ساعدوني وقولولي اسيبه ولا لأ

اول شي اسمحولي اكون ضيفه جديده بينكم
وثاني شي انا سجلت مخصوص عشان احط موضوعي في قسم المشاكل الزوجيه وابغاكم تعطوني ارائكم وخبراتكم في مشكلتي..؟؟
انا ليا 4 سنين متزوجه و زوجي انسان طيب وانا مره احبه بس طبعا مليان عيوب مو معناتو انو انا مافيا ولا عيب
المهم ربنا ماكتبلي حمل والمشكله كانت مني انا وحاولت اتعالج وابلع في الادويه والحبوب واخد ابر ولعبت في نفسي وانا اخد في الاعشاب وكل ماسمعت عن شي روحت اجري اجربه عشان بس احمل وافرحه بطفل واتنفخ جسمي وتخنت بس مو مهم مادام الشي هدا حيخليني افرحه وعلى فكره كل الدكاتره قالولي انه في امل والمسأله مسأله وقت مو اكتر لكن انا حاسه انه السبب نفسي مو عضوي
المهم انا اول مااتزوجت بدأت اكتشف في زوجي اشياء كتيره منها انه له علاقات مع بنات وانه يتفرج على افلام اباحيه وانه ما يصلي وهذا الشي سبب مشاكل كتيره بيننا وحاولت احلها بطريقتي من غير محد يدري من اهلي او اهله المهم كل ماتصير بيني وبينه مشكله يقولي روحي بيت اهلك وانا احس انه مايحبني ومستعد مع اقل غلطه انه يرميني غير انه مو راضي يخليني اشتغل عشان افضل تحت رحمته وانا حابه يكون ليا شخصيه وكيان غير انه يكون ليا راتب اسوي اللي ابغاه فيه وحتى لمن اطلب منه فلوس ما يرضى بعطيني بحجة انه عليه ديون وانا عارفه كم راتبه بالضبط يعني مستحيل مايكون عنده فلوس ودايما اقوله انت زوجي ومسؤول انك تصرف عليا يقوم يقولي ليش انتي اتزوجتي بس عشان واحد يصرف عليكِ
اهم شي يابنات اللي قاهرني في الموضوع انه مايصلي بالمره وكم مره قلتله صلي واستغفر ربنا عشان ربنا يكرمنا بالحمل يعني قلتله ماينفع انا بس اصلي وادعي واستفغر ربنا لوحدي لازم انت كمان تكملني ويوعدني لكن عمره مانفذ وعده بس يصلي الظهر في العمل عشان قدام الناس واصحابه وهذا الشي مخليني متأزمه نفسيا وانا نفسي انه يساعدني بس مو راضي يسمعلي وانا نفسي في اطفال لانه عمري 30 وهوا عمره 35 يعني يادوب اجيب اطفال واربيهم ونفسي كمان في واحد يصلي وهوا اللي يقوللي قومي صلي..............معليش كلامي مو مرتب اعذروني بس انا مخنوقه وماني عارفه ايش اسوي هل اتركه ولا خلاص اتحمل ولا ايش اسوي بالضبط دلوني على الصح