مذكرات سمينة

انراجع الدرس اول...ااقصد انراجع القصص السابقة:
1 ****** ر جلي (بفتح الراء يحب الزين )
2 ***** زوجي..ولاحتى يحلم بيها
3 ***** زوجي طفل وافشيلتاه
4 **** جارتي مشكلتها انها ( حلوة )
5 **** الناس تصفق لي وزوجي صفقني!!
6 ****** زوجي وتلميحاته الجنسية
:::::::::::::::::::::::::::::::::
القصة السابعه
احب الاكل حب جنوني..بيني وبينه صداقة قوية...الله لايفرق بيننا!
قسم ان الي ماتحب الاكل مو عايشة دنيا!
اصلا حتى باحلامي اشوف صواني جاية وصواني رايحه!
انا عشان خاطر عيونه ... اتقنت الطبخ...(صارت اقامتي بالمطبخ اكثر من اي مكان اخر بالبيت)
دايما اقول بنفسي لو كان الاكل...رجلا ...لعشقته
بس الغريب ...ان عندي رجّال...مايحبه!!
مو يعني مايحبه ...مايحبه...لكن مايكثّر!!! >>>مو عايش دنيا
يعني ياكل ربع الصينية ...والباقي لي >>ماخلا لي شي!!
ولو رحنا مطعم يطلب واحد همبرغر. ..وانا 3 مع وجبة اطفال
>>تدور الهدية!!
ومرة رحنا مطعم اكلات بحرية...طلب مشوي..وقال اطلب لك معي؟
قلت : لا شو مشوي.!!..ابي مقلي وكثر الزيت..اقصد وكثر السلطة!!
ومرة وانا في مطعم رحت دورة المياة -وانتوا بكرامة- وناوية لارجعت اكمل صحوني...
ولما رجعت لقيت السفرة نظيفة مافيها لو ربع صحن...!!
قلت : وين السفرة!!..
قال زوجي : قلت للنادل يشيلها..
زعلت ...وخليتهم يسوون نسخ لنفس الطلب ...ولصق في نفس السفرة..وسويت لها ارسال الى معدتي >>>صار جهاز حاسب مو مطعم
صحيح اني استحي آكل قدام زوجي....تعرفون حركات الدلع...لكن احيانا ماقدر اقاوم سطوة الاكل..اطب على الصحن اتقولون داخله سباق !!
وفيه مثل عند السلف يقول: لاجاعت ام العيال ابشروا بالعشا >>>وانا دايم جوعانه
اذا زعلت اجوع..واذا فرحت اجوع ...واذا مشيت اجوع ..واذا تكلمت اجوع ...وحتى اذا جعت اجوع
واذا دخلت المطبخ تعالوا شوفوا الفن ...اقول للجميع : وخروا..!!.روائح شهيه..واكلات طيبة ....وافرش سفرة ماتشوفون اخرها...لكن مشكلتي اني مااقاوم شكل السفرة بعد كذا ...( ولا ماتحويه من كنوز ).
مرة لاحظت ان وزني زايد حبتين ..ووقفت عالميزان ولقيت 5 كيلو جديدة علي!!
رحت لزوجي وانا ابكي
قال : خير!!
قلت وزني زايد 2 كيلو> >>ال3 اخفيت امرها
قال:عادي متوقع!!
قلت : لا لا مو معقولة اكيد في خطا..يمكن -لاسمح الله -فرط بالهرمونات ولا شي لازم اروح الدكتور!!
وزوجي مندهش قدام هالفلم المصري !!
يقول : احمدي ربك والله الي فيك من زود الصحة والاكل بدون داعي!!
قلت : قول ماشاء الله..
قال : ونعم بالله لكن الوضع الي انتي فيه ماهو موضع حسد الا شفقة!!..انتبهي لنفسك كم مرة نصحتك تخففي اكلك وتحافظي على جسمك؟!
قلت : وانا ايش سويت...انت شايف بنفسك انا اطبخ لك ..ومااكل...المشكله انك انت الي تاكل وانا الي اسمن!!... >>مازال الفلم المصري يدور
قال بتعجب : والله!!.........صدق!!.........انا الي آكل وانتي الي تسمنين!!...........طيب جربي يامظلومة تخيطين فمك ..واتشوفين النتيجة
>>ليه قطعة قماش!!
وتركني......وراح.........
وانا جلست افكر بال2 كيلو الزيادة >>صدقت الكذبة
ليه ..وكيف ..ومن وين جات؟!!
ياترى من مقلي الاحد ..ولا من كبسة الثنين ..ولا من صيادية الثلوث....الخ
ولا من صحون الحلى الي لازم تتبع كل وجبة غداء وعشاء؟
وحطيت حري في الميزان وقلت له : ((انا عمري ماحطيت ثقلي عليك الا جبت لي البلا....اكيد تكرهني ))
على طاري الكره....انا فييه حاجة ثانية اكرهها بحياتي غير الميزان
الريجيم
اسمع البنات يقولون ريجيم ..ريجيم >>ابوك يالمياعه
انا احرم نفسي من الاكل ..واسوي ريجيم!!
انا اتخلى عن الصداقة الحميمة الي تجمعنا !!
انا اترك الحلى..............طيب الحلا للحلوين وانا حلوة >>>بس سمينة
اتصدقون لو كان الريجيم رجلا لقتلته >>مسختها عارفه
لا لا فكرة الريجيم فكرة فاشلة جدا ..ولاافكر فيها ...اكيد في وسيلة ثانيه عشان اطير ال5 كيلو بس بابحث واشوف...
