع ... بيه كل هذا نمته ..من الفير ..
تسبحت على السريع وطلعت من الغرفة للصالة ...
لقيت الصالة فاضية مافيهااحد ...
قعدت على القنفة ..وناديت الخدامة ..
يعقوب : ساندي ...
ماردت ...
يعقوب : ساندي ..
هم ماردت ..
شسالفة وينها ؟؟؟
التفت للمطبخ ... وقمت باتجاهه ... دخلت وشفت ظل وحدة قلت بعدم اهتمام ..
يعقوب : سانديوه ..صارلي سنة اناديج ...
ما التفت لي وظلت واقفة بمكانها جنها لوح ...
دققت فيها وعرفت انها مو هي ...
قلت وانا اتقرب منها ..
يعقوب : منو انتي ؟؟
ما لفت بس قالت بصوت مرتجف ..
" لا تقرب "
وقفت بمكاني مخترع ...تتحجى عربي بعد ؟
قلت وانا لسة واقف بمكاني ..
يعقوب : منو انتي ؟؟
قالت برجا وجنها تبجي ..
" اطلع الله يخليك بسرعة .. انا ضحى "
بققت عيوني مصدوم ...
ضحى !!!!
يافشلتي ...
بسرعة طلعت من المطبخ لداري على طول ...
ياحسرتي ... شيابها هني ؟؟
طقيت يبهتي بقهر ...
والله ماكان قصدي ...عبالي ساندي ...
بس شيابها هالحزة لبت....
لحظة ...
انا ويني فيه ؟؟
طالعت غرفتي ... وانتبهت للإختلاف الواضح ..
انا في بيت يدتي !!!!!!
بققت عيوني مصدوم ...لهدرجة كنت دايخ وتعبان من سهرة امس ...
خبل والله اني خبل ...
كنا سهرانين شباب العايلة مع بعض ..عيال عمتي وعمي وربعنا كلنا ...بالديوانية على بلاي ستيشن والجنجفة ( شدة) وما نمنا إلا بعد ما صلينا الفير بالمسيد ...

اعتكفت بغرفتي وتوضيت وصليت الظهر ..

اكيد بتسالون منو انا ...

الله يسلمكم انا يعقوب فيصل ال.. ... عمري 27 سنة اشتغل مهندس بترول ..بعد ما تخرجت من بريطانيا توظفت على طول بشركة نفط الكويت ... معاي رفيج عمري واخوي اللي ما يابته امي زيد ... اللي همن مهندس بترول .. وعمره 27 سنة اكبرمني بشهرين بس ...انا شهر 10 وهو شهر 8 ...

بقولكم عن عايلتنا كلها عشان ارتاح من حنتكم ...ههه..

عندي اخت اسمها نوف مملجة ..وعرسها بعد شهرين .. من ولد عمي فهد دكتور النفساني للعايلة .. نناديه دكتور فيل ...نوف عمرها 23 سنة متخرجة من كلية التربية الأساسية وتشتغل مدرسة ...
وبعدها يوسف اللي عمره 17 سنة ...بس الله يشافيه متخلف عقليا ... لما امي كانت حامل فيه صارلها حادث فنقص عنده الأوكسجين وصارت له هالإعاقة ..بس والله حبوب ويدش القلب بسرعة ... تصرفاته طبعا مثل تصرفات ياهل بو ست سنين...
اما عن عمي غانم ..فعنده فهد زوج اختي عمره 28 سنة مثل ما قلت لكم دكتور نفساني .. والصراحة لايق عليه دكتور نفساني .. كل شي يمشي عنده بالعقل .. ومايحب اللوية والإزعاج ...هادي جداً ..اشتهي مرة بس القاه معصب ...
بعده ايي ناصر عمره 25 سنة ... يشتغل مع عمي بالشركة اللي فاتحينها هو وابوي ... مملج على بنت خالتي اخت ضحى بسمة ...
بعده تيي غنيمة عمرها عمر نوف وهم رفيجات ... وتشتغل معاها بنفس المدرسة ...
خلصنا الحين من اهل ابوي ...ونيي لأهل امي ...
خالتي سالمة .. متزوجة من ولد عم ابوي وعندها ...
