ليش أمي سويت فيني كذا

السلام عليكم ورحمة الله وبركاته
كيفكم أخواتي وحبيباتي الفراشات!
ربي يسعد أيامكم ويجعلها مُشرقه بنوره
حاسه بضيقه مايعلم فيها غير رب العالمين ومالقيت غيركم خواتي أفضفض
لهم وأقولهم اللي بقلبي.
قصتي قلتها قبل هنا في المنتدى وهو اني بنت عمري 31 سنه ومتأخره عن الزواج
وللحين ربي ماكتب لي اني أستقر في بيت الزوجيه ولا يكون لي زوج وأولاد
لكن ولله الحمد ربي انزل السكينه على قلبي بعد فتره من الهم والتعب النفسي
ورضيت بقضاء رب العباد.
عرفت انه الوحيد اللي راح يفرج همي ويزيل مافيني من كرب ويبعد الجزع من قلبي هو
سبحانه اللي خلق نفسي واللي اعلم فيها .
عشت ايامي ولله الحمد بأحسن حال ورضيت بنصيبي وجعلت الدعاء والتذلل لرب الخلائق
هو سبيلي.
والحمد لله من فترة شهر تقريباً أتصلت على صاحبتي وكلمتني عن وحده من زميلاتنا أيام الدراسه
في الكليه وقالت لي انه في واحد يدور على بنت يبغى يتزوج ويدور على عروس وهي تذكرتني
ودلتهم علي .
صحيح هو رجل متزوج وكان هذا سبب ضيقه لي لأني ماأحب أخرب بيت احد وأبني سعادتي
على تعاست غيري لكن أكدت لي صديقتي ان زوجته هي اللي طلبت منه الزواج
بسبب ظروفها الصحيه والرجل لسه صغير عمره 34 سنه.
ماأنكر اني فرحت وقلت لنفسي الحمد لله ربي استجاب لي دُعائي وعوض صبري خير
طلبت مني رقم البيت علشان الرجال يبغى يكلم الوالد ويتفق معه على موعد الزياره
على شان الرجال يتعرف على والدي وبنفس الوقت والدي يتعرف عليه انا اعطيتها رقم البيت
ورقم جوال الوالد لكن قلت لها انه مايتصل حتى اخبر امي بالموضوع وهي تخبر الوالد
يعني تمهد طريق وكان هذا الاتفاق بيني وبين البنت.
رحت لوالدتي علشان ابشرها وانا كنت حاسه انها بتفرح لي مثلها مثل اي أم تفرح لخطبة بنتها.
جلست معها وكلمتها ولاحظة انها مو فرحانه بالخبر لكن حاولت اني ماأدقق وقلت يمكن انا أتوهم
قلت لها كل اللي حصل واني ابغاها تجلس مع الوالد وتقوله عن الموضوع لأني انا مستحيل
اقول لأبوي انه تقدم لي ناس وربي فشيله ( أستحي منه )
بدأت أمي تتحجج وتقول بعدين انتظري شوي
انا سكت وقلت لها على راحتك. مر أسبوعين وأتصلت علي البنت وقالت لي ايش صار على الموضوع
الرجال يبغى يكلم الوالد وقال أنكم تأخرتوا بالرد .
بصراحه تفشلت وماعرفت ايش اقول لان الموضوع بصراحه مايبغى كل هذ الوقت لأانه كل اللي يبغاه
الرجال انه يكلم أبوي ويتعرف عليه ومايحتاج كل هذا الوقت.
طلبت منها مهله يومين ورحت لوالدتي وكلمتها وقلت لها ان الرجال يبغى رد.
وردت علي أمي الرد اللي كان من المستحيل يخطر على بالي.
قالت انتي ليش مستعجله على الزواج وانه في بنات كثير ماتزوجوا وهذي مو اخر الدنيا.
قلت لها أنا عارفه هذا الشي بس انا متقدم لي واحد ومن حقه انكم تعطوه فرصه وتتعرفوا عليه
قبل الرفض وأنه من حقي انكم تهتموا فيني وتحسوا لو شوي فيني.
سألتها انتي كلمتي أبوي وهو رفض ؟
قالت لي انها ماكلمته لأنها خايفه يخانقها ويسوي لها مشكله وعلشان كذا قررت انها ماتكلمه
وطلبت مني اقول للبت تخلي الرجال يدور بنت غيري.
انا حسيت نفسي دخت والارض دارت فيني من الصدمه
معقول هذي أمي اقرب الناس لي علشان خوفها من ابوي تضحي بمستقبل بنتها ؟
والمشكله ابوي في موضوع الزواج دايم يكون متفهم وباله طويل يعني مافي مبرر للخوف.
قلت لها حرام عليك يمه تكسري خاطر بنتك وتقتلي فرحتها قبل ماتبداء ليش تسوي فيني كذا ؟
وبكل برود أعصاب ردت علي ماراح اكلم ابوك مو ناقصني مشاكل من ورا راسك ربي يرزقه
بزوجه افضل منك.
قلبي انكسر منها وقلت لنفسي ليش ماأكون انا ؟؟
ليش يستكثروا علي الفرحه ؟؟ مايكفيني اللي جاني منهم ومع ذلك مستمرين بتعذيبي؟
سألتها يعني ايش اقول للبنت ؟
ردت علي قولي لها مالكم نصيب عندنا .
نزلت دموعي مو من خسارتي للفرصه اللي جتني علشان ابداء الحياة اللي طول عمري
انتظرها بأني اكون زوجه وأم.
نزلت لأني أكتشفت أني أخر أهتمامات أمي اللي كنت اقول مهما صار فيني فعندي أم توقف معي
وتسند ظهري في هذا الزمن
لكن لقيتها ضدي وأن بنتها أخر شي ممكن تفكر فيه
وأنه لو جار علي الزمن ماراح توقف معي
أسفه لأني طولت عليكم وأفكاري مو متناسقه لكن وربي احس الدنيا ضيقه بعيوني ومخنوقه حيل
مصدومه من اقرب الناس لي (( أمي ))
ليش سوت فيني كذا ؟؟