كنت دبة بس نحفت

1. أكل الرجيم نفس أكل البيت بس حطي ببالك 2

أنا دوري كأي امرأة جربت السمنة و حاربتها لسنة كاملة اني اعطيكم خلاصة تجربتي ...بس بالله استفيدوا و طبقوا ...اذا مليتي بعد شهر ووقفتي بكيفك ...راح تظلين دبة طول عمرك
و راح تظلين طول عمرك تبكين على الأطلال و تقولين لو اني بديت العام الماضي كان هالسنة انا رشيقة
و راح تكرهين نفسك أكثر و أكثر
)-:
الأكلات الدسمة ماراح تنقرض ... و ماراح تسمنك لو أخذتي منها 5 ملاعق بس و كملتي الباقي سلطة و زبادي
و الحلويات ما راح تضرك لو أخذتي قطعة صغيرة بس و الباقي تمر أو رطب
ورجولك ما راح تتكسر لو سويتي رياضة يومياً ...بس اح تتكسر و يصيبها النقرس بكل سهولة لو وصلتي ال40 سنة و انتي سمينة و كأنك جدة مو بس أم !!!
حالة محزنة صح ؟؟
طيب اشتغلي على نفسك ...خلي مشروعك من الآن الى رمضان الجاي الله يحيينا ( صحتي +رشاقتي و بس )
تثقفي بهالمجال ...اشتري كتب صحية و انصحكم بكتاب كارلا حبيب (أسرار التغذية) عند مكتبة جرير ) مفيد جداً
جداً جداً
لا تخدعون بخزعلات المنتديات (خلطة مدري ايش للتنحيف و الخل الفلاني لشد الشحوم !!! )
الشحوم مو بالمعدة عشان تحرقينها بخلطات حارة راح تصيبك بالقرحة و سرطان المعدة بعد كم سنة
و الشحوم مو على الجلد عشان تدهنينها بخل عشان تذوب !
و الله لو انها ثلج !!
الشحوم تحت الجلد بطبقات يعني ما راح تحس الا اذا صبيتي ماء نار فرضاً !!
بعيد الشر عن الجميع
يعني خليك ذكية و احرقي الشحوم بالأشياء اللي سببتها لك ..
ايش هي ؟؟
الأكل الدسم و الحلويات و كل الأكل الغير صحي لو اخذتيه يشكل يومي
و كثرة الجلوس
و بس
!
الشحوم تنحرق بالحركة ...
الرياضة لمدة ساعة يومياً لحد ما تعرقين و ينهد حيلك
اقرأي عن فوائد الرياضة بقوقل لجسمك و قلبك و شبابك و حتى نفسيتك و بشرتك
و الله اني احبكم في الله و عشان كذا نصحتكم من مبدأ المسلم يحب لأخيه ما يحب لنفسه ...
و انا مالي ؟ نحفت و خلصت ووصلت وزني المثالي (55) من 4 سنين ...
شدوا حيلكم و لا يضيع وقتكم و انتم جالسيين بالمنتديات ...
الرشاقة تبي حركة كثيرة باليوم يعني حتى لو سويتي رياضة و مشيتي ساعة و نصف لا تجلسين طول اليوم مقابلة النت !!
و على بالك انك خلاص انهيتي الواجب و سويتي احسن رياضة !!
لأ حبي ..
شدي على حالك
تبين نتيجة واضحة على جسمك ...لا يهمك الميزان ...و لا تفكرين فيه
اتركيه بعد اسبوعين من بدايتك النظام و اكرفي رجولك كرف بالمشي و الرياضة و الهرولة و كل شي تقدرين عليه
و انتي جالسة قدام التلفزيون سوي تمارين ليدينك بالأثقال ( ترا كلنا لنا زنود و ما نحب شكلها ..و حلها الوحيد هو تمارين الأثقال الخفيفة -من 5 الى 6 كيلو )
رجاءً لا أحد يقول تطلع عضلات ...ترا هذي خرافة ,,,راح يطلع لك عضلات لو أخذتي حبوب هرمونات معينه زي التستروجين -هرمونات ذكرية يستعملونها السيدات الرياضيات اللي بمجال كمال الأجسام و السباحة و الجمباز ....الخ )
و انتي بالمطبخ سوي تمارين لخصرك ...و انتي منسدحة و متسطحة ع السرير سوي تمارين لجنوبك و سيقانك
التمارين هذي كلها بقوقل ...ابحثي و يا مالك من الصور و مقاطع الفيديو
الأكل لا تشيلين همه ...أكل الرجيم مو شي خيالي نازل من السماء مكتوب عليه طبعة باللون الأحمر - لأهل الرجيم فقط !!