مشاري عمره 23 سنة ... هالولد ماادري طالع على منو ... مغازلجي درجة اولى وماخذ الدنيا سهالة ..
يعني عيش لحظتك ولا تفكر بباجر .. بس والله حبوب وطيب بس مشكلته البنات ... بس مهتم بدراسته غير جذي يصلي ... بس لو الله يهديه ويترك هالشي احنا بخير ..
تيي بعده بسمة 21 سنة متزوجة من ناصر آخر كورس بالجامعة قسم ادب انجليزي ...
بعده ضحى اللي توني شفتها بالمطبخ ... عمرها 20 تدرس بكلية ...لحظة خل اتذكر... ئي كلية العلوم قسم حاسب آلي ... مخها يوزن بلد ... ما شاء الله شاطرة وذكية ...
هييه لا يروح تفكيركم بعيد مااكن لها اي مشاعر ... بس اهلي الله يهديهم ملزقيني فيها ...وطالعة اشاعة علينا اني انا بخطبها وانا اصلا ما افكر فيها اكثر من اخت ..حالها حال نوف ...

ننتقل لخالتي ام صلاح ...متزوجة واحد مو من الأهل بس معارفنا وعندها ..

صلاح عمره 26 سنة خريج هندسة اتصالات ...يشتغل في زين ام تي سي سابقاً مدير قسم ...هذا الأنسان انطوائي لدرجة .. والله بعض المرات يختفي وما ينشاف ...بالمناسبات فقط ...وما يتكلم ابد والله بعض المرات اشك ان عنده لسان ... يقعد وهو ساكت ..على قولة مشاري ... للعرض فقط ممنوع اللمس ... ههه حسبي الله عليك يا مشاري ... رافض الزواج ماادري ليش ...
تيي بعده اخته حنين ... هاذي ما شاء الله حلوة ...طالعة على امها ... احم لا تاخذون فكرة سيئة عني ..بس شفتها صدفة بالبر مرة وما كانت كاشفة بس اعجبت فيها بس ما افكر اخذها ...عمرها من عمر ضحى وما بعض بالجامعة بس هي تخصص فيزيا ...
واخرهم جسوم 11 سنة ... لاعب العايلة ... مسجل بنادي فريجهم ويعشق الكرة ...

نيي الحين عند خالتي ام ضاري ...متزوجة وزير سابق ...وعندها ...

ضاري 27سنة ..يشتغل في وزارة الخارجية نائب مساعد الوزير... دائم السفر ..بس لما يكون معانا يصك تلفونه وما اييب طاري الشغل .. حبوب وهو اقرب الناس لي بعد زيد وفهد ... معلن العزوبية مثلي انا وزيد بس فهد هو اللي خوّن فينا ... بس انا حاس لا تقولون لأحد انه معجب بحنين اخت صلاح ...
تيي قبله اخته ابتسام اللي متزوجة من ولد عمهم فراس وعندها ولدين عمرها 30 سنة ...
اخرهم فواز .. عمره 23 رفيج مشاري بس ما يسوي سواته السودة واللي هيى مغازل ..بالعكس دوم ينصحه بس مشاري اوف لاين ...
بس ..ها حفظتوهم ؟؟؟
اوكي اشوفكم بالحلقة الياية ...
ههه ... اشفيكم خفتوا ؟؟
لا قاعد على قلبكم ..
طالعت الساعة وكانت وحدة وعشر دقايق .. اف يعني اشلون انحكر بداري عشانها يعني ؟؟
بعدين منو قالها تيي مطبخنا ؟؟
لحظة انا رحت اي مطبخ ؟؟
والله قمت اخوره ... من سهرة امس حسبي الله على ابليسهم ...كله من مشاري ...
تذكرت امس اشلون بغى يذبح فهد لما فاز عليه ...
ههه ...والله موصاحي هالريال ...
سمعت نغمة تلفوني طالعت الشاشة وكان فهد ...
ابتسمت وقلت ..
يعقوب : هلا هلا ...
فهد : هلا فيك ..وينك انت ؟؟ ناطرينك بالدوانية ...
قلت وانا اقوم ..
يعقوب : اوكي الحين ياي بس ببدل هدومي ..
صكيت عنه ولبست جينز وفانيلة صفرة ... مشطت شعري ع السريع ونزلت تحت ...
