رواية ودي اكون شخص ثاني للكاتبه انا

و اول بارت للحلوين ..!!
(ودي اكون شخص ثاني) للكاتبه lolana.
البدايه:
فيصل بعصبيه و صوت عالي: امل خلاص
امل بدموع: انا اللي خلاص و لا انتا اللي خلاص .. خلاص كفايه يا فيصل كفايه و الله انا ما اتحمل اكتر من كدا تعبت و الله تعبت ما اقدر اتحمل و الله ما اقدر اتحمل
و رمت نفسها على الكنبه و حطت وجهها بين يدينا و جلست تبكي بصوت عالي
فيصل خلاص حس نفسه متضايق من المكان سحب مفاتيحه و محفظته و خرج من البيت
امل بنووته في عمر الزهور ... 21 سنه لسا بتدرس في الجامعه طب طموحها انها تكون دكتوره طبعا .. متزوجه فيصل 24 .. فيصل حكايته حكايه
كان يحب وحده اسمها نوار و راح خطبها بس نوار ما عجبت ام فيصل (فاطمه)
حست انها بنت مش مزبووطه و مش كوويسه و ما تنفع تكون زوجة لولدها ....المهم فيصل عارف انه لو مهما عمل امه محا توافق و اضرب عن الزواج و لكن مع زن امه قال خلاص امشي حالي بأي بنت و هوا من جوا يحس نفسه بيموت ...
رجع البيت و فتح الباب بشويش...لقي المكان هاديء..اول شي جا في باله انها راحت بيت اهلها...زعلانه!!...انا ما سويت لها شي...هي اللي صارت تعصب على طول و تزعل...
يوه خلاص من جد خلاص ... انا بنهي كل شي بيننا......
فتح باب غرفة النوم ....شافها......نايمه على الكنبه .... قرب منها يشوف نايمه من جد و لا تمثل؟!!....لا لا شكلها حقيقي نايمه ..... طيب؟!...اوديها على السرير و لا اخليها هنا..؟؟؟!!...... لا بخليها اصلا انا مو نايم هنا في البيت اروح انام برا احسن!!
بدل ملابسه و خرج ...
كنت نايمه و حسيت بالباب ينفتح قلت اكيد رجع ... حسيت به .. حسيته يقرب مني ... فضلت مغمضه عيني ... ما ابغا اشوفه ... ما ابغا اتكلم معاه...ما ابغا اتخاصم معاه اكتر من كدا يكفي اللي صار!!...لا لا خرج ؟؟؟!! معقول؟؟؟
قامت من الكنبه و فتحت باب الغرفة بشويش و خرجت للصاله و دورت عليه راحت لغرفة الملابس برضو مش موجود....مهما عملت له ما يبطل..!!! يا ربي ارحمني ...
فيين راح دحيين؟؟!! اول مرا يسويها و يسيبني في البيت لحالي.... الساعه 2 الليل يا الله فيين راح
ماشي بسرعه بالسياره ... متوتر مرا من كل اللي حصل اليوم ...مقهور منها ... نفسه يقتلها...قطع تفكيره صوت جواله يدق....امل يتصل بك!!
يوه ايش تبغا دي دحين؟؟؟ كأني ناقصها؟!!!!!!!!
فيصل رد بس بدون ما يتكلم يستناها تتكلم ...
و امل اول ما رد عليها فيصل ما قدرت تتكلم معاه .. لانها كانت وااثقه انه محا يرد .. بس رد...!!
فيصل: ايوا؟!
امل: فيصل فينك ؟
فيصل: ما يهمك
امل: طيب..خلاص باي
و قفلت بسرعه بدون ما تسمع و لا كلمه زياده لانها مو ناقصه ... يكفي انه راح و سابها لحالها في البيت ... يكفي انها خاايفه ... صح الدنيا امان ... بس اول مره تحس انو مافي وراها ظهر ..................
وصلت المكان اللي ابغاه ... وقفت سيارتي و خرجت منها .. رحت على السقاله( المرسى)
بسرعه .. قعدت على طاوله ..طلعت بكت الدخان .. و ولعت سجاره .. تنسيني الدنيا و ما فيها ....
....: معليش اتاخرت
فيصل: لا عادي ...
....: فيصل..اشبك؟؟؟
فيصل: و لا شي
....: لا انتا مرا متغير مو فيصل اللي اعرفه ...
فيصل: خلاص يا احمد اسكت الله يخليك
احمد: طيب..
و فضلو الاتنين ساكتين و يتفرجو على البحر في الظلام ....
سعد بفرحه: هاي شباب كيفكم؟؟!!
فيصل اعطاه نظره و رجع يطالع على البحر..
سعد لاحمد: اشبو دا؟؟!!
احمد: مدري عنه
سعد: احمد امشي معايا و الله شفت شلة بنات و قعدت اتكلم معاهم ... شكلهم مش مزبووطين ..امشي يلا نروح لهم نتسلى شويا..
فيصل: ما بطلت حركاتك؟؟تراك كبير
سعد: يا شييخ رووح بس ... انتا اكبر مني..و لسا ما بطلت و انتا متزوج ..يعني اسكت
فيصل: يوه يا سعد خلاص اسكت ...
