مشكله مستقبليه

مساء الخيرات هلا ومرحبا
جايه اشكي لكم الحال
مدري احد مثلي والا انا بلحالي بها الوضع
انا مقبله على عرس والله يتمم لي على خير دعواتكم لي يااحسن صقيقات
المشكله ومافيها اني ودي اصير سنعه زي هالورده
لا من جد انا عايشه مدلله ببيت اهلي وعندنا شغاله ومااقولها بفخر لا والله
ليتني من اللي امهاتهم كارفينهم ومااقول اني صغيره لا عجيز وموظفه بعد
همي اجي من المدرسه انام اقوم واقعد على النت لليل وبعدها اتعشى وانام
وعلى قوله امي كني في النفاس على هالسرير كل النهار اخاف على نفسي تجيني جلطه
والله من غير مبالغه حتى المنديل عندي امر مااشيله
والله ضايق صدري من نفسي من جد
حتى ام زوجي شكلها سنعه حتى انها كبيره بالعمر وماعندها شغاله
وربي غرفتي محد يدخلها كلها حوسه
اختي قبل لاتتزوج وهي تنظفها والحين تجي عجه وتروح وتجي عجه ثانيه عادي الوضع عندي
مابي اصير طمله ابي اصير دهره وكل النهار اشتغل اصير زي الحريم
حتى الطبخ مااعرف انا قد طبخت لهم كبسه ووثقتها بصور عشان محد يسبني ويقول ماتعرف تطبخ
بس احس اني العب على نفسي
المشكله مدري وش بسوي بعد مااعرس وطبعا بسكن بدور يعني مو شقه
والله كان ودي بشقه عشان ماانظف كثير
وبعد زواجي بصير موظفه بالنهار وبعد الظهر برجع مدري وش ابدي ووش اسوي
تكفون نصايحكم يعني اللي مثلي موظفه وبتعرس وش اسوي
وشلون اقسم وقتي
اهم شي الخميس والجمعه ودي اصير اروح عند اهلي <<<هذا اللي فالحه فيه
علموني يعني التمسيح وكذا كل متى تسوونه الغسيل متى اغسله
انا احس اني اقدر اتكشخ واجلس اقابله كل الوقت بس تنظيف مره صعبه
وش الدبره وشكرا<<امي تقول لي اخاف يرجعس رجلس علي اخاف تصير صدق ودي اتلاحق عمري