شوربة ونقنقة وشوية طقطقة

1. زوجي يحب الشعر القصير وأنا أموت بالقص؟وش رايكم أقص شعري ولا أخليه؟؟

شفت موضوع بمنتدى وحبيت انقله لكم
مااعرف هو مكرر ولا لا
اذا مكرر مومشكله
ملحوظة:القصة أدناه من وحي الخيال!
والمغزى منها تفهمونه بعد ماتقرأونها...كان ياما كان...
كنَّا أختين أنا (لمياء) وأختي (بسمة)..
تزوجنا قبل سنوات أخوين يعني صرنا سلايف...وكل وحدة فينا لها اهتمامات مختلفة..
كنت من هواة الشعر والأدب...ولي مقالات أدبية واجتماعية على النت...استفرغ من خلالها طاقتي وحبي للغتنا الرائعة اللغة العربية الفصحى
وكنّا إذا اجتمعنا ببيت أهلي وجاء طاري النت ألقى أختي بسمة لاسمعتني أكلمهم عن آخر مقالاتي تقول بفخر:وأنا مثلك أكتب لاتفوتك موضوعاتي!!
ودايماً كنت أوعدها إني راح أبحث مخصوص عن موضوعاتها وأقراها بس أنشغل وأنسى وهكذا!!
وكل ماكلمنا بعض أو تقابلنا قالت:شفتي موضوعاتي؟؟وش رايك فيها؟؟
وأرد عليها بإجاباتي المعهودة:يوه نسيت بس وعد..في أقرب فرصة بأتكرم بزيارتها والتسجيل في المنتدى اللي تكتبين فيه مخصوص!عشان أرد عليك!
وبيوم دخلت وقرأت مواضيعها وقلت لنفسي:ليتني ماقريت!بالله أختي بسمة صاحية؟!
واليوم الثاني تقابلنا عندها في البيت...
قلت لها:ترى أمس قرأت مواضيعك!!
بسمة(بفرحة):صحيح؟!!
أنا:وليش فرحانة؟؟من زينها عاد؟؟
بسمة:ليش اشفيها مواضيعي؟أحس إنها متنوعة!
أنا:بالله اسكتي الله يرضى عليك..ولك وجه بعد تعزميني أقراها!وش هالكلام والدجة اللي مسويتها في المنتدى..كل مواضيعك خابِط ومخبوط!!زوجي كفخني وزوجي رفسني..بيني وبينك ماينلام!!
ولبست فستان أحمرمموج بأخضر!ورفع حاجبه وحط الثاني تهقون أعجبته ولايستهزأ فيني؟!!
لقيت مسج بجواله من زميل له بالعمل يقول له:اش رايك نتقابل برة هالأسبوع؟؟هقوتكم إنها حرمة متنكرة برقم رجال؟؟!
راح يحضر عرس ودخل علي وريحته بخور تهقون يخونني ولا لا؟!!
آثاري حياتك خبط ورفس وشكوك وإحنا على بالنا مبسوطة مع زوجك؟؟
وماعندك غير تهقون زوجي بيسوي كذا؟ولا تهقون قصده كذا؟ولاتهقون رأيه كذا؟؟
هالحين العضوات بيعرفون زوجك أكثر منك؟والا بيشتغلون لك قارئات فنجال ويتنبئون لك عن شخصيته؟؟
وماأعرف أرقص شرقي وودي أتعلم!!ممكن تعلموني؟؟الحين أموت وأعرف شلون تبينهم يعلمونك من ورا الشاشات؟؟؟بيقولون لك مثلاً هزي خصرك يمين يسار ثم طقي اصبعك وانقزي لأعلى ثم خذي دورة كاملة حول نفسك وادبكي!!والمصيبة لو رحتي تطبقين قدام زوجك!!
بسمة:ايه طبقت وقعد يستهزيء فيني أسبوع!!يقول حسيت إن صاعقك كهرب خط220!!
أنا:وزوجي فعل وفعل فيني بس رجاء ماأبغى ردود جارحة ولاتدعون عليه!!أجل تكتبين عنه ليش؟تحملي مايجيك من النسوان!
ولا بعد ماتحطين مية شكوى بالمنتدى تجين يوم وتكتبين موضوع تبين زوجك يموت فيك وكل مشاكلك معاه تنحل؟؟؟سوي له كذا وكذا!يوم إنها تنفع يالفالحة ليه ماسويتيها؟؟
لا وهذا غير أنا حلوة وسلايفي يغارون مني!هالحين تعالي ياقليلة الحيا!مين هم سلايفك؟؟مافيه إلا أنا ومضاوي اللي ساكنة بالشمال ومانشوفها إلا بالسنة حسنة وحالها بشانها!تقصدين أنا أغار منك؟؟؟على إيش ياحظي؟عطيني من ثقتك شوي!
