صور عشانا الفرنسي

مرحبا
كيف الفراشات الحلوات
بعد الردود الحلوة والتشجيع لمواضيعي السابقة راح اكمل اليوم بسفرة فرنسية والاخوات اللي طلبو الطبخ المصري والشامي والصيني اقولهم راح اعمل اللي اقدر عليه وان شاء الله راح انزل السفرة التايلندية .
من غير طولة هرج معاكم سفرة عشانا ليوم الاحد ، واعذرونا الاكل يادوب قليل الاخت ماكانت مشتهية الاكل فعملت على قد زوجي .
سفرة بسيطة مكونة من ثلاث مكونات والحلى
دجاج محشي بالاعشاب + بطاطس جراتان + سلطة +كيكة ايس كريم
ترصي في الصحن الخاص بالفرن او أي صينية طبقة من البطاطس وترشي عليها ملح وفلفل وترجعي ترصي طبقة تانية من البطاطس وبعدها ملح وفلفل يعني تبهري كل طبقة في الاخير تصبي الكريمة
تغطيها بالقصدير وتدخليها الفرن مع الدجاج
]
السلطة
(عجينة سبرنج رول-جزر-طماطم –ملفوف احمر-خس- بصل اخضر-مايونيز-خردل-ليمون-ملح –فلفل)
تستخدمي صينية او صحون السفليه الصغيرة وتاخذي قطعتين من العجينة تحطي الاولى في الصينية بحيث تاخذ الشكل الدائري وتضغطي عليها وتحطي التانية بس بشكل معاكس بحيث تكون الاطراف للقطعتين بارزة من كل الجهات
تمسحيها بشوية زبدة وتدخليها الفرن بس لين تحمر وتخرجيها
تقطعي الخضار بشكل طولي بس مرة سخيف وتحطي عليها المايونيز والخردل والليمون والملح والفلفل وتحركيها
وتحشي عجينة السبرنج رول اللي شكلها صار زي الصحن
وهنا شكل الدجاج والبطاطس بعد ماخرجنها من الفرن اخذت نص ساعة
الحلى
باوند كيك عملته بدون بيض (كاسة دقيق منخول– كاسة حليب بودرة-نص كاسة سكر –نص كاسة زيت –ملعقة ص فانيليا –ملعقةص بكنج بودر-ملعقة ص خل ابيض- ملعقة كبيرة بودرة كاكاو-3\4 كاس ماء)
تخلطيهم وتصبيهم في صينية تيفال وتدخليها الفرن في البداية على 350 د لمدة 5 دقائق وبعدين لمدة 40 على حرارة 300
استخدمت زبدية وغلفتها بالنايلون وقطعت الكيك لشرائح وغلفة الزبدية
حشيتها بالايس كريم فنيليا ورجعت حطيت طبقة من الكيك وغطيتها بالنايلون ودخلتها الفريزل لساعتين
زينتها بشكولاتة هرشي السائلة والحبوب
ملاحظات:
انا اخذ وصفاتي من مواقع اجنبية او من كتب واغير فيها بما يناسبني لان نعرف انهم يستخدمو مكونات ياانها محرمة ياانها مش موجودة عندنا.
بالنسبة للدجاج اذا حبيتي ان لونها يطلع محمر شوي افتحي القصدير واتركيها في الفرن شوية .
لازم تستخدمي الزبدة في الدجاج لانها تخلي الدجاج طري وله نكهة.
البطاطس في اخوات يستخدمو القشطة بدل الكريمة وبصراحة انا ماحبيت لان القشطة قوامها سميك وثقيله وبصراحة مش طعمة بس ممكن تستخدميها لو خففتيها بشوية حليب سائل وهذا رائ.
لعمل عجينة السبرنج رول تقدري تستخدمي صينية الكب كيك وراح تطلع مضبوطة .
تقدري تحطي ثقل على العجينة وهي في الصينية علشان اطراف العجينة تفضل ثابتة وماتميل للداخل.
انا اول مرة اعمل كيكة بدون بيض وبصراحة انا لقيت الوصفة بالمنتدى بس مش فاكرة صاحبته وفعلا طلعت طعمة ومافي فرق .
انا قطعت الكيك لشرائح علشان لما ارصها واحشي الايس كريم راح يتخللها وزي ماشفتو صار شكلها زي الرخام.
تقدري تعملي الايس كريم بنفسك بس انا بصراحة ماسبق لي عملت الا المثلوج لما اجرب راح انزل الوصفة.
العصير عبارة عن عصير العنب وفيه قطع ليمون.
عارفة ان اكلي للناس القليلين يعني ماينفع لعائلة بس ينفع لوحدة تبغى تعمل جو جديد لزوجها.
وبس خلاص