سعد: لا لا انتا شكلك فيك شي مو سهل
فيصل: اقوول... انقلع بس عن وجهي ..
سعد: ها احمد تجي معايا عند البنات؟؟ و على فكره يا فيصل ترا نوار معاهم
فيصل اول ما سمع الاسم افتكر ايام زماان ايام ما كان يشوفها و يقعد معاها بالساعات بدون ما يندم .. كان يحبها لا ما يحبها يعشقها..صح دحين بيشوفها بس مو كتير زي زمان ..برضها نوار ما تبطل ... كم مره قلتلها ما تجي دا المكان مع صحباتك ... اغار عليها يا ناس و الله اغار... اه بس منها و لا قالتلي طيب كويس اني جيت عشان اشوفها ...مع اني شايفها من يومين بس يلا .. وحشتني ...
فيصل: انا جاي معاك..
احمد: فيصل...لا تخرب بيتك بيدك..انسى نوار الله يخليك
فيصل طنش احمد و مشي.... قال اخربو بيدي ... قدو خربان من اول اصلا
في الطريق ... لنوار و صحباتها..
سعد: اقوولك اسمع شووف وحده من صحباتها لابسه طرحه بيضا ...بالله ابغا اعرف ايش اسمها ... عاد انتا خبره تعرفهم كلهم ..البنت مرا حلوه صااروخ ,,
فيصل: طييب طيب<<< من الحماس مو عارف يتكلم غير بكلمه و لا كلمتين
وصلو للبنات
اول ما شفته حسيت باحساس مررا واو .... اه فيصل حب حياتي ... كل ما افتكر اللي سبب بعض الحواجز بيننا ادعي عليه ...<< ام فيصل..
رحت بسرعه عنده و ضميته ....و صحباتي الاغبياء قامو يصرخو و يصفرو و يعلقو على الموقف اللي حصل
فيصل بصوت واطي: خلاص حبيبتي
نوار: مرا وحشتني
فيصل: و انتي كمان مررا وحشتيني ..يلا نمشي من هنا
فيصل للبنات: معليه بس باخدها منكم شويا ..لا تخافو برجعها محا اكلها ..
ابتسمت نوار
و مشيت معاه...
يوه ... ليش اتاخر الين دحين .. استناه و لا انام؟؟ استناه احسن ... انام يقوم يقول ما تهتم ..
شغلت التلفزيون و جلست تقلب بين القنوات و جنبها الشي اللي ما يفارقها وقت ما تكون متضايقه .... نوتيلا الكبيره .. تاكل منها بالملعقه ...؟!!!
وسط ما بتتفرج ... ما قدرت تتحمل و نامت في محلها ....
فيصل: انا اتغيرت .. لا تفكري اني لسا زي اول ..
نوار: افتحلي قلبك يا فيصل .. اتكلم قوول اللي تحس بيه ..
فيصل:مو المشكله هنا ... مني قادر اتكلم ... خلاص .. انا قلبي مات .. امي الله يهديها بس هي السبب ..
نوار بالم: خلاص لا تتكلم ..ما ابغا افتكر و لا شي ... خلينا مبسوطين مع بعض احسن
فيصل و نظره للفراغ: حتى انا مررا ما ابغا افتكر ..
نوار جات تبغا تتكلم بس انتبهت لشي..... و مسكت يد فيصل اليسار
نوار: انا كم مره قلتلك لمن تشوفني شيل دا الشي من يدك؟؟
فيصل يفتكر: ااه صح و الله حياتي نسيت .. اسف
نوار: فيصل انتا كدا تجرحني ... تفكرني بالشي اللي حطم كل احلامي ...
فيصل و هو يشيل الدبله من يده و يحطها في جيبه : خلاص و لا يهمك اهو شلتو
اصلا انا حاط الدبله بس شكليا .. قدام اهلي و اصحابي.. و في البيت << ما يبغا يقول امل
نوار: طييب...
طالعت في الساعه ..: لازم ارجع البيت دحين
فيصل: و تسيبيني لوحدي؟؟
نوار: فصول شووف الساعه 3 و نص .. مو معقوول اقعد طول الوقت دا برا البيت خصوصا و ماما ما تدري اني هنا .. قلتلها بروح عند ملاك صحبتي و من بيت ملاك جينا على هنا..
فيصل: طيب حتوحشيني ...
نوار و هيا تبوسه في خده بسرعه: و انتا اكتر .. يلا باي
جلس يتأملها و هي تمشي بسرعه .. بترجع عند صحباتها عشان يرجعو بيوتهم
يا ربي دحين ايش اسوي .. فيين انام...مصيري ارجع البيت .. خليني اشوف احمد فينه..
احمد: سلام
فيصل: ايوا يا احمد فينك؟
احمد: اوه انا قدني خلاص في البيت ..
فيصل: غريبه راجع بدري اليوم ..؟؟
احمد: لا يا شيخ بس ابويا كلمني قال ارجع البيت قلتلو طيب ما ابغا مشاكل ..
