علي القصة تمت

.
تهاني ....إيمان ...علي
.
.
تهاني /فتاة عشرينية إنسانة طيبة لأبعد الحدود ممتلئة لأبعد الحدود يعني بالعربي دوبيه بيضاء البشرة عيناها واسعتين ولكنها ترتدي نظارة مقعرة تخفي جمال عيناها وتعاني من بروز في أسنانها الأماميه الأمر الذي جعلها تستاهل عيارة (السنجاب ) وبجداره .!
.
.
------------------------
إيمان / صديقة تهاني الروحية وصندوق حفظ أسراراها ومستشارها الأول
.
.
أيضاً عشرينيه ..جميلة ..متزوجة ولها ولدان ..تكمل دراستها الجامعية ..ذكية ..وطموحة ..ودائماً متفائلة ..
.
.
.
.
-----------------------
علي / لا أريد التكلم في شخصية علي كثيراً ولكن أحداث القصة ستتكلم وستصف لكم علي حتى تتخيلون بإنكم ستشاهدونه ..
.
.
الشخصيات الأخرى كلها شخصيات جانبية وبعضها هامشية فقط لتحريك أفكار القصة ولإيصالها بشكل ممتع ومفهوم
.
.

.
.
.
*** الفصل الأول ***
.
.
المشهد الأول إحتفال وزواج تقليدي عائلي كبير.. لقبيلة كبيرة ومعروفة ..
.
.
كلهم أبناء عمومه ..العرسان وحتى المعازيم والآباء والأمهات أقارب
.
.
العريس الأول( بدر) وسيتزوج (مشاعل )
.
.
العريس الثاني (علي) وسيتزوج (تهاني )
.
.
في صالة النساء المتواضعة كانت الفرقة (تطق) والنساء يرقصن وأخريات يحتسين القهوة كبيرات السن (يسولفون ) ..الكل سعيد بدا هذا العرس وكأنه عيد لإنه ضم جميع الأقارب ..
.
.
وفي صالة الرجال يجلس الجميع على كراسي مستندين لجدار البعض يتكلم بصوت منخفض وهناك (مقهوجي ) يدور بالدلة ليصب القهوة التي زادها هيلاً وزعفراناً..لإنك في الرياض لن تفرق بين العزاء والزواج إلا بالزعفران فالعادة المتعارف عليها بإن قهوة العزاء تخلو من الزعفران
.
.
عدا ذلك لن يتمكن أي شخص غريب بالتفريق بين العزاء والزواج ..!
.
.
وهناك في خلف قاعة الزواج غرف العرسان ..
الغرفة الأولى تجلس مشاعل الجميلة الممشوقة الطويلة الرائعة وكأنها خرجت من كتاب ألف ليلة وليلة زادها الفستان الأبيض بياضاً فأصبحت عروس أسطورية تشع جمالاً ونوراً ..
لقد صدقت جدتي رحمها الله كانت تقول بإن الله ينزل على العروس نوراً من عنده ليزيدها سحراً وروعة ..
.
.
.
وفي الغرفة المقابلة كانت تهاني تبحث عن قِرطها الذي سقط من أذنها فجأة لثقله ..!
.
.
بدت تهاني وكأنها دب قطبي ..هي (سمينه ) وتلبس الأبيض الذي يزيد الوزن ويعكس إنعكاسات أكثر ويوحي بوزن زائد وهل تهاني (ناقصة ) وزن زائد !
.
.
تهاني : يمه ما أشوف وين الحلق طاح من أذني ...يوه هاتو نظارتي بس بلبسها ما أشوف شي حرام عليكم تزفون عروس عمياء ..!
.
.
الأم وهي حزينة على أبنتها لإنها شاهدت جمال (مشاعل ) : يابنتي مايصير تنزفين بالنظارة وش ثقلها ..! وش بيقولون الناس ؟
.
.
تهاني : أحسن ألبس نظارتي ولا أحسن أطيح وأتفشل هاتوها يمه ..!
.
.
فجأة دخل بدر يتقدم أهله على خطأ وإعتقاد بإن هذه الغرفة لمشاعل ..وشاهد بدر تهاني ..تفاجأ من شكل تهاني وحجمها !! ..! لإنه يعرف مشاعل جيداً
.
.
فخرج مسرعاً ...
.
.
وتهاني تلطم .! يمه هذا شكله بدر يووه شافني ..
.
.
الأم : هالحين قومي تجهزي وخلصي تصير هالأمور في أحسن العوائل ..قومي بسرعه رجلك بيجي الحين ..
.
.
دخلت إيمان صديقة تهاني التي كلمتها عن طريق (الجوال ) وطلبت منها أن تحضر ..
.
.
إيمان : مبروك تهاني الله يوفقك ..وهي تحتضنها وتسلم عليها
.
.
تهاني : وش رآيك فيني ..؟
.
.
إيمان : هاه حلوه حلوه أهم شي التوفيق الله يوفقك ياتهاني والله إنك طيبه وتستاهلين كل خير ..
بس النظارة من صدقك ؟
.
.
الأم : علميها ياإيمان عجزت فيها ..
.
.
إيمان : لا لا النظارة لأ تكفين ..أجل وشو له كل هالمكياج ؟
.
.
تهاني : بلبسها يعني بلبسها ولا أقول خلاص لا تزفوني ..وكانت تهاني حساسة جداً وعنيدة جداً وتصر دائماً على رأيها حتى لوكان خطأ ..!
.
.
الأم : يالله العريس وأهله جو جو
.
.
إيمان: يوه طيب دقيقه ياخاله بطلع ..!
الأم :إيمان البس عباتي خذي تغطي وأقعدي في هذاك الكرسي منتيب غريبه
.
.
دخل علي وأخواته وشاهد زوجته ..
.
.
إيمان أستغربت من شكل علي وتهاني فهم أضداد ..فعلي طويل جداً نحيف جداً ..أسمر البشرة ولكنه (مملوح ) كان ينظر في تهاني وكأنه لا يريد أن ينظر إليها ...!
.
.
وزفت العروس الأولى والثانية في زفة واحدة بناء على طلب جدتهم التي رغبت في ذلك
.
.
مع رفض أم تهاني لهذه الفكرة لإنها ليست في صالح إبنتها ولكن الجده أصرت ..
.
.
لاحظ الجميع الفرق ..الكل مدح جمال مشاعل ..ورقتها وأنوثتها ..
.
.
أما تهاني فأنتقد الجميع لبسها لنظارتها وهي تضع الميك أب ؟
.
.
ولكن تهاني لا تهتم كثيراً ولا تكترث بكلام الناس وهي التي كانت دائماً تقول كلام الناس آخر شي أفكر فيه ..مو أكبر همي ..!
.
.
.
لقد زادها الله نوراً كذلك ..ولكنها هي التي أهملت نفسها وجسمها وآرادت أن تبدو كذلك ....
.
.
بالرغم من أن الجميع شهد لمشاعل بالجمال لكن المتمعن والعارف والناظر لوجه تهاني سيعرف بإنها هي الأجمل وجهاً ..
.
.
--------------------------------
الجمال ضالتنا المنشودة في حياتنا كلها،وكل ما سوى ذلك اشكال من الانتظار
.
.

.
.
.
*** الفصل الثاني ***
.
.
.
دخلت تهاني حياة الزوجية وتعلمت أشياء كثيرة من هذه الحياة وأهم درس تعلمته هو درس الحب فعلي هو أول رجل تعرفه وتنظر اليه وتتحدث إليه وتمسك يده ..
.
.
أصبح علي كل شيء في حياة تهاني تخاف عليه وتحبه هي لا تفكر إلا في علي ...
.
.
البنت في مجتمعنا عندها هامش كبير في حياتها لا تستغله حتى تتزوج !
فأهلها علموها بإن أهم شيء في هذه الدنيا هو الزواج والحصول على رجل ..!
وكأنه الأرض التي ستبني عليه كل أحلامها ..
.
.
الموهم بإن تهاني تعلقت ولكن المصيبه بإن علي طلقها ..!
.
.
من غير أسباب واضحة بالنسبه لتهاني ..!
.
.
