موضوع لطشته من بنت خالتي اعجبني مره

1. أبلى خلود : لاتفرحين يا امل قاعدتن على قلبتس


2. البنات <<==يضحكون على رائدة


3. أبلى خلود : طيب ومن غير رائدة يعرفنا على طريقة حياتها بيتهم


4. ومن غير آمنه يكلمنا بعد


5. طيب لو تركنا البيت وجينا للمدرسة .. بالفصل مافيه نظام معين للنظافه؟

بسم الله الرحمن الرحيم
أمل : يالله أسماء بسرعه وش تبين عصير مابقى شيء وتخلص الفسحه عاد عندنا أبلى خلود والله ماتخلينا ناخذ ولا دقيقه من حصتها ذبحتنا بالرياضيات
أسماء : جيبي اللي تبين بس لاتجيبين عصير تفاح .. وبعدين وش فيها أبلى خلود والله انها أحسن أبلى انتم مادري ليه ماتحبونها
أمل : اقول اروح اجيب عصير ابرك من تعبيرتس اللي بيبدأ عن أبلى خلوود
ترن ترن
البنات <<== اوه والله مالنا خلق الرياضيات يارب انها تعتذر وتطلع اوف مانبي مانبي ليه يحطون لنا الرياضيات بعد الفسحه على طول اوف بس
المديرة : يالله بنات الله يصلحكن كل وحده على فصله من متاه مصفر الجرس الله يصلحكن بس
؛؛ يامعلمات الله يهديكن وراه ماتروحن حصصكن البنات بالاسياب منزمان مصفر الجرس
أبلى خلود : هلا والله بمديرتنا والله انتي خابرتن احب الرياضيات مثل ماتحب ابلى نوره تونة ريوماري .. بس البنات ماودي يكرهون الماده بالحيل وخاصة اني جديدة عليهن
أبلى نورة : وش سالفتس انتي ياخلودوة اشوفتس باديتن تمونين علينا من عقب الاجازة وانتي ماشاء الله طايلن لسانتس علينا
المديرة : اخلص من البنات يجوني المعلمات الله يصلحكن يالله لاتتأخرن بس على الدروس ..
أبلى خلود : والله اللي يطيعكن يا معلمات العربي والدين يدج ويدجج طالباته معه يالله بروح اشرح درسي وراي منهج طول نهر النيل
تك تك تك تك تك تك تك تك تك تك <<==كعب ابلى خلود رايحتن للفصل
طق طق طق السلام عليكم
واعليكم السالام ورحمة الله وبركاته
شرفتينا ونورتينا يا أبلى خلود
أبلى خلود : خير خير أظن اني داخله على اول ثانوي مو اول ابتدائي وش مفطرات تو
أمل : شاربين عصير تروبيكانا فرحانين فيه اول مره يبيعونه عندنا بالمدرسه
أسماء : لا والله أبلى فطورنا عادي بس البنات قالوا ان ابلى خلود نحس انها قريبه مننا عادي كانها بعمرنا
أبلى خلود : طيب طيب يالله اليوم انا ماراح اشرح لكم درس لأني باخذكم بكرى ان شاء الله حصتين ورا بعض اشح لكم درس كامل لان درس اليوم مايحتمل اني اقسمه بحصتين .
أمل : الله وناسه ابلى يعني بتروحين وحنا بنعلب

أبلى خلود : لاتفرحين يا امل قاعدتن على قلبتس

بس بغيت اسولف معكم شوي عن البيت وكيف شغلكم وكيف تقسمونه وهل تشتغلون ولا لأ؟
رائده : شوفي يا أبلى انا أمي ماتخليني اشتغل ابدا ابدا .. احاول اساعدها تقولي انتي صغيره روحي هناك بس .. ومره زعلت علي وعيت تغسل ملابسي قالت انا دلعتك مره انتي سوي شغلك بنفسك .. وانا زعلت ولاغسلت ملابسي وتركت الملابس تتكو عندي اسابيع وشهور الين خلصوا ملابسي في الخزانه .. ولما خلصوا قعدت اغسل واغسل واغسل واغسل واغسل الين تعبت من الغسيل ..
ولما خلصت غسيل ونشفوا قعدت اكوي واكوي واكوي واكوي واكوي الين تعبت من الكوي
وعقبها تأدبت وتعلمت اني اغسل كل فترة بسطيه حتى ماتعب
أبلى خلود : ههه امك عرفت كيف تعلمك بغلطك انتي ماقعدت تعاندك لأن البنات بعمرك بالعناد يزيد عنادهم ...!!

البنات <<==يضحكون على رائدة

أبلى خلود : طيب ومن غير رائدة يعرفنا على طريقة حياتها بيتهم

آمنه : شوفي والله يا أبلى انا بالبيت دايم هواش انا وخواتي على الشغل كل وحدتن تحلت الشغل على الثانيه كل يوم نحط جدول نرتب فيه الشغل واللي تزهق منه تشققه وتحط غيره الين امي حامت تسدبها مننا وجابت شغاله تقول صدق انت بنت جيبي ابرك من بنت بطني .. عاد انا انواع اشكال الدلع تقولين بدوي طاح بمريسه خليت الشغاله تسوي لي كل شيء حتى المويه تجيبه لغرفتي
أبلى خلود : ههه غلط يا آمنه مو كذا الشغل الشغاله تتعب كذا ويمكن تسوي لكم شيء على الأقل الشغل الخاص فيك لاتسويه هي ..