فيصل:مم طيب خلاص .. يلا مع السلامه
احمد: سلام
يعني مصيري ارجع البيت
اول ما وصلت البيت .. فتحت الباب سمعت صوت التلفزيون .. يووه يعني صااحيه..
دخلت الصاله .. لقيتها نايمه في محلها...اشبها دي كل ما دخلت لقيتها ناايمه ؟؟...
رحت غيرت ملابسي .. و كنت ابغا انام..سمعت صوت اذان الفجر .. قمت و غيرت تاني و رحت المسجد و صليت ... و حسيت براحه مو طبيعيه
رجع البيت من المسجد
لسا نايمه ؟!!...ما صارت كل دا نووم .. مو معقول ما حست بيا لمن دخلت و خرجت..
راح عندها ..هزها من كتفها بشويش.. على طول حست .. و قامت مفجوعه
امل بسرعه: اش في؟؟
فيصل: مافي شي .. بس قومي صلي الفجر..
امل و هي تمرر يدها بين خصلات شعرها السوداء الناعمه: طيب
فيصل على طول راح عشان يبغا ينام مرا نعسان .. بس المشكله مو قادر ينام من كتر التفكير ..فقرر انه يعمل نفسه نايم ..... مو نااقصها والله
امل قامت و صلت و لبست بجاما و دخلت الغرفه لقيته مغمض عينه .. عرفت انه صاحي .. يحسبني ما اعرفه ... لا تخاف يا فيصل انا اعرفك يمكن اكتر من نفسك ..
راحت و اتمددت على السرير بس بعيد عن فيصل ..
حتى امل ما قدرت تنام ...
امل: فيصل ..
...
امل: فيصل رد عليا انا عارفه انك منتا نايم
فيصل لف عليها ..: اش تبغي؟
امل: و لا شي بس ما جاني نوم
فيصل بقهر: طييب انا ايش دخلني؟؟؟
اضطرت انها تعمل نفسها مش زعلانه .. عشان تقدر تعيش مع فيصل<< متعوده
امل: مو انتا زوجي ؟
فيصل: ايوا زوجك على عيني و على راسي بس مو تزعجيني
و رجع لف على الجهة التانيه..
امل: طيب .. فين كنت؟
فيصل: اعتقد اني قلتلك ما يهمك..
امل: بس ابغاك تعرف شي واحد ... ترا نحنا كبار ..مو اتنين صغار متخاصمين مع بعض
فيصل : امل .. مرا مالك داعي .. اسكتي احسن ..
امل: طييب..تصبح على خير
شويا و دق جوال امل...(انا طبعي كدا .. و بحب كدا .. و بحب اعيش و ما عنديش الا كدا ..دي حياتي انا .. دي ملكي انا .. و انا مهما يكون برضو حكون زي ما انا ..)
على طول امل ردت و خرجت من الغرفه ..
امل بحماس: شوق يا حماره مرا وحشتيني ..
شوق: امولتي حياتي .. كيفك؟؟
امل: الحمدلله ماشي حالي لسا عاايشه
شوق: يوه منك .. طول حياتك بائسه ما كأنو اسمك امل ..
امل: يا شييخه هوا لسا باقي فيا امل ..؟؟
شوق: اخر مره كلمتك قبل اسبووع .. كل دا صار في اسبوع؟؟ حكيني بسرعه ايش اللي صار؟؟ في تطورات و تغيرات ؟؟
امل: ههه و الله انك .... ما ينفع دحين فيصل في البيت
شوق: طييب خلاص انا بكرا بجيكي.. من بدايه الاجازه و لا شفناكي.. و على فكرا ترا جبتلك شي مرا حماس
امل: يا حياتي انا .. طيب خلاص ترا مرا miss you .. اهم شي الهديه ها؟!!
شوق: طييب يختي انا عاارفه انك ما تبغيني تبي الهديه
امل: لا و الله.. فديتك و الفدوه ببلاش .. يلا call me بكرا...love you
شوق:me 2...اشووفك بكرا .. يلا سلام
امل: سلام
حسيتها متحمسه ... قمت ابغا اعرف تكلم مين ..؟؟
فتحت باب غرفة النوم شويا ..
امل: ههه و الله انك .... ما ينفع دحين فيصل في البيت
امل: يا حياتي انا .. طيب خلاص ترا مرا miss you .. اهم شي الهديه ها؟!!
امل: لا و الله.. فديتك و الفدوه ببلاش .. يلا call me بكرا...love you
امل: سلام
.............................................
رجعت للغرفه بحماس و الابتسامه ما فارقت وجهها...يالله شووق مرا مرا وحشتني .. حبيبتي والله .. صندووق اسراري و صحبتي و كل شي .. شكلي و الله احبها اكتر من فيصل .. ههه << زادت ابتسامتها
فيصل: مين كنتي تكلمي؟؟
امل بمزح: ما يهمك
فيصل بعصبيه: الا يهمني ... و بسرعه اتكلمي لاني مو ناقص اكتر من كدا
امل تقلده: اعتقد اني قلتلك ما يهمك !!