حتى طريقة تطليقه لها فيها خيانه ذهب معها إلى بيت أهلها و(تقهوى ) معهم ومن ثم ذهب وبعد ساعة أرسل لها مسج عن طريق المحمول يخبرها بإنها طالق ؟؟؟
.
.
حزنت تهاني لكنها لم تنهار ربما لإن الطلاق لم يكن وجهاً لوجه ربما الطلاق بالجوال أهون وقعاً ..!
.
.
ذهبت والدتها إلى بيتها وأحضرت أغراضها ومثل مايقولون (عفش مطلقة )
.
.
كانت الأم حزينة جداً لإن حلم حياة إبتنها إنهار وأصبح كابوس ...!
.
.
ذهبت لتأخذ عفش إبنتها فوجدت علي وضعه في (أكياس زبالة سوداء ) ليوفر عليها عناء الدخول وتجميع العفش ..
.
.
شعرت الأم بالغيض ولكن شعورها بالحزن والأسى والإنهزام كان أكبر فطغى عليها وأخرسها أخذت الاكياس وذهبت للبيت
.
.
أما تهاني فكلامها كله عن علي ..! مع أنه طليقها غيرأنها لازالت تتحدث عنه
.
.
الأم : تهاني يمه خلاص الولد سرح بإحسان خلاص يمه لا تسولفين فيه وقومي شوفي عفشك
.
.
تهاني : يمه أصلاً أنا أكرهه وعفشي كله ما أبيه بصدقه بوديه الجمعيه
.
.
الأم : وهو الي سواه شوي ..
.
.
تهاني : يمه ماحد أتصل عليك من أهله قال لك وش السبب ؟ ماحد قال لك إنه بيرجعني ؟
.
.
الأم : لا ماأحد أنصل علي ولا أبي أحد يتصل ولو ييبي يرجعك بطرده لعب هو وإنتِ خلاص لاعاد تسولفين فيه تسمعين ؟
.
.
تهاني : طيب طيب يمه
.
.
صحيح بإن تهاني قالت لأمها طيب ولكن شعورها الداخلي ودقات قلبها لا تستطيع التحكم فيها ؟ لازالت تحب علي بكل جوارحها وتحلم بعلي
.
.
ومع إحساسها بالفشل والهزيمة والفراغ أهملت نفسها وأصبحت تأكل كثيراً حتى أصبحت تهاني مصارعة ..!
.
.
أتصلت عليها إيمان فدعتها تهاني لبيت أهلها ليجلسون جلسة من جلسات أول ..
.
.
وبعد سواليف عن علي وعن طلاقها تسآلت تهاني ليش طلقني ودي أعرف ياإيمان بموت وأعرف
.
.
إيمان : والي يعلمك ليش طلقك ؟
.
.
تهاني : مين هو ؟ إيمان وهي تناظر نظرة بنص عين
.
.
إيمان : أنا بعلمك لإني أشوفك ماتشوفين أشياء كثيره مدري إنتِ عاميه نفسك عنها ولا من جدك ؟
.
.
تهاني : علميني بسرعه إيمان تعرفين مالي أحد بهالدنيا كلها غيرك حتى أمي أخاف أعلمها أشياء كثيره علمتك عليها ..
.
.
إيمان : أنا عرفت من خلال هالأشياء وعرفت بعد من يوم شفت زوجك يوم دخل الغرفة تذكرين يوم أناقاعده وإنتِ طلعتي تنزفين وبقوا خواته ..
.
.
تهاني وهي تعدل قعدتها : كملي إيمان
.
.
إيمان : بكمل بس بشرط ..ماتزعلين مني أنا بقول شي لمصلحتك ..كنت أبقوله لك من زمان وكنت خايفه تزعلين مني لإني أعرفك حساسه من أشياء أهون تزعلين عالى أتفه الأشياء بس هالحين خلاص بعلمك وأعتبري كلامي آخر العلاج الكي ..
.
.
تهاني : والله ما أزعل إيمان يالله تعرفين ما أحب أحد يقول كلامه ومايكمل خصوصاً إنتِ
.
.
إيمان : توعديني ماتزعلين
.
.
تهاني : ترى تجربة طلاقي غيرت أشياء كثيره فيني صحيح إني كنت بموت بس الضربة الي ماتموتك تقويك ..
.
.
إيمان : برافو عليك تهاني أبيك كذا قوية
.
.
أسمعي أول شي يبدو لي إن زوجك عينه طويله يوم زواجك كان يناظر فيني وهو عريس والليلة ليلته ..هذا شي
.
.
وثاني شي سمعت خواته يمدحون في (مشاعل بنت عمك )قدامه ويتكلمون عن رشاقتها ونعومتها وجمالها وسمعت ناس يحشون فيك عشان لبستي النظارة وآخر شي سمعت تعليق من وحده وأنا قاعده أتعشى تقول مشاعل تهبل كأنها حليمه بولند أما تهاني كأنها العريس ههه
هم قعدو يضحكون وأنا سكت وماعاد كملت أكل
.
.
تهاني : يوه ليتني سمعت الكلام ومالبست النظارة ..!
.
.
إيمان : وهو السبب بس النظارة تهاني أنا لو إني زوجك كان طلقتك أسمحي لي يعني النظارة والجسم وناظري أسنانك ..أشياء كثيرة وزوجك شكله متفتح وشايف وأبشرك كل الشباب هالحين كذا وشكله سمع كلام أخواته وحشهم فيك وإن بدر أخذ القمر وهو حس بالغبنه حس إنه إنقمر فيك
.
.
تهاني بأسى وحزن : إنقمر ؟
.
.
إيمان : تهاني ترى أخذت منك وعد بإن هالكلام ماراح يزعلك ..والرجال يبي حرمه على الأقل تشبه للأشكال الي قاعد يشوفها من حقه يشوف شي(ن) زين طبعاً إنتِ قمر بس لو تهتمين بشكلك وتسمعين الكلام
.
.
تهاني : ايه ايه طيب كملي وش رآيك بعلي يوم شفتيه يوم الزواج حلو صح يهبل؟
.
.
إيمان : تهاني فوقي أصحي خلاص الرجال راح طلقك يختي طلقيه طردك من حياته أطرديه وتعلمي من هالدرس
.
.
تهاني : ما أقدر تعبت أوقف تفكيري كل شي فيني يفكر في علي إيمان تقين أحياناً أقول ليتني حملت منه
.
.
إيمان : ياربي من هاللزقه الحمد لله إنك ماحملتي منه أعوذ بالله ماعندك كرامه ...؟
.
.
تهاني : عندي طبعاً بس لين أجي عند علي كل شي يصير قزم عنده والله لو بيرجعني خدامه عنده برجع
.
.
إيمان : ياعمري والله إن شاء الله ماتصيرين خدامه عند أحد تهاني أسكتي لا تسمعك الوالده ..ترى كلامك هذا كبير راح علي بقلعته بيجي غيره إن شاء الله وربي بيوقفك ..
.
.
تهاني وهي تبكي : إسمعي أنا غير علي ما أبي ولا أحد يجيب طاري العرس ما أشوف رجال بهالدنيا غير علي ولو سمحتي لاعاد تحشين فيه لإنه أكبر من كذا مآدري وش أسوي يإيمان أحس إني مجروحه علي طعني قتلني وشمت فيني كل الناس وهي تبكي
.
.
إيمان قامت عند تهاني ومسكت يدها : ماراح أقول لك لا تبكين أبكي طلعي كل الي بنفسك تهاني حبي نفسك مثل ماتحبين علي طوري نفسك أدرسي أشتغلي لا تقعدين للفراغ ولا ترى بيقتلك الفراغ والتفكير في شخص غير جدير بالإهتمام إنتِ مهمه بالنسبه لنا ولأهلك ولكثير ناس يحبونك لاتخلين طلاقك يسبب لك في تدمير حتى شخصيتك ...!
.
.
تهاني وهي تمسك يد إيمان بقوة : أوعدك إيمان ما أجيب لك طاري علي خلاص ...
.
.
إيمان : ماعاد نبي نشوف دموع الغالية خلاص مثل ماقلتي تقويه ماتقتله ..
.
.
عموماً شكل زوجي يتصل وعيالي هبلو بأبوهم لإنهم قعدو معه في السيارة
.
.
