لو انخطبتي لشخص كذا وش رايك ابي مشورتكم

السلام عليكم ورحمة الله وبركاته
قد يكون اسمي غريب بينكم الا انني معكم من بعيد منذ اكثر من 3 سنوات
وحان الوقت لافضفض لكم مابدا بخاطري بعد ان كنت ارى التفاعل الكبير
منكم مع من يستشيركم ..
مشكلتي اللي هامتني اني انخطبت !!اكيد بتستغربون
نبذه مبسطه عني والدي موظف باحد اكبر شركات البترول الا ان شهادته لم تتعدى المتوسطه
وامي ثانويه ودرست سنتين جامعه وتركت الدراسه وانا واعوذ بالله من انا البنت الكبيره والوحيده بين مجموعه اولاد وشهادتي جامعيه من واقعي اشوف المشاكل اللي احيان تصير بين اهلي لاختلاف الشهاده والتفكير
قبل فتره تقدم لي شخص وكان اصغر مني بسنه وشهادته ثانويه وظيفته حلوه بالاول ماكنت موافقه واقنعوني اهلي وماقولكم وافقت لا والله ماكنت موافقه بس كان ممكن اتقبل الموضوع شوي وانه في امل يكمل دامه وصل للثانوي الا انه اختلفنا اخر شيء وماتمت الخطبه .
والحين متقدم لي واحد اصغر مني بسبعه شهور شهادته متوسطه وظيفته استقبال بشركه خاصه وربي ماقدرت اعلق بكيت ع طول مابي اجلس ارفض كاني اتكبر ع خلق الله لكن بنفس الوقت مابي اصغر مني ولا ابي شهادته اقل مني مو غرور بس اخاف من اللي يصير المستقبل مهما قلنا لابد انه يقع في نفسه غيره كون شهادتي اعلى وهذا واقع مجتمعنا الشرقي وع هالسبب بتحصل مشاكل كثيره واذا قلنا انه متفاهم وهو من اول رضى ياخذني وانا اعلى منه يمكن تفكيره يكون بعيد عن تفكيري مانكر انه فيه اللي ماعندهم شهادات وتفكيرهم وثقافتهم اعلى من اللي عنده شهاده بس بعد وش يضمني هو من اي نوع وكيف ممكن اعرف
لو انه عنده ظروف امنعته يكمل دراسته كان قلت معليش بس ابوه ماعليه قصور يعني اكيد انه اهمال منه واذا هو اهمال منه واهله حاولوا يقنعونه يكمل ومارضى بيطيعني انا ماتوقع
اللي مقلقني انه اهلي يقولون مافيها شيء تقدرين تقنعينه يكمل وفيه ايه قريتها بمامعنا انهم ممكن فقراء وربي يغنيهم بعدين اذا كمل اكيد بيكون وظيفته احلى
مو عارفه احدد رائي وانا كل المواصفات مو عاجبتني ومابي ارفض وبعدين ربي يعاقبني ماسمعت كلام اهلي وماطبقت حديث الرسول صلى الله عليه وسلم( اذا جائكم من ترضون دينه وخلقه فزوجوه )
امنتكم الله تردون علي لو كنتوا مكاني وش تسوون واللي مرت بها الموقف او تزوجت بنفس الحال
تقولي كيف وضعها الحين :(
اختكم الحائره