فيصل طالع فيها : امل بسرعه انطقي.. ترا ما بمزح انا
امل واصله معاها: يووه يعني بكلم ميين يا فيصل .. لا تفكر اني زيك ... طيب
..ترا كلا يرى الناس بعين طبعه
و خرجت بسرعه من الغرفه ... تحس دموعها بتنزل .. ما تبغاه يشووف دموعها او بالاصح ضعفها قدامه ... بس ما تدري ليه جلست تتعابط معاه دحين ..يمكن عشان كانت فرحانه ؟؟ عشان كلمت شوق؟؟ و الله صح كلامك يا شوق ... شكلي بغير اسمي لبؤس..
بدال امل...
انا ليش عملت كدا.. ليش زودتها؟؟...يوه خلاص ... لازم انام و الله تعبت و الله ما اقدر اتحمل اكون في محل واحد معاها ... خلاص و الله خلااص...
اتمددت على الكنبه و هي تبكي ..ليش يفكر فيا غلط ؟!...ليش يحسبني زيو ؟؟...يعني انا عارفه انه يكلم اللي يحبها و سمعت من الناس كتير انه كان يحب وحده و فوق دا كله يكلمها و انا ساكته!!...بعدين اجي اكلم صحبتي يقوم يشك فيا؟؟..اه بس
صحيت على صوت المنبه .... يوه الناس اجازه و انا اصحى من الساعه 8 عشان الشغل..قمت رحت على الحمام .. و لبست و خلصت و انا خارج شفتها نايمه على الكنبه ... مسكينه كل يوم لازم تنام على الكنبه ... ابتسمت ابتسامه خفيفه ... ما ادري الابتسامه على ايش على شكل امل و لا على حالنا الميؤوس منها ؟؟..!!..و لا على واقعنا الاليم ..
و خرجت من البيت
حسيت بصوت شي وسط نومي ... فتحت عيني ...و كالعاده اول شي سويتو طليت على الساعه .. كانت 11 و شويا .. يوه مررا تعبت و الله نعسانه مرا ... قمت من محلي بعدين افتكرت الصوت اللي سمعته .. عرفت انه صوت جوالي طالعت فيه لقيت رساله فتحتها بسرعه ..ميين يرسل رسايل في دا الوقت و الناس نايمه..؟؟.... فتحتها طلعت رساله من شركة الاتصالات .. يوه و الله انهم فاضيين ...و دقيت على شوق قلتلها تجي عندي يوم تاني عشان اليوم يوم اهل فيصل..
رحت على الغرفه جيت ابغا افتح الباب قلت لا فيصل فيه ... بعدين افتكرت انو عنده دوام و راح .. دخلت الغرفه و حطيت راسي على المخده و نمت ...
يووه دوام و قرف الحمدلله انو اليوم ربوع يعني بكرا و بعده اجازه ... يا ربي لازم اليوم اروح العزيمه اللي في بيت جدتي ... يا ربي و الله مرا ما فيا .. لو ما رحت جدتي تزعل ..امرنا لله ..
رجع فيصل من الدوام في العصر .. لقي امل نايمه .. يوه كل ما ارجع الاقيها نايمه ما صاارت دي .. ايش العيشه الزفت هادي ...اوف
راح عندها و بصوت عالي شويتين
فيصل: امل قومي .. امل .. امل .. امل..
قامت مفجوعه : ها ايش صار اش في؟
فيصل: يلا قومي ..
امل: ليش؟
فيصل: يعني لازم افكرك انو يوم الربوع لازم نروح بيت جدتي؟!!
امل: يوه نسيت..طيب كان صحيتني من اول كان سويت شي اخده معايا
فيصل: خلاص مو لازم
امل: لا يا فيصل عيب .. ما يصير نروح و يدنا فاضيه .
فيصل: طيب خلاص نشتري اي شي من الطريق يلا قومي بس
امل و هي تطالع في الساعه: يووه ترا لسا بدري الساعه 5
فيصل: على بال ما تنقي اللي حتلبسيه و على عبال ما تصبغي في وجهك يكون قده مغرب
امل ابتسمت: طيب
و قامت ..
راحت امل اخدت شور على السريع و راحت غرفة الملابس تشوف ايش تلبس..
طلعت تنوره موف غامق برمودا ... لا لا مو حلوه..بلوزتها كمها طويل و الدنيا حر
م ايش البس ... م ...البس تنوره و لا بنطلون؟؟
تنوره احسن عشان احس اني انثى ... واه افتكرت فستاني دا ما عمري لبسته ...
فستان ابيض عريان برمودا منقط بالوان اصفر احمر برتقالي بمبي ...
يووه ايش احطلو مكياج دا؟؟
ما ينفع خلاص محا البسو ... كمان ما عندي صندل يليق عليه .. لازم انزل السووق
م خلاص مو لازم اروح ...
لبست اي شي بسرعه ...بنطلون جينز و تي شيرت
خرجت عند فيصل
امل: فيصل ما ابغا اروح ..
