كيف اقول لأمي

1. شخباركم بنات


2. با ادخل بالموضوع على طول ........


3. الله لايوريكم وجهي صار كانه

السلام عليكم ورحمت الله وبركاته

شخباركم بنات

با ادخل بالموضوع على طول ........

الموضوع الله يسلمكم .. من شهر 7 اللي راح يعني بداية الصيفية تقريبا ... كنت توني مخلصة الثانوي .. المهم في يوم من الايام نادتني امي في غرفتها وقال اسمعي يابنت الحلال خالتك توها داقة علي وتقول نبي بنتك .. قصدها انا .. لولدها .. يعني ( خطبتني لولدها )>> فاهمين الزبدة

الله لايوريكم وجهي صار كانه

لأنه اول مرة احد يكلمني في موضوع خطوبة ..( علما بأني قد انخطبت بس ما احد قالي عرفت من مصادري الخاصة )
المهم امي قالت فكري بعدين ردي لي خبر .. وانا ما ابغى الولد لأسباب كثيرة منها اهله ناس معقدين شوي وانا ما اعرف شخصيته اخاف يكون مثلهم بعدين انا ما ابغى يكونون اهل زوجي هم نفسهم خوالي ..لا ابغى اتعرف على ناس غير.. لأني اجتماعية مرة وابغى وجيه وناس ثانية .. المهم دعست الايام وجاء ذلك اليوم الذي نادتني فيه امي مرة ثانية عشان تاخذ رأيي وانا جاوبتها بالرفض عصبت علي وقالت ليه انتي خبل احد يفوت مثل هالولد ( مخلص الجامعة ويدور وظيفة - بار بأمه وابوه - اخلاق ) قلت يمه انا ما ابيه .. قالت موب على كيفتس انا اخبر بمصلحتس فكري زين وبتعرفين انه ما يتفوت << اجل ماله دااعي يوم تاخذ رايي بتزوجني غصب
والمصيبة امي خبرت ابوي .. وابوي كأنه طايح عليه من السما ما صدق واستانس وردوا خبر لخالتي اني موافقة موقع المصيبة انه ماعنده وظيفة وموافقين عليه ويقولون بس خطوبة اذا توظف نسوي الزواج .. اهلي حسسوني كأنهم بايعيني كأنهم ماصدقوا على الله يجي رجال صاحي ويدبسوني فيه .. فكرت وقلت يابنت الحلال اصبري يمكن يتغيير رايتس .. الحين لي 6 شهور حاولت اتأقلم مع الوضع حاولت اغصب نفسي ما اتخيل اني بتزوجه ابدا ما تقبلت الفكرة .. على فكرة الى اللحين ما توظف ..
الزبدة ابغى احاول افاتح امي بالموضوع واقولها اني ما ابغاه وعجزت ابلعه وحاولت اغصب نفسي عليه بس والله عجزت ( على فكرة ما هو شين الرجال بس انا عجزت اتقبله ) .. كيف اقول لأمي اول شي خايفة من ردة فعلها ثانيا والاهم مرة مستحية كيف بأقولها ...؟؟؟
لي كم يوم ضايق صدري وما غير ابكي
الله يجزاكم خير ما عندي الا الله ثم انتم استشيركم انتم خواتي .. بليز ساعدوني لاتتركوني .............