قوصتي يومنني رسبت ترى مسويتها هامني

سلام علاكم
يمسيهم بالنهار والقوايل <<=
كيفكون ؟ أخباركون؟<<= نعنبوا شيطانتس اهجدي على لهجه
المهم ندخل دوغري<<<وش عنده ديانا حداد
مولاحظه التزموا به قبل ماتبدون..
1/تحملوا المصاله الزايده
2/اشربوا سطل ماء وعادي لو يكون لبن والا زبادي..
3/ اللي موب فاضي بليز لايقراء علشان مايصير رده ماصل <<
4/ لا تحكمون على القوصه من اولها كملوها كلها همن احكموا ترا اولها ماصل بجد..
ون** تو** ثري** اكشن**
القوصه ومابها انني في ليلة من الليالي المظلمه<<= ترى فيه ليالي منوره عادي
المهم إنني جيت بروح انام الساعه الثالثه فجرا بتوقيت مكه المكرمه يوم جيت انام عجزت ماادري ليه..
قعدت أفكر ليه يوم فكرت اكتشفت اني تنكه ولاهوب اكتشافن جديد الا وبلا داريتن من ولدتني امي.. :
a072:
قلت يابنت الأجاويد انزلي تحت خلينا نفرفر بالتيفي لين يفرجها ربتس..عاد بذا الحاله يقالي اخدع
شيطاني علشان يجين النوم..
وانا قاعدتن اتمقل بالقنوات إلا وأختي ماشيتن 120 وما أسمع الا صوت العداد ..تن تن تن ..وانا اقضبها
وأقول بسم الله ماعندتس نعومه تنزلين بشويش,,<<= من يحتسي عن النعومه
المهم واثاريها تفتح خشتها وتقول ياوخيتي تخرجتي مبروك ونسبتس(*****) ... عاد انا صقعت
بسقف بيتنا من الفرحه بس مخفف الصقعه علشان مايصير احتمالات وقوع السقف علينا
تعرفون بيتنا جديد الا درجه اني اذكر ابوي عازمن هتلر عندنا . .
الوكاد اني قعدت اناقز من الفرحه واشوى الاصابات بس على بلاطتن من بلاط الدور الثاني والى يومكم
وهي تطقطق مالقت احد يسنعه..
يوم اذن الفجر وانا فرحتن بنسبتي واصك بوجه ابوي واقول يابه نجحت قال وانا ماأصبح إلا
خشتس ,,كم بس؟ قلت (**,**) من زين خشتس فرحه يعني جيد جدا قلت ايه بس مابقي شي واصير
ممتاز..
قال وش ذا الجامعه اللي بتضفتس قلت اشوا من غيري.. بذا الوقت انهز كياني << احلى يالكيان.
المهم كان طموحي حاسب آلي بحكم خبرتي وهندستي بكمبوترات قصرنا عفوا احح كوخنا..
المهم قلت خلينا بس انام وماهموني بالتجريح عاد قلت لحد يقومن لو انام سنه ويفوتن
التسجيل..
قال ابوي نومة اهل الكهف . . ابوي وتسبديه محتر من النسبه,, المهم نمت ونمت ونمت وبعد نمت الى ما أذن المغرب
طبعاً أقوم شويات للصلاة والا اشرب مويه مير اني اقول لبيي ورى ماتركب براده عند سريري
بس مدري ليه رافض شكل المويه غلا سعره بعد... <<نعنبوا القعاطه والبخل.
جت الساعه 6 قلت ياخيشة النوم نعنبوا دارتس قومي يكفي سهاد جدي اللي نام ولا قام,, عاد انا
لازم اخذ تمارين احماء في السرير **وتبدي اللغه الفصحى عندي **
فمططت كراعيني لين طاحت يدي اليسار من فوق السطح ويدي اليمين وصلت بيت الجيران كمخت
ولدهم ورجعت لي <<< ما اعرف اتسذب ابد
و بعد التمغط و التمطط اخيرن قمت ..<< مبرروك ياحاقه..
وانا الي القط فراشي ومخدتي وانطلهن بغرفه بالسطح اقرب لي اذا بغيت اخمد بالليل . .. والا اذا جيت
اخذ لابتوبتي المصونه والقط من دي اس الجيران <<=يحول كن ماعندهم دي اس ال..