فيصل: ليش يعني؟
امل: مني عاارفه ايش البس
فيصل: يا شيخه و الله انك تافهه .. البسي اي شي و خلصينا
امل: وجع خلاص بعدين ايش تبغا اهلك يقولو عني .. ما تعرف تلبس و لا ما تعرف تلبس؟؟؟
فيصل: يقولو اللي يقولوه يلا بسرعه
امل: ترا لسا بدري على المغرب
فيصل قام من محله و راح عند امل و سحبها من يدها و هي زي الهبله تمشي وراه و راح على غرفة الملابس
لقي باب دولابها مفتوح ... القى نظره سريعه و سحب تنوره بيضا و بلوزه سودا
فيصل: يلا بسرعه البسي
امل: لا والله ما البس دا كأني في عزا اعوزو بالله ...
فيصل: و الله انتو الحريم ...
امل: خلاص يلا اخرج برا انا اختار بنفسي انتا ما تعرف تختار
فيصل: لا عشان بعدين تجي تقولي ما ابغا اروح مني عارفه ايش البس؟؟
و رجع تاني يطالع في الدولاب و يتأمل
امل: ايوا .. اسمع انتا اهلك عندهم البس اي شي عادي؟؟
فيصل: ايوا ايوا ..
طلع بنطلون بيج .. معاه بلوزه لونها بمبا فاتح و عريان و مشجره على خفييف بدرجه افتح
فيصل: دا حلو مو؟؟
امل: م يلا ماشي حالو ..
قعدت امل ساعه عبال ما تحط المكياج .. و تزبطه .. و شويا لا مو حلو .. و شويا يوه اتخبص .. الين ما الناس صلو المغرب و خلصو ...
و لبست عبايتها و خرجت
فيصل: سنه؟!
امل: خلاص اهو خلصت
قام فيصل يلبس ....
و على صلاة العشا كانو في بيت جدة فيصل
_______________________________-----________________

اقرووه
و لو سمحتو الردود
و قولو رأيكم لو ما عجبكم اوقف ... ابداعي ...<< مصدقه نفسها
يلا يا حلووين
سلام

واو مرره جنان بليزز كملي اهم شي انها باللهجه الحجازيه خ
بليز كملي ويشرفني اكون اول وحده ارد

مرا شكرا
الصراحه اعطيتيني امل في الحياة
بس بنزل بارت طويل
بس مو اليوم بكرا عشان اشووقكم للاحداث<< كرهتيني صح ؟؟؟
مرا شكرا على مرورك المنور و تسلمي حبيبتي

مره حلوه تحمست انتظر البارت الثاني
مشكوره ياعسل

العفو حبيبتي ... انتي العسل
و دحين انزل البارت التاني ...

قعدت امل ساعه عبال ما تحط المكياج .. و تزبطه .. و شويا لا مو حلو .. و شويا يوه اتخبص .. الين ما الناس صلو المغرب و خلصو ...
و لبست عبايتها و خرجت
فيصل: سنه؟!
امل: خلاص اهو خلصت
قام فيصل يلبس ....
و على صلاة العشا كانو في بيت جدة فيصل
____________________________________________
__________ __________
جدة فيصل حرمه عجوزه طبعا .. تكون ام امه ..اسمها ( عائشه)
و زوجها اللي هوا جد فيصل ميت الله يرحمه
عندها 5 اولاد و 3 بنات
خاله محمد .. اكبر واحد اكيد .. متزوج طبعا زوجته اسمها ناهد
عنده ولدين و 4 بنات
سمر: 32 سنه متزوجه خالد .. عايشه في امريكا عشان دراسة خالد .. عندها بنت و 3 اولاد
عبدالله: 29 سنه متزوج خلود .. عندهم بنوتتين صغار ..و خلود حامل
هند: 25 سنه بتدرس برا قانون ... مالها علاقه بالعيله
هنادي: بنوته فرفوشه لزوزه 22 سنه ...
ابراهيم: 19 سنه
دانيا: 17 سنه ..
____________________
خالته جميله
متزوجه و عايشه في الشرقيه عشان شغل زوجها ...
عندها بنت و ولد فقط
وليد: 23 سنه...
وجدان: 20 سنه ....
_______________________________________
خالو محمود
متزوج بدريه
عندهم 2 بويز اند ون قيرل
يوسف: 25 سنه .... عزوبي
فلول: 22 سنه ... مخطوبه مدري مملكه المهم انو زواجها مرا قريب
ياسر: 18 سنه ...
________________________________________
خالو احمد
متزوج تهاني
عندهم
3 اولاد و بنتين
ريان: 24 سنه ...
انوار: 21 سنه
ايمن: 20 سنه
حسام: 18 سنه
ايمان: 17 سنه
_____________________________________________
بعدين ام فيصل
ما عندها غير فصول
و ابوه اسمو ابو فيصل خ ما يشوفه كتير لانه شغله كلو سفراات
_____________________________________________
خالو زياد
الين دحين ما اتزوج و لسا في عملية البحث عن عروسه و هوا قدو خلاص معنس
عمره 34 سنه ...
__________________________________________
خالوو نواف
عمره 24 سنه ... اساس البلا في العيله
لا حرام بس هوا شويا صاايع و ضاايع و دااشر و علم العيال كلهم اصوول الصيااعه تربية يده...
