قصة واقعية في التوكل على الله

1. اول موقف صار لي ..

السلام عليكم
كيف حالكم يا فراشات قرات في احدى المنتديات قصة واقعيه ترويها صاحبة القصة عن التوكل استفدت منها كثير وحبيت كمان انتم تستفيدوا لاني احبكم في الله
السلام عليكم ورحمة الله وبركاته ...
اشحالكم واخباركم .؟؟
قبل لا اكتب هالقصة اترددت وايد وقلت ماراح اكتبها ولكن قلت ليش ؟؟
خل الكل يحب الله مثل ما انا احبه ويتوكل عليه مثل ما انا توكلت عليه ...
الله يسلمكم ...
انا قبل صح كنت اقول انيه متوكله على الله لكن والله ما كنت اقولها من القلب .. كنت وايد
اخاف ان الشي اللي توكلت فيه على ربي ما يصير .. لكن بعدها ب سنتين حياتي انجلبت فوق تحت صرت احب الله وا ايد واتوكل عليه وايد
بدت قصة توكلي بعد ما شفت محاضرة الدكتور عبد المحسن الأحمد واللي كانت تتكلم عن التوكل على الله ... هي ست دقايق لكنها كانت بالنسبة لي ست سنين من حقيقة الفايده اللي ظهرت منهاا

اول موقف صار لي ..

رسبت مرتين في مساق من المساقات وبقتلي اخر محاولة وبعدها الجامعة اتوقفني سنة كامله ... صح اولها قلت ليش وليش ...ما دريت الا اني اقول لنفسي يابنت ترا هالرسوب فادج وكملي باصرار وبقوة ... ولي املج بالله كبير وخذت المحاولة الاخيرة وانا كنت متوكلة على الله هالمره بصدق ...
والله وما اجذب عليكم حسيت اني مستمتعه بالمسااق وكأني اول مره اخذه ... وبعدها يا امتحان الميد تيرم ... ودرست وكنت اناجي ربي وكلمه ... ويوم ظهرن النتايج كنت اعلى درجة في كلاسين من الكلاسات اللي المس ادرسهن وهي وايد استانست ... وبعدها
كنت ابا امتحن امتحان ايخليني اخذ هالمساق بسرعه لكن الله ما كتب ما زعلت قلت يمكن الله بيكرمني بدرجة حلووة وبالنجاح .. ويا امتحان الفاينل .. ولله الحمد نجحت بدرجة ما توقعتها وكله بفضل منو بفضل ربي حبيبي ...
ثاني موقف صار لي ...
صح السمعه طيبه لكن لازم في شي يشينها ... في ناس كلمو امي وقالولها نبغي نخطب وحده من بناتكم ...
صحيح كلنا حلوات لكن دوم ايقوولوون لي اني اقل جمالا من خواتي الثانيات .. وانا اقول ربي ما خلق حد مش حلو ...
وبعد ما شاافوونا اختارووني اناا ... فالناس قالت لانج اني جامعيه وانا قلت لا لان الله يبيهم لي ويبيني لهم ...والعلم موو كل شي ... ويا وقت السؤال .. وهنيه انا مت من الروعه وقلت لو دروا عنه ما راح يرضوون فيني ... لكن ما يأست قمت بالليل وكلمت اللي عيونه ما تنام وقلت يارب مسألتي عندك وانت اللي تدري فقدر اللي بيكون خير لي ...
والله يا خوات ويا خوان يومين والا هم متصلين ويقولون هذا شي عادي المهم عندنا البنت ..
وصارت امور الخطوبه ان الرجاجيل جو وتفقوا على المهر وغير وغيره وكل مره ايصير موقف
ما اكلم حد غير ربي وثاني يوم ربي يريحني ... وشوفوا للحين ما صارت الملجه وانا كنت اقول لامي يمكن الناس غيروا راايهم فيني ... وبعدها حسيت امي وخواتي ما يعطوني حل ولا كلام منطقي ... رحت ودعيت ربي وناجيته وقلت يارب طمني ... وبالفعل والله على ما اقول شهيد اول ما جيت من الصالون الا ان اختي اتقول يا فلانه ترا بكرة عمتك جايه يبغون يحددون موعد للملجة ..
ملخص قصتي ...
حبواا الله وكلموه ولا تلجأوون الا اله هو ... والله الناس ما همها غير انها تسمع لكن الحل ربك يدبره ... خله هو مصلحك الاجتماعي بقول لكم حكمة تعلمتها من استاذي (( تدبيري تدميري .. وتدبيرك تعميري ))
انا قبل لا يجون هالناس مريت بضروف محد يعرف فيها غير الله ... لكن كنت اقول لكل شي حكمة ... وبالفعل ربكم كريم
والله والله والله يشهد على قولي ... من عرفت ربي ما خسرت شي ولا زعلت على شي لاني اعرف ان الله ما يبغالي الا الخير
حبووا الله لان الله يحبنا ... وادعولي ان الله يسر اموري للاخر
ما عرفت كيف اووصل حبي لله لكن اتمنى ان رسالتي وصلت بما فيها ...
وعد وعدته اني اخبر الكل عن حقيقة توكل ... وها قد ابلغتها فانتفعوا بها
قصة توكل عشتها وسأعيشهاا
اختكم في الله
:: ن ف ا ف ه ::