تهاني : حظك زوج وعيال وزوجك يموت عليك مالت علينا
.
.
إيمان بصوت عالي : قولي ماشاء الله تصدقين كنت أظن إن المطلقات نفسيتهم تصير زفت وحتى تفكيرهم سوداوي ويحسدون ويصيرون منافقات بس الحين تأكدت ههه
.
.
تهاني : طيب أوريك أنا منافقه
.
.
إيمان : ماقلت إنتِ ياحلوة قلت المطلقات
.
.
تهاني : وأنا مطلقه ..
.
.
إيمان :إنتِ منطلقة مثل ماقلنا تقويه وماتقتله عموماً عادي يعني لا تآخذين كلامي بشكل سلبي تعرفيني زين وياما نصحتك نصايح وتهاوشنا وتضاربنا وإحتجنا فرقة فك الشغب وغازات مسيلة للدموع وقلت لك كلام وثبت لك إن كلامي طلع صح ..تهاني حنا صديقات العمر يعني أنا أنصحك وإنتِ تنصحيني وعلي راح بيجي غيره لا تقولين لا ومالا ترى القلب الي حب علي يقدر يحب غيره والحب شي متبادل مو حب مثل الخبال الي قاعده تسوينه ...يالله يالله هذا محمد يتصل سلمي على خالتي
.
.
إيمان : دقيقه أمي تبي تكلمك
.
.
أم تهاني : إيمان بدري توني أشوف تهاني تضحك من يوم تطلقت أقعدي معها شوي هبلت فينا كل كلامها عن علي وعلي راح وعلي أشترى وعلي ضحك وعلي قعد ..!
.
.
إيمان : لأ خلاص ياخالتي تهاني هالحين تغيرت وعرفت أشياء كثيره كانت غايبه عن بالها تهاني تقويه وإيش
.
.
تهاني : وماتقتله
.
.
الأم : أعوذ بالله إيمان ولا تبينها تقتله ههه والله هو يستاهل عاد
.
.
.
إيمان وتهاني والأم يضحكون
.
.
.
إيمان : يالله أشوفكم على خير وهي تحب راس الأم وتسلم على تهاني
.
.
.
.
--------------------------------------
ليس كل سقوط نهاية فسقوط المطر أجمل بداية

.
.
.
*** الفصل الثالث ***
.
.
عانت تهاني من حالة تخبط ...فهي غير مصدقة لكل ماحصل لها زوج سريع وطلاق أسرع
.
.
بدأت تعيد ترتيب أوراقها خصوصاً بعد كلام إيمان ووقوف إيمان بجانبها فهي تمر بمحنة وبظرف صعب ..!
.
.
قررت أخيراً أن تدرس ولكنها لا تمتلك المال لتسجل في دورة أو معهد فوالدها رجل _ على قد حاله_ فكيف بحالها هي ووالدتها ؟
.
.
أخيراًً ساعدها أخوها الكبير بالإلتحاق بدورة تعلم الحاسب الآلي وبالفعل أنهتها ومن خلال المعهد حصلت على وظيفة في التخصصي الطبي وهي (موظفة إستقبال) ...
.
.
ترددت كثيراً لكنها وافقت فلا إختيارات كثيرة أمامها خصوصاً بإن والدتها كبيرة في السن ووالدها يريدها أن تعمل وهما لا يمانعان من عمل أبنتهم في مجال مختلط الكثير من جماعتهم أصبحو حتى يسفرون بناتهم للدراسة في الخارج ..!
.
.
ذهبت تهاني وقابلت المسؤل عن توظيفها وأخذها للمكان الذي ستعمل فيه وأفهمها طبيعة عملها فهي تكتب المواعيد وتستقبل إتصالات المرضى وتنسق متى يدخل هذا وذاك
.
.
وافقت وبدأت العمل ..
.
.
كان الجو بالنسبة لتهاني غير مناسب فزميلاتها في العمل من جنسيات أخرى ومتبرجات بزينة ومكياج وبناطيل جنز وأنواع العطور ...والغريب بإنها تضع الطرحة وكأنها طرحة عروس لا طرحة ستر
.
.
كانت لا تكترث بأحد فهي لازالت متمسكه بإن كلام الناس لا يضر ولا ينفع أخذت تعمل وتعمل وتعمل وتعامل الجميع بإحترام ومن بعيد لبعيد ..
.
.
وفي الويك ايند أتصلت على إيمان ودعتها إيمان هذه المره لبيتها وبالفعل ذهبت عند إيمان ..
.
.
دخلت تهاني وإيمان سعيدة بحضور صديقة دربها تهاني وهي بالإضافة إلى كونها صديقتها تعطف عليها بسبب التجربة القاسية التي مرت بها ..
.
.
إيمان : هلا والله شكل نفسيتك ميه ميه
.
.
تهاني : الحمد لله الأمور تمام أبشرك والشغل أشغلني عن التفكير في أشياء كثيره أحس مو فاضية للبلاوي مثل أول
.
.
إيمان : وعلي ؟؟
.
.
تهاني : علي مين خلاص سحبت عليه السيفون أصلاً صرت أكره أي واحد إسمه علي بل وتعديت لأكثر من هذا أكره الرجال الكلاب الحيوانات
.
.
إيمان : أستغفر الله وش هالكلام عاد مولهالدرجه ماعندك إنت وقت ياكره وبغض ياحب وموت ؟؟
.
.
بعدين وش دخل إسم علي ...؟
.
.
تهاني : إيمان لا يكثر هاتي الكيكة بس خل نقطعها ونولع شموع ..
.
.
إيمان : ياحركات شموع بمناسبة إيش ..؟
.
.
تهاني : هي شمعة وحده بمناسبة مرور سنه على طلاقي
.
.
إيمان : ههه وبالمناسبة الأسبوع الجاي عيد ميلاد عبد الآله إبني خل نضرب عصفورين بحجر ههه
.
.
وبعد القهوة سألت إيمان تهاني عن جو العمل وعن زملائها
.
.
تهاني : ولا شي ما أحتكيت ولا مع أحد مع إن فيه موظف مسوي يتميلح وينكت ويذب على هالشاميات باين إنه مو مضبوط أستغفر الله المشكله مايفهمون هرجه وذباته بس يضحكون وبس ياشين كذا
.
.
إيمان : ليش قال لك شي ولا شي ؟
.
.
تهاني : لا بس يكلم الجميع وبصوت عالي وكل الموظفات شكلهم والله أعلم خاقين معه
.
.
إيمان : ليه لهالدرجة شكله حلو
.
.
تهاني : بالله عليك أقول لك المركز التخصصي الطبي تقولين شكله حلو ؟؟
طلعي لي موظف شين وحتى الموظفات أنواع العطور والحركات أصلاً الإدارة تطالب بهالشي وحتى التوظيف يطلبون المظهر والشكل والشخصيات والطخامه
.
.
إيمان : طيب غريبة وراهم يوظفونك
.
.
تهاني : ههه وش هالحقد
أنا يكفي إني سعودية وأتوظف في الإستقبال ..
.
.
إيمان : ههه أجل شكلهم ممسكينك التلفون بس بالصوت تشتغلين
.
.
تهاني : إيمان لهالدرجة شكلي شين ؟
.
.
إيمان : لأ بس مثل ماتقولين أهم شي عندهم الأشكال وبناطيل وحركات وإنتِ مع وين يدخل جنز عليك بس تعانين من وزن زائد يعني شكلك الوالده ..
.
.
تهاني : تصدقين بديت أنقهر واحس بالكلام الي كنتِ تقولينه لي حتى يوم أشوف السوريات الي معانا أقول بعذره علي طلقني ..!
.
.
إيمان : مافيه سعوديات ؟؟
.
.
تهاني : حتى السعوديات حركات نقاب أو برقع تقولين كله نشا مريتو وكيلو عطر والعيون مكحله وعدسات وهذيك الشيلة الخفيفه الي تطير وإذا طارت أنتشرت العود والعطورات الشرقية
.
.
إيمان : العود والعطورات الشرقية هذا محل مو
.
.
تهاني : يووه ياإيمان شفت شي عمري بحياتي ماشفته وش أقول وش أخلي ..أحس قلبي تعبان ..
.
.
