غدانا روعه اليوم تعالو شوفو بالصور

1. 1-نغسل العدس ونحطه بقدر ونعبي نص القدر تقريبا مويه...

كيفكم يافراشات
عملت على الغدا أكله روعه...
زي مانتو شايفين بالصور
ها عرفتو؟؟
هدا حراق اصباعو..(أكله سوريه)
روعه..بالذات للي يحبو ويعشقو ورق العنب...
بتسألو ليش؟ اش دخل هدا بهدا
لانه الاتنين فيهم حموضه تجنن
وطعم روعه ومميز...
وهدا شيش طاووق بطريقتي المميزه...
دحين انا خارجه.. وبرجع ان شاء الله بكتب المقادير اذا لقيت... حماس...
بس اصبرو لا تعصبو لاني والله خارجه...
رجعتلكم
مقادير حراق اصباعو:(تكفي ل2-3اشخاص)
1بصله مفرومه ناعم
1 بصله مفرومه انصاف ناعم
2حبه توم ايوه 12 لا تستغربو... اعملوه بالزبط...
باقة كزبره مفرومه ناعم..
ربع كاسة زيت زيتون
كاسة عدس بني
كاسة ليمون
مقادير العجينه :
كاسة دقيق
شويه ملح
ملعقة زيت
ماء للعجن
(تعجن المقادير وبعد ماترتاح ربع ساعه..افرديها بسطح مرشوش دقيق فرد رقيق وبعدين قطعيها مربعات صغيره وغطيها بقماش لين يجي وقت استخدامها)
الطريقه: ركزو معايا

1-نغسل العدس ونحطه بقدر ونعبي نص القدر تقريبا مويه...

ونتركه يغلي على نار عاليه.. وبعدين نوطي النار ونغطيه تقريبا ربع او تلت ساعه لين يستوي العدس تمام..
2- نجيب مقلى ونحط فيها زيت زيتون.. ونحط فوقه البصل (لازم الزيت يكون كتير يعني ربع كاسه تقريبا.. كونو كريمين بالزيت وبس يبدا شوي يحمر حطي تلات ارباع كمية التوم اللي مدقوق ناعم..وقلبي لين يحمرو ما ينحرقو
وعلى طول حطيه فوق قدر العدس... وحركي..
بس اهم شي العدس مستوي..
بعد كده ضيفي كاسة الليمون وحركي..
تمام..
وملح..
ودوقي انتي ملحه وحمضه على حسب ماتحبي..
بس اصل الاكله هادي حامضه زي ورق العنب..
بعد كده جيبي تلات ارباع كمية مربعات العجينه اللي عندك..
وضيفي شويه شويه على القدر مع التحريك ...وطي النار بالمره..وغطيه ماياخد وقت 7 دقايق بالكتير انتي شوفي استواء العجينه...
طفي النار ..
وتعالي معايا..
جيبي مقلاه وحطي شوي زيت زيتون..
( مو مره شويه) يعني ابو 3 ملاعق
وحطي معاهم الكزبره المفرومه ناعم..والتوم اللي باقي..
واقليهم على النار... لين تطلع ريحتهم
وبعدها ضيفي ربع الكميه على القدر المنطفي ناره وحركي..
وغطيه تاني..رح تطلع الاكله تقيله يعني مو زي الشربه.. ولا زي الرز..يعني متماسكه تقريبا.. زي السليق يارب تفهمو علي ههه
طبعا باقي من عجينتنا كميه بسيطه صح؟؟
هادي ياحلوين تقلوها زي العيش حق الفتوش.رح تتنفش زي البف..
والبصل الانصاف برضه اقليه..
ووقت التقديم..رح تحطي العدس بعدين تزينيه بالكزبره المقليه بالتوم والعجينه المقليه والبصل..
وربنا يشهد الطعم جنان..
ورح تدعولي
واذا اتكاسلتي ممكن بدل ماتعملي العجينه ممكن تجيبي مكرونه اللي زي الورود او اي شكل تبغيه وتحطيها بدل العجينه..
واقلي عيش وزيني
بس طريقتي هيا الاصليه وطعمها رائع..
بالنسبه لشيش الطاوق الرائع..
المقادير:
صدور دجاج مربعات..
ملعقه صويا صوص
ملعقتين مايونيز
ملعقتين كاتشب
شويه بهارات اجينو موتو (مادري كده اسمو )
تومه..
ليمونه..
شويه مستردا(خردل)
وبشر ليمون(القشر الاصفر)
(كمون-كزبره ناشفه-فلفل اسود-ملح)
شويه زيت زيتون
خل شويه..
جزر دوائر-فلفل رومي مكعبات
كلهم انقعيهم من الليل.. حتى الخضار..
عشان الطعم يجن يطلع..
وبس ووقت الغدا غسلي اسياخ الخشب وحطيهم بالترتيب..
وعلى الشوايه الكهربا ماتاخد وقت بالكتير 10 دقايق
واذا على الفرن شوفيها لين تستوي ..
وبس ودعواتكم ربنا يوفقني انا وزوجي وبنوتتي الصغيره..
وادعولي اتوظف بليز
وربنا يطول بعمر ماما(اللي علمتني الطريقه)
ويخليلي بابا الحنون وما يحرمني منهم...
قولو امين
يارب
يالله بستنى الردود