رحت للدرج و تزحلق على دربزين حقه لين وصلت تحت << هذا الاصنصير حقنا تعرفون بيتنا حركتات اصنصيرات وذا اللي مدري وشو..
ومن زود الخراشه وانا اتزلحق ما امداني اسحب فرامل فإذا بسياقني اللي تسنها سيقان سلوى
وتميل شوي لسيقان سندريلا وعليها ملامح من سيقان سالي تطيْر االسفره اللي عند الدرج
وتنكب الشكشوكه الي كنت ناويه افطرها .. .و تجي امي شايشه ترى موب اسمها شايشه لا هي
اسمها نوره. .والله و تجيب معها لي المكنسه اللي كانت تكنس فيها قشام الفصفص اللي عقبنا البارح
حتى احيانا خواتي والشغالات يتكافخون به <<ترا ماتقول اسرار منزلهم ابد. جسمي صار فيها وشم
من كثر اللسب و التقبص .. الاسبوع اللي فات قبصتني يوم شقيت ثوبه و سويته ستاره لغرفتي..و
الشهر اللي قبله كوتني بالمكوى يوم احرقت برقعه<<اجل برقع. ..
و العام لسبتني يوم احرقت المطبخ يوم اني بسوي تجربه بالبنزين و النار علمني عنها ولد جيرانا.. وانا
اقول يماما توبه واللهي توبه. .
وأنا أراد وأقول:طيب يمه اقبصيني مع بطني يقولون وناصه <<<< تحاول تلعب عليها بس ماش ما
فاد ....وبعدين وشو من امره يوم تحطينها فيذا الابله تقول يجب ان تضعي الصفره على المنضده <<<
اتحداكم تقولنها 10 مرات
و يوم فكتني امي عقب طقاق و طقيق رحت ركض للشارع و طبيت بمستنقع قدام بيتنا الا يوم طلع مني
صوت قال وش ...حسيت ببراد بررد على قلبي قصدي على رجيلاتي
والتفت يمين الا القى وايت شفط قدام جيرانا ابو سعد اثر بالوعتهم منفجره و الما يطرق بالشارع يعني
انا قاعده دحينه في مستنقع لمياه المجاري عاشوا عاشوا <<< العب على عمري وش اسوي لازم
اسوي ان الوضع طبيعي و يعنني ما اعاف شي
عاطي قمت ولا كانه صار شي و رحت دخلت البيت بروح افطر ما بعد كلت اسمع معدتي تبتسي. .. قال
مابوه الا خبزه بفول سوداني والا جبنه مالحه حقت الثيران الثلاث..
( على طاري معدتي تراها توها جديده ما كملت سنه بلاي العام شاربه كلوركس مخلط مع صمغ موكيت
وخيش مطحون هالخلطه قايلتها لي بنت جيرانا تقول انها تقوي العضلات عشان ما تقدر
اميمتي تلسبني عاد اناا مخفه قمت صدقتها و ماتت معدتي الله يرحمها ( الفاتحه على روح المرحومه ) << تراها ماتتباع مصلصلات مصريه
الوكاد انهم نافخين لي كيس بتاتيس ليز << حق البقالات وثبتوه بصمغ ابو دقيقه وهذاني للحين عايشه
مولاحظه مهمتن جدن جدن: ترا اسمي موب عايشه اسمي**مزنه**..
وعقب ذلك,,دخلت على امي و اصبخ بالباب يقالي زعله ويوم صبخت به طاحت العروه, بس الحمد
لله المفتاح سليم >>حتى اذا سويت فيها ما انفع ..
دخلت عليها والقاها منفرشه على افروات ابوي تتابع مسلسل جواهر اللي بالباديه. <<تراه بالصيف
بس مع زود البهارات والارانب بوه فروات
. قلت حرام اخرب عليها المسلسل منيب مناديته <<<<< حنوونه الله يحفظني ويخليني لغير اللي
يلسبني..
وانا اروح لطبلون الكهرب بفصله عشان تسمعني غصب والا منيب نجسه لذا الدرجه . . والا فيني بقايا
من موية الشارع اللي طبيت به و يوم فتحت باب الطبلون اول شي طار شعري و قمت اتنافض تسني
بلعبة الخضاضه وانا مدري وش السالفه
على بالي يلعب معي.. واثريه نعنبوه التماس وكل ذا هو ينفضني...