___________________________
خالتو عبير
23 سنه ...
طيوبه و حبوبه كل الناس تحبها .. بس مشكلتها شريره شويا..افكارها جهنميه..
____________________________________________
____________ __________
عبير: يا هلا و الله بفصول و مرتو
فيصل: اسكتي انتي بس ادفك تطيري قال فصوول قال .. قولي فيصل يا بنت
عبير: حاضر عمي فيصل ....انقلع عن وجهي .... كيفك اموول؟؟
امل و هي تسلم عليها: الحمدلله كيفك انتي؟
عبير: تمام .. تعالي اتفضلي .. مرحبابك
امل ابتسمتلها
جات عبير شالت من يد امل الكرتون اللي شايلتو
عبير: واو الكيكه اللي احبها.... انا عاارفه انكم تحبوني و جبتولي هيا
و شالته و دخلت جوا
امل ضحكت ..
و دخلت وراها
فصخت عبايتها و علقتها .. فتحت شعرها زبطت شكلها بخت عطر و دخلت..
سلمت على القبيله كلها ... و قعدت على يمينها هنادي و على يسارها خلود مرت عبدالله ولد محمد خال فيصل<< فهمتو شي؟؟؟
خلود: ها كيفك امل؟؟
امل: الحمدلله .. كيفك انتي؟؟
خلود: بخير ...كيف اجازتك ..
امل: ماشي حالها و الله كوويسه
خلود: ليش ما تسافرو؟
امل: عشان دوام فيصل..
خلود: اها... و الله الحال من بعضه..
امل: فيين ديالا؟؟؟<< بنت خلود الصغيره عمرها سنه و نص
خلود: ما ادري تلاقيها مع البنات ..
امل: لا دحين تتعود على الشيل .. بعدين لمن تقعديها تبكي
خلود: و الله طول وقتي و انا اقولهم بس الله يهديهم ما يسمعو ..
ام فيصل من بعيد: تعالي يا امل اقعدي جنبي
راحتلها امل عند جهة العجاايز خ
ام فيصل: ها كيف حالك؟
امل: بخير الحمدلله .. انتي كيفك يا خاله ؟
ام فيصل: و الله زي ما انتي شايفه يا بنتي .. سكر و ضغط و تعب ...
جميله : و الله اللي يسمعك يقوول حتموت بعد شويا .. انتي طول الوقت من بيت لبيت .. عند جاراتك و لا صحباتك ..
ام فيصل: لا و الله ...و انتي يا امل ... ها كيف حال ولدي وحشني
امل: اناديلك هوا؟؟؟
ام فيصل: ياريت و الله
امل: من عيوني ..<< بكش..
و راحت عند شنطتها
طلعت جوالها و دقت على فيصل
امل: الو فيصل..
فيصل: نعم
امل: ام امك تبغا تشووفك
فيصل: ايوا عارف اصلا دحين كل الاولاد يبغو يدخلو ..
امل: طيب انا فين اروح
فيصل: شوفي محل ما الحريم يروحو روحي
امل: البنات يقعدو عادي مع الاولاد بس انا مو متعوده عليهم ..
فيصل: مشكلتك
امل: ووجع فيصل .. من جد ايش اسوي؟
فيصل: البسي عبايتك و اقعدي.. يعني عشانك يخربو الجلسه؟؟
امل: طيب خلاص..باي
و قفلت
و راحت عند ام فيصل
امل: يقول دحين حيجو كل الاولاد
ام فيصل: طيب خلاص..
و راحت امل رجعت محلها جنب خلود و هنادي
امل لخلود: لمن الاولاد يدخلو انتي تقعدي معاهم؟؟
خلود: ايوا...ليش يعني؟
امل: و لا شي بس انا مو متعوده على اولاد عيلتكم ..
خلود: حتى انا كنت زيك ... دحين عادي .. يمكن اقوم اضرب واحد فيهم عادي مو مشكله ..تراهم طيبين ما ياكلو
هنادي: اقوولك انتي مرا مكسوفه يعني؟؟
امل: مو كدا .. بس ا فهمتي؟
هنادي: مافي كلمه عندي في القاموس اسمها ا
امل: ههه طيب يختي خلاص امري لله
هنادي: ترا و الله عادي .. و لا انتو في عيلتكم الاولاد لحال و البنات لحال؟؟
امل: لا عندنا عادي كلو مع بعض بس عشان دولاك اقاربي متربيين سوا فهمتي..
خلود: اهاا ايوا ايوا... يلا يا بنت هنادي قوومي جيبي شرشف صلاه ليا و لامل
امل: لا انا بلبس عبايتي .. ارتاح اكتر .. ما احب شراشف الصلاه احسها حوسه
هنادي: طويب<< زي الشغالات
و راحت هنادي
خلود: ها مافي مشروع حمل ؟
امل: ههه لا يختي لسا بدري
خلود: ايش بدري؟؟ حلوه بدري دي!! يلا اتشطري و جيبي عروسه لولدي ..اللي الله يخرجه بالسلامه
امل: يا شيخه... دوبنا متزوجين مالنا 3 شهور .. بعدين الناس يقولو مستعجله ..و ماشاءالله عليكي.. حامل بولد؟!!!
