لطالبات جامعة الملك فيصل بالأحساء فقط

مرحبا أختي (( طموحي أكبر همومي ))
انا طالبة في كلية التربية بجامعة الملك فيصل
راح أجاوبك باللي أعرفه واعذريني إن كان في إجابتي أي نقص
أولا :
انا أعرف 4 طالبات من دفعة 2007محولين من كلية العلوم إلى كلية التربية
لكن خلي مراجعاتك وتقديمك وكل شي من قسم الرجال
يعني خلي ولي أمرك يراجع لأن من هناك أضمن
طبعا لطلب التحويل يجب أن لايقل معدلك التراكمي عن 3
أما نسبة الثانوية فلا دخل لها
لكن وهذي المعلومة لازم تحطينها في بالك :
ال 4طالبات الي أعرفهم لما حولوا دخلوا لقسم اللغة العربية (( إجبارياً ))
ووحدة منهم قالت لي انها من لما جات تقدم قالوا لها انك بتدخلين قسم اللغة العربية وهي وافقت
والباقي لا ماكان عندهم خبر
ف طبعا لازم تفكرين فيها لأن الي دارسة علمي يصعب عليها دراسة اللغاة العربية "لأنها مادرست النحو في ثانوي مثل الي درسته طالبة أدبي "
وأعرف ثنتين بعد من كلية الطب وحولوا تربية
وحدة منهم بعد أُدخلت قسم اللغة العربية
ووحدة دخلت لغة إنجليزية بس علاقتي فيها سطحية ف ماأدري إذا دخلته بسهولة ولا بواسطة
ثانياً:
بالنسبة لسؤالك عن الساعات وعدد المواد
هذا يعتمد على كم ساعة تاخذين في كل فصل
وعلى كم المواد الي أخذتيها في كليتك السابقة وعادلوها لك(((لأن في مواد كثير ماتنحسب وهي الي مو مقررة للتربية))
طبعاً الأفضل انك تاخذين الحد الأقصى((18ساعة)) وياحبذا لو تاخذين صيفي
لكن على أكبر احتمال :
إن أقل مدة ممكنة هي 3سنوات ونص غير الفترة الي قضيتيها في كليتك السابقة
أخيراً:
أتمنى يكون كلام واضح
وقدرت أوصل لك الي أعرفه
وأتمنى يفيدك كلامي
وقبل كل شي أختي : صلي صلاة استخارة
قبل لاتقدمين أو تسوين أي شي صليها
وربي بيكتب لك الي فيه الخير
دعواتي لك بالتوفيق

مشكورة أختي " منطلقة ب طموحي " والله أنك بردتي قلبي بردك والله يريحك مثل ماريحتي بالي ....
والله أنا قلبي كان حاسني إني إذا حولت ماراح يحطوني بالإنجليزي بيقطوني باللغة العربية ...وأنا
عادي أحب النحو بس أكره الأدب بس حرام إني طالبة علمي وآخر شيء أدرس لغة عربية ....
إذا صديقاتك حولوا من كلية العلوم أجل أنا من كلية العلوم الزراعية يعني بيحطوني بالتخصص اللي
أبيه ....هذا شيء من المستحيلات ...
بس أختي عندي سؤال : صديقاتك لما جو يحولون هل سألوهم عن رغباتهم ؟؟؟؟ وشنهو التخصص
اللي كانو يبغونه ؟؟؟
وصح كلامك لازم أصلي صلاة إستخارة عشان أتوصل للقرار المناسب ....
وأختي أتمنى أنك تتواصلين معي إذا ما كان عندك مانع لإني سألت كثير بس مافي أحد عطاني إجابة
صريحة .... والله يجزيك ألف خير ....

حبيبتي انا في الخدمة في أي وقت
واعتبريني مثل أختك ، وماسويت الا الواجب
شوفي : وحدة ماسألوها أبد فجأة اكتشفت انها دخلت للعربي، ووحدة عطوها خبر من البداية ان إذا حولتي راح تدخلين عربي
بس أختي ياليت تتأكدين عن موعد التحويل
لأن صديقتي حولت بعد فصلين
يعني قبل بداية الفصل الثالث ب(( كمٍ )) أسبوع
فماراحت عليها الا سنة وحدة مو سنة ونص

مشكورة أختي ما قصرتي ...
إن شاء الله أنا راح أروح الجامعة خلال هذا الأسبوع وأشوف الوضع ....
بس أختي أنا سألت وحدة الله يجزيها ألف خير وقالت أنها تعرف بنات كانوا بكلية العلوم وتم تحويلهم
لكية التربية وتخصص إنجليزي بعد .... يعني الشغلة حظ ونصيب واللي الله كاتبه راح يصير ....
بس قالت يمكن فيه بنات حطوهم لغة عربية بس هي مش متأكدة من هالكلام وهذي البنت من دفعة
2006م .... وأنا ما أقصد إني أكذب كلامك بالعكس والله إنتي نبهتيني قبل ما أخطي أي خطوة وبعدين
أندم ..... لأنو الواحد لازم يحط له إحتمالات عشان ما ينصدم بالأخير وبعدين يطيح الفاس بالراس ...
والغرض من موضوعي إني أستشير أكبر عدد من البنات مروا بنفس حالتي قبل ما أتخذ أي قرار
فأتمنى أنك تتفهمين موقفي وما تاخذين في خاطرك علي ...
دعواتك لي بالتوفيق .... وإذا كان عندك أي معلومة تقدرين تفيديني فيها فأتمنى أنك ماتبخلين فيها
علي ....

