زوجي وكرة القدم حتى صرت أكرهه

ما أعرف شو أسوي ولا تقولون لي حاولي تندمجين وياه مع كرة القدم لأني حاولت وما قدرت وهو ما كان يعطيني فرصة وكل ما أسأل عن شي يقول لي لحظة ويندمج مع الكرة.
ولما فريقه ما يفوز ينجلب مائة درجة لا تكلمينه ولا تعاتبينه ولا تقولين له أي شي لأن مزاجه متعكر روحه وحياته كرة القدم ولما أقول له خذ إجازة بنطلع يقول ما يستوي بس لما شي مباريات ياخذ إجازة ثلاث أيام متتابعة كل هذا علشان الكرة. كان خاطري إنه يكون شوي من هذا الإحساس لدينه على الأقل كان بينفعه.
أحط في خاطري عليه لان من أول ما عرسنا لا سفرني مكان ولا طلعني أبات وياه برع في فندق كنت أقول يمكن علشان يالسة في بيت أهله ويمكن هم ما بيعجبهم بس ما أعتقد هذا عذر. كم مرة قلت له بدون فايدة
سافرت وياه أهله وسافرت ويه أهلي لكن أبغي أسافر وياه ؟و إذا فريقة بيلعب في مكان دربه ساعه ونص بيحضر المباراة إلي في هذا المكان وبيبات إذا متأخر لكن علشان خاطري لا ما بيسويها.
حتى دوم أدعي ربي إني يعطيني ياهل أتونس فيه علشان يفك من ضيقي شوي وألتهي فيه عن ريلي وادعو لي الله يصبرني لأني صايره باكرهه والسبه هاي كرة القدم وأحسه وايد تافه أن يحبه لهذي الدرجة ولما أقوله كل هذا علشان كرة القدم يعصب ويقول لو سمحتي لا ترمسين عن هذا الشي لأنج ما تعرفين ولا بتحسين مثل ما انا أحس. وأوقات أقول له قوم صل الوتر عقب شوف المباراة يقول عقب وما يصلي.
حتى ساعات أفكر هل صح هذا نصيبي وأقول لو كنت أعرف هذا الشي فيه من قبل ما خذته وايد إتجي لي أفكار كيف أنا خذت هذا الإنسان إلي لا يعرف يتحمل المسؤلية ولا يبالي إلا بالكرة من تخلص مباراة يدور على مباراة ثانية حتى إنه فاتح له قناة يدفع شهرياً علشان الكرة. صار لنا 10 شهور من تزوجنا وشنها 10 سنين ولا تقولون أنا السبب تراني مريحتنه أي شي يطلبه أقول له إن شاء الله حتى في الجماع مرتاح ما شذ تعبته في شي، طلبات ما أطلب أي شي أبغيه روحي آخذه من معاشي ما يصرف عليه شي وحتى العلاوة الزوجية أعطيه إياه كل شهر وزيادة عليه صح أول الأيام كنت أمن عليه بس ألحين ما شذ قلتله شي شو يبغي أكثر من شذي.
ما أقول إنه ما يصرف بس هو ماسك إيده لأن بياخذ له سيارة وأنا اساعده في هذا الشي يصرف بس قليل.
بيت بروحي ما بيسوي لي لأن ما يفكر يهد أهله وإحنا يالسين في هذا الملحق بس باشر بنييب عيال وين بنيلسهم؟
اسمحوا لي من غصتي اليوم بخلص دوامي و بسير بيت أبوي علشان أريح أعصابي شوي لأني مب متحملتنه.
وإذا عندكم نصايح أفيدونا جزاكم الله خير.