قلت بصوت عالي ..
يعقوب : درب ..درب ..
ما سمعت حس قلت اساسر عمري ..
يعقوب : احسن ..
مشيت لين الباب بطلته وطلعت للحوش بعدها انعطفت للديوانية ... هني سمعت اصوات ضحك رقيق وناعم ..وكانوا اصوات اناث طبعا ...
اكيد هذول بنات خالتي وعمي ...
بغيت انبهم ان اصواتهم عالية بس خفت يقولون عني اتجسس عليهم ..
لايبا مالي شغل ...
قرّبت صوب الديوانية ... هني طلع مشاري معصب وقال ..
مشاري : اصواتكم يا مال العمى انتي وياها ...
ضحكت انا بصوت عالي ... ما قدرت امسك روحي .. انتبه علي مشاري وقال وهو يضحك بخفة ..
مشاري : والله بطوا جبدي ... هاذي ثاني مرة انبههم ...
دخلت معاه الديوانية ..وقلت ..
يعقوب : انزين تدعي عليهم اشحقة ؟؟ خواتك معاهم ترى ..
مشاري : ادري ..مو من قلبي اصلا هالدعا ..
هني نط ناصر يرز ويهه ويقول ..
ناصر : ها ها ..خير ان شاء الله تدعي على مرتي ؟؟
قال مشاري وهو يقعد يمه ..
مشاري : مالت عليك انت ومرتك ...
كتمت ضحكتي وقلت ..
يعقوب : ما تغلبه ترى بالحجي ..
انتبهت على صلاح قاعد ويسمع لفهد وهو يحاجيه ..قلت اقاطعهم ..
يعقوب : هلا بوصلوح ...
طالعني وابتسم وقال بكل هدوء ..
صلاح : هلا بو يوسف ...اخبارك ؟؟
لأن امس ما كان معانا ... قمت انا وهو بعد وسلمنا على بعض ...
قلت وانا اقعد يمهم ...
يعقوب : ها اشوفكم تسولفون ..شاركونا ...
قال مشاري هني ..
مشاري : يتكلمون عن العولمة ودورها في حرب العراق ...وتأثيرها في حرب لبنان وموقفها في قضية فلسطين ....
سكت شوي بعدين قال يتطنز ..
مشاري : بالله شبيسولفون عنه ؟؟ يا كتاب قراه دكتور فيل اللي يمك يا تلفون يديد نزل بسوق وطبعا يتكلم عنه الأخ صلاح ...
طالعت ناصر اللي كاتم ضحكته هو وفواز وضاري ...
وغصبن عني ضحكت ... والباجي انفجروا يضحكون ..
قال ضاري وهو يضحك ..
ضاري : انت اشفيك بالع راديو ؟؟ اركد فضحتنا ...
قال فهد وهو يحاول يوقف ضحك ..
فهد : ماادري عنه ..
الوحيد اللي ما ضحك صلاح ... بس اكتفى بابتسامة ...
قال اخيرا ..
صلاح : لا ما كنا نتكلم عن العولمة ولا كتب ولا تلفون .. كان يحاجيني عن مريض عنده ..
قال هني فواز ..
فواز : مو مايصير تتحجى عن مرضاك ؟؟
قال ببساطة ..
فهد : كنت اقوله نموذج عن مرضاي ...
قال مشاري وهو ينسدح على ريول ناصر ..
مشاري : والله اخرتها بتصير واحد منهم ...
ابتسمت انا والتفت لصلاح اللي قاعد يمي ..
يعقوب : ها بوصلوح اشلون الشغل ؟؟
قال باختصار ..
صلاح : حمدلله ماشي ... انت اشلون الشغل وياك ؟؟
قلت وانا اسند ظهري على القنفة ..
يعقوب : والله زين ... ممتع ..
قال فهد وهو يطقطق بتلفونه ..
فهد : انت مو قلت لي ان عندك دورة للبنان ؟؟
فز هني مشاري وقال متفاجأ ..
مشاري: منو اللي عنده دورة للبنان ؟؟
طالعته باستغراب وقلت ..
يعقوب : انا ؟؟
حذف علي مخدة اللي يمه وقال ..