و طلع ريح الحسحسه من شويشتي و انتشرت الدخاخين وجت اميمتي موب حبن بي لا علشان
المصلصل ..يوم ناقرتن قلت : ابد يمه بس كنت بزيد من سرعة الكهرب عشان يجيبون لتس حلقة بوكره << فديت اللي يعرفون يصرفون..
قالت يا حبيلتس بس يالشهبا اللهبا بس لو انتس زينه و مملوحه و تعرفين السنع و الحتسي الزين و
تعرفين تطبخين و تلبسين مثل بنات خلق الله تسان انتي ازين وحده <<<< تكلفت
قلت خلاص يمه وعد مني اني اصير اقدع بنت قالت امي ايه يصير خير والله ان تبطين انتي
بس ادخلي الجامعه <<<< تعجبني محد فاهمني الا هي
المهم راحت بعد هوشات عقب فتح سيره الجامعه نعنبوا ابليس اللي اسسها...
واجي واتربع تربيعتن كنه تربيعة الأميرة النائمه يومنه نايمه ويبوسها حبيبها علشان تصحى << ترى
ماحفظت الحلقه ابدن
يومني ابلع تسني شبعت وقصم استغربت اني شبعت ولا احد هاوشن الا وانا انظل روحي الا ويجي
ابوي شايشن علي يقول هاه ماسجلتي قلت يابيي موب وقت الدراسه الحين توهم
ماوصلوا نسبتي ..
إلا يوم تجين ذاك اللسبه مع ظهيري والله من شد ما انا متعوده احسبه يهمزن.. . وابوي يناظرني بربع عين *قال تطسين باتسر تسجلين *المهم انهم يامال الدقم والصرعه اللي تصرع عميدات جميع جامعاتنا,,
نسبتي ماتأهل حاسب قلت ماعليشي ندخل عنقريزي. الا يوم قالوا انتي لو انتس أدبي تعالي تميلحي وادخلي عنقريزي.. أنا بذا الوقت صرت ما أنام الا ودموعي على خديداتي الورديه اللي تسنها خديدات هايدي
يومنها خلف الجبل مع صديقها بيتر. . الوكاد اني رحت يوم من الايام وسجلوني غصب فيزياء مادروا اني ماأنجح الا بالعقال ويالله ينفع..
قلت يابنت الحلال توكلي على الله بس .. المهم يوم بدت المطارس..وانا أسدح ذاك الحلف على ابيي كالعاده قصم قصمات وربي اللي خلق هالكون ما اداوم لين نص الرمضان؟!!! <<وش عنده ابو شهاب
يوم جاء نص الرمضان وانا اداوم يوم وذا اليوم فتح اشياء واجده في دنيتي انقلبت من فتاة عربجيه الا فتاة رومنصيه <<ياعيني ع الرومنصيه بص
السبب في تحولي هو اني الهواء ضدي <<الا ورى ما تاخذونها بدل بدر السبيعي بالمليون..
تخيلوا اقول ابي ذا يقولون نسبتس ماتأهل وصديقاتي اللي اقل مني نسبه حققوا احلامهم.. تخيلوا غير اني صرت رومنصيه ,, صرت شاعره,, قللت ذاك اليوم من همي الدفين في صدري ذا الشطر:
االتميمي من طيب راسه وطيبه ...به ميزة عدّت حدود المروات..لاثارت الفزعات لا تنتخي به لأنه يثورمن الطنا دون فزعات <<عاد ترى مالطشته من موقع بني تميم .<<وترى منيب تميميه بس مدري وش غافصن بهم
يوم جيت من ذاك الدوام التعيس نمت نومه حتى حسيت اني مت ,, يوم قمت جت امي قال الاخبار قلت
مابي واء مابي مابي اهئئئئئئئئئئئئئئئئئئئئئئئئ <<ترى ذا صياح كوكتيل صراخ
قالت وجع يوجعتس وراه قلتت مابي مابي اهئ اهئ المهم حلفت ورب البيت اني ما اداووم
باتسر وقعدت اسبوع على هالحاله يوم جاء السبت المقبل يعني للي بعدوو رحت وحولت الى ماده
احس من دخلته اني حمااره انا من حيني داريه اني حماره بس تأكدت الحين المهم يقولون انها سهله
وانا لو يجيبون لي الله رب الخلقي حقت اول ابتدائي قلت صعبه,,
الوكاد ان ربي هدان ودرست وجت الامتحانات الشهريه عاد انا يقالي شادتن حيلي يوم عطونا الدرجات
واثاري وحده منهن نص من 20 والثاني صفر والثالثه ربع والرابعه اربعه والخامسه اثنين واحلى درجه
مسويه فيها دافوره اخذت ثمانيه ونص لا وكاشختن به معلمتن شجرة العائله كله. . المهم قلت ماعليش نشد بالنهائي طبعا ذا حتسي بحتسي...