خلود: ايوا ..
امل: في الشهر الكم؟؟
خلود: نهاية السابع.. بس و الله تعب
امل: يلا خلااص ما بقي شي.. دحين تتعبي و في النهايه تفرحي
خلود: ههه طيب يختي .. اقوولك بس شوفتي الاسواق كلها تخفيضات
امل: من جد؟؟؟ و الله انا نفسي انزل السووق .. في اشياء كتيير ابغا اشتريها
خلود: طيب ايش رأيك نروح مع بعض؟
امل: و الله..؟؟ بس متى؟؟ انتي قولي و انا اكلم فيصل
خلود: نشووف يوم و نروح اصلا في حاجات حق البيبي ناقصتني و كدا بروح اشتري
امل: طيب
و جات هنادي و معاها عبايات و شراشف صلاه
و دخلو الاولاد..
و قامو يسلمو على عماتهم مدري خالاتهم و جدتهم ..
كانت الصاله كبيره من عند الباب الامهات و الحريم الكبار و بعدين هناك في النص كدا امل و خلود و هنادي و ما فوق ال20 و بعدين في الاخير المراهقات قاعدين في كنبه وحده كبيره ..
راحو الاولاد و جابو لنفسهم كراسي عشان يقعدو ,,اللي هما: نواف و ريان و ايمن
اما الباقي خرجو برا .. يا كبار مرا مالهم خلق هرجات الحريم يا صغار مرا يلحقو البليستيشن
, و كان في محل فاضي جنب امل .. قعد فيه فيصل...
نواف من بعيد على الكراسي: ها يابو الشباب اشووفك لاصق هناك << يستهبل
فيصل مطنشه
نواف: هي انتا فيصل
فيصل: ها
نواف: ليش هناك .. تعال عندنا .. شكلك غلط وسط الحريم
فيصل: مالك دخل ..
نواف: براحتك ..بس حبيت اقولك شكلك غلط..
ريان يستهبل: الولد مع البنات طزتو شوكه و مات امو قالت ليه ليه ابوه قال زيدو عليه
فيصل اعطاه نظره: مالك داعي ابدا
ايمن داخل عرض: كلو الا اخويا
فيصل: اسكت انتا اخر واحد تتكلم
نواف بقوة عين: تصدقو فيصل من يوم ما اتزوج صار رزل و دمو تقيل
ريان: عمايل الزواج
نواف: عشاان كدا انا محا اتزوج... نعم للحريه و لا للزواج
ريان: ايوا شوف كيف لاصق في مرتو .. ابدا مافي حريه
امل بصوت واطي: فيصل خليهم يسكتو ..
فيصل بصوت اوطى: سيبيكي منهم اغبياء...
نواف: واي واي كمان يتوشوشو يا الطااف الله ...
عبير: ايوا و الله قلة حيا هاا.. ترا في ناس مو متزوجين لو انحرفو انتو السبب
فلول: الحمدلله زواجي قريب جدا
نواف: طييب ليش جيتي هنا؟
فلول: بيت جدتي وه
نواف: يا غبيه العرايس ينعزلو عن العالم الخارجي عشان تطلعلهم طلعه يوم زواجهم..
فلول: غبي ..مالك دخل
نواف: بنت احترميني تراني عمك
فلول: شقلب بس شقلب
هنادي: ووجع خلاص بس اسكتو شويا ارحمونا مزعجيين
ريان: جااتكم العااقله
نواف: انتي يا رزله اسكتي
ايمن: في واحد ياباني عطس قال هيتاشي
فجأه كلهم ساكتين يبغو يحسسوه انه تافه .. الا و الحلوه امل تضحك بس بشويش
فيصل اعطاها كوع: اسكتي خليه يحس انه تافه
نواف: عما ان شااء الله .. خرقت بطن الحرمه .. افرض لو حامل
فيصل: اعوذ بالله ..
انوار: ليش يعني اعوذ بالله؟
فيصل: مالك صلاح
انوار: انا عرفت ليش
ايمن: حتى انا
فلول: و انا كمان
نواف: مي تو
ريان: مي تري
ايمان: مي كمان
هنادي: و حتى انا
فيصل: ملاقيف .. اصلا مافي سبب
ريان: طيب ليش اعوذ بالله دي هاا؟؟
نواف: ايوا ليش؟
انوار: صح ليش؟؟
هنادي: امم صح برضو كلامهم .. ليش؟؟
فيصل: انا ماشي ... يلا يا امل
فلول: وجع جفص .. مفروض تقول يلا يا حياتي ... يلا يا عمري مو يلا يا امل
فيصل: مالك داعي
نواف: ايوا جفص
كل العيله رددت وراه ايوا جفص ... صح جفص .. مرا جفص .. جفص جدا..
امل: و الله انكم فاضيين .. يلا سلام .. و سلمت على البنات
و راحت تسلم على العجايز
فيصل بتهديد بعد ما بعدت امل: الاستهبال دا ينعاد مرا تانيه يا ويلكم!!
