قصة الحب اللي بيني وبين الياباني كامينوموتو

1. (هو منه 3 انواع الاول مانع للتساقط والثاني مسرع للنمو والثالث شامبو)

السلام عليكم ورحمة الله وبركاته
كيف حال الفراشات الحلوين وكيفكم مع الإمتحانات <<< الله يوفق الجميع
المهم بما إني خلصت إختباراتي وفضيت قلت لازم أقول للبنات تجربتي مع المنتج الياباني كامينوموتو ..
أنا من الناس اللي ما أحب الخلطات والخرابيط يعني أحب اني أشتري الشئ وأستخدمه دوغري
وأنا طبيعة شعري مره كثيف <<< هذا أيام زمان
بس مرت على شعري فترة جفاف وتصحر من الصبغات وانعدم ..
المهم اني قررت اهتم فيه شوي ووانا اتصفح احد النتمديات قرأت عن هذا المنتج وشفت صورته وعاد أنا حبيته من أول نظره
وقررت اني اشتريه وفعلا اشتريته وجربته

(هو منه 3 انواع الاول مانع للتساقط والثاني مسرع للنمو والثالث شامبو)

المهم انا استعملت اول شي المكثف (مانع التساقط) ولا حظت صراحه قل التساقط كثير ..
لكن المفاجأة كانت لما استعملت مسرع النمو وطلع فعلا اسم على مسمى ووالله يا بنات انا شعري له حد ما يطول بعده يعني يوقف عند طول معين .. بس بعد ما استعملت كامينوموتو صار يمشي مشي ماشاء الله بس انا قصيته عشان التقصف وإلى الأن أنا استخدمه وراضيه عنه تماما لعدة أسباب:
1- المفعول العجيب اللي شفته في الطول
2- ريحته ريحة عطر يعني مو خايسه يعني احطه واخرج من البيت عادي
3- هو زي المحلول يعني مو دهني وما أتقيد متى أغسل شعري.
4- علبته كبيره والسعر حلال فيه يعني يستمر عندك شهر تقريبا.
هو سعره المسرع للنمو 80 ريال والمكثف 60 ريال وبما اني من مكه ما ألقاه غير عند صيدلية المتحده ..
طريقة الإستعمال:
تحطين شوي بأطراف أصابعك وتفركين فروة الرأس (ركزو على كلمة فروة) يعني لا يوصل لشعرك لأنه ينشفه ..وتسوين مساج يعني تفركين الفروة بس بشويش
انا أحطه في علبة محلول العدسات عشان أقدر أوصله للفروة بسهولة لأن باطراف الأصابع يتبخر لين يوصل الفروة يعني ما استفدت شي ..
يستخدم مرتين في اليوم وتزيدين الكميه شوي في الليل ..
وبعد شهر او اقل شوفي شعرك لوين حيوصل
أنا عندي صورته بس ماني عارفه أنزلها ..
ارجو ما اكون طولت عليكم وأي استفسار أنا حاضره ...
دعواتكم