صفحة من حياتي

قبل كل شي اسمحولي لأني طولت خصوصا الي طلبو مني انزل قصتي
كنت تعبانة هليومين ولله
اتمنى تحوز كلماتي على رضاكم
تزوجت مع اختي وقريبتي بنفس الليله
شهرين مرو على فرحنا
كنت جالسه العب في جوالي لحد ماطعنتني اختي بخنجر بدون لاتحس
قالت لي ان هي حامل
من هذا اليوم بلتحديد تعبت نفسيتي وصار شغلي الشاغل اني احمل
نسيت اقولكم اني تزوجت واني صغيره كان عمري 17 سنه رحت الح على زوجي يوديني المستشفى مارضى قال تو الناس
بعد سبعه شهور لمن بان حمل اختي ودخلت الخامس انكسر قلبي اكثر
رحت المستشفى ابي اعرف ليش ماحملت للحين
للحين اذكر هذاك اليوم وكأنه امس دخلت للدكتوره ودموع محبوسه وسط عيني قالت لي سبعه شهور مده قليله
المفروض تجين بعد سنه
قنعتني بكلامها
طلعت من المستشفى وانفجرت صياح بلسياره
رحت البيت اذكر يومها كنت اتصفح منتدى الفراشه لفت نظري قسم تأخر الحمل
صرت مدمنه عليه كنت ادخل واقرأ كل شي تكتبوه
كنت ابي اسجل معاكم واشاركم وتشاركوني
بس لمن اسجل دائما كانت تطلع مشاكل ومااتسجل
اخذت عضوه زميله لي وقمت اشارك بها
بعد مرور سنه ونص رجعت للمستشفى وسويت كل التحاليل الازمه طلع عندي كل شي سليم ماعدا البويضه كانت ضعيفه عندي
جلست اكتب لكم ابغى حلول وعلاج طبيعي وجلست على قوقل ابحث عن الأشياء الي تقوي البويضه
لمده ثلاث شهور واني اعالج نفسي بنفسي
ماخليت عشبه ماستخدمتها
ماخليت عسل ماشريته
قطعت البيبسي والحلويات
ادمنت على السمك والفواكه
التزمت في هلثلاثه شهور بعدها تعبت قلت استخدم الكلوميد احسن وسبحان الله بسرعه استجاب لي الكلوميد
واني متأكده ان الأشياء الطبيعيه كان لهادور فعال
استانست وايد لمن عالجت البويضه
شهر شهرين ثلاثه
ماصار حمل
رجعت احلل مره ثانيه هلمره طلع عندي هرمون الحليب مرتفع وضليت خمسه شهور اتعالج بدون اي فايده الهرمون رافض ينزل حتى مع تغير العلاج
يومها قالت لي الدكتوره بنصحش نصيحه
سبب ارتفاع الهرمون تفكيرش بلحمل
جربي انسي السالفه وصدقيني بتحملي
المهم بنات تعبت من العلاجات تخيلو يمكن سنه وشوي علاج تعبت ولله تعبت
رميت كل الأدويه
في محرم قطعت العلاج
وقررت اشيل من بالي سالفه الحمل
وقررت اسافر مع اهلي نص السنه اغير جو
ريحت نفسيتي بلسفر حاولت الهي نفسي بأي شي
في ربيع ثاني اخرتني الدوره 12 يوم بيني وبينكم ماكنت مهتمه كنت فاقده الأمل
اساسا كيف احمل واني تركت العلاج كيف احمل وهرمون الحليب مرتفع
كنت شايله الفكره من بالي بس لمجرد فضول قررت اسوي تحليل منزلي وكنت متأكده ان سلبي
بس المفاجأه لمن حللت طلع لي خطين
شتبوني اوصف لكم شعوري
شتبوني اقول لكم
كانت الساعه 8 الصباح من يوم الجمعه
مالقيت نفسي الا بلغرفه وماسكه فنيله زوجي احاول اصحيه بقوه
ماكنت مصدقه كنت ابكي اقوله اصحى اصحى اني حامل تفاجأ وقعد من النوم حزتها قمت جري على التلفون ابي ابشر امي
صحيتها من النوم كانت مختلعه تقول وش صاير قلت لها اماء اني حامل
المسكينه ماكانت مستوعبه شي تقول ع البركه اقولها وس فيش مب فرحانه تقول من مستوعبه شي
قفلت من عندها وجلست ابكي مدري هذي دموع الفرح والا دموع محبوسه من ثلاث سنين
واني ابكي جلست اتذكر كل شي من يوم زواجي الى هذا اليوم
بعدها جلست مع زوجي فتحت له قلبي وجلسنا نسولف
وطول الوقت كنت ابكي من الفرحه بس ولله لحد الحين مب مصدقه اني حامل
عقبال كل محرومة ان شاء الله