إيمان : ليه ؟؟ سلامات وش يدخلك فيهم
.
.
تهاني : مثل ماقلتِ بنات أكبر مني وحده كبر أمي والله إن شكلي جدتها
.
.
إيمان : يالفالحة التخصصي الطبي عندهم مركز للرشاقة والتخسيس روحي سجلي ...
.
.
تهاني : فكرة ..
.
.
إيمان : الحمد لله الحمد لله
.
.
تهاني : يرحمكم الله خير تعطسين على الصامت ؟
.
.
إيمان : ههه لأ ياشيخه أحمد ربي إن فكرتي الي كنت أغني بها في إذنك وصلت وشفتي الشي الي كنت أبيك تشوفينه حتى قبل تتطلقين من علي ..شوفي الناس كيف عايشين حياتهم شوفي البنات والحركات
.
.
تهاني : يعني لازم أصير قليلة حيا وألبس عدسات وأتسكع في مشيتي
.
.
إيمان : قلت لك ماعندك شي وسط ..بالله وريني نقابك
.
.
تهاني : دقيقة وينه هه خوذيه ..
.
.
إيمان وهي تفتح النقاب وتضحك بصوت عالي : بالله هذا نقاب ولا مفرش طاولة ؟ كله بقع وريحته بصل مدري ثوم كله كوم وقشر الفصفص الي ملزق من قدام كوم
.
.
تهاني : تعرفين عشقي للفصفص
.
.
إيمان : بالله أنتبهي تقولين لأحد وتبوحين بسر عشقك لفصفص باجه لإنهم بيآخذون عنك فكرة إنك طقاقة وزاحفة وإنتِ من جنبها ههه
لا يشوفك هذاك الذباب السعودي ولا بيستلمك
.
.
إيمان : وحتى العباية شوفي من تحت كيف ؟ كلها غبار وتراب كانسه الغام ولا عباية وانا أقول ليه المركز نظيف ولا وش السالفة العباية حدها مقززة ..؟ هالشي وش يدخله في الستر ؟النظافة شي والستر شي ..!
.
.
تهاني : إيمان ترى اليوم شكلك حاقده من جد
.
.
إيمان : لا ياحبيبتي مو حاقده ولا شي بالعكس أحس إنك بديتي تغارين وتحسين تصدقين الغيره مهمة الي مايغار مايحس ولا يشعر جبله وغير ناجح بس الي يغار معناته يحس معناته راح يطور نفسه وإنتِ بديتي وأنا متأكده مدام هالشعور وصل لك راح تتغير فيك أشياء كثيره ..أيه كنت بسألك عن شي ايش ياربي ذكريني تكلمنا في أيش ..
.
.
تهاني : عرفت أكيد بتسأليني عن هذاك الي يقعد يتميلح ويستهبل الذباب على قولتك
.
.
إيمان : والله وصرتي ملمة بعلم الفراسة مثلي يابنت تطورنا ياشيخة قولي قا
.
.
تهاني وهي تضحك : إنتِ لسا شوفتي حاقة
.
.
إيمان : وش إسمه طيب
.
.
.
تهاني : إسمه والله مدري بس هو دايم يسولف مع وحده كبر جدتي إسمها نجاة شامية ومرتبه وطيوبه ماعليها تجي تسولف معي وتسألني عن أمي ..
.
.
إيمان : كبيرة وتسولف معاه ..وش تبي ذي ؟
.
.
تهاني : ياربي مشكلة الناس الي مايعملون في مجال مختلط هذي الرئيسة كل الشغل مسئوليتها وبعدين محترمة ..
.
.
إيمان : وهي تغير صوتها تقلد تهاني الناس الي مايعملون في مجال مختلط تكفين يالربيعة من اليوم بسميك وزير الصحة حتى أفكارك تغيرت ؟؟الله يستر بس
.
.
تهاني : لا تخافين علي ولا شي أصلاً الرجال كلهم أنذال ولو واحد ناظر فيني وش يبي بوحده دوبية وضروسها طالعه وتلبس نظارة عشرين سم ؟
.
.
إيمان :وأخيراً شفتيها وأعترفتي بوجودها مدام شخصنا صح يعني العلاج قريب كل هالأشياء في مقدورك تصلحينها بس ماعند رغبة لكن مراويها إن الرغبه بتجي أعتقد قريبة منك قرب نظاراتك هذي أم عشرين سم
.
.
تهاني : يالله أخوي جا يآخذني راح جاب زوجته وهالحين تحت هو يالله أمونتنا الغالية أشوفك على خير مع السلامه
.
.
إيمان : أهم شي النقاب والعباية أغسليهم زين بشامبو بنكهة الفصفص
.
.
تهاني : تستهبلين أوريك إنتِ وقصتك هذي سلامات ياشوجي
.
.
إيمان : إنتبهي تسول لك نفسك أمراً وتقصينها ..
.
.
تهاني لو قصيتها بيطلع راسي صغير وجسمي كبير هذا إذا بان راسي
.
.
إيمان : بالعكس شعرك حرير ولين ركبتك ماشاء الله إنتبهي تقصينه ياويلك عطيني إيان ولا تقصينه
.
.
تهاني : قولي ماشاء الله تفلي تفلي عليه
.
.
إيمان : ماشاء الله تبارك الله تفوه عليك وعليه
.
.
تهاني : ههه يالله مع السلامه أكرمكم الله تعبتك
.
.
إيمان : تعبك راحه أهم شي إني شفتك مبسوطه ورجعتي تسولفين وتنكتين وتصالحتي مع نفسك
.
.
مع السلامة
.
.
.
مشكوره يا إيمان دخلت السعاده بدنياي ..
وأخذيتني من بحر يأسِ عميقي
مديتي لي يدك وأنا أمد يمناي ..
ونسيتيني بلطفك كل حزني وضيقي

.
.
.
*** الفصل الرابع ***
.
.
أستيقظت (تهاني ) لتصلي الفجر توضت وصلت وأخذت تسبح وتستغفر ..فسمعت صوت والدتها وكانها تبكي ..!
.
.
خرجت للصالة فوجدت والدتها تجلس على سجادتها وتبكي ..
.
.
تهاني : صباح الخير ...يمه تبكين ؟
.
.
الأم : لا لا بس تذكرت أشياء وكنت أدعي لك ياتهاني يارب يوفقك بإبن الحلال الي يعوضك عن علي والأيام الي عشتيها معه
.
.
تهاني : يمه وش جابك على علي وطاريه أحد كلمك ؟
.
.
الأم : خالتك كلمتني أمس تقول علي تزوج ..
.
.
تهاني : الله يوفقه طيب يمه لا يكون تبكين عشان كذا ...؟؟؟
.
.
الأم : يمه أنا أشوفك قدام عيني كل أخوانك تزوجوا وإنتِ بنتي الوحيده ذابحه نفسك بهالدوام ولا زوج ولا عيال ودي أشوف عيالك قبل لا أموت ..
.
.
تهاني : بسم الله عليك يمه من الموت ..يمه لا تشيلين همي لي رب إسمه الكريم وبيرزقني أنا أدعيه كل يوم ومتأكده إنه مابيخيبني..يمه كل الي صار لي خيره وماحد يآخذ في هذي الدنيا إلا نصيبه ..
.
.
الأم : الله يوفقك ياتهاني يارب أشوفك عروس ..
.
.
تهاني : إيه كذا يمه أدعي لي بعد إنتِ ..يالله بقوم أنام شوي وبعدين بلبس وبروح الدوام ..
.
.
الأم : ماقلت لك إن مشاعل ولدت ؟
.
.
تهاني : ماشاء الله وش جابت
.
.
الأم : جابت لها توم ولدين
.
.
تهاني وهي تضحك : يوه ماشاء الله تبارك الله
.
.
الأم : تهاني لا تزعلين هذي عطايا رب العالمين
.
.
تهاني : يمه ليش أزعل ليش أحسدها على رزقها من ربها ؟
.
.
الأم : لإنكم أعرستوا في يوم وهي لا إله إلا الله مبسوطه وبدر شايلها على راسه وهالحين جابت التوم ..
.
.
تهاني : الله يوفقهم ويزيدهم من فضله ويرزقنا ...يمه تذكرين بدر يوم غلط ودخل وشافنا ؟؟
.