مشاري: لا يا التعبان ولا تقولي ..
ضحكت بخفة وانا احط المخدة اللي حذفها علي يمي ..
يعقوب : اشتبي راز ويهك ؟؟ الدورة لي ..
مشاري : ادري ... بس بروح معاك ..
قال فواز باستنكار ..
فواز : مشاري ...
طالعنا كلنا فواز اللي قال باعتراض ..
فواز : ادري ليش تبي تروح هناك ... بقول لخالتي إذا بتروح ..
مشاري : وانت شكو ؟؟
قال ضاري ..
ضاري : ليش تبي تروح هناك ؟؟
قلت انا ببساطة ..
يعقوب : يعني ليش بالله عليك ؟ بيروح يقز ...
قال صلاح باستنكار ..
صلاح : مشاري شهالسوالف ؟؟
قال ناصر ..
ناصر : ياحبه لهالأشياء ..
وطالع مشاري وقال ..
ناصر : انت ليش ما تتزوج وتفكنا ؟؟
قال فواز وهو يقوم ..
فواز : هذا ويه زواج هذا ؟؟ خله على خرابيطه اخرتها بيطيح على راسه ...
وطلع ...
قلت وانا اطالع تلفوني اللي دق ..
يعقوب : لعلمك ترى الدورة اعتذرت عنها ...
مشاري : عيل هالمحاضرات على الفاضي كانت ..
ابتسمت ورديت على نوف ..
يعقوب : هلا نوف ..
نوف : يعقوب روح ييب يوسف من النادي ...
بيه نسيته ...
قلت وانا اقوم ..
يعقوب : اوكي ...
صكيت عنها ... وقلت وانا احط تلفوني بمخبات الجينز ...
يعقوب : إذا سال عني ابوي قولوا له اني رحت اييب يوسف اوكي ؟؟
قال مشاري وهو يقلب بالتلفزيون ..
مشاري : مارح يسأل عنك ...
قلت وانا اقط عليه المخدة ..
يعقوب : انت خل عيونك على التلفزيون ..
وطلعت بس سمعته يقول ..
مشاري : انا اوريك حلايا الفانيلة تقول برد موز ..
هني ما قدر امسك روحي ... فطست من الضحك بنص الطريج ...
حسبي الله علي ابليسك يا مشاري ...
انتبهت على وحدة تطالعني باستغراب جنها تقول هذا اشفيه يضحك جذي بس غضيت البصر عنها وما لحقت ...
ما طالعتها ..طنشتها ...وركبت سيارتي ...
بروح اييب يوسف من النادي اللي سجلته فيه ... نادي تقوية القدرات العقلية اللي صارله فيه تسع سنين ..كأنه مدرسة ..
وصلت بعد عشرين دقيقة ... لقيته ينطرني بالمكان اللي نزّلته فيه ..
ركب وهو يبتسم قلت وانا ابتسم له ..
يعقوب : ها يوسف ..شسويت اليوم ؟؟
قال بكل طفولة ..
يوسف : السلام عليكم ... انت مو قلت لي سلم اول ما تدخل مكان ..
طالعته بانبهار وقلت بعدين ..
يعقوب : شاطر ... وعليكم السلام ..
قال بعدين ..وهو يحط جنطته ورا ..
يوسف : اليوم اخذنا رياضيات وعربي ..
قلت وانا احرّك السيارة ..
يعقوب : ها سهل ؟؟
يوسف : ئي وايد ... بس ما عرفت احل مسألة رياضيات ... يعقوب ..
التفت له وقلت ..
يعقوب : هلا حبيبي ..
يوسف : اربعين ضرب ستين جم ؟؟
قلت بعد تفكير دام ثواني ..
يعقوب : الفين واربعمية ...
ضحك ببراءة وقال ..
يوسف : يعني صح ؟؟ انا قلت للأستاذ جذي جان يقولي بقولك الجواب باجر ..
يعقوب : بعد باجر شنو نقول ؟؟
قال هو يطق راسه ناسي ..
يوسف : اووه نسيت ... ان شاء الله ..
ابتسمت عليه وقلت ..
يعقوب : حبيبي انت ... ئي صح الجواب ...وباجر ان شاء الله إذا رحت النادي قوله انا متأكد من الجواب وخلك واثق ..