أكل الرجيم نفس أكل البيت بس حطي ببالك 2

• النوعية (أكل صحي ) مو مقلي و دسم و يكون حبوب كاملة زي خبز البر فواكة سلطات زبادي الخ
• الكمية ( خفيف ) ما يصيبك بالتخمة و يملا بطنك ...لازم تقومين و انتي خفيفة نصيحة رسولنا الكريم (و ثلث لنفسه )

كذا مره اقرأ بكتب التغذية ان أي طريق للرشاقة لازم يمر من خلال الأكل الصحي
يعني خليك صديقة للفواكة + السلطة + الخضروات + الأشياء الطازجة اللي كلها فيتامينات و معادن ...
اختي بعد الولادة ب8 شهور ...نزلت من 84 الى 69 من سنة تقريباً و عندها 4 أطفال و لا زالت على نفس وزنها و كأنها صغرت 10 سنين ...لأنها مستمرة على نفس نظامها الطبيعي المريح جداً لكل ربة بيت و أم و حتى بنوته و طالبة
تجلس مع زوجها و اطفالها و
تاكل نصف أكلها القديم بالضبط و تزيد عليه سلطة
و تمشي كل يوم ساعة
ما عندها شغالة و عندهت 4 كتاكيت ...يعني لا أحد يقول راحت نادي و لا فاضية
حبايبي ...العاقل من اتعض بغيره ....لا تضيع أعماركم و انتم تبحثون عن رجيم جديد ... امشي على نظام واضح و متوفر عمله بكل بيت و امشي عليه فترة طويلة حتى لو سنة و نصف
انتي لك سنوات و انتي وزنك زايد تبينه يختفي بيوم و ليله !!!
اصبري و خلي كل يوم يمر عليك يوصلك لهدفك و يعدل صحتك ...كل يوم تاكلين فيه أكل صحي و تسوين فيه رياضة حتى تعرقين و يمر عليك ساعة مو ربع و ثلث ساعة !!!
هالليوم هذا مع الوقت بيصير أيام و شهور و راح تنحفين
فيه طريقة كنت اسويها بتليفوني الجوال عشان اتحمس ...اروح للتقويم و أحط موعد تنبية بعد اسبوعين
و أكتب عنوانه الوزن اللي ناويه عليه ...و غالباً أنا منطقية كيلو واحد يعني
طول هالأسبوعين مستحيل أشوف الميزان عشان اتحمس و ازيد رياضتي
و اذا مروا هالأسبوعين و رن المنبة أقوم اشوف وزني
اذا صرت نازله كيلو ... اهيص من الفرحة و أحط تنبه ثاني بعد 3 أسابيع و احط كيلو و نصف كهدف ..
و هكذا ...
من جد هالطريقة تجيب نتيجة معاي
لأني كل ما أفكر أخبص أقول و المنبة اللي بعد اسبوع ؟؟
اخاف أتفشل قدام نفسي و أرادتي ...
حبايبي الوزن بيدينك ...لو انتبهتي للكالوريز الداخلة و الطاقة المستهلكة بس شوي
الأكل اللي يدخل جسمك احرقيه بالرياضة ...عشان يصير فيه توازن بين مصادر الطاقة اللي تدخل و الكالوريز اللي تحرقينها و تطلع ...
حطي ببالك انك ناحفه ناحفه ... و أكدي هالقول بفعل ..يعني طبقي ...
أحياناً احس اسلوب بعض البنات فيه يأس و قلة حيلة و كأن الرشاقة شي خيالي !
ليش مستبعدين نزول الوزن و كأنه معجزة ما راح تجي الا بطلوع الروح ؟؟؟
؟
حبيبتي ...
ما تشوفين الرابح الأكبر كيف أوزانهم فوق ال200 أحياناً و بسنة يصيرون غزلان
!
استمري على رياضة يومية ...و ابشري بالرشاقة
نوعي برياضتك ...اذا عندك جهاز خلي يوم تتمرنين فيه ع الجهاز و يوم مشي عادي بالحوش
يوم قسمي رياضتك بين طلوع و نزول الدرج و بين هرولة و مشي و جهاز ...يعني ابدعي و كثري حركة رجولك
ماراح تنحفين و انتي جالسة تفكرين بالرجيم ...صدقيني ...
راح يمر الوقت بسرعة و ما يجي رمضان الجاي الا و انتي واصلة وزنك المثالي و قريرة العين
خلي هدفك لرمضان الجاي ....الوزن المثالي ....و بس و شدي حيلك عندك سنة
(-:
أدري كلامي كثير بس ...من جد حاسة فيكم و ابغاكم تذوقون طعم الرشاقة و الصحة
موفقات اخواتي الحلوات الرشيقات بأذن المولى
منقول