.
الأم : اييه قايلين له إن هذي غرفة مشاعل ...يالله يوم وراح ..
.
.
تهاني : تصدقين يمه للحين أتذكر شكل عيونه يوم طارت شكله كان خايف أكثر مننا ههه
.
.
الأم : خلاص ياتهاني لا عاد تذكرين هذاك اليوم لإنه يجيب لي الضغط ,,
.
.
تهاني : بسم الله عليك من الضغط بس لازم تعرفين شي واحد يمه أنا سعيدة وفرحانه بكل شي يكتبه لي ربي علي الله يوفقه ومشاعل الله يقومها بالسلامه ولوبتزورينها يوم الخميس بجي معك
.
.
الأم : بردتِ قلبي ياتهاني برضاك ..روحي الله يرضى عليك دنيا وآخره ..
.
.
تهاني وهي مبتسمه : أهم شي عندي إنتِ لا تشيلين همي أنا في أحسن حالاتي يالله تصبحين على خير
.
.
أستيقظت تهاني بعد ساعتين ومر عليها أخوها الكبير وذهبت للدوام ...
.
.
كانت تفكر كيف تلتحق بالنادي الرياضي وبرنامج الدايت ..
.
.
ذهبت وسألت نجاة لإنها المسئولة عن كل شي يخص الموظفين ..فدلتها على الموظف الذي سيساعدها في هذا الأمر ..
.
.
نجاة : تعي معي لأوريك وين مكتبه وهو مارح يئصر معك لإنه كتير هون عندهن عضويه بس بيجو يوم يومين وبعدين بحكم شغلهم وهيك بيلائو نفسون خسو طبيعي ههه
.
.
كانت تهاني تمشي مع نجاة حتى وصلو إلى مكتب الشخص الذي سيساعد تهاني ..
.
.
نجاة : خلاص أنا كلمتو وهو هلأ جاي بالطريئ وئلت لو إنو إنتِ هون تنطري
.
.
تهاني : طيب هو بعيد عشان ما أترك مكاني فاضي ..
.
.
نجاة : هلأ بكير كتير حتى مافيه مراجعين وهو ئال بإنه في المصعد وأنا بدي روح أشوف موظفات الأشعة عندي شغل معهن قبل مايجو البيشونت ..
.
.
تهاني : طيب خلاص أنا بقعد أنطر هون
.
.
نجاة : ههه صرتي تحكي شامي الله الله يالله يائمر سلمي ..
.
.
تهاني : مع السلامه
.
.
أنتظرت تهاني ..وأخذت تنظر للمكتب لفت نظرها طريقة ترتيبه ..كل شيء في مكانه الأورق النظام النظافة الكوب وحتى منظمات المكتب ومستلزماته كلها في مكانها الصحيح ..
.
.
دقائق وحضر هذا الشخص ..نظرت تهاني في القادم فقالت في نفسها يؤ هذا (الذباب ) على قولة إيمان ..!
.
.
كان يمشي مسرعاً لإنه يعلم بإن هناك من ينتظره وصل وسلم وأعتذر عن تأخره وقال : معليش زحمة الرياض أعتقد بعد كم سنه بتصير القاهرة ..أهلين أختي كيف أقدر أساعدك ..
.
.
تهاني : أنا ودي أسجل بالنادي الصحي ..
.
.
هو : طيب أوكيه مافيه مشاكل كثير موظفات التحقوا بس لازم ماتتعارض الأوقات مع وقت عملك ..
.
.
تهاني : لا إن شاء الله لو بس هم يعطوني برنامج لو أحضر يوم بس أعرف من وين أبدأ ..
.
.
هو : طيب أعطيني بطاقتك الشخصية ..
.
.
تهاني : أي بطاقة ؟ ماعندي بطاقة أحوال ..! ولا تقصد دفتر العائلة ..
.
.
هو : لا لا بس الي أعرفه إن أي شخص لازم يسوي له بطاقة تعريفيه له عشان كل من سأله يعطيه طيب طيب مو مشكله عطيني أي بطاقه عندك ..!
.
.
تهاني وهي مرتبكه : طيب خل أشوف
.
.
وضعت الشنطه على المكتب ..وأخذت تبحث عن أوراق مبعثره وبدا مابداخل الشنطه من (أنواع الحوسات ) وأكياس فصفص باجه ومشط قديم وعطر طبعاً مو ماركه
.
.
وهو ينتظرها وينظر بذهول في حقيبتها التي بدت وكأنها محل أبو ريالين
.
.
هو : خلاص خلاص مو مشكله عطيني معلومات بشكل شفهي إسمك وعمرك بس دقيقه بجيب قلم وورقه _وهو يفتح الدرج _..
.
.
هو : هاه وش أسمك ؟
.
.
هي : تهاني بنت محمد
.
.
هو : كم عدد أطفالك ..؟
.
.
هي : أنا ماعندي أطفال ..؟؟
.
.
هو : آسف بس أنا كتبت في خانة الحاله الإجتماعية متزوجة ..طيب من مواليد كم ..؟
.
.
هي : 27-9-1407
.
.
هو : معقول ؟ هذا تاريخ ميلادك ..؟
.
.
هي : إيه ليش ؟
.
.
هو :: لا لاعفواً بس النظارة الي لابستها معطيتك سن أكبر بكثير عموماً خلاص أعتبري نفسك من اليوم عندهم بس تحتاجين تعبين نفس المعلومات فوق عندهم ..
.
.
تهاني : طيب ..خلصت هالحين ..باقي شي
.
.
هو : ايه ..ولا أقول لأ لأ خلاص تقدرين تروحين مكتبك هالحين ..بس ممكن أطلب منك طلب
.
.
تهاني : تفضل
.
.
هو : إنتِ الموظفة الجديدة الي بالدور الثالث ؟
.
.
تهاني : إيه وحنا هالحين بالدور الثالث
.
.
هو : تشرفنا ..وأي خدمات وأي شي تبينه أبد تفضلي هنا حنا كلنا هنا أخوان ..
.
.
تهاني : شكراً بس ممكن أعرف إسمك ؟
.
.
هو : إيه سوري ماقلت إسمي ...مع إنه مكتوب قدام عيونك شوفيه على المكتب
.
.
تهاني وهي تناظر : إسمك علي وهي تنافخ ..؟؟
.
.
هو : ليش ؟ وش فيه إسمي ..إيه صح بخصوص إسمي هالإسم مو دارج عندنا بس جدي الله يرحمه هو سماني علي ..
.
.
بس ليش تفاجأتي من الإسم آآآآآآه لا يكون تحسبيني شيعي ههه
.
.
تهاني : لا لا أخ علي أشكرك على كل شيء ..أستأذن أنا هالحين
.
.
علي : بس ودي أنصحك نصيحة أخويه تبين تآخذين بها ولا ماتبينها أرميها في أقرب باسكت !
.
.
تهاني : تفضل ..
.
.
علي : سوي لك بطاقة شخصية ... نصيحة وقبل تطلعين فوق عند مسئولات النادي حاولي ترتبين أمورك أكثر ..
.
.
تهاني : طيب شكراً شكراً
.
.
كانت تهاني تتكلم بشكل رسمي وأستغربت من آخر كلامه لها لماذا قال لها رتبي أمورك وهي تقول في نفسها ليش يعني عشان مكتبه بيطير من كثرة النظافة والترتيب يعنني ..!
.
.
ليش قال لي كذا لازم أقول لإيمان ..لازم أكلمها بكره على الأقل أقول لها إن الذباب طلع إسمه علي
.
.
-------------------------------
.
.
من الخطأ أن تنظم الحياة من حولك وتترك الفوضى في قلبك !

.
.
.
***الفصل الخامس***
.
.
إيمان تتحدث مع تهاني بالهاتف ..وتهاني سردت كل الاحداث لإيمان ..
.
.
إيمان : غبية قلت لك لايشوف فصفص باجه رحتي وعناداً فيني وريتيه كل الأكياس أحلى شي إنه ماقال لك كل شي بهالشنطه مابقى إلا البترول
.
.