قال باستغراب ..
يوسف : يعقوب يعني شنو واثق ؟؟
ابتسمت وقلت وانا الف لفة بيت يدتي ..
يعقوب : يعني متأكد ..
وصلنا ..ونزلنا ما صفطت السيارة جدام الديوانية ...
قال يوسف وهو ماسك جنطته ..
يوسف : انا بروح اتسبح وابدل هدومي ... وبييكم ..
افترقنا عند باب الديوانية ..قلت انا بصوت عالي شوي ليوسف اللي ابتعد ..
يعقوب : خل نوف تزهب لك الهدوم ..
قال وهو يبطل باب البيت ..
يوسف : ان شاء الله ..
دخلت انا الديوانية وكانوا على حالهم غير ان ابوي وعمي وازواج خالاتي موجودين ..سلمت عليهم سألني ابوي إذا يبت يوسف ولا لأ ..
قلت وانا اقعد يم مشاري اللي احترم روحه وساكت ...
يعقوب : ئي ..الحين بيي ..
التفت لمشاري وقلت بمساسر ..
يعقوب : اشوفك صاير هادي ؟؟
اشر لي على الشياب وقال ..
مشاري : غصبن عني والله ..اقول بو يوسف .
يعقوب : آمرني ..
مشاري : ما يامر عليك عدو ولاظالم ... امش خل نتمشى برة ..
طالعت فهد والباجي وقلت بحماس ..
يعقوب : اوكي ... خل نقولهم بس ..
طلع مشاري تلفونه وانا تلفوني ... وبدينا ندز مسجات ... هاذي طريقتنا إذا بنقول شي جدام الشياب ...شفرة مثل ما يقولون ..
دزيت انا لفهد وضاري ..ومشاري دز لصلاح وفواز وناصر ..
طالعونا كلهم واشر فهد بدون ما يتحجى .. بأنهم موافقين ..
ولأن هو اكبرنا فوهقناه ...
قال فهد وهو يقوم لنا وايي صوبنا وبمساسر ..
فهد : حسبي الله على ابليسكم ...بتوهقوني ؟؟
ضحك مشاري وقال ..
مشاري: والله انت اكبرنا ... يلا انطلق ..
تنتحنح فهد فانتبه له ابوه ...قال وهو يبتسم بهدوء واحترام ..
فهد : بعد اذنكم يعني ... بنطلع انا والشباب ...
قال ابوه ببساطة ..
عمي : ئي ما عليه بس لا تطولون ...
قام مشاري بسرعة وقال وهو ييرني ..
مشاري : اكيد عمي افا عليك بس انا معاهم بييهم لك على الساعة ثمان ..
ضحك ابوه وقال .
بو مشاري : انت تعال بالأول بعدين نشوف الساعة ..
قصده انه دوم يتأخر ..
ضحكنا كلنا وطلعنا ...
اشرلي ابوي اني ما اتأخر وايد ... هزيت راسي بايجاب وطلعت قبل ما ايي يوسف عشان لا يحن يطلع معانا ...
مع اني ريال بدخل الثلاثين بعد جم سنة بس ابوي وامي دومهم وراي ...يعني دايما احس انهم خايفين علي وهذا شي حلو طبعا انا مو مستنكر هالشي ...
ركبت انا مع مشاري وصلاح اللي في البداية ما كان يبي بس يريناه معانا غصب ...وفهد ..وناصر مع فواز وضاري ...
الناس عطلة وهو حاكر عمره ...
ظلينا نتمشى واخر شي استقرينا نقعد على البحر ... مع ان الجو بارد موت ..كان فهد وصلاح معترضين بس انا والباجين مصرين ولأننا الأغلبية فرحنا البحر ..
قال فهد وهو ينزل من السيارة ..
فهد : والله مشاريوه لو ياني برد بعديك انت اول واحد ...
ضحك مشاري وهو يصك الباب ..
مشاري : افا عليك بعالجك على حسابي ...
طالعت فهد وقلت ..
يعقوب : خايف على عمرك يعني؟؟
قال وهو يمشي يمي ..
فهد : وراي زواج انا ..عبالك عزوبي مثلك ..
طالعته باستخفاف وقلت ..
