كرات البطاطس بالخضار والقشطه واو بالصور

بنات شخباركوم
اليومين هذي نفسي مفتوحه للطبخ <<<<< عساها تدوم بس
اول امس رحت الروشان مول وكانو عاملين بازار عائلي
وماصات عارضين فيها شنط ماركات
وجلابيات مصريه
وخزعبلات وتعليقات بلاك بيري
والي شدني ماصات الاكل <<<<< همك على بطنك خ
لا والله بس كان الشكل يفتح النفس الصخانات فيها مالذ وطاب
اشتريت دجاج مكسيكي وتبوله وعيش ابو اللحم وكرات البطاطس وهذا موضوعنا <<< اخيرا
كان شكلها شهي بس كانت مسويه الخلطه بصل ودجاج وذره وفلفل بارد طبعا ماكان عندي دجاج
وماعندي صبر كمان فسويتها بالخضار ممكن تشيلو الخضار وتحطو قطع صدور دجاج
المقادير 4 حبات بطاطس مسلوقه
كيس خضار مشكل
2علبه قشطه
حبه بصل
حبه فلفل بارد
ملح وفلفل والبهارات الي تحبيها
و2 مربع كيري وملعقه زبده ونص كاسه حليب هذا للبطاطس
الطريقه
نسلق البطاطس ونقشرها وتبرد شويه ونحط عليها الجبن والزبده والحليب وملح وفلفل ونهرسها
نقطع بصله جوانح ونحطها على النار شويه تصفر ونظيف لها كيس الخضار والفلفل المقطع
نقلب ولو احتاج الامر شويه مويه اقل من ربع كاسه لان الخضار المكيس يكون فيه ثلج ونفس الخضره ذايبه
ونغطيها شويه ولما نحس ان الخضار استوى نحط علبتين القشطه ونقلبهم شويه ونطفي النار وطبعا ماننسى نملحهم ونتبلهم قبل القشطه
نجيب صينيه فرن ونحط فيها ثلاث ارباع خليط الخضار ونشكل البطاطس المهروسه على شكل كرات ونحطهم على الخليط
بعدها نحط الربع الاخير من الخليط وتكون فوق كور البطاطس وندخلها الفرن بس نشغل الشوايه من فوق عشان الوجه يتحمر لان كله مستوي
وهذا الشكل النهائي والف عافيه وصحه على قلوبكم