تهاني من صدقك ولا تستهبلين ؟ تفتحين شنطتك بهالطريقة العشوائية ؟معليش قلنا طيبه وعلى نياتك وحركاتك كلها بالفطرة بس خلاص ستوب وقفي الحياة هالحين مايبي لها الفاهيين تلاقينه قاعد يضحك عليك وينكت
.
.
تهاني : وش تبيني أسوي يعني ..
.
.
إيمان : أول شي النظارة يختي فيه إختراع إسمه عدسات ..وملونة بعد
.
.
تهاني : أستغفر الله لا وملونة بعد لا لأ أحس العدسات شعرة في عيني وتولع العيون ماهضمتها أبد هالعدسات ولا كل يوم البسها ما اقدر هالنظارات بيني وبينها عشق أبدي تاريخ
.
.
إيمان : أجل فمان الله حنا مسافرين الشرقية اليوم وإنتِ عاد دبري نفسك
.
.
تهاني : طيب ماعلمتك وش إسمه ؟
.
.
إيمان : إسمه سعود
.
.
تهاني : لأ
.
.
إيمان : فيصل
.
.
تهاني : لأ
.
.
إيمان : خالد
.
.
تهاني : لأ
.
.
إيمان : قولي طيب وش إسمه ؟؟؟
.
.
تهاني : علي
.
.
إيمان :خير الظاهر لك حظ وافرمع العليين
.
.
تهاني : كرهته من يوم قريت إسمه ..!
.
.
إيمان : آي هوب ذات
.
.
تهاني : من جد ..
.
.
إيمان : ويوم إنك كرهتيه وش هوله قاعده تسردين لي الأحداث
.
.
تهاني : إيمان وش في دمك صاير ثقيل
.
.
إيمان: إنتِ عنيده راسك ناشف أنشف من شابورة السعودية
.
.
تهاني : خلاص بسوي عملية الليزك عندنا بالمركز
.
.
.
إيمان : طيب أنا هالحين بقوم أرتب شناطتنا وبعد شهر أشوفك ياقمر يالله أستودعك الله الذي لاترد ودائعه ..
.
.
تهاني : بتوحشينا يابنت
.
.
بدأ الدوم وتهاني تذهب للنادي وتعمل وخلال هذه الأيام أجرت عملية الليزك وأخيراً تخلت عن النظارة وبدت عيناها واسعتين تلمعان ..
.
.
أصبحت تلبس النقاب من غير تلك النظارة المقعرة التي ربما كانت هي سبب طلاقها لإنها كانت تخفي جزءً كبيراً من جمالها ..!
.
.
كانت تهاني تستقبل المكالمات وتنظم المواعيد وترتب المكتب وهي بذلك ايضاً ترتب حياتها ووقتها وتطور من شخصيتها ومظهرها وطلتها ..
.
.
فإشتراكها في النادي الصحي بدأ يعطي ثماره حتى في شخصيتها أصبح قوامها مشدود قليلاً وهناك تطور ملحوظ في شخصية تهاني قلباً وقالباً
.
.
وفي يوم والجميع منهمك في عمله جاء علي وأخبر الجميع بإن شادي مدير العلاقات العامة سيذهب إلى بعثه في كندا وأنه سيقيم له حفل توديع ويطلب من الجميع الحضور ..
.
.
حضر جميع الموظفين ومعهم تهاني التي كانت تقول في نفسها : يوه معقول يصير كذا هنا وين الهيئة عنكم
.
.
وبعد إنتهاء الحفل قام الأستاذ شادي وأثنى على الجميع وشكر وأمتدح علي الذي بادر وتكفل بإقامة تلك الحفلة وبالرغم من صغرها إلا أنها تعني له الشيء الكثير وبإنه أحب المركز بمن فيه وأولهم الأستاذ علي وأخذ يصافح علي الذي بدا عليه الحزن الحقيقي ..!
.
.
أنتهى الحفل ووزع علي الكيك والفطائر المتبقية على الموظفين وسمع تهاني تقول : لالا شكراً أنا مسويه دايت وممنوعه من كل هالاشياء ,,
.
.
علي : الأخت تهاني ..
.
.
تهاني : أيه أستاذ علي أنا تهاني تذكرني
.
.
علي : إيه نعم أذكرك بس يوم شفتك ماعرفتك كيف حالك ؟
.
.
تهاني : الحمد لله تمام ..الله يعطيك العافية على هالحفل الحلو وعلى الإهتمام بالموظفين
.
.
علي : أنا عندي إهتمام بالموظفين كلهم خصوصاً إذا كانو سعوديين ,,!
شوفي أنا أعرف إنه وظيفتك هذي مستحيل أي سعودية تقبل بها ولكن إنتِ قبلتِ بها بل وتميزتِ فيها كل الموظفين يثنون عليك وأنا شخصياً معجب فيك الله يرحم أم وأبو ربوك .
.
تهاني : بس أمي وأبوي عايشين مو ميتين
.
.
علي : الحي يحتاج للرحمة بعد وش حنا من غير رحمة رب العالمين الله يرحمنا جميع ..
.
.
ذهب علي وتهاني سعيدة بكلماته وثناءه عليها وعلى عملها ..
.
.
عادت للبيت وضمت والدتها وحبت راسها ..
.
.
الأم : تهاني وش فيك اليوم
.
.
تهاني : يمه فرحانه مره بتشقق من الفرح ..يمه مديري اليوم مدحني قدام الجميع وقال إني أفضل موظفة في المركز يمه بطير من الفرح
.
.
الأم : الله يسعدك ويزيدك من فضله
.
.
تهاني : حتى أنتم مدحكم وقال الله يرحم أم وأبو ربوك
.
.
الأم : الله يسخر لك الطيبين يابنيتي يالله قومي سخني غداك وتغدي وتعالي تقهوي معي
.
.
تهاني : حاضر حاضر طيب يا أحلى وأغلى وأطيب أم في الدنيا
.
.
.
ذهبت لتغير ملابسها وتتناول طعامها وإيمان تتصل ..
.
.
آآآه وأخيراً عادت إيمان من الشرقية
.
.
.
---------------------------
.
.
حاجة الإنسان إلى التقدير تفوق حاجته إلى الطعام والشراب !

.
.
.
*** الفصل السادس ***
.
.
عادت إيمان من الشرقية وكعادتها أخذت تعطي النصائح والحكم والمواعظ لتهاني التي كانت تأخذ ما تريد وترمي الباقي في أقرب سلة مهملات ..
.
.
مرت ثلاث سنوات على عمل تهاني في المركز وكانت تقابل الكثير ..وتتحدث مع الكثير ..عرفت أشياء كثيرة وتعلمت من الحياة الكثير ..
.
.
وكان علي يوجه لها النصائح والحكم تماماً كما تفعل إيمان ..
.
.
وفي حديث لها مع إيمان ..
.
.
إيمان : تهاني خلاص ترى كلامك عن علي صار كثير وش بينك وبينه ..خبري فيك ماتخبين عني شي ..!
.
.
تهاني : والله ولا شي بس إذا شفته أحس إني متلخبطه ومضيعه أوراقي أتذكر شنطتي يوم شافها وأتذكر فصفص باجه
.
.
إيمان : وش بتلبسين في زواج ولد خالتك ...؟
.
.
تهاني : فستانك الفوشي مايبي لها ..
.
.
إيمان : سبحان الله مقاسي صار يجي قدك سبحان الذي يغير ولا يتغير ..
.
.
إيمان : حتى أسنانك صارت ماشاء الله بعد التقويم لا إله إلا الله شكلي بركب تقويم تصدقين حتى الشفايف صار كأنك مسوية لها سيلكون ..!
.
.
تهاني : وش يدريك إني ماسويت سيلكون ..
.
.
إيمان : والله حركات القطه المغمضه فتحت تعالي قولي لي سويتيها ؟؟
.
.
تهاني : أنا في مركز طبي يعني أطرف عملية بسويها بس وش رآيك
.
.
إيمان : تصدقين إنك حقيرة وتدرين إني بموت وأسويها يالله أحجزي لي بكم هي
.
.
تهاني : بسته الآف ريال لاغير ريال ينطح ريال بس إذا معزمه بتوسط لك عند علي
.
.
إيمان : شاكه إن بينك وبينه شي
.
.