يعقوب : اللي يقول كلش امير ويليام بيتزوج ...
قال مشاري وهو يمشي معانا ..
مشاري : اقصاك فهد ..
هني ضحكت انا وياي مشاري ... قال فهد وهو يبي يطق مشاري بس نحش وقال يتوعده ..
فهد : اوريك يا التعبان .. انت وقصتك تقول جستن تمبرلك على غفلة ..
انا هني ضحكت اكثر ...اول مرة فهد ينكت ...
قال مشاري وهو يعدل شعره ويقول بكل فخر ..
مشاري : كفوه جستن تمبرلك يشبهني ..
كان الأخ قاص على الموضة ... وطبعا شعره مثل قصة هالمغني اللي ماادري شسمه ... انا بالأغاني لا تسالوني ...
حدي مايكل جاكسون واللي بزمانه ...بس ..
عتيج انا صح ؟
طالعت صلاح اللي طول الطريج ما تكلم اللهم لما اعترض على ييتنا للبحر ...
شفته يوقف جدام البحر وايده بمخابي بالطوه الأسود ..
غريب هالريال ...
انتبهت على فواز ومشاري يلاحقون بعض ... وايي مشاري وراي ينخش .. قال فواز اللي شكله معصب ..
فواز: والله ما اخليك ... ييب الصورة ..
قال مشاري وهو ماسك اجتافي ينخش اكثر ...
فواز : مشاري ييب الصورة احسن لك ...
قلت انا بملل منهم هاليهال ..
يعقوب: اشفيكم انتوا الأثنين ؟؟
قال فهد بملل وهو يرد على تلفونه ..
فهد : تلقاهم متهاوشين على صورة مصورها فواز ...
ورد على تلفونه ..
ما قلت لكم ان فواز يعشق التصوير الفتوغرافي ...
حاولت معاهم بس ما يبطلون ... عصب فواز اكثر وزعل وراح ...
قلت انا بعتاب لمشاري ..
يعقوب : مشاري روح عطه الصورة يلا ... والله ما يصير زعلته ...
قال بلا مبالاة ..
مشاري : ماعليك منه بيرضى فوازوه واعرفه ..
طالعته باستغراب ...
هذا والله غريب ... يزعِّل ومايروح يراضي ..اول مرة اسمع بجذي ...
عدلت جاكيتي اللي لبسته عن البرد ... طالعت البحر ...
الله ياحلاة البحر هالحزة ...
استنشقت الهوا العليل ..وغمضت عيوني ... ابي بس اظل هني بهالجو الحلو البارد ...
حسيت بعيون تراقبني ..بطلت عيوني وكان مشاري اللي قال لما شافني اطالعه ..
مشاري : حمدلله والشكر ... اقول فريد اطرش ..اطربنا شوي ..
ضحكت بخفة وقلت وانا امشي عنه ..
يعقوب : اقلب ويهك ..
ظليت اتمشى وانا افكر بكل شي ...
بشغلي ..
بحياتي ...
طالعت فهد اللي كان يتكلم بالتلفون شكله مع نوف ... وكان يضحك ...
طالعت ناصر اللي كان قاعد مع صلاح وفواز الزعلان ..وكانوا يسولفون ويضحكون ... انضم لهم مشاري اللي نط على فواز يعني بيراضيه ...
هالصبي عجيب ... عنده الزعل والرضا غصبن عنك ....
ابتسمت عليهم ... واحنا جذي قاعدين بهاللمة الحلوة ... الله يديم علينا ان شاء الله قولوا آمين ..
انتبهت على تلفوني يدق .. طالعت الشاشة وكانت امي ...
يعقوب : هلا يما ..
ام يعقوب : هلا حبيبي ... وينكم فيه ؟؟
قلت وانا ادفي عمري بالجاكيت وانكمش فيه ..
يعقوب : بالبحر ..
قالت متفاجأة ..
ام يعقوب : شنو؟؟؟ بالبحر ؟؟؟ ميانين ؟؟
ضحكت وقلت ..
يعقوب : والله قلنا خل نتمشى شوي ومافي احلى من البحر ...
قالت باستسلام ..
ام يعقوب: مارح اعلق انا لأن ما يفيد الحين ... بس ليش طلعتوا قبل ما تغدون ؟؟
قلت وانا اشوف فهد يايني ..