ومن غير آمنه يكلمنا بعد

منيرة : أبلى انا والله يد أمي بالبيت مايساعدها الا أنا البيت كله عيال يعني تتعب لو قامت عليه لحالها والشغاله مانبيها بالبيت لأننا مانبي نقلق ونوسوس من ناحيه نخليها ونوديها لو بغينا نطلع .. لكن انا عندي مشكله اعاني منها وقت المذاكره .. انا عندي وقت اذاكر .. بس مشكلتي اقول ابي ارتاح وليه اضغط نفسي شغل ودراسه ومدرسه الوقت اللي افضى فيه ابي ارتاح واشوف التلفزيون واتونس والمذاكره وقت الاختبارات .. واذا جت الاختبارات اتعب حيل وانا ادرس
أبلى خلود : انتي ذكرتيني بماضي دراستي يامنيرة الله يعينتس يارب وتراتس ماجورة وانتي تساعدين امتس وبتلقينه قدام مع عيالتس ان شاء الله

طيب لو تركنا البيت وجينا للمدرسة .. بالفصل مافيه نظام معين للنظافه؟

يعني ماترتبون المكان بحيث انه يظهر للي يدخل فيه انه فصل طالبات ثانويه مطورة ..
يعني ماراح اقول ان كل يوم الفصل على بنت تنظفه ... صعب على البنت تشيل مهملات غيرها .. لكن نقول ان كل بنت تهتم بنظافة مكانها الخاص فيها ... ونفس الشيء اول ماتخلصين من الدرس قبل تطلع المعلمه من الفصل خططي بقلم رصاص على الكتاب تخطيط سريع الاشياء الهامه اللي خذتوها .. وسجلي الإضافات اللي قالتها لكم المعلمة عند كل نقطه .. !!
ماراح تتعبون كذا .. لو رتبتوا انفسكم هنا بالمدرسه ترتيب صح .. ماراح تتعبون بالبيت ابدا ً ... حنا مشكلتنا يابنات ان ماعندنا نظام نمشي عليه .. اللي مضيعنا كثير العشوائيه اللي عايشين فيها ..
الثانوية الآن تعتبر تمهيد للجامعه والكليه بكرى ان شاء الله .. لو عرفتي كيف تنتظمين بالثانوي ماراح تعانين من التنظيم بالمستقبل ان شاء الله ..
لكن لو عودتي نفسك من الطفولة انك عشوائية راح تستمرين عشوائية .. ولاتنسون المثل اللي يقول من شبّ على شيء شاب عليه ...!!
لو ناظرنا قدام وقابلنا بنات الجامعه والكليات وسألناهم وش أكثر شيء تعانون منه بالدراسة .. بيقولون لكم ماتأسسنا صح بالإنقلش .. ناقصنا كثير معلومات انقلش ... يعني لازم نتعلم من اخطاء اللي اكبر مننا ..!!
انا كنت اول شخص ببيتنا درس كلية وطحت بحفر وقمت بمشوار دراستي الين ماتخرجت الحمدلله لأني ماعندي انسان قبلي جرب هالعالم واستفدت من خبرته واتعضت من غلطاته ..
لكن لو تشوفون خواتي اللي بعدي كثير استفادوا من مشواري والحمدلله التوفيق حليفهم باذن الله ..!!
خلاصة كلامي قبل ينتهي الدرس يابنات ..!!
1- التنظيم هو اساس العمل .. لو عرفنا ننظم سهل علينا العمل جدا ً ..
2- نستغل كل معلومة تمر عليا ونحاول نرسخها صح ونحاول تطبيق اللي نستطيع تطبيقة حتى يثبت ولا ننساه ..
3- نحسن النية لكل شيء .. خصوصا الدراسة ونضع قدامنا حديث الرسول صلى الله عليه وسلم (( من سلك طريقا يلتمس فيه علما ً سهل الله له به طريقا الى الجنه ))
ترن ترن ترن
والحمدلله والصلاة والسلام على رسول الله واتمنى اي ماثقلت عليكم بالكلام ..!!
الطالبات <<== شكرا يا أبلى وناسه لاعمرتس تشرحين لنا كذا اونس سواليف
&~&~&~&~&~&~&~&~&~&~&~&~&~&~&~&~&~&~&~&~&~&
هل فيه شيء من حياة الثانوية أثر علينا بالجامعة ؟؟
هل يوجد معلمة أو استاد له بصمة لا ينسى أثرها في حياتك الحالية؟؟
هل عالم أبلى خلود وطالباتها اعادنا لواقع نتمنى عودته لنصحح مارتكبناه من اهمال وأغلاط ؟؟
هل كلكم يعاني من العشوائية وكره الدراسة والجامعه ؟؟ أم انه ثمت مواقف أصبحت درسا ً لامعا ً لتفيقنا من أخطائنا الى صوابنا ..؟؟
أتمنى اني ما أطلت عليكم وأرجو أني ابلغت لكم الهدف ...!!