تهاني : أمزح معك أعوذ بالله بس تعالي المركز شوفيني وأنا مشخصه
.
.
إيمان : الإسبوع الجاي بجي من جد بسوي عملية اللحمية لعبد الآله قولي لزملائك حضرة وسمو إيمان جاية المركز بخروه وخلي علي يزين لنا القهوة
.
.
تهاني : إبشري وحنا في ذيك الساعة
.
.
.
وفعلاً حضرت إيمان ..ودخلت في إستقبال المركز الثالث وأخذت تبحث عن تهاني حتى وجدتها ..
.
.
إيمان : وش هالحركات دخلت وناظرت وشفتك ماعرفتك لابسه عدسات ملونه ..!هماك تكرهينها وتحسين إنها شعره بعيونك
.
.
تهاني : أدخلي بالله لا تفشليننا نعرف إنك تعرفين ملفي بس لاتفلينه هنا
.
.
وبعد الكشف عادت إيمان لمكتب تهاني
.
.
إيمان : يالله أشوفك على خير ياحلوة ..تصدقين المركز كأنه فندق ماعندكم كوفي قريب هنا
.
.
تهاني :إلا فيه يالله تعالي وراي ومنها نسولف شوي
.
.
إيمان : صدق ونحش شوي في هالأشكال
.
.
تهاني : شوفي هذا الي جاي تراه علي ..
.
.
إيمان : وش فيه شكله متجه لنا تكفين لا توقفين خل نكمل
.
.
تهاني : عادي هذا زميل عمل
.
.
إيمان : زميل إيش
.
.
تهاني : زميل عمل
.
.
إيمان : ليش زميل العمل هذا مو رجال غريب ..
.
.
قرب علي وسلم : كيف الحال أخت تهاني ؟
.
.
تهاني : الحمد لله شلونك إنت ..إستاذي هذي صديقتي إيمان ..
.
.
علي : هلا وغلا ..
.
.
.
اليوم عندنا إجتماع مهم ..والكل في صالة الإجتماع ممكن ماتتأخرين لو سمحتِ
.
.
أوكيه أنا جاية هالحين ..
.
.
تهاني : إيمان هذاك اللفت شوفيه أنزلي منه أضغطي جي يالله باي حبيبي عبودي
.
.
إيمان : تهاني طيب تعالي شوي
.
.
تهاني : بعدين نكمل باي هالحين مع السلامه سي يو
.
.
.
.
إيمان : تهاني تهاني تهاني
.
.
------------------------------------
.
.
بعد ماربك إنطاك علي قمت أتكبر ..؟
ياهل جنحانك قصار ؟؟ طير إن كان تقدر ؟؟
بالك تهوى وتطيح ..! ريش إنتا بوسط ريش
وأخاف عليك تعثر
وأخاف عليك تخسر !
.
.
^
برايفت من إيمان لتهاني لإنها جحدتها

.
.
.
***الفصل السابع ***
.
.
أنتهى الإجتماع وأنتهى الدوام ..
.
.
خرجت تهاني مسرعة ناداها علي ..
.
.
علي : أخت تهاني ممكن أطلب منك طلب صغير ..!
.
.
تهاني : تفضل ..
.
.
علي : ممكن أعزمك
.
.
تهاني : تعزمني ..وين في زواج مثلاً
.
.
علي : لأ لأ بعزمك في مسرحية لشكسبير ..
.
.
تهاني : وين هي فيه ؟؟
.
.
علي : في مركز الملك عبد العزيز الثقافي ..
.
.
تهاني : والله عمري مارحت له ولا طلعت من بيتنا أصلاً غير للدوام بس بفكر ..!
.
.
علي : طيب على العموم هي يوم الخميس الجاي ممكن تعطيني رقمك .
.
تهاني :هاه طيب طيب 0505*******
.
خرجت تهاني وكلها إستغراب ياربي ليتني ماعطيته الرقم ..مسرحية لشكسبير ..؟ وفي الرياض ؟ وش السالفة ..
.
.
ماعندي غير الإتصال بصديق ..وأنا لي مين غير إيمان مستشاري العزيز ..
.
.
رجعت للبيت وأتصلت على إيمان ...
.
.
والعجيب بإن إيمان لا ترد ..
.
.
عشرين إتصال وإيمان لم ترد ..!
.
.
تهاني وش فيها البنت شكلها زعلت إيمان مني يوم أمس والله مالها حق طيب هذا مكان عملي ..!
شكلها بدت تخرف إيمان ولا شكلها تستهبل ..!
.
.
وأخيراً أرسلت لها مسج ..
.
.
وردت إيمان : ماشاء الله من لقى أحبابه نسي أصحابه نسيتي يوم تكلميني وزوجي بجنبي واصرفه عشانك وعشان سواليف وإنتِ على طول جحدتيني وهالحين جاية تتصلين ..يالله ورينا شطارتك طير إن شان تقدر تطير
.
.
تهاني ردت بمسج : إيمان مالي غيرك وإنتِ تعرفين مكانك وأنا آسفه وهذا راسك أحبه بس تكفين ردي علي عزمني في مسرحية !
.
.
ومامرت ثواني إلا وإيمان يتصل بك
.
.
تهاني : آلو إمونتنا ومالنا غيرها ..أنا أسف
.
.
قاطعتها إيمان ..
.
.
إيمان : أي مسرحية ووين ومتى لا يكون في الكويت ولا في مصر ..!
.
.
تهاني : أدري والله ما أتصلتِ إلا عشان اللقافة بس أشوى رب ضارة نافعة
.
.
إيمان : وين المسرحية ...؟
.
.
تهاني : في الرياض يالحبيبية في مركز الملك عبد العزيز ..
.
.
إيمان : تحلمون ماشاء الله عليكم ياحبيبتي هنا ماعندنا إختلاط ولعب وقلة حيا وأتمنى لو صارت تطب عليكم الهيئة وتقشكم وأولكم علي شكله قليل حيا ومو ناوي يجيبها لبر ..!
.
.
تهاني : أنا للحين مستغربه ..!ما أستوعبت ..!
.
.
إيمان : وش قلتي له ..!
.
.
تهاني : قلت له بفكر ...
.
إيمان : بفكر أقول يازينك ساكته ...طيب كان بتروحين أجل رجلي على رجلك
.
.
من جدك ياتهاني بتروحين ومعهاه مافكرتي بأقل شي مثلاً وين بتركبين ؟
.
.
تهاني : هو يقول نطلع من المركز للمسرحية ..؟
.
.
إيمان : طيب ما أختلفنا ووين بتركبين ؟ قدام صح
.
.
تهاني : والله مافكرت بكل هالأمور ..؟
.
.
إيمان :ولا بتركبين ليموزين وتمشين وراه يالقرويه
أقول إنتِ ماشفتي شكلك وإنتِ تكلمينه فهيتي بقوة نسيتي إن حضرة سمو إيمان عندكم في المركز...بصراحه ماتوقعتك كذا
.
.
تهاني : حنا عملنا كذا نكلم الرجال عادي !
.
.
إيمان : أنا عظامي تنتفض من الخوف وإنتِ ماعندك فكره وفي النهاية طينتيها بستين طينه ورحتي معها وخليتينا !
.
.
تهاني : كنت مثلك أول ماأشتغلت بعدين خلاص
.
.
إيمان : راح الحيا
.
.
تهاني : لا مو كذا بس خلاص تعودت
.
.
إيمان : بس هل هالشي صح ولا خطأ
.
.
تهاني والله ما أدري عموماً عندي إتصال الحين إيمان يالله باي سي يوو
.
.
إيمان : حركاتك تدلل على قل خاتمة
.
.
.
-----------------------------
..
لا احد يعيش حياته الحقيقيه والعفويه بأكمل وجه ؟
كلنا نمثل .. لذلك نحن داخل مسرحيه ضخمه ...
.
مالدنيا إلا مسرح كبير
.
.
وليم شكسبير

.
.
*** الفصل الثامن***
.
.
.
علقت تهاني مكالمة إيمان وقامت بالرد على مكالمة ( المتصل )
.
.
وكانت تعلم يقيناً بإن المتصل هو (علي ) خصوصاً بإن الرقم مميز
.
.