طبعاً ياعمري الشغلة أكيد قسمة ونصيب
والي الله كاتبه هو الي بيصير
وانا ماقلت لك انه مستحيل تدخلين إنجليزي
بس بناءً عالبنات الي أعرفهم ((4)) كلهم دخلوا قسم لغة عربية
فحبيت أنصحك عشان تفكرين كويس
وصدقيني مازعلت ولا شي
وأسأل الله أن يكتب لك مافيه الخير

مشكورة أختي لأنك تفهمتيني والله إني كنت خايفة إنك تفهميني غلط ..... تصدقين عاد أنو نفسيتي
تعبانة من هذا الموضوع لأني إلى الآن محتارة وكلامي متذبذب مرة أقول خلاص بحول ومرة أقول
لا بقعد بكليتي أحسن لي ....
وأنا إذا رحت الجامعة إن شاء الله بأحاول أشوف الأوضاع في الكليتين .... والأهم كلية التربية عشان
ما أنصدم بعدين فأنا راح أسألهم وإذا حسيت أنهم صادقين في كلامهم وتجاوبوا معي وسألوني عن
رغباتي فذيك الساعة ممكن أحول بس بعد ما أعرف وضعي الأكاديمي بالكليتين .... والله يكتب اللي
فيه الخير ......
بس عندي سؤال للتأكيد : صديقاتك ما أختبروا إنجليزي ؟؟؟
أدري إني زهقتك بس والله إني محتاجه معلومات عشان يكون كل شيء عندي واضح ...وأختي
لاتفتكرين إني آخذ آرائك من ناحية سلبية بالعكس والله إني أعتبرها نصائح من أخت لأختها ....
والله يجزيك ألف خير ....... أختك في الله طموحي أكبر همومي ...

يسعد صباحك أختي
<<حسيت الموضوع قلب شات لنا خ شكل مافي من جامعة الملك فيصل الا انا وانتي
المهم :
صدقيني مقدرة حالتك لأني سبق ومريت بأزمات مقاربة لك
وهالشي هو الي مخليني متواصلة معاك بقوة
وأتمنى لك أن الله يكتب لك الخير والأفضل
بالنسبة لسؤالك :
وحدة من صديقاتي مااختبرت ، بس هي كانت تبي قسم رياض أطفال ونسبتها 96وشوي .. تأهلها للقسم .. وبما أنها حولت من بداية السنة فدرست أول فصل تربية عام .. وبعدها لما سجلنا احنا 2008التخصصات المطلوبة ، هي سجلت معانا على أساس انها أول سنة لها في التربية
طبعا بعد ماسألت الموظفة المسؤلة عناستمارات التخصصات وأكدت لها هالشي
لكن لما طلعت نتايج الأقسام وكانت مرتبة عالنسبة من96ورايح
هي ماطلع اسمها معاهم
الباقي ماأدري عنهم والله
بس الي محولين من الطب
ثنتينهم اختبروا إنجليزي
وطبعاً هم الطب دارسين إنجليزي كويس ويقولون حلوا زين
بس وحدة انقبلت ووحدة لا
طبعا مثل ماقلت لك هذي مجرد نماذج
وانا ماأعرف الكل
جايز يكون في بنات غيرهم دخلوا إنجليزي بس انا ماأعرفهم
تحيتي لك

أي والله شكله مافي إلا أنا وإنتي بجامعة الملك فيصل بس عدد المشاهدات كثير مع أن عنواني كان
واضح ....
تسلمين أختي ماقصرتي عطيتيني معلومات مهمة وإن شاء الله راح أستفيد منها .... والله يكتب اللي
فيه الخير ...
وأحب أشكرك لأنك وقفتي معي وحاولتي تساعديني وهذا دليل على أخلاقك العالية والله يجزيك
ألف خير ....
دعواتك لي بالتوفيق ........
أختك في الله ... طموحي أكبر همومي ...

مرحبا اختي
ههه لا انا بعد معاكم بالجامعه
اعتقد الاخت منطلقه بطموحي عطتك معلومات كثيير
للأسف ماعندي معلومات عن التحويل
لو عندي مابخلت عليك
بس ماحبيت ادخل الموضوع وما ارد عليك
وان شاء الله البنات الباقي يفيدونك
ربي يوفقك لكل خير