يعقوب: بنتغدى هني ان شاء الله ..
ام يعقوب : اوكي ... دير بالك على روحك من البرد ... اخذت معاك جاكيتك ؟؟
قلت ..
يعقوب : ئي ...
صكت عني وسمعت فهد يقول ..
فهد : ها بو يوسف ... يوعان ؟
قلت وانا اصلا مو يوعان وايد من سهرة امس ..
يعقوب : يعني مو وايد ...
نط علينا مشاري ومعاه ضاري ..
مشاري: انا يوعان ..
قال ضاري ..
ضاري : امشوا خل نتغدا ...ما تريقت انا ..
نادينا فواز وناصروصلاح ورحنا مطعم ...
تغدينا وطبعا انواع الخبال من مشاري وفواز وكان يشاركهم فهد اللي ماادري شطاري عليه اليوم ... شكله من مكالمته مع نوف ...
وحنا قاعدين نضحك ونسولف انتبهت على مجموعة بنات توهم داخلين المطعم ...
وطبعا مكياج اللهم يا كافي ... ولبس كل وحدة تقول الزين عندي ..
استغفر الله ياربي ..
قعدوا يمنا ... وطبعا لما شافونا شباب بدا الدلع ...
كل شوي وحدة تأشر على واحد فينا وتضحك ..
وطبعا مشاري عاجبه الوضع ...
قلت انا منبطة جبدي من مشاري اللي معطيهم ويه ..
يعقوب: مشاري ...بطل هالحركات ... كل ماتسوي شي هم يزيدون ..
مارد علي مشاري وكان مشغول يعطيهم الرقم ...
قال فهد باستنكاروهو ياخذ الرقم منه ويقطعه ..
فهد : استح عيب ..جدامنا بعد ؟؟..
قال ببساطة وهو يضحك لوحدة ..
مشاري : هي تبي جذي ..
قال صلاح اللي قام معصب ..
صلاح : وانت ما صدقت ؟؟..
انا عبالي قايم يروح الحمام عزكم الله يغسل ايده ...بس انصدمت لما شفته رايح لهم ...
ولأن الطاولة قريبة سمعت شقال لهم ..
كان يتكلم بعصبية لأول مرة ..
صلاح : خافوا على روحكم انتوا بنات .. واعتقد اهلكم ما يرضون يشوفونكم بهالصورة ... إذا هالغبي
اشر على مشاري اللي بقق عيونه مصدوم ...
كمل ..
صلاح : معطيكم ويه تراه يقص عليكم ... اتمنى ارد مكاني الحين وما القى وحدة فيكم موجودة ...لو سمحتوا يعني ..
ورد قعد عندنا ...
كلنا سكتنا من الموقف اللي محد تجرأ يبطل حلجه بعده ...
شفت البنات يقومون وشكلهم تفشلوا عدل ...انقص ويههم ..
طالعنا انا وفهد بعض بعدين ردينا للصحن باحراج واحنا نقول ...
يعقوب+ فهد : احم ...
قال مشاري معصب ..
مشاري: انت اشحقة تقول عن غبي ؟؟ وجدامهم بعد ؟؟!!
قال صلاح ببرود وهو يكمل اكله ..
صلاح : لأنك غبي ..
كتمنا ضحكتنا كلنا وانا ما قدرت اكمل حطيت ايدي على حلجي امنع الضحكة تطلع ..وفهد وضاري وفواز وناصر يحاولون ما يضحكون ...
قال مشاري بعد ماشافنا جذي معصب طبعا ..
مشاري : ارتحت الحين ؟؟ ضحّكت البنات علي وفشلتني جدامهم والحين عندهم ..
طالعه صلاح وقال ببرود ..
صلاح : انت يبته لنفسك ...
وقف مشاري وقال بجدية ..
مشاري : لو انت مو ولد خالتي كنت تصرفت معاك تصرف ثاني ..
طالعه صلاح وقال بلامبالاة ..
صلاح : مشكور ...
بغى يرد عليه مشاري بس بلعها ..طالعنا معصب وتحرك ... بعّد الكرسي من وراه بقوة لدرجة انه طاح ..ومشى طلع من المطعم ..
طبعا صلاح ما