علي : آلو السلام عليكم
.
.
تهاني : هلا وعليكم السلام ورحمة الله وبركاته
.
.
علي : أول شي أنا أبدي أعتذاري على ماصدر مني وأتمنى ما أكون ضايقتك ..!
.
.
تهاني : لأ ماضايقتني بس عندي إستفسار ..
.
.
علي : أدري تقصدين بخصوص المسرحية ..سوري كان في سوء فهم مني ..تدرين أختي الكريمة أنا مولود في باريس وتربيت هناك لإن الوالد كان يعمل في السفارة السعودية هناك يعني إنسان تربيت على الحضور في مسارح تاريخية عتيقة أستمتع جداً بمشاهدة أي عرض مسرحي ..!
.
.
كرسي المسرح عندي يضاهي كرسي الملك ..بس حدث لبس عندي وحسبت نفسي في باريس مو في الرياض ههه
.
.
تهاني : أنا قلت مستحيل يكون إستاذ علي مايدري عن قوانين البلد وأنظمتها ودينها قبل كل شي
.
.
علي : أول شي وقبل كل شي لا تقولين أستاذ وما أستاذ خلينا نتكلم بشكل أبسط من كذا ..توافقين نكون أصدقاء ..
.
.
تهاني : أصدقاء..!
.
.
علي : تهاني أنا ولد عائلة معروفة وأعتقد تشوفين إسم عايلتنا على أكبر اللوحات التجارية وأكبر محلات في الرياض ..!
.
.
تهاني : إيه والنعم
.
.
علي : لذلك أنا إنسان أنجذبت لك من أول يوم شفتك فيه وليومك هذا ما أنسيت شنتطك والحق ينقال تغيرتي كثير ..وأنا أحب الإنسان المتطور المتجدد أحب التغيير ..
.
.
تهاني : تغيرت للأسوء أوللأفضل
.
.
علي : للأفضل طبعاً ..تهاني بسألك إنتِ مرتبطه بخطوبه ولا بزواج قريب ..؟
.
.
تهاني : لأ للحين ماتقدم لي المناسب ..
.
.
علي : طيب ممكن أتدخل شوي وأسألك عن سبب طلاقك
.
.
تهاني : لو كنت أعرف السبب كان علمتك فيه أشياء كثيره تصير في حياتنا مانعرف لها سبب مثلاً مكالمتك لي .!
.
.
علي : ههه مكالمتي لك أعتقد علمتك السبب في كلام قديم صار بيننا أنا معجب فيك ببساطه ..!
.
.
تهاني : طيب شكراً
.
.
علي : أجل أخليك باين عليك مشغولة ...إيه صح كنت بسألك بتطلعين ؟؟؟
.
.
تهاني : وين مو قلنا حنا مو في باريس ؟
.
.
علي : من حيث المبدأ أقصد ممكن تطلعين
.
.
تهاني : لأ طبعاً ممكن في داخل المركز أشوفك ولو عندك سواليف أو كلام ممكن يصير في مكان العمل
.
.
علي : بس هذاك مكان عمل ,,
.
.
تهاني : وأنت أخ علي تظل زميل عمل وأكن لك كل التقدير والإحترام ..
.
.
علي : طيب قبل أقفل ممكن أطلب منك طلب ؟
.
.
تهاني : تفضل ..
.
.
علي : ممكن تسوين لي أي نوع من أنواع الحلى ..؟
.
.
تهاني : عفواً ماسمعتك ايش؟؟
.
.
علي : الوالدة مسافرة باريس هي وخواتي وودي في حلى بيتي ممكن لو تكرمتي أذوق شي من يدينك ..
.
.
تهاني : طيب ..
.
.
علي : يعطيك العافية وأكرر أسفي وكل إعتذراي لو كنت أزعجتك أو تطفلت عليك يالله مع السلامه ..إيه صح ونسيت شي مهم لا تنسين تجيبين معك كيس فصفص باجه
.
.
تهاني : أنا من يوم ركبت التقويم خلاص بطلت فصفص ..
.
.
علي : أمزح أمزح ..بس شكلك تغيرتي من جد
.
.
تهاني : أخ علي أمي تناديني هالحين ..
.
.
علي : أوه آسف آسف مرة أخرى مع السلامه
.
.
تهاني :مع السلامه ..!
.
.
تهاني :يمه طيب طيب جايه هالحين
.
.
الأم : وينك يمه وش تسوين شكلك تكلمين إيمان أنا يا إيمان هذي شكلها ساحرتك ههه
.
.
تهاني : ومن لي غيرها تعرفين إن إيمان هي صديقة عمري وحياتي ..
.
.
الأم : تدرين إن مشاعل ولدت وجابت بنت ..وأتصلت عليهم أبزورها قالو لي راحت تتمشى مع بدر ..يقولون بدر ميت عليها ومن بلد لبلد ومآحد صار يشوفها كثير ..
.
.
تهاني : يمه الله يوفقها ..
.
.
الأم : بس البنت توها نفاس وهو مسافر بها برا السعودية ..ينتظرها لين تخلص ولا خلاص مافيه شي إسمه صبر كل الناس يتكلمون عن بدر ومشاعل مرتاحه البنت والراحه فوقها وتحتها وبدر مايدري وش يسوي بس يسعدها العيال وعندهم وهالحين جابت بنت وزوجها منهبل عليها ليتك تتزوجين واحد مثل بدر وتتوفقين مثلها
.
.
تهاني : يمه الله يوفقها ويزيدها من فضله قلت لك كم مره لا تقارنيني مع أحد لا تخليني أكره مشاعل يمه
.
.
الأم : وشو له تكرهينها ؟
.
.
تهاني : خلاص لاتزورونها البنت مسافره مع زوجها وعيالها ..وعلي خلاص يمه لاتجيبين لي طاريه لو تحبيني من صدق وتهتمين لأمري لاتجيبين لي سواليف أحد
.
.
الأم : طيب خلاص هذا جزاتي يوم أعلمك بأخبارعيال عمك ..يوم إنك تنافخين علي ..؟ .
.
تهاني : يمه لا يكون زعلتي ..آسفه يمه بس السواليف عن الناس والجماعه ماصارات تسليني مثل أول بالعكس تكدر خاطري ...مالي شغل بالناس يكفي إني إذا زرتهم يأشرون علي ويسموني المطلقه ..أنا عندي إسم إسمي تهاني ...وأخذت تهاني تبكي ..
.
.
الأم : بكيفهم يابنيتي لا تسوين بنفسك كذا ترى صدري يضيق لو شفتك تبكين الله يعافيك خلاص
.
.
تهاني : يمه ماأبيك تزعلين مني ..بس أنا كذا وتعرفيني ما أحب سواليف أحد تكفين يمه خلاص خليني بعيده عن عيال عمي...
تهاني : وش رآيك يمه نقوم نسوي العشاء أبرك لنا وأبرك لأبونا
.
.
الأم : صادقه ياتهاني يالله ضبطي البيض بس لا تحرقينه
.
.
تهاني : وبسوي حلى لصديقاتي بكره إن شاء الله عندنا إحتفال
.
.
الأم : الله يوفقكم يارب ويسخر لك ياتهاني ويفتح لك أوسع أبوابه
.
.
.
------------------------------------------------------------
يمه عساني ما نحرم منك يمه
شوفي لحزني والمواجع طريقة
ضميني لصدرك ثمانين ضمه
ضمة عشيق ٍ مايفارق عشيقه
وكانك سألتي خاطري ويش همه
بعلمك وأبي جواب الحقيقة
ليه الزمن اليوم مافيه ذمة ؟!!
وليه الطعون اللي بظهري عميقة ؟!!
وليه أنخدع في ناس كانت مهمة ؟!!
ويوم أكتشفها وهم ماله حقيقة ؟!!
وليه الذي وقت الرخا كان قمة
و وقت الشدايد مالقينا طريقة ؟!!
وليه الحسد يمي من عيون عمه ؟!!
وليه الخطا لو قلت كلمة رقيقة ؟!!
أزيد يمه ولا كافي مغمة ؟!!
أشوف عينك من هماها غريقة
يمه دخيلك آسفه آآه يمه
كني جرحتك وأنتي أغلا حبيبه