بسمة:يووه الله يهديك!لاتاخذينها جد..هذاك يوم كنت فاضية وماعندي مشكلة قلت خلني اخترع حاجة أكتبها!يعني بالله كل العضوات عندهم مشاكل إلا أنا فاضية؟؟!
أنا:صدقتي يالشينة!الله يقطع ابليسك انتي ومواضيعك اللي رفعتي بها ضغطي!
بسمة:لي مشاركات بالأقسام الثانية..انتي ماقريتي إلا اللي بقسم الزواج؟!
أنا:إلا قريتهم طاح حظك انتي ومواضيعك!
منطقتي الحساسة شكلها كذا وكذا تهقون أنا طبيعية ولافيني تشويه؟!مابقى إلا ترسمين لهم اياها وتحطين صورتها!!بالله انتي صاحية يابنت؟!
وأبغى شفايفي تكبر ووجهي يبيض وأوراكي تنحف.عطوني الحل من غير عمليات!!!
لا وحاطة صور ملابسك ينقال تستعرضين دولابك وكشختك وتقولين اش رايكم بأناقتي؟؟وينها ذيك الخلاقين عمري ماشفتها عليك؟؟
بسمة:هذيك ملابس جارتي!!ماشاء الله عليها كشخة!استلفتهم منها وصورتهم قلت خلني أكشخ على العضوات!!
أنا:يازين ذكائك يختي!والبيت اللي مصورته وتقولين اش رايكم بمجالسي وأثاثي؟!منهو بيته؟
بسمة:بيت زوجة صاحب زوجي!!
أنا:وليه ماصورتي بيتك يالفالحة؟؟؟
بسمة:يختي أثاثي مو مودرن!!
أنا:وبعدين وش هالأفكار اللي حاطتها؟ابسطي زوجك بليلة حمراء..ومتعيه بليلة أندلسية..وهديتي لك حفلة أسبانية!! ومن ذا الأفكار..غريبة يعني عمرك ماقلتي لي إنك تتفنين بهالشغلات!
بسمة:ومين قال لك إني أسوي هالشغلات ببيتي؟على بالك زوجي بيعطيني وجه عاد ولابتعجبه سوالفي!لاياحلوة هذي حركات أألفها للعضوات الفاضيات يسوونها!!
أنا:عز الله مابأقول لك إلا شي واحد! اللي دلِّك على النت الله لايسامحه!
بسمة:وشفيها؟؟هي الحياة كذا فضفضة ونقنقة وتسلية وطقطقة!!يعني تبيني أسوي مثلك وأكتب مقالات أدبية تافهة ماتهم إلا المتخصصين بالأدب!
أنا:ايه أكتب لأهل الأدب ولاأكتب في قلة الأدب!
وبعدين زوجك أحسن من غيره ولاهو راعي سوالف بطالية ولاشي إنتي إلا تبغين تطلعين فيه شي بالقوة؟وحياتك بالنسبة لنا كتلة من السرية مانعرف عنها شي وآثاري الوطن العربي من شرقه لغربه عارف بمشاكلكم وبلاويكم؟؟؟
فضحتونا بثقافة الحش والغيبة ونشر الأسرار بين الشعوب الثانية على الفاضي والمليان وليتها مشاكل تستاهل الطرح!!والله البعض منكم كأنها تكتب لنا يومياتها!خرج من البيت زعلان شلون استقبله لارجع؟؟
وش رايكم أدز له مسج؟؟وش رايكم ألبس له وأتعطر ولا أقعد بخلاقيني وكعشتي وأكمل شغل البيت؟؟
ريحة زوجي قاتلة أصارحه؟ولا تعتقدون بأجرح مشاعره؟

زوجي يحب الشعر القصير وأنا أموت بالقص؟وش رايكم أقص شعري ولا أخليه؟؟

كل يوم أفتش بجواله ولاألقى شي!تعتقدون ممكن يكون عنده بلاوي بس إنه يحذفها؟!ولابريء؟
ياناس ياعالم..لازم تتغير ثقافة البربرة والقرقرة في كل صغيرة وكبيرة قسماً بالله عيب!!أتوقع نص اللي يكتبون لو أزواجهم قرأوا مواضيعهم كان طلقوهم!!عمرك شفتي زوجك كل ماتهاوش معاك راح للمنتديات يكتب عن مشاكله معاك؟؟
المشكلة العويصة اللي يستعصي حلها وتحتاج فعلاً لاستشارة المفروض هي اللي تُطرح وبأسلوب راقي..أما المواضيع النص كم وتشحن النفوس وماتستاهل ..المفروض تُلغى!!
يجب أن يكون هناك انتقاء للارتقاء
والله يهدينا جميعاً وإياكم