ساعدوني

حبوبه ما ادري شنو ذوقكم بالاكل
لكن باختصار راح اعطيك كم وصفه على السريع وتكون سهله وانشالله تفيدك
اي بوفيه يتكون من الأطباق التالية
السلطات - المقبلات - الأطباق الرئيسية - الحلويات
السلطات :
تقدرين تسوين سلطة عادية
أو يونانية .. وهي انك تضيفين جبنة فيتا بيضا مقطعه مكعبات
او تسوين سلطة كول سلو ( وهي عبارة عن خلط كمية متساوية من الجزر المبشور بالطول والكرنب المبشور بنفس الحجم وتجهزين الصلصة وهي عبارة عن مايونيز وشوية ليمون وفلفل اسود وملح . تخلطين الصلصة مع الجزر والكرنب)
المقبلات
بطاطا مقلية - سمبوسة مقلية - شوربة - معجنات
شوربة الخضار : تسلقين مقدار من الخضار المشكلة ( جزر - كوسا - ثوم - شوية بصل - شوية عدس - واي خضره تحبين. بعدها تطحنينها بالخلاط مع ماء الدجاج وشوية فلفل اسود وملح او انك تضيفين مكعب ماجي للنكهه والبعض يضيف للخلط علية قشطة
حتى يكون الطعم دسم ولذيذ) هذي اسهل شوربة
تقدرين تسوين اصابع الشاورما الصغيرة وطريقتها هي:
دجاج مسلوق - تفصلين الجلد والعظم من الدجاج وترشين عليه فلفل اسود وسماق وتخلطين معاه صنوبر مقلي
تجيبين الخبزة وتفصلينها وتقصينها كل شريحه على شكل مربع - بطاطا مقلية اصابع - مخلل خيار مقطع اصابع - زيت زيتون
تمسحين الخبزه بالمايونيز وتحطين الدجاج والبطاطا والمخلل .. بعدها تلفينها على شكل رول وتحطينها بصينية الفرن
تمسحين الوجه بشوية زيت زيتون وتدخلينها الفرن حتى تتحمر شويه ( حطي بالك لا تصير يابسه)
وبس تطلع من الفرن ترشين الوجه بالسماق وتغطينها حتى تظل طريه ودافيه.
وفي من الأطباق الرئيسية تقدرين تسوين خضار بالبشاميل
شرائح كوسا مقلية - شرائح باذنجان مقلية - شرائح توم مقلية - لحم مفروم مطبوخ مع صلصة طماطم - شرائح بطاط مقلية
مقدار البشاميل : على كل كأس حليب سائل تضيفين ملعقه ونص كبيرة طحين وشوية ملح ولزيادة النكهة تضيفية 3 ملاعق جبنة كرافت او قشطة ... تحركين المقدار على النار حتى يتخثر.
تصفين اول طبقة خضار ( نوع واحد) وتصبين شوية بشاميل ، بعدها تصفين الطبقة الثانية من الخضار وفوقها طبقة اللحم وفوقها شوية من الصلصة وأخير الطبقة الأخيرة من الخضار وفوقها البشاميل وتغطين الوجه بجبنة البيتزا وتدخلينها الفرن مدة 10 - 15 دقيقة حتى تتحمر.
( ملاحظة : يفضل ان تكون الخضار مقطعه بشكل حلقات دائرية واذا قليتيها حطيها على منديل حتى تتخلصي من الزيت)
وصفة صينية الدجاج
دجاج مقطع - خضار مشكلة مقطعة مكعبات - بهارات - مكعب دجاج - ماء
تخلطين الدجاج بالخضار وتحطينها بصينية الفرن
تخلطين البهارات + الماء + مكعب ماجي + زيت + شوية كاتشب
تصبينها على الدجاج والخضرة
تدخلين الصينية الفرن وبعد مرور 10 دقايق تغطين الصينية وتتركينها داخل الفرن مدة 30 دقيقة او اكثر حتى ينضج الدجاج
بعدها تشيلين الغطا وتتركينه يتحمر
(ملاحظة: لازم تحرصين انك تنظفين الدجاج مضبوط وتفركينه بالفلفل عن الزفر)
وصفة ثانية وهي : صينية بوريه اللحم
بطاط مسلوقة ومهروسة ( يعني قولي 3 حبات كبيرة) تخلطينها مع 2 بيضة وعلبة قشطة
وتخلطينها حتى تصير مثل الكريما الكثيفه
تحطين بصينية الفرن اول طبقة من البطاط وتواسينها وتحطين عليها اللحم المطبوخ بصلصة طماطم
بعدها تغطينها بطبقة بطاط
تدخلينه الفرن حتى يتحمر مدة 15 - 20 دقيقة
الحلويات
ما في اسهل من سلطة الفواكة
تقطعين التفاح ، الكمثرى او الجوافه ، البطيخ _ الفراولة - الموز - الخوخ - الأناناس
تصبين عليهم شوية ليمون وتقلبينهم تمام
بعدها تغطين السلطة بعصير المانجا .. تحطينها بالثلاجه الى ان يصير وقت التقديم
هذي اسهل الوصفات اللي في بالي .. وشوفي المنتدى فيه وصفات اكثر بعد وسهله
الله يعينك انشالله .
.