لكل متأخره في الزواج والحمل اقرأي قصص بنات عائلتي مهم جدا

1. مرحبا ياغاليات


2. للمتأخرات في الحمل


3. يعني يابنات التفكير يأثر في النفسيه وايد ...


4. اما للمتأخرات في الزواج

مرحبا ياغاليات

يابنات لا حظت بهالقسم مواضيع المتأخرات بالزواج زايده , كل وحده تشتكي من تأخر زوجها وتأخر سنها ورغبتها في الزواج ربي يرزقهن الزوج الصالح وايضا تأخر الحمل يعني كل وحده تعاني من مشكله مختلفه تعيق حملها وتعالو شوفو نفسيتها مسكينه بسبب هالمجتمع الي ما يرحم وتجي اختنا تنفس وتفضفض بالمنتدى عشان نساندها وندعي لها
كم يعتصر قلبي واتألم لما اقرى المواضيع الي تتكلم عن هالشيين بالذات لكن يابنات موضوعي هذا ربما يكون يد حنونه تمسح عليكم , موضوعي دعوه للتفائل من خلال نماذج بذكرها لكم وراج تشوفون حقا ان ما على الله سبحانه وتعالى شي غريب او بعيد وكل شي ممكن يصير بالدعاء واللجوء الى الله ,, واذا ربي قال للشي كن يكون ...

للمتأخرات في الحمل

عند اختي الكبيره صديقه متزوجه من سنوات طويله يعني الحين عمرها يمكن فوق الاربعين , هذي صديقه اختي كانت معاها بالجامعه ولما كانت معاها كانت متأخره بالحمل يمكن 5 سنوات , المهم توظفو الثنتين واستمرت علاقتهم ببعض واختي ماشاء الله الله من عليها بالذريه وكلما تسأل عن صديقتها تكون الاخرى ليلحين تنتظر الذريه ,, مسكينه عانت جدا جدا وهي ترغب انها تكون ام وعندها اطفال , تعرفون الدنيا تلاهي واختي لهت عن صديقتها وصديقتها كذلك ,ضاعت ارقامهم من بعض وقبل فتره اختي شافتها وفرحت جدا ,, عندها بنتين الحمدلله يارب بعد معاناه 18 سنه ويا الحمل الله رزقها ببنتين بينهم سنتين فقط سبحان الله , تقول صديقه اختي والله قبل ادعي الله يرزقتي الذريه والحين ادعي الله يهديهم مجننيني ومخبليني ...
قصه ثانيه , وحده من قريباتنا طولت ما حملت ياقلبي عليها صارت تتجنب الاجتماعات العائليه عشان محد يحرجها , صار لها 8 سنوات ومن كم شهر سمعنا خبر حملها اخيرا ربي يتمم لها على خير ويرزقها بالذريه الصالحه يارب سبحان الله ...
بنت خالتي العقم من زوجها , عانت جدا ’,, تبي تحمل تبي طفل تبي تسمع كلمه يمه واخيرا بعد معاناه 6 سنوات نحجت عمليه اطفال الانابيب والله رزقها ببنتها وبهجه حياتها الله يخليها لها يارب ويرزقها الذريه ...
اخت زوجي متأخره بالحمل 4 سنوات كان عندها اكياس فوق المبياض وحاله وسوالف ويبي لها عمليات عشان تزيل الاكياس وتحمل , حاولت تتناسى الموضوع الى ان تسمح ظروفها بالعمليه لانها كانت مرتبطه بدوام وما تقدر تاخذ اجازه , في هالوقت اهتمت بنفسها ونست موضوع الحمل وسوت ريجيم قاسي والنتيجه انها حملت وتفاجأت جدا لانها من سنوات تنتظر ومافي شي ماجربته ولما نست الحمل وما سعت له ربي رزقها اياه

يعني يابنات التفكير يأثر في النفسيه وايد ...

اما للمتأخرات في الزواج

قبل يومين راجعه من زفاف وحده من جماعتنا عمرها 32 سنه ومتزوجه واحد اكبر منها ولم يسبق له الزواج وسوت عرس ولا حصل والكل كان يقول هذي مستحيل تمشي بالاخص ان الي اصغر منها اخواتها كلهم اجمل منها وتزوجو وهي حظها في الجمال قليل لكن سبحان الله كل تأخيره وفيها خيره ..
بنت عمي عمرها فوق الاربعين فاتها القطار , تقدم لها واحد تاجر ومطلق في عمرها والسبب من زوجته الي خذت العيال وعايشه معاه احلى عيشه وصار لها فوق الثلاث سنوات , سعيده جدا ربي يتمم عليها ..
وحهد قريبه جدا من قلبي خواتها الي اصغر منها تيسروا وتزوجوا وبقت هي بروحها عمرها 31 يأست من الزواج لانها سنين وهي تنتظر ومو قاصرها ولا شي جمال وكمال وطول وبياض وسمعه واخلاق ودين وعائله وكل ما يتمناه الرجل لكن الحظ والنصيب , الحمدلله ياربي زواجها ان شاء الله بعد شهر , ربي رزقها برجل ولا في الاحلام كأنه مفصل تفصيل لها صج يرزق من يشاء بغير حساب , كانو الناس يحاولون يصيدون نظرات الغيره والالم في عينها بزواج اخواتها لكنها صبرت واحتسبت وربي عوضها
يابنات هذي النماذج ذكرتها لكم عشان تتفائلون وتعرفون ان ربي ماعليه شي بعيد او غريب ,, يعني تفائلوا بالخير تجدوه , اتركوا اليأس والحزن والهم وتفائلي وان شاء الله فال السعد بيكون جدامج ياربي ,, كل مافكرت اكثر في تأخر الحمل او الزواج انتي بهالاسلوب تتعبين روحج , اتركي الامر على الله وادعي ولاتنسين الدعاء , تفائلي وكوني سعيده ومتأكده ومتيقنه وربي بيرزقج فوق ما تتمنين ...
واخيرا يا حبيباتي خلونا ندعي لكل متأخره بالزواج ان ربي يرزقها بالزوج الصالح عاجل غير اجل ولكل متأخره بالحمل ان الله يرزقها بالذريه الصالحه السليمه والمعافاه ...
اذا تعرفون نماذج وقصص مشابهه ذكروها خلونا نبرد على قلوب خواتنا ونخليهم يتفائلون اكثر
منقول
لا تنسوني من الدعاء بالزوج الصالح الذي يجمع بين كل الصفات الي تمنيتها و بالرزق الكثير الحلال المبارك