قصه حب بعد الفرقى

اللي طلب فرقاي يبشر بفرقاي
يبشر مدام انه طلبني فراقي
بصبر على همي وجرحي وبلواي
وان شفت قلبي مال قصيت ساقي
لا عاد ترجاني ولا تطلب رضاي
ماظنتي بعد الفراق التلاقي
أول معك ببني حياتي ودنياي
في ذمتي يابنت ماهو نفاقي
وأعاهدك على الوفاء طول محياي
بالعين اشيلك وافرش الرمش واقي
جيتك بحب ومندفع لك من اقصاي
بهديك عمري دامني معك باقي
جيتك صدوق وفرحتي تسبق خطاي
كنت الأمل في دنيتي واشتياقي
عز الله اني جيت لك صدق شراي
وارخصت لاجلك كل من كان راقي
واليوم ماينفعك كثر الترجاي
جرحتني جرح ٍ كبير الفتاقي
مسموح واتحمل جروحي بممشاي
يغفر لك الله في نهار التلاقي
صحيح صعب انساك لو كنت نساي
لكنه اسهل من عقود اتفاقي
خليتني قصه مع الرايح الجاي
قصة غرام انهيتها باحتراقي
عهد ٍ علي مانظر لغيرك بدنياي
وعهد ٍ عليك تفكني من وثاقي
وعهد ٍ علي لحفظ كلامك ورجواي
تحفظ كلامي كان لا زال باقي
ونعيش قصة حب من بعد فرقاي
ياطالب ٍ فرقاي قبل التلاقي