نواف: مو قلتلكم رزل و دمو تقيل
الباقي ايوا رزل و دمو تقيل<< دي وسيلة للاستفزاز ..كل ما واحد يقول على احد شي الباقي يعلق وراه بنفس الكلام ..
_------
في السياره
امل: طفش مو ؟!..
فيصل: لا عادي
امل:يلا نروح اي مكان
فيصل: زي فين يعني؟؟
امل: كافيه .. مطعم اي مكان
فيصل:افكر
امل: لا يا شيخ .. لسا حتفكر؟
فيصل: ايوا
امل: اصلا لو كانو الحريم يسوقو هنا كان رحت اي مكان ابغا اروحو
فيصل: و مين قال اني برضالك؟
امل بتحدي: و مين قال انو على كيفك
فيصل: يا شيخه بس..طاعة الزوج واجبه
امل:لا و الله طيب رفقا بالقوارير..
فيصل: طيب
امل و هي تطالع من الشباك:فيصل..
فيصل: نعم
امل سكتت شويا تفكر في اللي تبا تقوله
فيصل: نعم..؟؟!!
امل: لا و لا شي خلاص
فيصل: لا قولي
امل: لا خلاص و لا شي
فيصل: براحتك ..
امل فجأه:ليش اتزوجتني؟
فيصل باستغراب: ايش؟!!
امل: اللي سمعته..
فيصل سكت لفتره .. يفكر ايش يرد عليها
فيصل: سنة الحياة
امل: و سنة الحياة كدا؟؟
فيصل: ايوا .. اي اتنين يتزوجو و يجيبو اطفال و يموتو و هكذا ..
امل:طيب ليش لمن نواف قالك يمكن اني اكون حامل قلت اعوذ بالله .؟
فيصل: امل لا تسوي مشكله من لا مشكله طيب..
امل: انا ما بسوي مشكله انا بتناقش معاك ..
فيصل: طيب خلاص انا ما ابغا اتناقش معاكي في دا الموضوع
و سكتت امل...
_.......... ....................
في مكان تاني في جده
فارس:يا عمار لو ايش اقلك ما تصدقني لو اقلك قد ايش افتقدتها ما تصدقني..
عمار: يا شيخ خلاص ترا البنت اتزوجت و خلاص شيلها من بالك دور على غيرها
فارس: دقيقه..لا تكون مفكرني احبها دا الحب؟؟
عمار: طيب..؟؟
فارس: و الله انك غبي و ستين غبي .. من زمان و انا احكيلك عنها و دحين تفكرني احبها؟؟ ترا انا و الله احبها زي اختي الكبيره
عمار: اها اختك الكبيره و لا و لا؟؟؟
فارس: انتا انسان تافه ..
عمار: فاكر الشي اللي قلتلي عليه ...
فارس: ايت واحد بالضبط
عمار: حق زوجها..
فارس: اها ايوا؟؟؟!!
عمار: انا موافق
فارس: لا ترا بطلت ... مدام بيضرها انا ما ارضى
عمار: شايف انك تحبها
فارس بهدوء: عمار...انتا ترضى انو اختك يصيرلها زي كدا .. طبعا لا .. عشان كدا انا ما ارضى دا الشي يصيرلها ... فهمت؟!!
عمار: طيب برر برر ..برضو مو مصدقك
فارس: اقولك اسكت بس عسا عمرك لا صدقت ... اروح لعزوز اصرفلي
عمار: مصيرك ترجعلي ..
فارس بتسكيته: طيب طيب
عمار: بس باقولك شي....لا تعلق مصيرك بمصيرها...
_____________________________________
يوه كل يوم نكد ... و الله بكلم شوق و اقولها تجي دحين ...
امل: شوقتي
شوق: و عليكم السلام
امل: اوبس نسيت السلام عليكم
شوق: و عليكم السلام
امل: شوق تعالي عندي دحين
شوق: مجنونه انتي ؟؟ اجي عندك دحين الساعه 11 و اخرج متى ان شاء الله 5 الفجر
و الله اهلي ما يرضولي...لو انا متزوجه كان جيتك
امل: شووق الله يخليكي و الله انا اكلم امك .. بس تعالي
شوق: انا عن نفسي عادي .. المشكله هيا ماما و تبي تكلميها براحتك انا مالي صلاح
امل: يوه طيب .. بكلمها باي
شوق: باي
و كلمت امل ام شوق و سبحان الله
و مدري كيف
و مدري ليش
و غريبه انها
.
.
.
.
.
.
ما رضيت ..
بس عوضتهم و قالتلهم بكرا
راحت امل و نامت بدري..اما فيصل فضل سهران الين صلاة الفجر و بعدين نام
_--------------------------------------------------------------------
__________________________________________________ _____
استمتعو بالقراءة ... و التوقعات لو سمحتو

من البداية شكلها حلوة بس عندي لك سؤال هيا كاملة ولا لأ

مدري ايش اتوقع ام يمكن انه امل تطلع حامل ويزعل فيصل ((توقعك زي وجهك خ
متابعه...