كيف تكسبين رضاء زوجك طريقة مجربة ومضمونة

السلام عليكم ورحمة الله وبركاته
كيفكم يافراشاتي
اليوم حابة اكتب لكم عن موضوع يهم كل امرأة متزوجة
وهو كيف تكسبين رضاء زوجك؟
أكيد كل البنات المتزوجات يهمه انهم يكسبون رضاء ازواجهم
بس الكثير لا يعرف كيف
وتقول مهما أسوي زوجي مو مهتم فيني وإلا مو راضي علي
بس الحل عندي انا
أولاً:
ابي اتكلم لكم شوي عن حياتي
انا متزوجة من سنة ونص تقريبا
وكان اهم شيء عندي اننا نعيش انا وزوجي حياة سعيدة ونكون متفاهمين
بس لاحظت شيء في بداية الزواج ان المشاكل بيننا كثيرة والزعل كثير
وبعض الاحيان نجلس بالايام مانكلم بعض
يعني يجي في بالكم اننا مانحب بعض بالعكس
حبينا بعض بجنون من ايام الملكة
وزوجي ابد ماقصر معاي
وبديت اتحطم بس
استشرت والكل قالي
ان هالشيء طبيعي لان لسى مابدينا نفهم بعض ويبي لنا وقت
ولازم نحاول عشان نكون سعيدين بحياتنا
فبديت اشوف وش الاشياء الي ترضي زوجي
وحاولت وبحثت وسألت
فطلعت بمجموعة اشياء
اذا سوتها الزوجة رضى عليها زوجها
بس هذي الاشياء تعتمد على البنت نفسها
وتعتمد على حبها لزوجها
بس اقولكم الطريقة ذي مضمونة
وانا جربتها وزوجي الحين راضي عني مرة
وبالعكس احسه صار مرتاح وصار يهتم فيني أكثر
اكيد بيكون فيه ايام يكون فيه زعل وهذا شيء طبيعي
بس مو زي قبل وإننا نجلس بالايام مانتكلم وإلا راوح بيت أهلي
فحبيت أشارككم هالطريقة للي يحبون إنهم يجربونها مع أزوجهم
بسم الله الرحمن الرحيم
أولاً
كل الرجال يحبون يكونون في مكان القيادة ويحبون التحكم
ويحب إن زوجته تسمع كلامه
يعني إنها تستأذن منه اذا بتسوي شيء
والا اذا تبي شيء تسأله اول
وان تكون كلمته مسموعة والأولى في البيت
يحس انه هذا الشيء جزء من رجولته
بالعكس لاحظت ان المرأة اذا سوت هالشيء تقرب
زوجها لها أكثر لان الرجل بيحس انه هو المسئول
وهو القائد فيبدأ يهتم فيها أكثر وأكثر
ثانياً
الرجال يحتاجون وقت لأنفسهم
يعني المرأة بيكون عندها وقت اذا زوجها كان مداوم
بس الرجل ينشغل بالدوام واذا رجع ينشغل بالبيت
فيبدأ ينضغط ويسرح باله بعيد عن زوجته
وتبدأ المشاكل بين الازواج
فالأفضل ان الزوجة اذا زوجها قالها انه بيطلع مكان والا بيجتمع مع أصحابه
انها تخليه خصوصا اذا كانت طلعاته معقوله
يعني انه مايتركها ويهملها ودايم برى
فتخليه زوجته يروح عن نفسه ويخفف ضغوطه
ويرجع لها مستانس وباله معها
ثالثاً
الفلوس
الرجال يهتمون في الفلوس مره ومايحبون انه يسرفون فيها
وفيه سبب
لانهم تعبوا عليها
يعني يقمون الصباح ويتعبون عليها ويرجعون تعبانين من دواماتهم
ويجيهم جزاء تعبهم آخر الشهر
فيهمهم الراتب ويضايقهم إن تعبهم في الشهر يروح على كماليات واشياء مستهلكه وزايدة
بس اغلبهم ماراح يتكلم ويقول راتبي قليل والا اني مابي اصرف
لان يحس ان هذا نقص من رجولتهم وانهم هم الي عليهم انهم يتصرفون
بس هنا دور المرأة انها تقدر الهشيء وتحاول انها تخفف من الصرفيات
والاشياء الزايدة انها تتركها
رابعاً
الرجال يحبون ان زوجاتهم تهتم فيهم
لانهم يفكرون ان هذا جزء من الزواج
وانهم تزوجوا عشان يتركون حياة العزوبية
وتكون وحدة في حياتهم تهتم فيهم
يعني تسوي له فطور وهو رايح الدوام
يقوم الصباح يلقى ملابسه دوامه جاهزه ونظيفة
يلقى البيت نظيف وريحته حلوه
يعزم احد وتطبخ لهم زوجته ويعشيهم
كذا بيحس انه مفتخر فيها
ويحبها اكثر واكثر
خامساً
ان المرأة تهتم بنفسها
كل الرجال يحبون انهم يشوفون زوجاتهم في احلى طلة
يلبسون لهم احلى لبسه
ويغيرون في تسريحاتهم ومكياجهم
ودلعهم وحركاتهم
الزوجة تقدر تخلي قلب زوجها يخفق بقوة بالحب
بدون ماتقرب منه والا تقول كلمة
تقدر تسوي كذا
بسحرها
هذا كل ماعندي
اتمنى اني افدتكم
وان تكون حياتكم سعادة مع ازواجكم