وقريت بالكتب مثل يقول: كل كثيرا ..وامشي اكثر
واجتهدت ..وسويت رياضة ...لكن برضه زاد وزني 5 كيلو ثانية نهاية الشهر...!!
واكتشفت اني عكست الحكمة ( امشي كثيرا ..وكل اكثر)
يعني كنت كل بعد حصة رياضة ...اطب عالاكل ..على بالي خلاص الرياضة احرقت الاكل اللي قبله ...
قال لي زوجي : ها كم وزنك هالشهر..شكل الحمولة زايدة؟
قلت : نفسه مازاد !!
قال : ماظنيت
قلت باحباط : انا سويت رياضة طول الشهر مانفع وانت شفت بنفسك
قال باستهزاء : ايه شفتك وانتي تمشين عالسير وصحن الكنافة بيدك......وشفتك يوم خلصتي رياضة تربعتي على صحن كبسة وبعدها رقدتي!!
>>يالهوي يراقبني
يابنت الناس افهمي وخلي عزيمتك قوية..لو مو عشاني عشان صحتك..السمنة تضرك..
قلت له : كل الرجال يحبون السمينة!!
قال : مين قال...الرجال يحب السمنة باماكن معينة >>>عيب لكن يكره السمنة المنتشرة بكل مكان..انتي جسمك صاير كله نتوءات !! >>ويش نتوءات هذي!!
قلت : شفت اتقول يحب السمنة بمواضع؟؟!!..يعني صح كلامي ..المهم اتحبون السمينة وبس!!
قال : طيب متفقين ...بس مو زي سمنتك...انتي تعديتي الحدود الحمراء..صار شكلك مثل الاسطوانة!!
قلت بعصبية: نتوءات...اسطوانة ..ويش هالعبارات الجارحه !!
قال بصراخ : لان الوضع صار ماينسكت عليه وبتفهمين وتلحقين نفسك احسن لك..ولا ترى ..!!
قلت :...ولا ترى ايش؟!!
ماقال شي بس قام وفتح دولابي ورمى علي واحد من هدومي فاول زواجي وراح !!
ليه؟
حركة غريبة صح؟
>>>استخف الرجال
رحت لامي وخواتي اشكيلهم قسوة زوجي...
وقلت لاختي : زوجي قال لي كلام جارح اليوم...شكلي مثل الاسطوانة وكلي نتوءات ؟...الا على فكرة ويش هي النتوءات هذي ؟!!
قالت اختي بسخرية: يعني مو مسطحه؟
قلت : ليه كرة ارضيه انا؟
قالت : يعني ان جسمك رايح فيها
قلت : ياشينك !!
قالت : ويش اسويلك مو راضيه تفهمين!!
قلت:لاتكوني انتي والزمان علي كفاية زوجي!
قالت: والله انتي عدوة نفسك الوحيدة!!
قلت : لاتقولين موالك المعتاد سوي ريجيم ترى طفشتيني!
قالت : وماعندي غير هالكلام.
قلت : وقالي بعد انحفي ولا ترى..؟؟...بعدين قام ورمى واحد من هدوم عرسي علي وراح؟..تهقين ويش يقصد... ؟!
قالت : قسم ان كثر الاكل سطح عقلك مو بس بطنك ماعاد تفقهين!!
قلت : اقول عن العيارة...!
قالت : يقصد ارجعي لوزنك زي اول ماخذتك ولاتزوجت عليك.
قلت : باطل ...مايقدر......
الا ...... بسالك........... بالله جسمي مازان بعد ال 10 كيلو؟؟
قالت بصوت عالي : ياجعله يارب يصكك ب 3 مو واحدة !!
صرخت بوجهها وقلت اهب يافالك!!..
واشتكيت عليها امي.
جات امي الحنون وقالت ايش الحكاية؟
قلت : بنتك الحقود تدعي علي !!
قالت امي : وجع يانورا ليه تدعين على اختك!؟
قالت اختي : والله ياامي ماتفهم بنتك مرارتها مفقوعه كل يوم زوجها يهددها انحفي ولا اتزوج عليك ولاهمها متحضنة صحونها وتاكل ...هذا همها بالحياة!!
نظرت امي الي نظرات عتب ..خلتني بنص هدومي!!
عاد انا انهرت بالبكاء وقلت لها مااقدر يامي احرم نفسي احس بعد كل حرمان ارجع للاكل بشراهه اكثر
قالت امي : اشغلي نفسك باشياء غيره..لاتخليه اكبر همك..ومن هالنصايح الاموية..
ورجعت لبيتي وعندي شوية عزيمة (اعرف انها ستتلاشى امام طبق شهي من صنع يدي!!)
اي والله حتى السمنة من صنع يدي >>اعتراف
وقررت ( وياما قررت!! ) اني اقاطع المطبخ...وانهي صداقتي بالاكل واني مانهزم قدام اي صحن يفرفر قدامي...واسوي ريجيم قاتل >>حرب
ومازال الوضع قائم.................
شهر افوز انا...وشهر يفوز الاكل..
شهر ينتصر الريجيم ..وشهر ينقلب على عقبيه
وشهر فرحان زوجي مني ..وشهر يجهز لعرسه
ومازال هو الي ياكل ..وانا الي اسمن <<رجعنا للكذب
end
:::::::::::::::::::::::::::::::::::
الله ينحف كل سمينة بصحه وعافية
يارب
هذي اقرب قصة كتبتها ..لقلبي..وتعاطفت مع بطلتها >>لا لاتفهموني غلط مو عشان سمينه ..عشان احب الاكل ههه .