طريقة حنيني تكفون

ليه كذا وانا شدة الظهر فيكم

هلا أختي aroojah21
الحنيني أنواع وكلن له طريقته
وهذي الطريقة اللي نصلحها ..
المقادير :
2 كاس دقيق
3 صحون تمر صغيرة تقريبا
2 زبدة
الطريقة
يحمس الدقيق الى ان يشقر لونه تقريبا وبعدين تحطين التمر والزبدة
وتدقين فيه الى أن يتماسك واذا أحتجتي أنك تزيدين زبده أو تمر زيدي
لأننا نصلحه بدون مقادير قياسيه بس حطيتها لك للتوضيح .
وبالهناء والعافية..
..تحياتي..
أختك الفرااشة الوردية

قلبي..اسمعي طريقة الحنيني هذي وسويها وماراح تندمين..
حطي تقريبا 3 اكواب طحين براو اخلطي كوب ونص بر وكوب ونص طحين ابيض..
مويه واهم شيء ماتكثرين المويه
ملح ناعم شوي
الطريقه..
تعجينين الطحين والملح بشوي مويه
وتحطين بالقلايه شوي زيت يعني حوالي 5 ملاعق او 6
وتفردين العجينه بيدك او بالملعقه بالقلايه يعني لازم
تكون العجينه قاسيه مو سايله هذا سر الحنيني
يعني من قساوة العجينه تبللين يدك بمويه وتفردينها بالقلايه وتخلينه عريض شوي يعني لايصير نحيف علشان مايصير يابس يعني يكون عرضه حوالي 3 سم..
وبعدين حطي نار متوسطه الى عاليه وغطيه وخليه لمدة 10 دقايق وشوفي اذا تحمر من تحت اقلبي فيه على الجهه الثانيه واذا كان ماتحمر خليه 5 دقايق اخرى واذا احتاج زيت من تحت زيدي فيه كم ملعقه اخرى عادي
واقلبيه على الجهه الثانيه الين يتحمر
وطلعيه ودقيه بيد الهاون (النجر)
وجيبي سمن بلدي وتمر منزوع النوى وحطيهم كلهم بقدر وفتيه يعني عفسيه بيدك السمن والحنيني والتمر وكثري السمن شوي يعني حوالي نص كاس المهم تلاحظين انو لونه حلو وصار ناعم ولذيذ وبالعافيه

طريقه 2
الحنيني بالفرن مثل الكيك
4 كاسات طحين بر او ابيض او مخلوط براحتك(كاس جبن كرافت الصغير)
ملعقة باكنج بودر
ملح
كاس تمر منزوع النوى تحطين عليه شوي مويه وتخلطينه بالخلاط
نص كاس سكر
نص كاس زيت
ماء للعجن
تعجنين المقادير مع بعض زي الكيك
وتحطينه بالفرن من تحت لمدة تفريبا 25 دقيقه
يعني الين يتحمر وبعدين تحمرينه من فوق زي الكيك
وبعد مايخلص تفتتينه بالملعقه وبيدك وتحطين سمن بلدي ولا زبده وانا عندي السمن اطعم وبالهناء والعافيه..
بليز خبريني شو بيطلع معاك ودعواتك لي بالتوفيق وراحة البال.

مشكورين حبيبي الله يوفقكم