وتجي الامتحانات وادرس وادرس وادرس وبعد ادرس وادرس يوم جاء اول يوم امتاحان وتجيني النفاضه
هي نفس النفضه حقت عدا الكهرب يومنه ينفضن بس ذي مطوله..
وادخل القاعه واشوف الورقه واثروه كله عنقريزي يعني لو اني دارستن عنقريزي اصرف لي. .,,,<<بس هم نعنبوهم لازم يحطمونن
المهم وانا اكتب اسمي رباعي من زود الثقه واقلب الورقه واخمد ع الطاوله تخبرون لي اسبوع اذاكر ولا نمت. .<<لازم تاخذ حقه بالنومه,,
يوم جاء نص الوقت وانا اسلمه فاضيه. .<<ترى مسويه ولا همني وتمشي الايام وامتحان ورى امتحان ومذاكره ورى مذاكره ..
المهم كملنا الامتحانات بسلام يوم جت النتايج واكتشف اني راسبه في جميع المواد يامال الدقم..
عاد يجي بوز ابوي لو احلف ان طريق الرياض - القصيم اقصر من بوزه, ,والعائله الملصونه تتنتز علي .. عاد انا موب مسويه ماهمني الا والله ماهمني ..
مشكلتي ان عندي مشاكل في الحياة::
اولها.. ما اعرف اختم القوصه يعني جيبوا خاتمه من دماغكم تسذا وفكون..
ثانيها محد فاهمني..ولا احد يقدر شعوري >>بدت الرومنصيه
ثالثها ما اقدر احقق احلامي
رابعها حيويه في الواقع جدا جدا جدا
خامسها وايضا في الواقع خوافه جدا جدا تحاول تحقق اماني والديها لكن دون جدوى <<جتها حالة الدموع..
سادسها ان الهواء ضدي وحظي ردي ويكسر الصخر من رداوته,,
وبس.. توته توته خلصت الحتوته،،
عاد مايستفاد من الحتوته،،يعني الزبده لغير المتكلمين بالغه العبريه/
1/ مصير البنت بيت رجلها يعني بلا دلع ومصاخه..
2/الشعب السعودي شعب فاشل السبب ما لقي احد يهتم فيه و ينمي مواهبه <<وش عنده ياحظي من مواهب
3/ ترى الرسوب موب نهاية الدنيا يعني اذا اختك والا بنتك رسبت لا تقعد تلسب بظهرها لين يصير كنه زبيريتن من عهد فله والاقزام السبعه <<ادري ماله دخل فله بس مشي الحال..
4/اذا بتدرس لاتاخذ راي احد رايك انفع لك واختر القسم اللي يجوز لك والا ترى بتقوم القيامه وتفضل انك تنتحر افضل لك ،<<عاد يازين شكلك انت واخشتك وانت منتحر
5/ حاول الاكثار من البصل لانه يقولون يقوي الذاكره وكثروا بعد من الجزر لأنه يقولون بعد يقوي النظر <<ترى ذي بعد ماله دخل بس بدى مفعول البن..
6/ لاتضيق صدرك اذا ماصار لك نصيب من الزياده 5% ترى ماصار الا الخير وحظ اوفر بالمره القادمه.. <<<وذي بعد ماله دخل بس قولوا يالله
7/ أن المصاله كنز لايفنى <<رحم الله امريء عرف قدر نفسه ,
8/* لو تجري جري الوحوش غير ويندوز ما تحوش <<ذي اس بعد داخله عرض
واخيرا وليس اخرا
مع السلامه والى اللقاء والوداع .<<تسمع بالخاتمه,,
واذا الموضوع زياد فيه نسبة المصاله قرشعوه حلالكم يابعديناتي..